Imong Kaugmaon Kinsay Makatagna Niana?
ANG pagsulay sa pagpanagna sa umaabot masayon. Ang pagkahimong tukma dili. Mahimo kining buhat nga walay kapuslanan kon ang mga panagna mosumbalik, sumala sa yanong makita sa mosunod nga mga pananglitan.
Sukad sa karaang panahon, naningkamot ang tawo sa pagtuki kon unsay anaa sa umaabot. Bisan karon, ang kadaghanan kanato nagatinguha sa pagsid-ing sa umaabot. Kining pagpangagpas ug kahibalo bahin sa umaabot nga mga hitabo nakaagak sa tawo sa pagsulay ug nagkalainlaing mga paagi. Pananglitan, ang tawhanong lawas ginasusi alang sa mga timaan sa mga kinaiyahan sa nawong, sa tabas sa bagolbagol, ug sa mga linya sa palad. Nakatuon ang tawo sa mga hayop—sa lihok sa mga ilaga o bitin, sa pagpanaw sa mga langgam, bisan sa paagi sa pagtuka sa manok sa mga lugas sa trigo nga gibutang sa yuta. Gigamit sa uban ang mga butang sama sa bolang kristal, mga baraha, dice, ginaling nga mga dahon sa tsa, o kape. Nagkadaiya ang mga teknik sama sa pagkadaiya sa tawo, kustombre, ug mga yugto sa panahon, apan ang mga resulta parehas ra gihapon: kapakyasan.
Apan, adunay Usa nga tukmang makatagna sa umaabot. Kinsa? Si Jehova nga Diyos. Tagsaon si Jehova tungod kay siya “ang Usa nga nagpasundayag sa sinugdan ngadto sa kataposan.” Bisan pag naglakat pa ang mga hitabo, ang Diyos makatagna kon unsa ang kataposan. Oo, makabutyag si Jehova sa umaabot atubangan sa mga mata sa tawo dili lang abante ug pipila ka adlaw kondili abante pag mga kasiglohan!—Isaias 46:10.
Busa, ang pagpangagpas ug kasayoran sa umaabot dili kinahanglang matapos nga walay kapuslanan. Ang Pulong sa Diyos, ang Bibliya, naglatid sa labing importanteng bahin alang kanato. Nan unsa man gayoy gipakita niini kon unsay umaabot sa katawhan?
[Mga hulagway sa panid 3]
“Imposibleng molupad ang mga makinang mas bug-at pa kay sa hangin.”—Lord Kelvin, taga Britanyang matematiko, pisiko, ug Presidente sa Harianong Katilingban sa Britanya, c. 1895.a
[Mga footnote]
a Gikuha kining mga kinutlo gikan sa librong The Experts Speak, ni Christopher Cerf ug Victor Navasky.
“Kon magsugod kita sa pagsulay ug sa pagsabot sa kinabuhi sa kahimtang unya niini sa 1960, kinahanglang magsugod kita sa pagkaamgo nga ang pagkaon, sapot ug puloy-anan sama ra unya ka barato sa hangin.”—John Langdon-Davies, taga Britanyang magsusulat ug Fellow of the Royal Anthropological Institute, 1936.
“Mao kini ang labing dakong binuang nga atong nahimo sukad. . . . Ang bomba dili gayod mobuto, ug ako nagsulti ingong eksperto sa mga bomba.”—Admiral William Leahy, nagtambag sa Presidente sa U.S. si Harry Truman bahin sa proyektong bomba atomika sa U.S., 1945.
[Tinubdan]
U.S. National Archives