Nakaplagan ba Nimo ang Yawi?
NGANONG ang gugma hinungdanon kaayo alang sa mga Kristohanon? Tungod sa matang sa Diyos nga ilang ginasimba. Si apostol Juan nagbatbat kaniya niining mga pulonga: “Ang Diyos gugma.” (1 Juan 4:8) Maingong molaom ang daghang ginikanan nga mosunod ang ilang mga anak sa ilang mga lakang, buot usab ni Jehova nga Diyos nga paningkamotan sa mga Kristohanon nga mahisama kaniya. Sa ingon, miawhag si apostol Pablo: “Mahimo kamong mga manunundog sa Diyos, ingong hinigugmang mga anak, ug magpadayon sa paglakaw sa gugma.”—Efeso 5:1, 2.
Ang gugma nagatimbang usab sa ubang Kristohanong hiyas. Sa mga adlaw ni Jesus, ang mga Hudiyo—ilabina ang ilang mga pangulo—maoy makugihong mga estudyante sa Bibliya. Apan palandonga kon unsay gisulti ni Jesus kanila: “Kamo nagasusi sa Kasulatan, tungod kay kamo nagahunahuna nga pinaagi niana kamo makabaton ug kinabuhing walay kataposan; . . . apan ako nasayod nga ang gugma sa Diyos wala diha kaninyo.” (Juan 5:39, 42; Lucas 11:42) Kon sila may gugma pa unta ug kahibalo, ila untang mailhan nga si Jesus mao ang Mesiyas. Sumala sa kahimtang, ang kadaghanan kanila nawad-ag higayon nga mahiapil sa unang mga sakop sa Kristohanong kongregasyon.
Hinumdomi, usab, ang Romano Katolikong mga konkistadores nga nagdala sa ilang relihiyon ngadto sa Bag-ong Kalibotan. Sila nagbaton gayod ug lig-ong pagtuo ug mainitong kadasig sa pagbuhat sa ilang nabuhat. Apan tinong kadto wala matimplahi sa gugma. Kay kon tinimplahan pa kadto sa gugma, sila dili gayod unta manulis, magsakit, manglugos, ug magpatay sa mga lumad sa Amerikanhong mga kontinente.
Busa, ang gugma mao ang timailhang hiyas sa Kristohanon. Kinsa ang angay pakitaan sa maong gugma? Si Jesus nagatug-an kanato: “‘Higugmaon mo si Jehova nga imong Diyos sa bug-os mong kasingkasing ug sa bug-os mong kalag ug sa bug-os mong hunahuna.’ Kini ang kinadak-an ug unang sugo. Ang ikaduha, nga sama niana, mao kini, ‘Higugmaon mo ang imong silingan sama sa imong kaugalingon.’”—Mateo 22:37-39.
Sa pagkamatuod, ang gugma sa Kristohanon molabaw pa. Si Jesus miingon usab: “Ipadayon ninyo ang paghigugma sa inyong mga kaaway ug iampo kadtong nagalutos kaninyo; aron kamo makapamatuod nga kamo mga anak sa inyong Amahan nga anaa sa mga langit, sanglit siya nagapasilang sa iyang adlaw ibabaw sa mga tawong daotan ug sa maayo ug nagapaulan ibabaw sa mga tawong matarong ug dili matarong.” (Mateo 5:44, 45) Sa laing mga pulong, ang gugma sa Kristohanon mosakop sa halos tanan! Apan unsay kahulogan niini diha sa buhat?
Kon Tinuod Natong Gihigugma ang Diyos
Sa usa ka butang, kon buot natong tinuod higugmaon ang Diyos, kinahanglang labaw pa nato siyang mailhan. Ang Diyos mismo nagpaposible niana pinaagi sa pagtagana sa Bibliya, nga maoy, sa pagkamatuod, usa ka sulat alang kanato gikan kaniya. Inigkadawat natog sulat gikan sa usa ka hinigugma, ang kadaghanan nato mobasa dayon niana bisan unsa nato ka puliki. Kita ba malahi na kon bahin sa pagbasa sa Bibliya? Siyempre dili. Matuod, alang sa daghan, ang kinabuhi karong adlawa punog mga kabaldahan, ug daw palabihon sa kadaghanan ang pagtan-awg telebisyon kay sa seryosong pagbasa. Apan dili itugot sa matuod nga mga Kristohanon nga kana magpugong kanila sa pagbasa sa Pulong sa Diyos. Busa, sila nahisama sa salmista nga misulat: “Gitipigan sa akong kalag ang imong mga pahinumdom [nga karong adlawa anaa sa Bibliya], ug labihan ang akong paghigugma niana.”—Salmo 119:167.
Diha sa Bibliya, gisultihan kita sa Diyos kon unsay buot niya nga atong igawi. Maingong ibutang sa mga ginikanan ang mga sukdanan sa kagawian alang sa ilang mga anak, gibutang ni Jehova ang mga sukdanan nga iyang gidahom nga atong huptan—mga sukdanang dili mabalhin. Pananglitan, ang Bibliya nagasulti kanato: “Ang mga makihilawason, mga tigsimbag diyosdiyos, mga mananapaw, mga lalaking gihuptan alang sa dili-kinaiyanhong mga katuyoan, mga lalaking makigdulog sa mga lalaki, mga kawatan, mga tawong dalo, mga palahubog, mga tigpasipala, mga tikasan dili magapanunod sa gingharian sa Diyos.” (1 Corinto 6:9, 10) Taas gayod nga listahan! Apan si bisan kinsang tinuod nga nahigugma sa Diyos malipay sa pagmatikod niana. Ngano? Tungod kay sumala sa gipunting ni apostol Juan: “Kini mao ang kahulogan sa paghigugma sa Diyos, nga atong pagabantayan ang iyang mga sugo.”—1 Juan 5:3.
Ikasubo, daghan sa mga buhat nga ginasaway sa Bibliya nagakahimong dinawat karong adlawa, bisan taliwala sa “Kristohanong” katawhan. Ang usa ka tahong giluwatan sa Canada sa usa ka Protestanteng denominasyon nagrekomendar sa pagtuon sa pagdawat sa mga bayot aron maordinahang mga ministro, nagpatuo nga ang sekso nga walay pagminyo mahimong madawat sa pipila ka kahimtang, ug nagsugyot nga ang pag-unong sa kaminyoon dili gayod magpahigawas sa panapaw. Pihong buot sa mga tagsulat niadtong tahoa nga tan-awong liberal ug hunahuna ug matinagdanon. Apan sila ba nagpakitag gugma, sa Diyos kaha o niadtong gidasig nila nianang imoral nga mga buhat? Dili gayod, sanglit si Pablo miingong ang mga mamumuhat nianang mga butanga dili magapanunod sa Gingharian sa Diyos. Pagkalabi pang mahigugmaon ang pagsunod nga walay kahadlok sa mga sukdanan sa Diyos, nga magatabang sa mga mahuyang sa pagbuhat sa sama, inay dasigon sila sa pagsunod sa mas sayon nga dalan nga mohatod sa kataposan sa kadaotan!
Matandog sa Pagpakig-ambit sa Uban
Inigbasa nato sa Bibliya, masayran usab nato ang kahibulongang mga butang gituyo sa Diyos alang sa katawhan. Atong mahibaloan nga “gihigugma pag-ayo sa Diyos ang kalibotan nga iyang gihatag ang iyang bugtong Anak, aron ang tanan nga magtuo kaniya dili malaglag kondili makabaton ug kinabuhing walay kataposan.” (Juan 3:16) Masayran usab nato ang katuyoan sa Diyos nga wagtangon ang pagkadaotan sa yuta ug pasudlon ang malinawon, paraisonhong sistema sa mga butang pinaagi sa iyang Gingharian ilalom sa mao mismong Jesus. (Mateo 6:9, 10; Pinadayag 21:3, 4) Sumala sa ginasaad sa Bibliya: “Sa dili na madugay, ug ang daotan mawala na . . . Apan ang mga maaghop magapanunod sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:10, 11.
Sa pagkamatuod, ang mensahe sa Bibliya mao gayod ang gikinahanglan sa tawhanong banay. Kana ang hinungdang makapasubo ang pagbasa mahitungod sa mga misyonaryo sa Kakristiyanohan nga nabalda kaayo sa kakabos ug inhustisya nga ilang nakita sa mas kabos nga kayutaan nga sila nalangkit sa politika ug sa rebolusyon pa. Ang rebolusyon dili magsulbad sa mga suliran nianang mga nasora. Tinuod bang gihigugma sa maong mga misyonaryo ang Diyos? Kon mao, dili ba sila motuo sa iyang mga saad ug itudlo sa ilang mga panon ngadto sa iyang Gingharian? Ang mga magbalantay nga tinuod nahigugma sa ilang mga panon tinong magpakita kanila sa unsang paagi ang pagsugot sa kasugoan sa Diyos makatabang kanila bisan karon, inay nga ipalangkit sila sa politikanhong mga laraw nga mosangpot lamang sa kahiubos.
Ang matuod mao, ang mensahe sa Bibliya kahibulonganon kaayong walay mahigugmaong tawo ang magtago lamang niana sa iyang kaugalingon. Kana ang hinungdang tungod sa gugma ang matuod nga mga Kristohanon matandog sa pagpakig-ambit sa ilang nahibaloan ngadto sa uban. Sa Kakristiyanohan ang buluhaton sa pagpakigsulti sa uban mahitungod sa Bibliya kasagarang itugyan lamang ngadto sa diyutay, sinuweldohan, propesyonal nga matang—ang klero. Kini daotag sangpotanan. Sumala sa giangkon sa usa ka Luteranong pastor diha sa magasing Christianity Today: “Ang Iglesya mahuyang karong adlawa tungod kay napakyas ang espirituwal nga mga pangulo sa pagbansay sa pundok sa mga magtutuo sa pagbuhat sa samang matang sa buluhatong ilang ginabuhat. O tungod kay napakyas ang mga magtutuo sa pag-ila ug pagdawat sa maong ministeryo.”
Ang matuod nga mga Kristohanon “nagaila ug nagadawat sa maong ministeryo.” Ginaisip nilang ugdang kining mga pulong ni apostol Pablo: “Malig-on natong panguptan ang dayag nga pagpahayag sa atong paglaom nga walay pagkatarog, kay siya nga nagsaad matinumanon.” (Hebreohanon 10:23) Ilang motibo? Sama niadtong nagtukmod sa usa ka pundok sa mga Kristohanon sa unang siglo nga mainitong gidayeg ni apostol Pablo: “Ang mga naulahi nagamantala kang Kristo tungod sa gugma.”—Filipos 1:16.
Gugma Alang sa Isigka-Kristohanon
Oo, ang gugma mao ang ilhanan sa matuod nga Kristiyanidad sa pagkaaging apektado niini ang tanang bahin sa kinabuhi sa matuod nga mga Kristohanon. Sa ingon sila mahimong lahi sa katawhan alirong kanila. Ngano? Si apostol Juan miingon mahitungod niining kalibotana: “Ang tibuok kalibotan nahiluna sa gahom sa usa nga daotan.” (1 Juan 5:19) Ang usa nga daotan mao si Satanas nga Yawa, ug ang kalibotan nagabanaag sa iyang mga prinsipyo diha sa kadaghanan niining kalihokan. Ang impluwensiya ni Satanas makita diha sa kaylap nga pagkalimbongan, imoralidad, inhustisya, rasanhong tensiyon, ug ekonomikanhong pagkadili-makiangayon nga nagalungtad karong adlawa. Ang Kristohanon, kay nagasimba sa usa ka mahigugmaong Diyos ug nagasundog kaniya pinaagi sa pag-ugmad sa hiyas sa gugma, kinahanglang malahi!
Karon, kini dili sayon buhaton nga kinaugalingon. Busa, ang Bibliya nagadasig usab kanato sa pagpangita niadtong may susamang pagpabili sa hiyas sa gugma. Sa ingon niana ang mga Kristohanon mahimong magtinabangay sa usag usa. Kana ang hinungdang si apostol Pablo misulat niining makapadasig nga mga pulong: “Magdasigay kita sa usag usa sa gugma ug sa maayong mga buhat, nga dili magabiya sa panagkatigom sa atong kaugalingon, . . . nga magadasigay sa usag usa.”—Hebreohanon 10:23-25.
Kon buot nimong mosanong sa maong pagdasig, ang mga Saksi ni Jehova malipay sa pagpailaila kanimo ngadto sa usa ka pundok sa katawhan nga nagapaningkamot pag-ayo sa pagpasundayag sa diyosnong gugma diha sa ilang mga kinabuhi. Pihong adunay ingon nga pundok sa inyong komunidad, ug ang espiritu sa Diyos anaa kanila tungod kay, sa kataposang analisis, kana ang tinubdan sa matuod, Kristohanong gugma. “Ang bunga sa espiritu mao ang gugma.” (Galacia 5:22) Ang pagpakig-uban kanila motabang kanimo sa pagpamati sa pagdasig ni apostol Pedro: “Magbaton ug gugma sa tibuok kapunongan sa kaigsoonan.”—1 Pedro 2:17.
Pagkamakapasubo unya nga imong hikaplagang ikaw nahiapil niadtong si kinsa, tapos sa pagpaningkamot sa pag-alagad sa Diyos, makadungog sa mahukmanong mga pulong ni Jesus: “Wala ko gayod kamo igkaila! Pahawa kamo, kamong mga mamumuhat ug daotan.” (Mateo 7:23) Kon atong ugmaron ang gugma, ang ilhanan sa matuod nga Kristiyanidad, kana dili mahitabo kanato. Ang gugma magpalihok kanato sa pagbasa sa Bibliya, pagkinabuhi sumala sa mga sukdanan niini, pagpangita sa ubang Kristohanon ingong mga kauban, ug pagsulti sa uban mahitungod sa maayong mga butang anaa sa Bibliya. Oo, ang gugma mopalihok kanato sa pagbuhat kon unsay buot sa Diyos nga atong buhaton. Ug, sumala sa giingon ni Jesus, ang “nagabuhat sa kabubut-on sa iyang Amahan nga anaa sa mga langit” mao ang magapanunod sa mga saad sa Diyos. Midugang si apostol Juan: “Siya nga nagabuhat sa kabubut-on sa Diyos magapabilin sa walay kataposan.”—Mateo 7:21; 1 Juan 2:17.
Oo, ugmara ang gugma. Itugot nga kana magpalihok kanimo sa pagbuhat sa kabubut-on sa Diyos. Sa ingon mapamatud-an nimo nga ikaw matuod nga Kristohanon, sanglit si Jesus miingon: “Pinaagi niini ang tanan mahibalo nga kamo akong mga tinun-an, kon kamo adunay gugma sa inyong taliwala.” (Juan 13:35) Ug imong mapahimuslan ang mga ganti nga walay kataposan nga gisaad sa Diyos alang niadtong nahigugma kaniya.
[Hulagway sa panid 7]
Ugmara ang Gugma