Hupti ang Positibong Tinamdan
SAYO kadto sa usa ka buntag sa ting-init. Apan ang adlaw sa Tungang Sidlakan misidlak nang masanagon sa nadawat sa usa ka amahan ang makaguol nga balita. Ang panganay niyang anak nga lalaki, nga 22 anyos, namatay sa aksidente sa kotse sa gabii.
Unsa kahay imong pagsanong nianang balitaa? Kay ang mga sakop sa pamilya suod kaayo, maingon nga mao ang kahimtang sa Tungang Sidlakan, naguol gayod kaayo ang mga ginikanan. Daw kinaiyanhon nga sila mayugot kaayo ingong reaksiyon nianang kalit nga trahedya. Apan sa katingala sa komunidad, ilang gipakita ang positibong tinamdan, bisan niadtong unang adlaw. Bisan tuod nasubo sa labihan, sila may bug-os nga pagsalig sa katakos ni Jehova sa pagbanhaw sa ilang anak sa Iyang tinudlong panahon. Sila naglantaw sa unahan sa sinaad nga bag-ong sistema sa Diyos diin “ang kamatayon mawala na.” (Pinadayag 21:4) Bisan karong adlawa, katuigan sa ulahi, ang mga tawong nakaila sa maong pamilya nagahisgot gihapon sa tinamdan sa mga ginikanan ug sa ilang talagsaong pagtuo.
Unsay kahulogan sa paghupot ug positibong tinamdan? Ang usa ka positibong tawo nagahupot sa katimbang bisan pa sa nagkabalhing mga kahimtang. Bisan ilalom sa masulayong mga kahimtang siya dili magmayugtanon, nga tugotang maglabi ang negatibong mga hunahuna. Sa unsang paagi posible kini? Sa pagkaplag sa pila ka tubag, atong palandongon ang pila ka Biblikanhong panig-ingnan.
Kon Atubangon sa Kahadlok sa mga Tawo
Sa tuig 1512 W.K.P., samtang ang nasod sa Israel didto sa kamingawan sa Paran, gisugo ni Moises ang 12 ka espiya sa pagsusi sa Yutang Saad. (Numeros 13:17-20) Ang tanang espiya maoy mga pangulo sa ilang mga tribo—mga tawong may impluwensiya nga gituohang maayong mga panig-ingnan. (Numeros 13:1, 2) Apan pagkamakauulaw! Tapos sa 40 ka adlaw, napulo kanila mihatag ug daotan kaayong taho nga ang mga Israelinhon mirebelde batok sa pagdumala ni Jehova ug buot mobalik sa Ehipto! “Ang katawhang nagapuyo sa yuta kusgan,” matud sa mga espiya. “Dili kita makatungas batok sa katawhan.”—Numeros 13:28, 31.
Pagkanegatibo nga tinamdan! Ug pagkalahi ang positibong tinamdan ni Josue ug Caleb, ang nahibiling duha ka espiya: “Ang yuta nga among giagian sa pagpaniid niini maoy maayo kaayong yuta. Kon si Jehova nahimuot kanato, nan kita iya gayong dad-on sa maong yuta ug kana iyang ihatag kanato, usa ka yuta nga nagaagos ang gatas ug dugos.” (Numeros 14:7, 8; 13:30) Ang duha ka pundok nakakita sa samang mga butang samtang naniid sa yuta. Apan pagkalahi sa tinamdan! Ang negatibong tinamdan sa napulo ka espiya nakaapektar sa tibuok nasod, ug sila misugod sa pagbagulbol. Kadto miresulta nga kadtong tanang kapin sa 20 anyos sa panuigon nangamatay sa kamingawan. Si Josue lamang ug si Caleb, tungod sa positibo nilang pagsalig kang Jehova, ang nakapribilehiyo sa pagsulod sa Yutang Saad. (Numeros 14:22-30) Ang ilang panig-ingnan angay magdasig kanato niining adlawa sa pagpabiling matinumanon ug huptan ang positibong tinamdan kon moabot o modako ang paglutos o pagsupak.
Sa usa ka nasod nga may pagdili sa daghan nang katuigan, ang usa ka espesyal nga payunir gibilanggo ug gimaltrar kaayo. Siya nahinumdom: “Kon mas grabe ang opisyales, bation kong mas suod kang Jehova. Ako awiton ang mga awit sa Gingharian. Dumdomon ko ang tanang kasulatang akong nahibaloan. Nakaamgo ako nga, bisan tuod gitugotan ni Jehova nga mahitabo kadto, siya makaarang—sa bisan unsang gutlo—sa pagpagawas kanako. Kadtong tanan nakatabang kanako sa paghupot ug positibong tinamdan. Sama sa mga apostol, gibati ko ang kalipay nga dagmalan tungod sa labaw nga ngalan ni Jehova. Ako mag-ampo kanunay nga lig-onon ako ni Jehova. Siya mitabang kanako, mao nga ang una lamang nga pagbunal ang sakit. Gigamit ko ang tanang higayon sa pagsangyaw ngadto sa ubang binilanggo.”
Sa pagkagawas niya sa bilanggoan, ang maong Kristohanon miingon: “Sanglit atong napahinungod ang atong mga kinabuhi kang Jehova ug gipanaad nga magpabiling matinumanon kaniya, angay nga mopadayon kita sa pag-alagad kaniya bisan pa sa mga kalisod. Siya takos sa atong pagsimba ug bug-os nga debosyon.”
Kita, usab, mahimong moatubang sa susamang pagsupak sa umaabot. Atong ihukom nga hugot usab nga dili mahadlok sa mga tawo. Hupti ang positibong tinamdan, ug sama sa kahimtang ni Josue ug Caleb, ihatag kanato ang daghang panalangin ug balos.
Dihang Mawala ang mga Pribilehiyo sa Pag-alagad
Si Moises, ingong pangulo sa nasod sa Israel, maoy nagsugo sa 12 ka espiya. Siya ang nangulo sa nasod sa paggawas sa Ehipto ug pihong gidahom nga mao ang manguna kanila sa pagsulod sa Yutang Saad. Ugaling, nawad-an si Moises nianang pribilehiyoa dihang, sa gutlo sa pagkapikal, siya napakyas sa pagpadako sa ngalan ni Jehova. (Numeros 20:2-13) Unya unsa ang reaksiyon ni Moises? Sa usa ka awit nga sa ulahi iyang gikomposo, siya miingon: “Akong ipahayag ang ngalan ni Jehova . . . Ang Bato, hingpit ang iyang mga buhat, kay ang tanan niyang dalan maoy hustisya. Usa ka Diyos nga matinumanon, nga kaniya walay inhustisya; siya matarong ug matul-id.” (Deuteronomio 32:3, 4) Pagkapositibo ang tinamdan ni Moises, bisan pag nawad-an siyag importanteng pribilehiyo sa pag-alagad!
Kon ugaling atong atubangon ang susamang kahimtang ang paghinumdom niining kasinatian ni Moises makatabang kanato. Tingali mahitabong ang usa ka lawas sa mga ansiano sa usa ka kongregasyon magrekomendar sa pagtangtang sa usa ka ansiano o ministeryal nga alagad, tingali tungod kay siya nakulangan sa usa o kapin pa sa Kasulatanhong mga katakos nga gikinahanglan sa maong pribilehiyo sa pag-alagad. Basin mobati ang igsoong lalaki nga siya dili takos nga tangtangan, maglagot, ug magpahinabog walay-hinungdang kasamok. Kay may negatibong tinamdan, siya basin mosugod sa pagbagulbol, mangitag sayop sa uban, nga magtabitabi pa. Sa kataposan, siya basin moundang sa pagtambong sa mga tigom ug pag-apil sa pagsangyaw. Pagkadaotang kahimtang nga mahiagoman! Pagkalabi pang maayo ang paghupot ug positibong tinamdan ug isipon ang pagtangtang ingong disiplina o pagbansay aron mahimong mas maayong alagad ni Jehova. Mahimong mapahimuslan niya pag-ayo ang higayon sa pagtuon ug pagpamalandong sa Pulong sa Diyos aron maangkon pag-usab ang gikinahanglang mga katakos sa pag-alagad Kaniya sa bug-os. Daghan nga nagbuhat niana gipanalanginan sa labi pang dagkong pribilehiyo sa pag-alagad.—Hebreohanon 12:11.
Kon Mahitabo ang mga Kausabang Wala Dahoma
Ang kinabuhi punog wala-dahoma nga mga kausaban nga tungod niini ang pipila tingali mahiubos ug magsagop sa negatibong tinamdan. Unsay imong reaksiyon sa kataposang panahong may nahitabo nga dili kaayo maayo sumala sa imong gidahom? Bisan ang ginagmayng mga hitabo makapaluya kanato kon itugot nato kana. Apan ayaw gayod hikalimti: Ang paghupot ug positibong tinamdan motabang kanimo sa pag-atubang nga labi pang maayo sa nausab nga kahimtang.
Ang usa ka maayong panig-ingnang hinumdoman mao ang kang Ruth. Kay sayong nabalo, siya mibalik sa Israel uban sa iyang ugangang-babaye, si Noemi, dihang ang gutom didto naarang-arang. Bisan walay bana sa pagtagana bisan sa pangunang mga kinahanglanon sa kinabuhi, gihuptan gihapon ni Ruth ang positibong tinamdan. Nga masadyaon, siya milakaw sa pagpanghagdaw sa kaumahan sunod sa mga mangangani aron siya ug ang iyang ugangang-babaye may makaon. Ang kahago wala makapaluya kaniya. Wala siya magbaton ug negatibong tinamdan, nga nagmulo nga nawad-an siya sa iyang bana ug sa maong panahon halayo sa iyang pamilya ug mga higala. Ug sumala sa ginapakita sa mga talaan, si Jehova tugob nagbalos kaniya tungod sa iyang maayong binuhatan.—Ruth 4:13-17.
Kon Unsaon Paghupot ang Positibong Tinamdan
Ang paghupot ug positibong tinamdan lisod alang sa pipila. Ang mga kabalaka sa kinabuhi, ilabina sa samok nga mga panahong atong ginapuy-an, makahikaw sa usa sa kalipay—ilabina kon ang suliran mopadayon. Apan, bisan sa dili-maayong mga kahimtang, ang usa makahupot ug positibong tinamdan. Daghan ang naghimo niana sa labing masulayong mga kahimtang. Sa unsang paagi atong mahimo ang sama?
Sulayi ang dili pagpamalandong sa negatibong mga butang. Bisan panahon sa dagkong mga kalisod, ang positibong mga bahin hikaplagan. Ang mga apostol kanunayng gilutos o gibilanggo, apan sa gihapon sila nalipay nga nakadayeg kang Jehova. (Buhat 13:50-52; 14:19-22; 16:22-25) Kita makapamalandong sa gibuhat nila ug sa ubang matinumanong alagad ni Jehova sa mga panahon sa pagsulay ug pangitaon ang mga pagtulon-an alang sa atong mga kinabuhi mismo. Nganong sila masadyaon ug positibo? Kay sila may bug-os nga pagsalig ug pagtuo kang Jehova. Sila misalig sa iyang katakos sa pagbanhaw ug pagbalos kanila. (Pinadayag 2:10) Sa susama, hupting tin-aw sa hunahuna ang paglaom sa matarong bag-ong sistema ni Jehova.—Itandi ang Hebreohanon 12:2.
Angay usab kitang magpadayon sa pagsusi sa atong kaugalingon, kay basin ang negatibong panghunahuna makadaot ug makagamot sa atong mga kasingkasing. Pagkamaayo nga magpabiling suod kang Jehova ug mag-ampo alang sa iyang tabang kon kita maluya! (Salmo 62:8) Ang makapalig-ong tabang mahimong pangayoon gikan sa mga ansiano. Ugmara ang espiritu sa pagpaubos ug pagkamasinugtanon. (Salmo 119:69, 70) Magbutang ug maayo, makab-ot nga mga tumong sa kinabuhi. Kining tanang sugyot motabang kanato sa paghupot ug positibong tinamdan ug pagbaton sa “kalinaw sa Diyos” nga ‘magabantay sa atong kasingkasing ug sa atong mga katakos sa panghunahuna.’—Filipos 4:6, 7.
Tinuod, dili kanunayng sayon ang paghupot ug positibong tinamdan. Bisan pa niana, pinaagi sa pagkugi ug tinukmod sa lig-ong pagtuo, maugmad ang maong tinamdan. Busa, bisan unsa man ang atong kahimtang, mohukom kitang tanan sa paghupot ug positibong panglantaw. Kini dili gayod magpasabot sa atong kapildihan kondili, hinunoa, mosangpot sa daghang kahimut-anang mga balos karon ug sa umaabot.
[Hulagway sa panid 29]
Hupti ang positibong tinamdan, ug ang daghang panalangin ug mga balos moabot kanimo