Kinabuhi ug Ministeryo ni Jesus

Naghimog Maayong mga Buhat sa Adlawng Igpapahulay

TINGPAMULAK kadto sa 31 K.P. Milabay na ang pipila ka bulan sukad nga nakigsulti si Jesus sa babaye diha sa atabay sa Samaria migikan sa Judea paingon sa Galilea.

Karon, human nakapanudlo sa tibuok Galilea, migikan na usab si Jesus paingon sa Judea, diin didto nagsangyaw siya sa mga sinagoga. Kon itandi sa pagtagad nga gihatag sa iyang ministeryo sa Galilea, diyutay ray gisugilon sa Bibliya bahin sa kalihokan ni Jesus sa Judea niining panahona sa pagduaw ug sa mga bulan nga iyang gigugol dinhi pagkahuman sa miaging Paskua. Dayag nga ang iyang ministeryo wala makadawat ug maayong pagsanong sa Judea sama sa Galilea.

Dayon mipaingon si Jesus ngadto sa kaulohang siyudad sa Judea, ang Jerusalem, alang sa Paskua sa 31 K.P. Dinhi, duol sa ganghaan sa karnero sa siyudad, mao ang linawng gitawag Betsata, diin daghang mga masakiton, buta, ug mga bakol nga nanagpangabot. Nagtuo sila nga maayo ang mga tawo pinaagi sa pag-ubog sa mga tubig sa linaw kon kini makutaw.

Adlawng Igpapahulay kadto, ug nakita ni Jesus ang tawo diha sa linaw nga nagmasakiton sulod sa 38 ka tuig. Sanglit nasayod sa dugay nang sakit sa tawo, si Jesus nangutana: “Buot ka bang maayo?”

“Senyor, wala akoy tawo nga makatunlob kanako sa linaw inigkutaw na sa tubig,” siya mitubag, “samtang manlimbasog ako sa paglusad adunay makauna kanako sa pag-ubog.”

Si Jesus miingon kaniya: “Bangon, dad-a ang imong higdaanan ug lumakaw ka.” Dihadiha ang tawo naayo, ug gidala niya ang iyang higdaanan, ug milakaw!

Sa nakita sa mga Hudiyo ang tawo, sila miingon: “Adlawng Igpapahulay karon, ug ginadili kanimo ang pagdala sa imong higdaanan.”

Gitubag sila sa tawo: “Ang tawo nga miayo kanako miingon kanako, ‘Dad-a ang imong higdaanan ug lumakaw ka.’”

“Kinsa bang tawhana ang nag-ingon kanimo, ‘Dad-a kini ug lumakaw ka’?” sila nangutana. Nakalakaw na si Jesus tungod sa panon sa katawhan, ug busa ang tawo nga naayo wala mahibalo sa ngalan ni Jesus. Apan, sa ulahi, si Jesus ug ang tawo nagkita sa templo, ug nahibaloan sa tawo ang ngalan sa nag-ayo kaniya.

Busa gipangita sa naayong tawo ang mga Hudiyo sa pagsulti kanila nga si Jesus mao ang nag-ayo kaniya. Sa pagkahibalo niini, ang mga Hudiyo miadto kang Jesus. Alang sa unsang katarongan? Aron ba mahibalo kon pinaagi sa unsa nga nakahimo siya niining katingalahang mga butang? Dili. Kondili sa pagpangitag sayop kaniya tungod sa pagbuhat niining maayong mga butang sa Adlawng Igpapahulay. Ug gani misugod sila sa paglutos kaniya! Lucas 4:44; Juan 5:1-16.

◆ Unsa ka dugaya sukad nga miduaw si Jesus sa Judea?

◆ Nganong popular kaayo ang linawng gitawag Betsata?

◆ Unsang milagro ang gihimo ni Jesus diha sa linaw, ug unsa ang reaksiyon sa mga Hudiyo?