Kon Nganong Akong Gibiyaan ang Hunahunang Moadto sa Langit

—Giasoy ni Yuriko Eto

INGONG usa ka Metodista nga Haponesa, dulot akong nagtuo nga walay kalipay nga molabaw kay sa pag-adto sa langit. Mahimayaon gayod unya nga mahatapad sa Diyos ug makapuyo uban sa Ginoong Jesu-Kristo sa walay kataposan. Nganong nabatonan ko ang maikagong pangandoy nga moadto sa langit? Ug nganong akong gibiyaan ang hunahuna? Pasugira ako sa akong estorya.

Sa mga siglo ang Shintoismo ug Budhismo ang gitugot sa akong nasod, ang Hapon. Ako natawo sa 1911, mga 22 ka tuig lamang tapos itugot ang kagawasan sa relihiyon. Ang akong pamilya nahimong mga Metodista. Ang akong amahan negosyante. Ang akong inahan mao ang anak babaye sa usa ka pastor. Ang kamatuorang ang akong inahan tinuod nagtuo sa Bibliya usa ka panalangin alang kanako. Mahinumdoman ko ilabina nga ang higala sa akong inahan, usa ka maestra sa usa ka teolohikanhong tunghaan sa mga babaye, tigduawan kanamo. Kanunay siyang maghisgot sa Bibliya, ug gusto kong manimati. Apan sa pagkatapos sa panaghisgot siya kanunay moingon: “Dili ba makapasubo nga ang Bibliya dili pa bukas ug dili hisabtan?” Ako kanunay malibog nga sanglit gipasulat sa Diyos sa mga tawo ang Bibliya, nganong wala man niya ipasabot kana kanila?

Sa pagkauli gikan sa tunghaan, moangay gayod ako nga molingkod sa hayahay nga silya nga magbasa sa Bibliya ug magdamgo mahitungod sa langit. Ang nakatandog ilabina sa akong kasingkasing mao nga tingali si Kristo moabot sa pagsugat kanamo sa panahong kami buhi pa. Gipanig-ingon ni Jesu-Kristo ang iyang kaugalingon sa usa ka pamanhonon ug nagpasidaan kanamong sa napulo ka ulay, lima ang mahikatulog pag-ayo ug dili makasugat sa pamanhonon ug dili makaadto sa langit! Busa kada adlaw, ako moampo alang sa panahong ang Ginoong Jesus moabot sa pagtawag kanamo, ug ako moampong ang ikaduhang presensiya ni Kristo dili gayod mahikalimtan. Gitagoan ko sa akong kasingkasing ang kasulatang nagaingon, “Bulahan ang maputli ug kasingkasing; kay sila makakita sa Diyos,” ug ako nagpaabot ug naglaom. Ngani, ako nagkinabuhing samag dili-matinagdanong magpapanaw niining kalibotana.​—Mateo 25:1-12; 5:8, King James Version.

Niadtong 1933 ako naminyo, ug tungod kay ako kanunayng magpasulod sa langit sa among mga estorya, ang akong bana tigkatawa kanako nga moingon, “Ikaw taga langit, apan ako taga dinhi niining kalibotana.” Bisan pa niana, ang amahan sa akong bana debotado sa Bibliya ug kadaghanan moingon: “Halos 2,000 ka tuig sukad sa pag-anhi ni Ginoong Jesu-Kristo, busa kita makatuo nga haduol na ang ikaduhang presensiya ni Kristo.” Ang akong kasingkasing nadasig sa dugang ug dugang.

Unya misugod ang Gubat sa Kalibotan II, ug sa kataposang tuig sa gubat namatay ang akong bana. Niadtong panahona ako naghunahuna nga kon adunay makahadlok nga impiyerno, kini mao gayod kining kalibotana. Human sa gubat, gidala ko ang akong upat ka anak (ang kinamanghoran pito ka bulan) ug kami namalhin sa makadaghan, kay ang Tokyo niadto samok pa. Dili ako makaantos sa tibuok Dominggo nga walay pagsimba, busa kada panahong kami mobalhin, ako mosimba sa simbahang labing duol sa among balay. Ako walay pagtagad kon unsang simbahana kadto, kay akong gibati nga adunay usa lamang ka Diyos ug usa ka Bibliya. Dili ko gusto niadto nga mopabilin sa usa ka relihiyon.

Pagpangita sa Organisasyon sa Diyos

Kay nakasabot sa mga kalainan, ako inanay misugod sa pagkahibulong kon unsay paghunahuna sa Diyos mismo sa mga sekta. Nahidangat ako sa konklusyong ang Diyos labawng nahibalo kay kang bisan kinsa nga ang mga sayop nagalungtad sa daghang relihiyon. Sa samang paaging ang magtutudlo mogrado sa papel sa pasulit sa usa ka estudyante, ako naghunahunang ang Diyos mohatag ug mga grado sa organisasyong nakasabot sa labing tukma sa Bibliya. Misugod ako sa pagbati nga kinahanglang makit-an nako ang organisasyong matarong sa panan-aw sa Diyos. Dayon ang Mateo 7:9 midan-ag sa akong hunahuna. Kini nagaingon: “Kinsa ba kaninyo nga pangayoan sa iyang anak ug tinapay​—siya dili mohatag kaniyag bato, dili ba?” Kay akong gipangita ang tinuod nga “tinapay,” ako nagtuo sa maong kasulatan ug misugod sa pag-ampong seryoso adlaw-adlaw: “Palihog itugot nga ako makauban sa organisasyong dunay tukmang pagsabot sa Bibliya.” Usa ka tuig tapos sa pagsugod sa pag-ampo niining paagiha, ako mibalhin ngadto sa Yokohama. Maoy didto nga nalipay ako tungod sa usa ka pakigkabildo.

Inigkahibalag kog mga tawong moingong sila nagasimba, ako dayon silang pangutan-on, “May nailhan ka bang makasabot nga detalyado sa Bibliya?” Usa ka adlaw sa usa ka nait nga lungsod, akong nahibalag ang usa ka membro sa usa ka simbahan ug nangutana kaniya sa samang pangutana. Bisan tuod hangtod niadto ako wala makadawat ug paborableng tubag, siya mitubag sa makapakombinsir nga tingog: “Oo. Adunay ingong tawo. Sa usang adlaw miduaw dinhi ang usa ka babayeng misyonaryo. Gipadayon ko siya sa balay ug gibuksan dayon niya ang Bibliya ug gisaysay niya ang sunodsunod nga butang. Miingon siya una molakaw nga siya nagapuyo sa ibabaw sa bungtod sa dapit nga imong gipuy-an.” Sa pagkadungog niana, mibiya ako sa iyang balay​—nga nalipay. Sa sunod gayong adlaw akong giduaw ang misyonaryong balay sa mga Saksi ni Jehova.

Usa ka Panahon sa Krisis

Sa kataposan akong mabatonan ang detalyadong pagtuon sa Bibliya. Milabay ang duolag usa ka bulan​—ug dayon ang makapakurat nga butang! Ang akong misyonaryo-magtutudlo, si Jean Hyde (karon Nisbet), mipahiyom ug miingon: “Sa umaabot lagmit dili ka mopuyo sa langit kondili sa yuta.” Ako nakuratan pag-ayo kay akong gibati nga ako gipalagpot gikan sa langit. Ako nasuko kaayo. “Kini ang unang panahong ako nakahibalag ug misyonaryong bastos manulti sama kanimo,” ako misinggaak kaniya. “Makauulaw nga bisan pag gilaoman kong ikaw magtudlo kanako sa Bibliya, kanang pagbatia nawala na karon. Hinuon, kay ako nangita man sa tinuod nga organisasyon sa pagkakaron, ug nakasuskribir sa Ang Bantayanang Torre ug nakabaton usab sa librong ‘Pasagdi ang Diyos Maminatud-on,’ susihon ko kinig maayo sa akong kaugalingon. Kon akong mapamatud-ang kini ang kamatuoran, moyukbo ako kanimo ug hangyoon ko pag-usab ang imong tabang.”

Si Jean wala masuko. Siya mipahiyom ug miingon, “Sige, susihag maayo ang kamatuoran.” Niana siya mibiya, apan siya malulutong mohapit matag karon ug unya sa pagpangutana, “Ginahimo mo ba ang imong pagsusi?” Ako naglaom nga ang maong organisasyon mao ang tubag sa Diyos sa akong mga pag-ampo, apan niadtong panahona gubot kaayo ang akong mga pagbati. Wala pa sukad ako makadungog nga may paglain niadtong moadto sa langit ug niadtong mopuyo sa walay kataposan sa yuta.

Human niadto, akong gisusing maikagon ang mga basahon sa Watch Tower sa kada adlaw. Sa wala madugay ang nagpanawng magtatan-aw sa mga Saksi ni Jehova, si Adrian Thompson, miduaw kanako. Sa paaging masupakon ug diyutay, ako nangutana dayon: “Bisan pag sa umaabot adunay duha ka grupo, ang usa langitnon ug ang usa yutan-on, dili ba ang Diyos maoy maghukom? Mapangahason nga ang tawo maoy mohukom, dili ba?” Siya mitubag: “Eksakto! Ang mohukom mao ang Diyos.” Bisan pag ako wala makasabot sa mga detalye, sa usa ka paagi maarang-arang ang akong gibati. ‘Busa,’ ako naghunahuna, ‘ang akong paglaom nga moadto sa langit wala makuha.’ Tapos niadto, ako nag-ampo ug nagpadayon sa pagtuon sa akong kaugalingon.

Sa 1954 ako mitambong sa Memoryal sa kamatayon ni Kristo. Si Lloyd Barry mao ang mamumulong. Sa iyang pakigpulong siya miingong kadtong anaa sa “kasabotan sa tugon” mao ang moambit sa tinapay ug sa bino. Tapos sa Memoryal ako daghag pangutana, busa ako mikuyog sa pagpauli kang Shizue Seki, usa ka madasigong Saksi. Iyang gipakita ang dakong kabalaka ug migahig panahon sa pagdasig kanako nga dili mohunong tungod lamang kay may suliran ako bahin sa usa ka punto, kondili sa pagtino kon ang tanang ubang pagtulon-an gipasukad ba sa Bibliya o wala.

Usa ka adlaw, tapos manglakaw ang kabataan paingon sa eskuylahan, ako nanglimpiyo sa pag-andam alang sa mga bisita, ug ako miampong mahilomon, ‘Motuon ako pag-usab uban sa mga Saksi ni Jehova.’ Sa pagbuka sa akong mga mata, ako natingala sa pagkakita, dili sa mga bisitang akong gipaabot, kondili sa tulo ka Hapones nga Saksi ni Jehova. Kay natingala, ako silang giingnang bag-o pa akong nahuman sa pag-ampo. Si Fumiko Seki malipayong nagluksolukso, nga namakpak sa iyang mga kamot nga nag-ingon, “Maayo! Maayo!” Sa wala madugay ang laing misyonaryo, si Sonny Dearn, uban kang Fumiko nga mitabang sa paghubad, misugod sa usa ka makalingaw nga pagtuon. Sa maong panahon ang duha sa akong mga anak miuban kanako sa pagtuon. Ugaling, nabalhin ang asaynment ni Sonny. Dayon si Leon Pettitt, laing langyaw, miabot. Kami kanunay mobomba kaniyag daghang pangutana. Iyang malinawong gipakita kanamo ang mga kasulatan mao nga kami nakadangat sa hustong konklusyon ug miuswag sa kahibalo sa Kasulatan.

Pagkahibalo sa Katuyoan sa Pag-adto sa Langit

Kasukwahi sa kaugalingon kong mga tingusbawan, akong nahibaloang adunay katuyoan sa pag-adto sa langit nga labaw kay sa yanong pangandoy nga mahatapad sa mahimayaong Diyos ug magpuyo uban kang Ginoong Jesus sa walay kataposan. Samtang akong nasayran ang pipila ka kamatuoran, daling nakadawat niana ang akong kasingkasing.

Sa pagsugod, kon wala pa unta makasala ang unang tawong si Adan, si bisan sa katawhan dili kinahanglang moadto sa langit. Kini tungod kay may kaliboan ka kaliboang manulonda na didto sa langit una lalanga ang kalibotan.​—Job 38:4-7; Daniel 7:9, 10.

Samtang nagpadayon ang pagtuon, akong nahibaloan gikan sa Lucas 12:32 nga ang gamay lamang nga grupo nga gitawag sa Bibliya nga “gamayng panon” ang moadto sa langit. Si Jesus miingon: “Ayaw kahadlok, gamayng panon, tungod kay nauyonan sa inyong Amahan ang paghatag kaninyo sa gingharian.” Mahitungod sa katuyoan, wala ba mahisulat sa Pinadayag 20:6 nga “sila . . . magmando nga mga hari uban kaniya [Kristo] sulod sa usa ka libo ka tuig”? Ug sa Pinadayag 5:10 nga “sila magmando nga mga hari ibabaw sa yuta”?

Akong nahibaloan usab ang kahulogan sa Pag-ampo sa Ginoo. Si Jesus miampo: “Moabot ang imong gingharian. Matuman ang imong kabubut-on sa yuta, maingon man didto sa langit.” (Mateo 6:10, KJ) Sa dihang akong nasabtang kini nagtumong sa langitnong Ginghariang kagamhanan nga nalangkoban sa mga tawo nga gikuha gikan sa yuta sa paghari uban sa Haring Jesu-Kristo, ako nahibulong sa kaalam sa Diyos. Ako kombinsidong kini gayod ang butang atong gikinahanglan, usa ka linain, bag-ong gobyerno nga magpahigawas sa katawhan gikan sa pag-antos, kaguol, ug mga kalisdanang gipatungha ni Satanas. Ako wala makapugong sa akong pagdayeg kang Jehova.

Lain pa, sa dihang akong nahibaloang ang gidaghanon nga moadto sa langit limitado ra sa 144,000, ako makauyon lamang gayod sa pagkamakataronganon niini. (Pinadayag 14:1, 3) Sa samang paagi, bisan ang gidaghanon sa opisyales sa usa ka gobyerno sa yuta maoy limitado. Akong napabilhan nga may pila ka hinungdanong buluhaton alang niadtong moadto sa langit. Ang ilang buluhaton sulod sa mahigugmaong kahikayan sa Diyos nagaapil sa paghimo sa tanang nagkinabuhi sa yuta nga malipayon ug pagpasig-uli niining yutaa ngadto sa paraisonhong kahimtang.

Ako nahupong kaayo sa pagpabili nga malipayon kong gibiyaan ang akong mga hunahuna sa pag-adto sa langit. Karon ako nahupong sa paglaom sa pagpuyo sa usa ka paraiso sa yuta. Sa walay duhaduha, gipadayag sa Diyos ang kahulogan sa Bibliya pinaagi sa iyang organisasyon. Ako nangita sa kamatuoran. Ako obligadong magpasalamat sa Diyos nga ako iyang gitabangan sa pagpakig-uban sa organisasyong iyang giuyonan.

Mabungahon, Malipayong Ministeryo

Ako nabawtismohan sa Oktubre 1954. Sukad sa 1955, duha sa akong mga anak nagapakig-ambit sa bug-os panahon sa buluhaton sa pagsangyaw sa Gingharian uban kanako. Ang akong anak lalaki si Keijiro nag-alagad nga nagapanawng magtatan-aw sulod sa pito ka tuig. Karon siya gipanalanginan sa duha ka anak, ug siya ug ang iyang asawa nagabuhat nga madasigon ingong bug-os-panahong mga magsasangyaw (mga payunir). Ingong espesyal payunir, ako nakaambit sa pagtukod ug mga kongregasyon sa mga Saksi ni Jehova sa unom ka siyudad.a Dili pa dugay ako nakabaton sa kalipay sa pagsangyaw sa daghang katuigan uban sa akong kinamagulangang anak babaye, si Hiroko, sa Hachijo Island, nga 185 ka milya (300 km) gikan sa Tokyo sa Dagat Pasipiko.

Sukad ako nagmatagbawon sa paglaom sa kahibulongang umaabot sa yuta, ang akong hunahuna bahin sa yuta dakog kausaban. Sa Hachijo Island ilabina, kami gilibotan sa talagsaong kabulakan, ug samtang kami namalaybalay, among gidayeg kana dihang nakigsulti sa mga tagbalay diha sa ilang maanindot nga mga tanaman. Usa ka adlaw akong nahibalag ang usa ka tigulang babaye nga nag-atiman sa iyang mga bulak. Kana among gidayeg, apan siya mimulo: “Ako dili mahadlok nga mamatay, apan makaguol kanako nga kinahanglang mabulag ako niining mga bulaka inig-adto ko sa laing kalibotan.” Gisaysay nako nga ilalom sa pagmando sa Gingharian sa Diyos siya pagabanhawon gikan sa kamatayon ngadto sa usa ka paraisong yuta diin ang kabulakan kahimut-an sa walay kataposan. Misidlak ang iyang mga mata, ug nahikay ang pagtuon sa Bibliya.

Ako nadani usab sa yanong kinabuhi sa katawhan sa pulo. Sila masimbahon ilabina kon bahin sa pagpasidungog sa ilang katigulangan. Kon may mamatay, ang tanan sa komunidad obligadong motambong sa paglubong. Ako nanghinaot lamang nga kining tanang tawo makaila kang Jehova, ang Amahan sa kinabuhi, ug makasabot nga siya ang Diyos nga makapabuhi pag-usab sa ilang mga katigulangan dihang ang yuta mapasig-uli sa paraiso. Buot ko silang pahibaloon nga adunay dakong kalainan tali sa pagtahod ug pagsimba sa atong katigulangan. Kita angay magsimba lamang sa usa ka Amahan sa kinabuhi, si Jehova. Sumala sa giingon ni Jesus: “Bisan pa niana, ang takna nagasingabot, ug kini mao karon, dihang ang matuod nga mga magsisimba magasimba sa Amahan uban sa espiritu ug kamatuoran, kay, sa pagkamatuod, ang Amahan nagapangita sa mga ingon kanila sa pagsimba kaniya. Ang Diyos maoy Espiritu, ug kadtong nagasimba kaniya kinahanglang magsimba uban sa espiritu ug kamatuoran.”​—Juan 4:23, 24.

Karon sa akong ikapitong asaynment sa teritoryo, ako nagapasalamat kang Jehova samtang ako nagapadayon sa pagsulti sa katawhan mahitungod sa katuyoan sa langitnong Ginghariang kagamhanan ni Jehova ug sa kahibulongang mga panalangin nga igahatag niini niadtong si kinsa magbaton sa kahibulongang pribilehiyo sa pagkinabuhing walay kataposan sa yuta.—2 Pedro 3:13; Pinadayag 21:3, 4.

[Mga footnote]

[Hulagway sa panid 12]

Si Yuriko Eto nagtuon sa uban mahitungod sa saad sa Bibliya sa usa ka yutang paraiso