Ang Diyos sa “Daang Testamento”—Diyos ba Siya sa Gugma?
“ANG Diyos sa Daang Testamento, nga Yahweh sa Judaismo, maoy diyos nga nagapanunglo, diyos sa kasuko, diyos sa pangabugho, ug dili ako mahimong masuod kaniya.” Miingon si Youji Inoue, Hapones nga paring Katoliko, diha sa artikulong nag-ulohan “Hapones ug ang Kristiyanidad” sa usa sa dakong pamantalaan sa Japan, nga Asahi Shimbun. Apan, siya mipadayon, kining maong Diyos sa ulahi “nausab ug nahimong Diyos sa Bag-ong Testamento, sa ato pa, ang Diyos nga gitudlo ni Jesus.”
Aron matino, dili lamang ang pari nga si Inoue ang aduna ning hunahunaa. Apan mouyon ka ba kaniya? Mibati ba usab ikaw nga ang Diyos sa “Daang Testamento,” o sa Hebreohanong Kasulatan, maoy usa ka mabangis ug mapanimaslong Diyos kon itandi sa Diyos sa “Bag-ong Testamento,” o sa Kristohanon Gregong Kasulatan?
Taliwala sa mga tawo, ang mga personalidad mausab. Pananglitan, giawhag sa Bibliya kadtong nahigugma sa Diyos sa “pagsul-ob sa bag-ong personalidad nga gilalang sumala sa kabubut-on sa Diyos sa tinuod nga pagkamatarong ug pagkamaunongon.” (Efeso 4:24) Pinaagi sa pagtuon sa Bibliya ug sa pagpadapat sa ilang nakat-onan, daghan niadtong naghambin sa pangabugho, kasuko, ug uban pa, nakahimog dagkong mga kausaban, nga sa ingon sila karon nagpakita diha sa ilang adlaw-adlawng mga kinabuhi sa bunga sa espiritu sa Diyos—“gugma, kalipay, pakigdait, pagkamainantuson, kalulot, pagkamaayo, pagtuo, kalumo, pagpugong sa kaugalingon.”—Galacia 5:22, 23.
Ikasulti ba usab kini diha sa Maglalalang, si Jehova nga Diyos? Siya ba “nausab ug nahimo” gikan sa “diyos sa kasuko” ngadto sa Kristohanong Diyos sa gugma, nga maoy pagtawag kaniya sa uban?
Jehova—Diyos sa Gugma sa Tanang Panahon
“Ang Diyos gugma” misulat si apostol Juan. (1 Juan 4:8) Didto gipamulong niya ang walay kataposang kamatuoran: Ang Maglalalang, si Jehova, sa miagi, sa karon, ug sa tanang panahon maoy usa ka Diyos nga dili mobag-o ang gugma. Ug gikan sa sinugdan ngadto sa kataposan, ang rekord sa Bibliya naglaban nianang pulonga.
Dihang gilalang ni Jehova ang yuta, sa mahigugmaon gihimo niya kini nga usa ka maanindot nga puy-anan alang sa katawhan. (Isaias 45:18) Sa ulahi, dihang iyang gilalang ang unang lalaki ug babaye, si Adan ug Eva, iyang gihimo sila “sa iyang dagway,” sa ato pa, iyang gihatagan sila ning diyosnong mga hiyas sama sa gugma, hustisya, kaalam, ug gahom. Iyang gibutang sa ilang atubangan ang palaabuton sa pagbaton ug mga anak, sa paghimo sa tibuok yuta nga usa ka paraiso, ug magpuyo niana sa walay kataposan. (Genesis 1:27, 28) Dili ba kining tanan maoy pamatuod sa gugma sa Diyos?
Dihang ang unang tawhanong paris nadaog sa pagsulay ni Satanas pinaagi sa bitin, nawala nila ang walay kataposang mga panalangin dili lamang alang sa ilang kaugalingon kondili sa ilang wala pa matawong mga anak. Ning kritikal nga yugto, gipahayag ni Jehova ang unang tagna nga narekord sa Bibliya, nga mao, nga samaran sa gisaad nga ‘binhi sa babaye’ ang ulo sa bitin. (Genesis 3:15) Dili ba kining saara sa paglaom ug kaluwasan maoy laing tagsaong pasundayag sa gugma sa Diyos?
Mga 2,000 ka tuig sa ulahi, misaad si Jehova sa iyang matinumanong alagad nga si Abraham: “Pinaagi sa imong binhi ang tanang kanasoran sa yuta magapanalangin sa ilang kaugalingon,” busa nagpadayag nga ‘ang binhi sa babaye’ moabot pinaagi sa linya sa pamilya ni Abraham. (Genesis 22:18) Kining saara nakalig-on sa paglaom sa kaluwasan ug nagpakita nga ang gugma ni Jehova sa katawhan wala mahanaw sa milabay ang panahon. Anaa sa iyang hunahuna ang bulahang umaabot alang sa katawhan sa paghimo ning saara. Siya sa tinuod maoy usa ka Diyos sa gugma!
Ang Gugma sa Diyos sa Israel
Dugang pa, giluwas ni Jehova nga Diyos ang mga Israelitas gikan sa pagkaulipon sa Ehipto sa 1513 W.K.P. ug mihimog Balaod sa pakigtugon uban kanila pinaagi kang Moises. Diha sa ikaduha sa Napulo ka Sugo, si Jehova miingon: “Kay ako, si Yahweh nga imong Diyos, mao ang Diyos nga abughoan [nagapangayog bug-os nga debosyon, New World Translation] nga magasilot sa pagkadaotan sa amahan ibabaw sa mga anak, sa ibabaw sa ikatulo, ug sa ibabaw sa ikaupat nga kaliwatan sa mga nagadumot kanako; apan nagapakita sa mahigugmaong kalulot alang sa linibo kanila nga nahigugma kanako ug nagabantay sa akong mga sugo.”—Exodo 20:5, 6, The Jerusalem Bible.
Ingong Soberano ug bana, si Jehova may katungod sa pagpangayog bug-os nga debosyon gikan sa iyang katawhan sa pakigtugon, ang Israel. (Isaias 54:5; Jeremias 3:14) Dihang wala magpabiling matinumanon ang iyang katawhan ug misimba sa bakak nga mga diyosdiyos sa makadaghang higayon, dili ba makataronganon nga si Jehova, tungod sa iyang gugma alang kanila, nagdisiplina kanila, sa pagpasundayag sa iyang dili pag-uyon ug sa pagtunglo sa ilang balikong dalan?
Sa daghang mga okasyon, nagpakita si Jehova ug lalom nga pagtagad sa iyang katawhan ug mihangyo kanila sa pagbalik ngadto kaniya. (Isaias 55:7) Bisag gikastigo niya sila sa ilang mga kasal-anan, nga sa kataposan mitugot nga mapukan ang ilang pagkahimong nasod ug nangabihag sa laing langyawng yuta, sa tinakdang panahon iyang gipabalik sila ngadto sa ilang yutang-natawhan. Unsay gipakita niining tanan bahin kang Jehova? Siya ba abughoan, madumtanon, ug mapanimaslong Diyos? Dili! Hinunoa, kini nagpakita nga siya maoy “usa ka Diyos nga maluloy-on ug mahinatagon, mahinay sa kasuko ug dagaya sa mahigugmaong kalulot ug kamatuoran.”—Exodo 34:6; Nehemias 9:17; Joel 2:13; Nahum 1:2, 3.
Gugma nga Gipasundayag Pinaagi sa Iyang Anak
Sa nanglabayng kasiglohan, mitagana si Jehova ug dugang mga detalye mahitungod sa ‘binhi sa babaye’ ug sa ‘binhi ni Abraham,’ ug pinaagi sa Iyang mga propeta Siya mitagna sa pag-abot sa Mesiyas. Dihang miabot ang tinudlong panahon, gipasundayag sa Diyos ang iyang gugma sa dili hitupngang paagi—pinaagi sa pagpadala sa iyang bugtong Anak sa yuta aron sa pagtaganag halad lukat.
Bahin ning katingalahang tagana, si apostol Juan misulat: “Kay gihigugma gayod sa Diyos ang kalibotan nga tungod niana gihatag niya ang iyang bugtong Anak, aron ang tanan nga motuo kaniya dili malaglag, kondili may kinabuhing dayon.” (Juan 3:16) Sanglit ang gugma sa Diyos pinaagi sa iyang Anak, si Jesu-Kristo, dako man kaayo, ang uban nasayop sa pagtuo nga dili mahimong Siya gihapon ang Diyos nianang usa nga gihisgotan sa Hebreohanong Kasulatan nga nagpakanaog silot ug paghukom.
Apan ang Diyos ba nga gitudlo ni Jesus lahi kaayo gikan sa Diyos nga gilarawan sa Hebreohanong Kasulatan? O ang mga tawo lang ba ang mipili sa pagtan-aw sa gusto nilang tan-awon? Dili ba kanang iladong kasulatan, sa Juan 3:16, tin-awng nagpakita nga kon ang usa dili “motuo” sa Anak, siya “pagalaglagon”? Dugang pa, si Juan mipadayon sa pag-ingon: “Ang dili mosugot sa Anak dili makatilaw ug kinabuhi, hinunoa ang kapungot sa Diyos magapabilin diha kaniya.” (Juan 3:26) Kon wala kini makakuha sa pagkadako sa gugma sa Diyos, nan nganong ang iyang gipakitang kasuko batok sa dili matinumanong mga Israelitas ug sa uban sa Hebreohanong Kasulatan nakahimo kaniyang dili usa ka Diyos sa gugma?
Ang Mahigugmaong Katuyoan sa Diyos Alang Kanimo
Pinaagi sa iyang propetang si Malaquias, ang Diyos miingon: “Ako mao si Jehova; walay pagkabalhin.” (Malaquias 3:6) Dili lamang nagpabilin siyang walay pagkabalhin ingong Diyos sa gugma kondili ang iyang mahigugmaong katuyoan bahin sa katawhan ug sa yuta nagpabiling wala usab mabalhin. Sama nga gihikyad ni Jehova atubangan kang Adan ug Eva ang palaabutong kinabuhing walay kataposan sa paraisong yuta, sa ingon kining Diyos sa gugma nagatinguha nga usa ikaw niadtong magpuyong malipayon sa walay kataposan niana nga Paraiso. (Lucas 23:43; 2 Pedro 3:13; Pinadayag 21:4) Apan unsay gikinahanglan? Si Jesus miingon: “Ang kinabuhing dayon mao kini, ang ilang pagkuhag kahibalo kanimo, nga mao ang bugtong tinuod nga Diyos, ug kang Jesu-Kristo nga imong pinadala.” (Juan 17:3) Malipay ang mga Saksi ni Jehova sa pagtabang kanimo sa pagkakat-on bahin kang Jehova, ang Diyos nga dili mabalhin ang gugma.