Ang Tagna ni Daniel—Mga Damgo nga Nagaapektar Kanimo
“Abi ninyo, ako moliso ngadto sa inyong karaang mga manalagna sa Daang Tugon ug sa mga ilhanang nagatagna sa Armageddon, ug ako mahibulong kon—kon kita ba ang kaliwatang makakitang mahitabo kini. Ambut kon kamo nakamatikod ba sa maong mga tagna sa dili pa dugay, apan tuohi ako, sila nagabatbat gayod sa panahong atong gipuy-an.”—Presidente sa T.B. si Ronald Reagan.
SI Presidente Reagan dili mao lamang ang nahibulong kon kaha ang panahong atong gipuy-an mao ang gitagna sa mga tagna sa Bibliya. Minilyon pang uban natingala usab sa pagkahaom sa mga kahimtang karon sa kalibotan ngadto sa mga tagna sa Kasulatan. Hinuon, kining mga tagnaa nagatagna dili lamang sa walay-ingong panahon sa kalisdanan kondili sa matarong bag-ong sistema sa mga butang usab nga mosunod dayon niana.
Kining artikuloha maoy una sa serye, nga moabot sa upat ka magsunod nga isyu sa Ang Bantayanang Torre, nga gilaraw sa pagpasinati kanimo sa usa ka karaang manalagna, kansang ngalan mao si Daniel. Tingali ikaw nakaila kaniya. Siya usa ka Hudiyo nga may hamiling pagkatawo. Samtang batan-on pa, si Daniel gidala ngadto sa Babilonya, diin siya naedukar sa korte ni Nabukodonosor, ang ikaduhang hari sa Neo-Babilonyanhong Imperyo. Kadto maoy sa kataposan sa ikapitong siglo W.K.P., sa wala pa malaglag ang Jerusalem. Si Daniel nagpabiling binihag hangtod sa pagkapukan sa Babilonya sa 539 W.K.P., nga tapos niana siya nag-alagad sa korte sa unang Medo-Persianhong mga magmamando. Panahon sa iyang pagkadistiyero siya mihubad sa mga damgo ug nakabatog mga panan-awong may kalabotan sa atong adlaw. Oo, ikaw ug ang imong pamilya nalangkit sa gitagna ni Daniel.
Matagnaong mga Damgo ug mga Panan-awon
Sa pagkamatuod, ang mga damgo ug mga panan-awon sa basahon ni Daniel maoy dili-madugay ug madugay pang mga tagna. Kini maoy kasaysayan sa kalibotan nga sinulat daan. Sila maoy pasiunang mga talan-awon sa pag-ilogay ug gahom sa mga tawo, mga dinastiya, ug politikanhong mga imperyo sukad sa panahon ni Daniel latas sa kasaysayan hangtod sa “panahon sa kataposan.”—Daniel 8:17, 19.
Ang pagkatuman sa dili-madugay nga mga tagna angay modasig sa atong pagsalig sa madugay pang mga tagna nga makaabot sa atong panahon. Unsa ang pipila niining dili-madugay nga mga tagna?
Ang usa mao ang damgo bahin sa usa ka dakong kahoy nga giputol ug gipikitan sulod sa “pito ka panahon,” o katuigan, una tugoting moturok pag-usab. (Daniel 4:10-17) Sa dili-madugay nga katumanan niini kining tagnaa gipadapat kang Haring Nabukodonosor, kinsa mao ang nagdamgo. Usa lamang ka tuig sa ulahi, ang maong magmamando ‘giputol,’ lagmit tungod sa sakit sa utok. Sulod sa pito ka tuig siya milihok samag mananap sa kapatagan. Dayon, “sa kataposan sa mga adlaw” nga gitagna, si Nabukodonosor napasig-ulian sa iyang maayong kaisipan ug sa iyang trono. (Daniel 4:28-37) Sumala sa The International Standard Bible Encyclopedia, ang karaang mga tinubdan nagapailang si Nabukodonosor nagmasakiton sa hinapos sa iyang paghari. Apan kadtong damgoha may madugay usab nga katumanan, sumala sa ipakita sa ulahing artikulo niining seryeha.
Ang laing dili-madugay nga tagna sa basahon ni Daniel gitagana sa milagrosong sinulat sa kamot sa bungbong sa dapit gikombirahan diin ang apo ni Nabukodonosor si Belsasar ug ang iyang mga prinsipe nagkombira. (Daniel, kapitulo 5) Ilang gipasipad-an ang sagradong mga panudlanan nga kinuha gikan sa templo ni Jehova sa Jerusalem. Ilalom sa pagdasig, si Daniel naghubad niadtong mensahe sa balaang paghukom. Ug sa katumanan, “niadtong gabhiona mismo” ang Babilonya napukan ug “si Belsasar ang Kaldeanhong hari napatay,” sumala sa gipamatud-an sa Gregong historyano si Xenophon. (Daniel 5:30) Apan karong adlawa adunay sinulat sa kamot sa bungbong alang sa daotang sistema sa mga butang karon. Kini, usab, isaysay sa usa ka artikulo niining seryeha.
Dili-Tinakpan sa “Panahon sa Kataposan”
Sa hinapos sa iyang matagnaong basahon, gisulat ni Daniel kining mensahea nga iyang nadawat gikan sa usa ka manulonda: “Ug alang kanimo, Oh Daniel, himoang tinago ang mga pulong ug takpi ang basahon, hangtod sa panahon sa kataposan. Daghan ang magngadto-nganhi, ug ang tinuod nga kahibalo modagaya.”—Daniel 12:4.
Karong adlawa, ang “tinuod nga kahibalo” sa katumanan sa tagna sa Bibliya tinuod nga nagmadagayaon. Kining miuswag nga pagsabot nakapatuo sa minilyong seryosong estudyante sa Bibliya nga kita nagapuyo gayod sa “panahon sa kataposan” ug haduol na ang Gingharian sa Diyos sa pagkamatarong. (Daniel 2:44) Sa pagpakita sa pagkamapadapat sa basahon ni Daniel niining bahina, ang Soncino Books of the Bible nagaingon: “Ang kadaogan sa kataposan sa pagkamatarong, uban ang mosunod niining pagkatukod sa Gingharian sa Diyos, maoy paninugdan diha sa Daniel.”
Gilaoman ba nimo “ang kadaogan sa kataposan sa pagkamatarong”? Kon mao, ang matagnaong mga damgo ug mga panan-awon sa Daniel hinungdanon kanimo. Ang mosunod nga artikulo mopahibalo kanimo sa pipila niini ug mohatag ebidensiya nga magapamatuod nga ang Daniel maoy kasaligang basahon sa tagna.