Pagsadya Taliwala sa Katawhan sa Diyos

ANG mga pulong ni Haring David, nga nahitala sa Salmo 68, bersikulo 2-4, nagaapil sa mainitong pagdapit sa tanang mahigugmaon sa tinuod nga kagawasan: “Manag-awit kamo sa Diyos, manag-awit sa iyang ngalan; ipatugbaw ang usa ka awit ngadto sa Usa nga nagasakay sa desyertong kapatagan sama kang Jah, nga mao ang iyang ngalan; ug magsadya sa iyang atubangan.” May mas labaw pa bang pribilehiyo kay sa pagsadya atubangan sa atong Diyos? (Isaias 12:2, 3) Sa tibuok tuig 1986, gilig-on ni Jehova sa kahibulongang paagi ang iyang mga saksi samtang sila nagpadayon sa pagmantala sa kagawasan ngadto sa mga katawhan sa yuta.

Ang mosunod nga mga panid nagahatag ug sumaryo sa tibuok-kalibotang kalihokan sa mga Saksi ni Jehova sa 1986. Pagkatagsaon ang hinungdan sa pagsadya! Sumala sa gipakita sa mga numero, ang kinatas-ang gidaghanon sa aktibong mga Saksi sa 208 ka yuta nga nagtaho miuswag ngadto sa 3,229,022, usa ka 6.8-porsientong pag-uswag sulod sa tuig. Ang gidaghanon sa nabawtismohan maoy 225,868.

Paghandom sa Kamatayon ni Jesus

Ang mitambong sa pangunang tigom sa tuig, ang Memoryal sa kamatayon ni Jesus, miuswag ngadto sa labing menos 8,160,597, bisan tuod ang pila ka taho wala madawat tungod sa nagkadaot nga mga kahimtang sa kalibotan. Ang gidaghanon sa miambit sa mga emblema sa Memoryal mius-os ngadto sa 8,927 samtang ang mas tigulang nga mga dinihogan nakatapos sa ilang yutan-ong pag-alagad.​—Pinadayag 2:10.

Daghan sa mga nagtigom ingong pagsugot sa sugo ni Jesus nagpakitag talagsaong kaisog. (1 Corinto 11:23-26; Juan 16:33) Sa usa ka Aprikanhong yuta diin gidili ang buluhaton ni Jehova, ang kongregasyon nagtigom sa balay sa usa ka igsoon sa pagsaulog sa Memoryal. Walo pa lang ka minutos sa pakigpulong, ang lokal nga mga awtoridad mitungha sa pagsikop sa mga igsoon. Ilang gimando nga hunongon ang tigom. Ang mga igsoon maluluton apan malig-ong miinsistir nga kinahanglang ilang tahoron ang maong Memoryal sa haladnong kamatayon ni Jesus. Tapos sa pagpangatarongan ug paghangyo sa kapolisan, sila mitugot nga magpadayon nga nakabati ang mga polis. Ang tigom natapos nga malinawon, ug ang tanan gisikop. Tapos sa pagsukitsukit, lima ang gipriso. Sila nagpabilin sa prisohan sa usa ka panahon apan unya gibuhian, malipayong sila sa ingon nakasaulog sa Panihapon sa Ginoo!​—1 Juan 5:3, 4.

Ang Nigeria, diin ang gidaghanon sa mga Saksi miuswag ngadto sa 128,461, may tumatambong sa Memoryal nga 394,370​—ang kinatas-an sukad. Ang usa ka tigom sa Memoryal gihimo sa dapit sa konstruksiyon sa bag-ong mga tinukod sa Bethel sa Igieduma, ug kapin sa 700​—halos ang tibuok nga balangay​—didto!

Gikan sa Mexico miabot ang taho: “Sa bisan diin kami moadto sa nasod, nagaawas ang kadasig sa mga magmamantala, ug ang tibuok nasod daw mainit sa kamatuoran. Ang mga igsoon nahupong sa kamatuoran, ug ang ilang mga kinabuhi nasentro sa kamatuoran. Ang tibuok nga mga pamilya nagadawat sa kamatuoran. Ang dakong porsiento sa katawhang nagatuon nagasugod sa pagtambong sa mga tigom sa samang panahon. Kini nagabulig kanila sa pag-uswag nga kusog.” Ang Mexico mitaho sa tumatambong sa Memoryal nga 838,467. Sa Agosto ang 198,003 ka magmamantala sa Gingharian nianang yutaa nagdumalag 327,664 ka pagtuon sa Bibliya diha sa mga balay sa katawhan. Dako gayod ang ilang purohan sa padayong pag-uswag!

Dugang Kauswagan sa Tibuok Yuta

Gikan sa sentro sa Kakristiyanohan miabot ang susamang mga taho sa kauswagan. Nakab-ot sa Italya ang bag-ong kinatas-ang ihap nga 139,570 ka magmamantala sa Agosto, ug 301,009 ang presente alang sa pagsaulog sa Panihapon sa Ginoo. Ang mga Saksi ni Jehova ‘nagapasidlak gayod sa ilang kahayag atubangan sa mga tawo.’ (Mateo 5:16) Pananglitan: “Ang usa ka igsoong babaye nagbutang sa kuwarta sa usa ka makinang tiketan sa bus dihang ang usa ka kaila miingon kaniya nga dili kinahanglan ang pagbayad kay mubo kaayo ang pagsakay. Ang igsoong babaye misaysay nga matarong ang pagbayad sa tiket, bisan alang sa usa ra ka hunonganan. Tapos niadto, ang iyang higala nanaog sa bus. Niana, ang drayber sa bus milingi kaniya ug miingon: ‘Saksi ka ba ni Jehova?’ ‘Oo,’ mitubag ang igsoong babaye, ‘nganong nangutana ka man?’ ‘Akong nadunggan ang inyong estorya mahitungod sa pagbayad sa tiket sa bus, ug ako nasayod nga ang mga Saksi ni Jehova nahiapil sa diyutay ra kaayong tawo nga nagabuhat niana ug matinud-anon sa tanang butang.’ Pila ka bulan sa ulahi, usa ka lalaki miduol sa igsoong babaye sa usa ka tigom ug miingon, ‘Nakaila ka ba kanako? Ako ang drayber sa bus nga nakigsulti kanimo bahin sa pagbayad alang sa tiket. Sa pagpaniid sa inyong panggawi, ako mihukom sa pagsugod sa pagtuon sa Bibliya uban sa mga Saksi ni Jehova.”

Ang Britanya may kinatas-ang ihap nga 107,767 ka magmamantala sa Gingharian, apil kining bag-ong bawtismadong igsoong lalaki: “Si George karon maoy 84 anyos. Tapos sa 50 anyos ingong membrong magwawali sa lokal nga iglesya, iyang nasayran ang kamatuoran. Sa sinugdan, sa matapos niya ang iyang pagtuon sa Bibliya sa balay, siya modali pagsulod sa laing lawak aron manigarilyo. Siya regular nga tigtabako sa 70 ka tuig. Apan tapos sa pagtuon sa kapitulo 26 sa librong Ikaw Mabuhing Walay Kataposan sa Paraiso sa Yuta, siya wala na gayod motabako pag-usab. Si George karon nabawtismohan sulod sa kapin sa tuig ug madasigon kaayo sa pagsangyaw sa kanataran, nga nagasulti sa uban mahitungod sa mga panalangin nga ipatungha ni Jehova sa Iyang bag-ong sistema sa mga butang.”

Ang Pederal nga Republika sa Alemanya nagtaho sa kinatas-ang ihap nga 118,645 ka magmamantala. Adunay linibo usab nga matinumanong Saksi nga ‘nagapasidlak sa ilang kahayag’ sa nait nga Alemang Demokratikong Republika. Sa Alemanya ang matinumanong mga karaang alagad nagadumili sa pagbutang sa “espada sa espiritu.” (Efeso 6:16, 17) Usa ka kongregasyon nagtaho: “Kami may usa ka igsoong babaye nga 103 ka tuig sa edad ug nagapuyo gihapong siya ra. Gihikay sa mga ansiano nga ang usa ka pundok sa pito ngadto walo ka igsoong babaye magturnoturno sa pag-atiman kaniya matag semana. Kini ilang ginabuhat sulod na karon sa miaging tulo ngadto upat ka tuig. Ang mga social worker, nga gisuholan sa komunidad, moanha sa pag-atiman sa pagdigo ug pag-ilis. Apan kon sila magsakit o magbakasyon, ang atong mga igsoong babaye ang mobanos sa trabaho. Kining ebidensiya sa Kristohanong gugma ug pagsakripisyo nahimong maayong pamatuod alang sa mga tagagawas. Ang atong 103-anyos nga igsoong babaye sa pangutok igmat ug nagaisip sa mga social worker ingong iyang ‘teritoryo.’ Siya nagasangyawng madasigon kanila samtang sila magadigo kaniya ug nagahatag kanilag mga basahon.” Sa pagkamatuod, “ang pagkaubanon maoy purongpurong sa katahom dihang kini hikaplagan sa dalan sa pagkamatarong.”​—Proverbio 16:31.

Bisan pa niana, ang pagdapit sa pagdayeg kang Jehova maoy alang sa katawhan sa tanang panuigon​—“kamong mga batan-ong lalaki ug kamong mga ulay usab, kamong mga tigulang lalaki uban sa mga batang lalaki.” Daghang batan-on ‘nagahinumdom sa ilang Dakong Maglalalang sa mga adlaw sa ilang pagkabatan-on.’ (Salmo 148:12; Ecclesiastes 12:1) Sa Brazil, diin may talagsaong bag-ong kinatas-ang ihap nga 196,948 ka magmamantala, nadawat sa Watch Tower Society ang usa ka sulat gikan sa usa ka nahilit nga lungsod diin duha ka batan-ong lalaki misangyaw sulod sa pila ka bulan. Kini mabasa sa bahin: “Buot kong dayegon kamo tungod sa buotang mga batan-on sa inyong relihiyon. Ako usa ka magtutudlo ug may pakiglabot sa mga batan-on, ug ako nasayod nga sila dili sama sa nangagi. Ang inyong mga batan-on usa gayod ka sulundan. Sila nagatahod sa ilang mga tigulang, matinahoron ug kasarangan sa panapot. Ug sila nahibalo gayod sa ilang mga Bibliya! Kana gayod ang relihiyon! Anugon nga sila kinahanglang mobiya.” Ang pamipamilya sa atong mga igsoon karon namalhin sa pagpuyo ngadto sa pipila niining nahilit nga mga dapit sa pag-atiman sa interes.

Unsa ang pag-uswag sa kamatuoran diha sa dili-Kristohanong mga dapit? Ang The Wall Street Journal sa Hulyo 9, 1986, mipatik sa taas nga artikulo nga nag-ulohang “Umaw nga Yuta​—Kristohanong mga Misyonaryo Nagpugas sa Binhi sa Hapon Apan Nakita Nilang Diyutay ra ang Mitubo.” Usa ka misyonaryo sa United Church of Christ gitahong miingon, “Walay paaging ang Kristiyanidad mogamot sa Hapon,” ug ang usa ka Franciscanong pari mipahayag, “Natapos na ang adlaw sa langyaw nga misyonaryo sa Hapon.” Sila nagbudlay nga kawang sulod sa kapin ug 30 anyos. Ang artikulo miingon: “Walay 1% sa populasyon ang Kristohanon, ug bisan pa sa tanang misyonaryong buluhaton, ang porsiento nagaus-os.” Husto na sa mga relihiyon sa Kakristiyanohan! Apan komosta ang mga Saksi ni Jehova, nga nagatudlo sa putli nga Kristiyanidad nianang nasora? Sulod sa miaging 92 ka bulan nga sunodsunod, ang gidaghanon sa ilang aktibong mga ministro miuswag ngadto sa kinatas-ang ihap nga 113,062 (apil ang aberids nga 46,390 nga “mga payunir” matag bulan). Sa Hapon 146,316 ka pagtuon sa Bibliya sa balay ginadumala uban sa mga tawong bag-ong interesado. Kini tinong usa ka timaan sa dugang dakong pag-uswag. Dinhi, atong makita ang buhing katumanan sa Isaias 65:13, 14.

Ang Natad sa Pagpayunir

Komosta ang sentro niining tanang dakong kalihokan​—ang Tinipong Bansa sa Amerika? Didto, 744,919 ka magmamantala sa Gingharian ang diha sa kanataran ingong kinatas-ang ihap. Apan gikinahanglan ba gayod ang maong ‘lokal nga mga misyonaryo’? Gikinahanglan gayod, kay ang krimen, mga droga, imoralidad, sakit, ug kahiwian nagatubong labi pang grabe kay diha sa gitawag paganong mga kayutaan. Ang mga tawong buot ug mas maayong mga butang nagakinahanglan sa paglipay ug paglaom, ug nabatonan sa mga Saksi ni Jehova ang maong mensahe. (Isaias 61:1, 2; Mateo 24:14) Sa Tinipong Bansa, sulod sa 1986, ang maong mga ministro mideboto sa 146,673,490 ka oras sa pagpahayag sa maayong balita sa Gingharian. Kana maoy 12.6-porsientong pag-uswag, o 16,449,229 dugang oras kay sa miaging tuig. Kanang panahona gigugol nga mapuslanon, kay 6,138,938 ka libro ang napanagtag, nga maoy 23.2-porsientong pag-uswag kay sa miaging tuig. Sa Abril lamang, ang katibuk-ang gidaghanon maoy kapin sa 1,000,000 ka libro nga nagapatin-aw sa matuod nga paglaom sa kalinaw ug kasegurohan.

Usa sa labing makapaukyab nga mga bahin sa taho sa Tinipong Bansa mao ang pag-uswag sa payunir nga pag-alagad. Sa pagka Abril may kinatas-ang ihap nga 45,786 regular nga payunir, pag-uswag nga 23 porsiento kay sa miaging tuig. Kon imong itapo ang maong numero sa aberids nga 43,369 auxiliary payunir ug sa aberids nga 279 espesyal payunir, kini nagkahulogang kada bulan duolag 90,000 ang nagpahayag sa bisan diin sa Gingharian sa Diyos diha sa buluhatong payunir. Kini mga batan-on ug mga tigulang, usab, nga maalamong nagagamit sa ilang panahon sa pagdayeg kang Jehova.

Paghatag sa Bug-os nga Pamatuod

Sa pagtudlo sa publiko ug sa balay-balay, si apostol Pablo “bug-os nagpamatuod” sa maayong balita. (Buhat 20:20, 21) Ang susamang pamatuod ginahatag sa daghang teritoryo karong adlawa. Pananglitan, kining tahoa nagagikan sa Guadeloupe: “Sa pagkatapos sa tuig sa pag-alagad, kami may usa ka magmamantala alang sa 72 ka tawo. Dili na mistil isulti, kami ilado kaayo sa tibuok nasod! Ngani, sa daghang dapit, kami moadto sa samang teritoryo sa kada semana. Ang pipila nakaingon nga tinong ang mga tawo gipul-an na sa pagkakita kanamo, o makapaluya nga maanaa sa samang teritoryo sa sunodsunod nga semana. Sa kasukwahi, sa dugang kami mosangyaw sa teritoryo, mapukaw ang dugang interes. Ug ang pamatuod? Aw, kini mao ang kinatas-ang ihap sa miaging Abril nga 7,136 ka pagtuon sa Bibliya sa balay nga gidumala sa among 4,558 ka magmamantala! Dili pa dugay ang usa ka magasin may pangunang-ulohan: ‘Mga Saksi ni Jehova​—Mga Hari sa Balay-Balay’! Giisip namo kana nga kadungganan. Sulod sa tuig sa pag-alagad, 458 ka bag-ong igsoong lalaki ug igsoong babaye ang nabawtismohan.” Ang pagkalig-on ug kalipay nga gipasundayag sa pagsangyaw nga balikbalik sa among teritoryo, pagkaila ug pagpakighigala sa katawhan, nga mahigugmaong naghanaw sa ilang mga sayop nga pagtuo​—kini mahimong motultol sa pagkaplag ug daghang karnerohong tawo.

Si Jehova tugob nagapanalangin sa iyang mga alagad sa usa ka Aprikanhong nasod diin ang buluhaton gidili ug nagasilaob ang gubat sibil. Nianang yutaa daghan sa atong mga igsoon nagaantos sulod sa mga prisohan, ug ang pila ka batan-ong Saksi gipatay. Bisan pa niana, ang Abril may talagsaong taho, uban ang napulo tanang-panahong kinatas-ang mga ihap. Ang bag-ong numero sa magmamantala maoy pag-uswag nga 29 porsiento kay sa miaging tuig. Talagsaon ang kadasig nga gipadayag niining minahal nga kaigsoonan! Ang aberids nga oras sa Abril maoy kapin sa 18 matag magmamantala, ug ang pagtuon sa Bibliya maoy 2.6 matag magmamantala.

Ang sekretong mensahe nga nadawat sa sangang buhatan nga nagaatiman sa maong teritoryo igo na sa paghatag ug ideya sa nagalungtad nga kahimtang. Kini mabasa: “Ang kainit padayong nagamakmak kanamo. Ang panlimbasog nga gikinahanglan aron kami makalakawlakaw ug makakitag tawo maoy pamatuod sa naglagiting nga kainit. Apan kita nasayod nga kita gibuhat sa paaging makapahiuyon ngadto sa bisan unsang temperatura ug silinganan. Bisan pa sa tanan, kami nagaagwanta ug nagasalig nga kami molahutay.” Talagsaong integridad!

Ang matag usa nga mga maghuhupot-sa-integridad maglangkob sa nagahupot-sa-integridad nga organisasyon. Ang tibuok-yutang organisasyon sa 3,229,022 ka saksi ni Jehova maoy ingon! Sila nagalantaw nga maluwas sa umaabot nga “dakong kasakitan” ug sa pagpakig-ambit, ilalom sa Gingharian ni Kristo, sa dakong buluhaton sa pagbalhin niining yutaa nga paraiso. (Pinadayag 7:14; 21:3, 4; Isaias 65:17, 21-23, 25) Sila nagamasadyaon tungod sa pagpanalangin bisan karon sa ilang madasigong kalihokan, bisan kon sila nagawali sa pulong “sa maayong panahon” o “sa masamokong panahon.” (2 Timoteo 4:2) Ang mosunod nga mga panid nagapakita giunsa nila pagsugot ang tema sa ilang 1986 tinuig nga teksto: “Lumakaw kamo . . . , imantala sa bisan diin ang gingharian sa Diyos.”

—Lucas 9:60.

[Kahon/Letrato sa panid 7]

Pila ka Bahin sa Tibuok-Yutang Taho sa mga Saksi ni Jehova

Pag-uswag:

Kinatas-ang ihap sa magmamantala: 3,229,022 6.8%

Binulang aberids sa payunir: 391,294 21.2%

Total gidaghanon sa oras sa pagsangyaw: 680,837,042 15.3%

Aberids binulang pagtuon sa Bibliya sa balay: 2,726,252 14.6%

Total gidaghanon sa nabawtismohan sa 1986: 225,868 19%

[Chart sa panid 10-13]

1986 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN

(Tan-awa ang bound volume)

[Mga Letrato sa panid 8, 9]

PAGSANGYAW SA “DAYAG UG SA BALAY-BALAY” “NGADTO SA KINALAY-ANG BAHIN SA YUTA”

Davao Pilipinas

Venice Italya

Castle Combe Inglaterra

Gålå Norway

Kowloon Hong Kong

Taipei Taiwan

Queenstown New Zealand

Bolgatanga Ghana

Paris Pransiya

Quetzaltenango Guatemala

Kerala India

Banff Canada