Mga Pangutana Gikan sa mga Magbabasa
◼ Sa karaang Israel ang usa ka tuyok o siklo sa 49 ka tuig gisundan sa usa ka tuig sa Tinghugyaw (ika-50ng tuig). Ang maong Tinghugyaw katumbas ba sa yugto human sa semana sa paglalang sa Diyos nga may 49,000 ka tuig?
Kay ang numerong 49 makita sa duruha ka kaso, mopatim-aw tingaling ang Tinghugyaw maglandong sa panahon human matapos ang semana sa paglalang nga may 49,000 ka tuig. Apan alang sa katawhan sa linangkob nga magadawat sa pag-uyon sa Diyos, ang nahitabo panahon sa Tinghugyaw sa Israel labawng motumbas sa mahitabo panahon sa Milenyo, ang kataposang usa ka libo ka tuig sa maong semana sa paglalang, dili sa pagkahuman nianang semanaha. Tagda ang pasikaranan alang niini:
Nahauna, ang Moisesnong Kasugoan nagbaod nga ang matag ikapitong tuig maoy usa ka igpapahulay alang sa yuta; walay pagpugas, pagtikad, o pag-ani sa mga tanom. Tapos sa ikapitong tuig nga Igpapahulay (ang ika-49 nga tuig), may espesyal nga tuig sa Tinghugyaw, ang ika-50ng tuig. Kadto usa ka igpapahulay nga sa maong panahon ang yuta magpahulay na usab. Labing hinungdanon, gimantala ang kagawasan. Ang mga Hebreohanon nga nagbaligya sa ilang kaugalingon sa pagkaulipon gipahigawas sa pagkautangan ug pagkaulipon. Gawas pa, ang yutang panulondon giuli ngadto sa mga banay nga napugos sa pagbaligya niana. Busa ang Tinghugyaw maoy panahon sa kagawasan ug pagpasig-uli alang sa mga Israelinhon.—Levitico 25:1-46.
Ikaduha, ang pagtuon sa pagkatuman sa tagna sa Bibliya ug sa atong nahimutangan sa agos sa panahon kusganong nagapaila nga ang matag usa sa mga adlaw sa paglalang (Genesis, kapitulo 1) maoy 7,000 ka tuig ang gidugayon. Masabot nga ang pagmando ni Kristo sa usa ka libo ka tuig magtapos sa 7,000-tuig nga ‘adlaw sa pahulay’ sa Diyos, ang kataposang ‘adlaw’ sa semana sa paglalang. (Pinadayag 20:6; Genesis 2:2, 3) Ipasukad sa maong pangatarongan, ang tibuok semana sa paglalang maoy 49,000 ka tuig sa gidugayon.
Sa pagmatikod sa pagkapareho sa mga numero, gitandi sa pipila ang 49 ka tuig sa karaang tuyok sa Tinghugyaw ngadto nianang 49,000 ka tuig sa semana sa paglalang. Sa pagpangatarongan niining paagiha, sila naghunahunang ang Tinghugyaw sa Israel (ika-50ng) nga tuig maghulagway, o maglandong, nianang human matapos ang ‘semana sa paglalang.’
Bisan pa niana, hinumdoming ang Tinghugyaw sa linain maoy usa ka tuig sa pagpagawas ug pagpasig-uli sa katawhan. Ang semana sa paglalang sa malangkobon may kalabotan sa planetang Yuta ug ang pagkaugmad niini. Apan kon bahin sa pagpalampos sa katuyoan sa Diyos alang sa tawo sa yuta, ang globo mismo wala mahabaligya sa pagkaulipon ug busa wala magkinahanglag kagawasan. Ang katawhan mao ang nagakinahanglan niana, ug ang mga tawo nagalungtad na, dili sulod sa 49,000 ka tuig, kondili sulod sa mga 6,000 ka tuig. Ang Bibliya nagapakitang sa usa ka panahon tapos malalang si Adan ug si Eva, sila mirebelde sa Diyos, sa ingon nabihag sa sala, pagkadili-hingpit, ug kamatayon. Sumala sa Roma 8:20, 21, si Jehova nga Diyos may katuyoan sa pagpahigawas sa matinuohong katawhan gikan sa maong pagkaulipon. Ingong resulta, ang matuod nga mga magsisimba sa yuta “pagawson gikan sa pagkaulipon sa kadunotan ug magbaton sa mahimayaong kagawasan sa mga anak sa Diyos.”—Tan-awa usab ang Roma 6:23.
Samtang ang gamayng pundok nga gipiling dad-on sa langit napasaylo na sa ilang mga sala sukad sa Pentekostes 33 K.P. paunahan ug sa ingon nagapahimulos na sa Tinghugyaw, ang Kasulatan nagapakita nga ang kagawasan alang sa matinuohong katawhan mahitabo panahon sa Milenyong Paghari ni Kristo. Kana maoy sa panahong iyang ipadapat sa katawhan ang mga kaayohan sa iyang halad lukat. Sa pagkatapos sa Milenyo, ang katawhan mahituboy na ngadto sa tawhanong kahingpitan, nga bug-os nahigawas sa napanunod nga sala ug kamatayon. Kay sa ingon nagtapos sa kataposang kaaway (ang kamatayong nahipasa gikan kang Adan), itugyan ni Kristo ang Gingharian balik ngadto sa iyang Amahan sa pagkatapos sa 49,000-tuig nga semana sa paglalang.’—1 Corinto 15:24-26.
Busa, alang sa matinuohong katawhan nga may yutan-ong mga kalaoman, ang pagpahigawas ug pagpasig-uli nga nagtimaan sa tuig sa Tinghugyaw sa karaang Israel may haom nga katumbas sa panahon sa umaabot nga Milenyong Igpapahulay. Sa maong panahon ang kagawasan ug pagpasig-uli masinati. Kana maoy sa ilalom sa pagmando ni Kristo, “kay Ginoo sa igpapahulay ang Anak sa tawo.”—Mateo 12:8.