Ang Determinasyon Nakatabang Kanako nga Molampos
Sumala sa giasoy ni Joseph A. Oakley
DAKO kaayo ang kalipay niadtong 1950 nga maapil sa 123,707 nga mitambong sa internasyonal nga kombensiyon sa mga Saksi ni Jehova sa Yankee Stadium sa New York City sa Tinipong Bansa! Ug talagsaon ang pribilehiyo human niadto ang pagtambong sa ika-16ng klase sa misyonaryong tunghaan sa Gilead sa ibabaw sa New York!
Sa pagkagraduwar ako naasayn, uban sa usa ka grupo sa kaubang mga Australiano, ngadto sa misyonaryong buluhaton sa halayong Pakistan. Kami nakaabot didto sa ting-init sa 1951. Ang unang tuig nagpatungha ilabina ug lisod nga mga pagsulay.
Usa niini mao ang walay-kaumog, punog abog nga kainit, nga lahi kaayo sa kabugnaw sa habagatang Victoria sa Australia ug sa Tasmania diin ako nagpuyo. Unya diha ang tipos, jaundice, ug ubang tagdugayng mga sakit nga giantos sa kadaghanan namong mga bag-ong abot. Usa sa batan-on namong mga klasmet namatay niadtong unang tuig.
Ang laing pagsulay mao ang kakabos ug lahing mga kahimtang sa pagkinabuhi. Wala madugay tapos sa pag-abot, ako naasayn nga usa ka nagapanawng ministro, nga nagkinahanglan sa tagdugay, mamingawong mga panaw sakay sa mga tren ug usahay nalangkit pa ang pagkatulog sa mga estasyonan sa tren.
Apan ang lain pang pagsulay mao ang kakulang sa sanong ngadto sa among mensahe sa Gingharian taliwala sa naglabing Moslem nga katawhan. Ug usa gayod ka dakong pagsulay ang pagpaningkamot sa pagpahayag sa maong mensahe diha sa lisod, bag-ong pinulongan, ang pinulongang Urdu.
Sayon ra unta ang pag-undang ug pagpauli. Ang pagpabilin nagkinahanglag lig-ong determinasyon. Ako nalipay nga ang akong unang mga kasinatian nakatabang kanako sa pagsagubang nga malamposon sa mga pagsulay.
Mga Kasinatian nga Nag-umol sa Akong Kinabuhi
Ako nagdako sa usa ka umahan mga 11 milya (18 km) sa gawas sa Geelong, usa ka siyudad ubay sa dagat sa Australianong estado sa Victoria. Usa ka adlaw sa Abril sa 1935, samtang nagduaw sa lungsod, ang usa ka Miss Hudson nakigsulti kanako ug miawhag kanako sa pagtambong sa usa ka pakigpulong sa Bibliya. Ako nabalaka sa tibuok semana tungod kay ako misaad niadtong minahal, sinsero, ug dayag dedikadong tigulang babaye nga ako motambong. Sa pagkamatuod dili ko buot motambong, apan dili ko buot nga pakyason siya.
Busa sa pag-abot sa panahon, uban ang diyutayng kabalaka akong gituman ang akong saad ug miadto. Sa akong katingala, nahimuot kaayo ako sa tigom nga misugod na ako sa pagtambong nga regular. Ang akong nakat-onan nagkombinsir kanako nga akong nakaplagan ang kamatuoran, ug ako nabawtismohan sa usa ka asembliya nga gihimo sa Geelong niadtong tuiga mismo.
Pila ka bulan sa ulahi, duha ka madasigong payunir nga babaye mibaktas sa kapin sa milya (1.6 km) latas sa dinaro nga umahan aron makaabot sa among umahan. Ang nakapahibulong kanako bahin kanila mao ang ilang pagtuo ug kadasig. Makahinumdom ako nga nangutana kanila kon diin sila moestar niadtong gabhiona, kay sila mihisgot nga sila nagpadulong sa usa ka bag-ong asaynment sa gamayng lungsod sa Bacchus Marsh, mga 35 milya (56 km) ang gilay-on.
“Wala pa kami masayod, apan mangita kamig dapit sa dili pa ang gabii,” mitubag sila. “Kon wala, among ipatindog ang among tolda.”
Kadto lapas na sa alas kuwatro, ug ang mga adlaw maoy mubo ug tugnaw. Ako naghunahuna sa akong kaugalingon: ‘Kini ang tinuod nga pagpayunir!’ Kadto nakapasugod usab nako sa paghunahuna: ‘Unsa bay akong ginabuhat dinhi sa umahan, nga nahilayog mga milya gikan sa katawhan? Unsay nagapugong kanako sa pagkahimong payunir nga ministro sama niining mga dalaga? Ako batan-on ug mahimsog usab. Kon sila makahimo niana, nganong dili ako?’ Ako mihukom niadto mismo nga sa dili madugay ako magpayunir usab.
Determinadong Ipadayon ang Akong Desisyon
Ang akong amahan supak kaayo nga ako mopahawa sa balay ug mosulod sa bug-os-panahong buluhatong pagsangyaw uban sa mga Saksi ni Jehova. Siya usa ka superintendente sa Sunday school sulod sa mga 30 anyos ug dili moangay sa mga Saksi. Ugaling, ako 21 anyos na, ug ang akong inahan wala kaayo mosupak sa dihang akong gipahayag ang akong mga plano ngadto kaniya. Busa, sa kataposan, ang petsang Hunyo 30, 1936, mao ang gitakdang adlaw sa akong pagbiya sa balay.
Gihangyo sa akong amahan ang ubay-ubayng iladong negosyante sa pagpakigsulti kanako aron dili ko idayon ang maong “ngil-ad nga trabaho” sumala pa niya. Ang maong mga tawo nanlimbasog sa pagdani kanako sa pagpabilin sa balay, nga migamit sa tanang paagi sa mga argumento, sama sa: ‘Makahatag kag kaulaw sa relihiyon sa inyong pamilya.’ ‘Ikaw nagaapil sa dili-ilado ug dili gayod popular nga grupo.’ Ug, ‘Unsay imong garantiya nga ikaw masuportahan sa pinansiyal?’
Kadtong gisulayang paghaylo—lagmit maayog tuyo—nagpadayon sa daghang semana. Apan, katingalahan, sa dugang sila misulay sa pagdani kanako, sa dugang ako determinadong moduyog sa ranggo sa mga payunir.
Miabot ang Hunyo 30, nga tugnaw ug mahangin! Akong gikarga ang tanan kong nabatonan sa akong motorsiklo ug mipaingon sa Melbourne, mga 40 milya (64 km) ang gilay-on. Ako gidapit sa pagtrabaho didto uban sa usa ka grupo sa mga payunir. Ang bug-os bag-o may-katuyoan nga kinabuhi sa maong panahon nabuksan alang kanako, apan daghan ang mga pagsulay.
Determinadong Pag-atubang sa Pagsupak
Niadtong mga adlawa ang pangunang paagi sa pagpakaylap sa mensahe sa Gingharian maoy pinaagi sa paggamit ug mga sakyanan nga may trompa aron sa pagsibya sa girekord nga mga pakigpulong sa Bibliya sa presidente sa Watch Tower Society, si J. F. Rutherford. Sulod sa mga lima ka tuig, ako ang nagdala sa usa sa maong mga “sakyanan,” usa ka maayong-pagkasangkap nga panel van nga nailhan sa bisan diin nga “Red Terror.”
Ang nindot, halalom nga tingog ni Igsoong Rutherford nga migawas sa trompa alang sa pila ka nangita sa kamatuoran maoy “tam-is,” apan alang sa mga magsusupak sa kamatuoran kadto nahisamag hilo. (Itandi ang 2 Corinto 2:14-16.) Usahay, ipatunong kanako ang hose sa tanaman, o kaha batohon ang sakyanan.
Ang mga pakigpulong ni Igsoong Rutherford nga nagyagyag sa relihiyosong kabakakan, sa laing bahin nagustohan sa pipila. Ang usa ka datoong lalaki, pananglitan, mihangyog kopya sa matag usa sa narekord nga mga pakigpulong ni Rutherford ug tanang libro nga iyang gisulat. Sa among gibisita ang iyang dakong balay, naglugos ako sa pagdala niadtong tanang rekord ug libro. Ang tawo nalipay sa pagbaton kanila, nga misulat sa usa ka tsekeng £15 (niadto $70) dihadiha dayon. Kadto ang labing daghan nga sukad akong napahimutang!
Niadtong 1938 si Igsoong Rutherford naeskedyul nga moduaw sa Australia ug mohatag ug pakigpulong sa Bibliya sa Sydney, New South Wales, nga Town Hall. Ako nahiapil niadtong magasuroy sa mga dalan sa Sydney uban ang sakyanang may trompa, nga mohimog mga daklit nga anunsiyo sa umaabot nga pagduaw. Ang “Red Terror” gisangkapan nga linain alang sa unom-semanang programa uban ang dakong pahibalo sa duha ka kiliran sa sakyanan. Kadtong “blitzkrieg” nga kalihokan nakapatunghag dakong pagsupak.
Tungod sa kusog nga relihiyosong impluwensiya, ang reserbasyon sa Sydney Town Hall gikanselar. Ang akong asaynment niadto mao ang paggamit sa sakyanang may trompa sa pagpapirma sa mga petisyon sa pagprotesta. Among giduaw ang dagkong mga pundok sa mga trabahante panahon sa ilang mga pahulay sa pagkaon ug, bisan pa sa pagsupak sa daghang lugar, milampos sa pagbatog ginatosgatos ka pirma pabor sa kagawasan sa pagsulti. Tanantanan tinagpulo ka libong pirma ang nabatonan sa tibuok nasod. Apan bisan pa sa pagpresentar sa maong dakong petisyon ngadto sa mga konsehal sa Sydney, gihikaw gihapon ang paggamit sa Town Hall.
Bisan pa niana, ingong subsob mahitabo, kadto misangpot nga kaayohan sa katawhan ni Jehova. Ang Sydney Sports Grounds mao ang gigamit niadto, ug tungod sa dakong publisidad nga nahatag tungod sa pagsupak, ang tumatambong sa pakigpulong ni Igsoong Rutherford misulbong ngadto sa mga 12,000, sumala sa banabana sa kapolisan. Sanglit ang Town Hall makapalingkod lamang ug mga 5,000, ang pagsupak misangpot sa kapin sa dobleng katawhan nga namati sa pakigpulong!
Determinasyon Panahon sa Pagdili
Uban sa pagbutho sa Gubat sa Kalibotan II niadtong 1939, ang pagsupak midako. Dayon, sa Enero 1941, ang buluhaton sa mga Saksi ni Jehova gidili sa tibuok Australia. Ako niadto nagpayunir sa Melbourne ug nagpuyo sa pondohanan sa basahon sa Sosyedad.
Usa ka adlaw unom ka dagkong polis sa Commonwealth miabot didto ug miharong sa alagad sa pondohanan sa basahon si Jack Jones ug kanako. Ako gihatagan lamag lima ka minutos sa paggawas sa akong kuwarto sa itaas. Nakasulay ka ba sa paghipos sa tanan nimong kabtangan sa lima ka minutos? Ako wala pa makahuman dihang ang mga polis miyuhot sa pagsulod sa kuwarto ug mabangisong naglabay sa tanan nakong nabiling sinina ug kasangkapan sa gawas sa bentana.
Bisan pa niana, ang pagdili wala makapahunong sa among buluhaton. Pinaagi sa paggamit lamang sa Bibliya, kami nagpadayon sa pagsangyaw sa balay-balay ug paghimog regular nga mga tigom sa Melbourne. Sulod sa 1942, ang ikaduhang tuig sa pagdili, ako gipatawag sa pag-adto na usab sa Sydney, sa maong panahon sa pagtabang sa pag-organisar sa buluhaton sa pito ka kongregasyon sa mga Saksi ni Jehova didto.
Ang balayng Bethel sa Sydney niadtong panahona gipuy-an sa opisyales sa gobyerno sa Commonwealth. Gikan sa usa ka dakong duhag-andanang balay sa pila ra ka bloke kalayo, among giplano ang tanang organisasyonal nga kalihokan. Ang akong asaynment mao ang pagduaw sa matag usa sa mga kongregasyon sa Sydney ug, nga gamiton ang traysikol, nga magahatod sa mga laraw alang sa mga tigom ug sa ubang butang kinahanglanon aron magpabiling organisado ang mga kongregasyon ug mouswag.
Pag-alagad sa Tasmania
Dihang ang pagdili gihanaw sa Hunyo 1943, ako naasayn sa pagtabang sa pagtukod na usab sa pondohanan sa basahon sa Melbourne. Dayon, niadtong 1946, ako natudlo aron moalagad nga usa ka nagapanawng alagad sa kaigsoonan (karon, magtatan-aw sa sirkito) sa isla nga estado sa Tasmania sa Australia. Sa geograpikanhon, ang Tasmania maoy matahom, bukiron nga isla nga may daghang tuktok sa bukid, nga maputos sa yelo sa kinadak-ang bahin sa tuig.
Sa dihang ako nag-alagad nga nagapanawng magtatan-aw, may pito lamang ka kongregasyon ug ubay-ubayng nahilaing grupo sa tibuok isla. Tali sa mga pagduaw sa mga kongregasyon, ako nagpayunir sa usa ka gamayng lungsod nga ginganlag Mole Creek. Ang mapintasong pagsupak ngadto sa mga Saksi misilaob didto panahon sa gubat. Apan sa maong panahon kadto naawop na, ug ang ubay-ubayng tawo nga akong napahimutangan ug mga basahon nahimong dedikadong mga Saksi.
Maoy didto sa Tasmania, sa 1950, nga akong nadawat ang pagdapit sa pagtambong sa ika-16ng klase sa Gilead. Tapos sa graduwasyon, sumala sa gisugid nga sayosayo, ako naasayn sa Pakistan.
Pagminyo ug Pamilya
Dihang ako nakapuyo na sa Pakistan sa unom ka tuig, akong giminyoan si Edna Marsh, kinsa nag-alagad nga misyonaryo sa Hapon. Si Edna miduyog nako, ug among gibuksan ang usa ka bag-ong misyonaryong balay sa Quetta, nga nahimutang sa bukid nga rehiyon sa Pakistan. Among gigugol ang duha ka tuig sa Quetta, apan unya, tungod kay gimabdos na ang among unang anak, kami mihukom sa pagpauli sa Australia. Unsay diha sa among unahan sa maong panahon?
Kon diin kami mopuyo ug magmatuto sa among pamilya wala gayod duhaduhai. Ako misaad nga kon ugaling ako mopauli gikan sa langyawng pag-alagad, ako mobalik sa Tasmania. Ugaling, kami halos walay kuwarta, ug ang mga trabaho alang sa usa ka 45-anyos maoy nihit. Bisan pa niana among gihukom nga dili tugotang ang sekular nga trabaho mobabag kanamo gikan sa mga tigom sa kongregasyon ug sa pagsangyaw sa kanataran.
Tungod sa malulutong tabang sa mga igsoon sa espiritu, ako nakatukod sa akong kaugalingong negosyo sa pagpanglimpiyog bentana. Sulod sa kapin ug 20 anyos, ako wala gayod makapaltag tigom o pagsangyaw sa kanataran tungod sa pagbuhat sa sekular nga trabaho, bisan pag usahay kinahanglan ang determinasyon sa pagsukol sa mga tanyag sa trabaho ug sa ekstrang kuwarta. Sa ingon kami nakamatuto sa among duha ka anak diha sa dalan sa kamatuoran ug nakabatog regular nga bahin sa tanang kalihokan sa Gingharian.
Ang among mga anak karon dagko na ug wala na magpabuhi kanamo. Silang duha malig-on sa kamatuoran, nga ang among anak babaye nakapahimulos ug daghang tuig sa pagpayunir una pa sa iyang pagminyo. Ang among anak lalaki ug ang iyang asawa karon duol nang mag-alagad sa dapit diin labaw ang panginahanglan sa payunir nga pag-alagad.
Usa ka Magantihong Kinabuhi
Dili pa dugay kami giduaw sa usa ka karaang higala nga mao ang unang tawo nga mibarog sa kamatuoran sa Quetta sa Pakistan. Tapos sa usa ka tigom sa among Launceston nga Kongregasyon dinhi sa Tasmania, iyang gisuginlan ang kongregasyon nga kaduha iyang gisugo ang iyang sulugoon sa pagsulti kanakong siya wala sa balay dihang ako miduaw. Apan, sa ulahi sa dihang nahibalag ko siya sa tanaman ug siya walay kaikyasan, siya misugod sa pagpangutana, nga sa kataposan nagdawat ug pagtuon sa Bibliya. Siya miasoy nga mapasalamaton kaayo siya nga akong gipasundayag ang determinasyon pinaagi sa paglahutay sa maong lisod nga langyawng asaynment sa Pakistan.
Pila ka tuig nga sayosayo, sa usa ka kombensiyon sa Sydney, ang usa ka batan-ong babaye midalagan sa pagduol kanako ug migakos kanako nga mainiton. Kay natingala, ako misugyot nga siya nasayop. “Dili,” siya mitubag, “dili ba ikaw si Joe Oakley? Ikaw ug si Alex Miller nagtuon sa among pamilya sa Lahore, Pakistan, ug karon ang akong inahan ug igsoong babaye ug ako anaa sa kamatuoran ug nagapuyo na sa Sydney.”
Ang mga kasinatiang sama niini tinuod nakadugang sa katagbawan sa pagbatog bug-os nga bahin sa pagmantala sa Gingharian. Nindot gayod ang pagkakita sa pagpanalangin sa Diyos sa buluhaton! Dihang ako unang nag-alagad dinhi sa Tasmania sa 1946, may siyam ka magmamantala sa Gingharian sa tibuok siyudad sa Launceston. Karon adunay tulo ka kongregasyon, nga ang matag usa may kapin sa 90 ka magmamantala!
Sa pagkamatuod, gikan sa makapatagbawng mga kasinatian sa akong kapin sa 50 anyos nga Kristohanong pag-alagad, ako makasulting walay pagpanuko nga ang determinasyon nakatabang kanako sa pagpalampos niana.
[Hulagway sa panid 24]
Ang sakyanang may trompa gigamit sa pagpahayag sa mensahe sa Gingharian sa Sydney
[Hulagway sa panid 25]
Si Joe Oakley uban sa gamayng kongregasyon sa Quetta, Pakistan, dihang ang among bag-ong Kingdom Hall nabuksan sa Disyembre 15, 1955