Pagtagna sa Kapalaran—Nauso Gihapon

“ANG usa makahunahuna, niining adlaw sa kanat nga pagkanahayagan ug edukasyon, dili na kinahanglan ang pagyagyag sa kabakakan sa mga pagtuo nga gipasukad sa salamangka ug patuotuo.” Kini maoy bahin sa usa ka pahayag nga gipirmahan sa 186 ka iladong siyentipiko, apil ang 18 ka mananaog sa premyong Nobel. Unsa bay ilang gihisgotan? Ang astrolohiya, nga usa ka kasagarang matang sa pagtagna sa kapalaran pinaagi sa paggamit sa mga bituon nga, sumala pa nila, “kanat sa modernong katilingban.” Nagtuo ka ba sa personal sa pila ka matang sa pagtagna sa kapalaran? O ikaw ba tingali maduhaduhaon, o supak kaayo, sama niining iladong mga siyentipiko? Hinungdanon ang imong tinamdan niining butanga. Atong tan-awon ngano.

Kining maong praktis kanat kaayo. Sumala sa tigpamaba sa usa ka kongreso sa mga mananagna sa kapalaran sa Paris, “4 milyong Pranses [nga katawhan] nagaadto sa mga sikiko kada unom ka bulan.” Sa Tinipong Bansa may gibanabanang 175,000 partaym nga astrologo ug 10,000 nga bug-os panahon. Adunay daghan usab sa Gran Britanya, diin sila adunay ilang kaugalingong mga tunghaan. Ug ang Pranses nga magasing Ça m’intéresse (That’s Interesting) mikomento: “Sa bisan diin, apil diha sa labing ugmad nga mga katilingban, among nakaplagan ang susamang mga estadistika. Ang mga sikiko nagdaghan sa kataposan sa atong siglo.”

Kinsay Mangonsulta Kanila—Ug Ngano?

Tingali gituohan sa pipila nga ang dili edukado, kabos nga mga tawo ang interesado sa okultong “mga siyensiya,” nga niana ang astrolohiya mao tingali ang labing kanat. Apan si Madame Soleil, usa ka bantogang Pranses nga astrologo, mipadayag: “Silang tanan moanhi kanako, kon kaha rightist o leftist, mga politiko sa tanang punto de vista, ug langyawng mga pangulo sa gobyerno. May moanhi pa kanako nga mga pari ug mga komunista.” Nahiuyon niini, sa dihang namatay ang salamangkerong si Frédéric Dieudonné, ang usa ka artikulong mipatim-aw sa Le Figaro, usa ka ugdang Pranses nga mantalaan, naghinumdom nga nadani niya “ang daghan kaayong suki sa mga bantogang taga-Paris, mga ministro, mga opisyal nga tag-as ug katungdanan, mga magsusulat ug mga aktor.”

Ang mga sugarol mokonsultag mga astrologo aron mahibalo kon unsaon nila sa pagpusta. Ang mga negosyante moadto kanila sa pagsusi kon unsaon nila pagpangapital sa ilang kuwarta. Ang mga astrologo andam pang mosulti kanimo kanus-a ka angay mobiyahe o kon unsay lutoon. Ug gisudlan usab sa pagpanagna ang ubang natad. Ang mga departamento sa kapolisan sa nagkalainlaing nasod nagadangop sa mga mananagna sa pagpangitag mga kriminal o mga tawong nawala. Ug sumala sa Pranses nga senemanang Le Figaro Magazine, “ang Pentagon nagasuweldog 34 ka tawo nga may hiyas sa ikaduhang panan-aw sa pagtaganag impormasyon kon unsay nagakahitabo sa sekretong mga base militar sa U.S.S.R.” Ang samang magasin mitaho nga ang kongresista sa U.S. si Charles Rose miingon nga ang mga Ruso nagadangop usab sa mga gahom sikiko.

Nganong ang astrolohiya nauso gihapon kaayo? Kini ba kalingawan o palabay sa panahon nga dili makadaot? Kini ba ang labing maayong paagi sa pagsusi kon unsay anaa sa ugma-damlag—o may mas maayo bang paagi? Atong tan-awon kon ato bang hikaplagan ang mga tubag niining hinungdanong mga pangutana.