Kristohanong mga Babaye—Paghupot sa Integridad Diha sa Trabahoan

“USAHAY ang tensiyon diha sa [trabahoan] baga kaayo nga kini imong mahiwa sa kutsilyo.” Matud pa sa usa ka babaye nga nagtrabaho.a Ang kapig-otang makatrabahog daghan, traydoray nga kompetisyon, pugosong mga superbisor, kalaay​—maoy pipila lamang sa mga butang nga nakahimo sa mga trabaho nga makapuol. Diyutay lamang ang mga trabaho nga mohatag kaambong ug kalipay nga gisaad sa propaganda. Apan kon usa ikaw ka babayeng nagatrabaho, maningkamot ka gayod nga molampos ka sa imong trabaho.

Apan, ang among gipasabot dinhi mao ang ganansiyang kuwarta nga makuha. Ang trabahoan maoy dapit nga masulayan ang imong Kristohanong integridad! Ang paagi sa imong paghimo sa imong trabaho, pagsumpo sa espiritu sa tuk-anay nga kompetisyon, ug pagsukol sa moral nga pagpangatake nagapadayag kon asa kutob ang imong pagkadebotado sa diyosnong mga prinsipyo. Aron kahimut-an ni Jehova nga Diyos, ang babayeng nagatrabaho angay makapahayag sama sa salmista: “Naglakaw ako sa akong kaugalingong integridad.”​—Salmo 26:1.

Ang Bibliya motabang kanimo sa paghimo niana. Pananglitan, dihang pugson sa paggamit sa malimbongong mga taktika o kon tintalon sa pag-una sa trabaho kay sa mga responsibilidad sa pamilya, sa pagtuon sa Bibiya, sa Kristohanong mga tigom, ug sa ministeryo, tingali imong mahinumdoman ang mga pulong ni Haring Solomon: “Unya nakita ko ang tanang buhat ug ang tagsatagsa ka batid nga mga buhat, nga tungod niini ang tawo pagakasinahan sa iyang isigkatawo; kini usab kakawangan man ug mao ang paghakop ug hangin.” (Ecclesiastes 4:4) Ang paglantaw sa sekular nga trabaho niining paagiha makapugong o makapabugnaw sa nagkalayong ambisyon. Kini makatabang kanimo sa pagbaton ug hustong mga panglantaw sa trabaho, lantawon kini nga ikaduha lamang sa espirituwal nga mga butang.​—Mateo 6:33.

Apan nagkahulogan ba kini sa dili-pagtagad sa sekular nga trabaho? Dili gayod, tungod kay gihukman sa Bibliya ang pagkatapolan. (Proverbio 19:15) Naghisgot kini bahin sa ‘pagpahimulos ug maayo tungod sa imong kuging pagtrabaho.’ (Ecclesiastes 2:24) Dugang pa, ang pagtagana sa pamilya maoy hinatag sa Diyos nga responsibilidad. (1 Timoteo 5:8) Busa kon ang pagkab-ot nianang obligasyona nagkahulogan sa pagsulod ug sekular nga trabahong dili-maayo, palandonga ang mga pulong sa Bibliya diha sa Colosas 3:23: “Bisan unsa ang inyong buhaton, buhata kini sa bug-os kalag sama ra nga inyo kining gibuhat alang kang Jehova, ug dili sa tawo.” Ang paglantaw sa kaugalingon nga nagabuhat “alang kang Jehova” maoy gamhanang motibo aron mahimong mabungahon, nga labaw pa kay sa taas nga suweldo o sa pangabig sa promosyon sa trabaho.

“Lisod Pahimut-an” nga mga Amo

Ang babayeng ginganlag Sally miingon: “Akong gibati nga daw naniid kanunay ang [akong superbisor] kanako. Wala gayod siyay maayong mga pulong nga ipahayag kang bisan kinsa.” Ang pagtrabaho ubos sa usa ka amo nga “lisod pahimut-an” o daling masuko makaluya usab, ilabina kon bag-o ka pa sa trabahoan.​—1 Pedro 2:18.

Apan, dili ka makaundang sa trabaho tungod sa panginahanglan ug kapangabuhian. Busa ang labing maayo mao ang pagsunod sa tambag sa Bibliya nga kinahanglan ang mga mamumuo​—lalaki o babaye​—“magpasakop.” (1 Pedro 2:18) Inay padakoon ang kasungian pinaagig mahalang nga pulong o sa pagpakitag pagkawalay pagtahod, paningkamoting “mapahimut-an ug maayo ang [mga amo], pinaagi sa dili pagtubagtubag.” (Tito 2:9) Ang pagpugong sa kaugalingon tingali makapugong kanimo nga mawad-an ka ug trabaho. Miingon si Solomon: “Kon ang espirtu sa punoan [usa nga may awtoridad] masuko batok kanimo, ayaw pagbiyai ang imong dapit, kay ang kalumo nagapakunhod sa dagkong mga kasal-anan.”​—Ecclesiastes 10:4.

Hayan ang mapintas nga amo maulawan pa dihang ang iyang pagkawalay-pailob tubagon ug kalumo, ang iyang dili-makataronganong mga hangyo tubagon ug pagkamaayo. (Proverbio 15:1; Colosas 4:6) Ug samtang imong pamatud-an ang imong katakos ug pagkakasaligan, ang iyang kaisipan kanimo tingali sa anam-anam mouswag. Kondili, wala kay kapilian kondili sa “pagpailob,” uban sa kasayoran nga nahimuot ang Diyos sa imong Kristohanong paggawi.​—Santiago 5:7, 8.

Pagpabiling Putli sa Pamatasan

Ang integridad nalangkit usab sa Kristohanong pamatasan. Ang usa ka artikulo sa Ladies’ Home Journal mipasidaan: “Ang opisina​—diin ang tagsatagsa gilaomang magsapot ug maayo, magminatarong, nga magkaubang nagagugol sa panahon ug may samag mga tumong​—may atmospera nga makapukaw sa sekso.” Komung dapit ang opisina sa affair o sekretong mga relasyon. Busa maalamong mag-amping. Himoa nga ang relasyon uban sa mga lalaki diha sa trabahoan maoy sa propesyonal nga paagi lamang. Likayi ang mga kolokabildo nga makapukaw sa romantikong mga pagbati. “Kay mao kini ang kabubut-on sa Diyos, . . . nga magpahilayo kamo gikan sa pakighilawas.”​—1 Tesalonica 4:3, 4.

Apan, may mga panahon nga ang mga babaye mabiktima sa dugay nang problema: seksuwal nga panghasi. Gisugilon kanato sa Bibliya nga gisugo sa tawong ginganlag Boaz ang mga batan-ong lalaki nga iyang sinuholan sa “dili paghilabot” kang Ruth, usa ka babaye nga nagtrabaho sa iyang uma. Ang eskolar sa Bibliya nga si John P. Lange mihisgot mahitungod sa “batasan sa mga trabahante sa uma sa pag-atake sa mga babaye ug malaw-ayng mga tiaw.” (Ruth 2:9) Ug bisan pa dunay pipila karon nga mga amo nga nagapanalipod sa ilang mga empliyadong babaye, gibanabana sa uban nga 40 ngadto sa 85 porsiento sa mga babayeng nagatrabaho (sa Tinipong Bansa) naladlad sa pipila ka porma sa seksuwal nga panghasi.

Ang usa ka batan-ong babayeng ginganlag Valerie, pananglitan, nagtrabaho ingong sekretarya. Sa matag karon ug unya, ang iyang amo​—nga kapin sa tulo ka pilo kay sa iyang edad​—misultig mahilas nga mga pulong bahin sa iyang panapot. Kas-a iyang gilansisan siya sa pagpatan-aw kaniya ug pornograpikong mga larawan. Sa kataposan, iyang gipatawag siya sa iyang opisina ug gisultihan siya, “Aron dili ka mapalagpot sa imong trabaho, kinahanglang mohimo kag seksuwal nga mga pabor kanako.” Siyempre, midumili siya.

Daghang porma kining makauulawng pagtagad. Ang magasing New Statesman sa Britanya miingon: “Mahimo kini sa pormang pagpasiplat, pagkusi, wala-kinahanglanang pisikal nga kontak ug sa malaw-ayng sinultihan.” Kasagaran ang kapig-otan aron makabahin sa seksuwal nga imoralidad sama ka malalangon nga tawgon sa mga angga nga (Honey, Sweetheart) o sa prangka nga pagtanyag. Gitugotan sa ubang mga babaye ang pagpanghasi tungod sa kahadlok nga mawad-an sila sa ilang mga trabaho. Ug gipakita sa mga surbi nga may pipila ka mga babaye nga daw nalipay sa maong pagtagad!

Bisag makalipay ang pagtagad sa kaatbang nga sekso, ang sobra ka suod sa kasagaran maoy unang lakang nga madaldal sa pangdani. Busa usa kini ka pag-atake sa imong integridad ug pasipala sa imong Kristohanong dignidad.​—1 Corinto 6:18.

Mga Paagi sa Pagpanalipod

“Dihang mosulod sa imong kasingkasing ang kaalam . . . , ang katakos sa paghunahuna magabantay sa ibabaw kanimo.” (Proverbio 2:10, 11) Busa sa unsang paagi imong magamit ang praktikal nga kaalam ug pagsabot sa pagpanalipod sa imong kaugalingon? Ang usa ka nagatrabahong babayeng si Diane miingon: “Akong gipahibalo diha sa trabahoan nga usa ako sa mga Saksi ni Jehova.” (Itandi sa Mateo 5:16.) Dihang mahibalo ang mga lalaki nga ikaw adunay hataas nga sukdanan sa pamatasan, sila sa kasagaran dili na kaayo mobirigbirig.

Usa ka maalamong babayeng ginganlag Betty mihimog laing panagang. Siya miingon: “Mainampingon kaayo ako sa akong pagpakigkuyog sa kaubanan nako sa trabaho tungod kay dili sama kanako silag paggawi.” (1 Corinto 15:33) Wala kini magkahulogan nga magpalayo o magpakita kitag kasuko sa kaubang mga trabahante. Apan kon moinsister sila sa paghisgot ug mga butang nga dulumtanan alang sa usa ka Kristohanon, ayaw pagpanuko sa pagpalayo. (Efeso 5:3, 4) Ang imong pagpamati sa mahilas nga mga kolokabildo mohatag sa mga lalaki diha sa trabahoan ug impresyon nga madani ka sa ilang mga pagbirigbirig.

Ang paghupot ug propesyonal nga baroganan makapalayo sa wala-kinahanglanang pagtagad. Lain pa, ang Bibliya nagtambag sa mga babaye sa “pagpamesti nga maligdong, makasaranganon ug mabuot sa hunahuna.” (1 Timoteo 2:9; itandi sa Proverbio 7:10.) Miingon ang librong Sexual Harassment on the Job: “Ang madanihong besti​—sa ato pa, dagkog mga liab; senina sa ting-init; mugbo kaayong mga sayal, mugbong mga sayal; ug baga sinawng mik-ap​—dili angay sa trabahoan. . . . Ang imong tsansa sa pagpakitag propesyonal nga larawan mapauswag ug dako kon mopili ka sa pagpamostura nga dili makakuhag pagtagad.”

Sa kataposan, likayan sa maalamong babaye ang mga situwasyong makakompromiso. Ang usa ka imbitasyon sa pag-inom ug alkoholikong ilimnon o sa pagpabilin diha sa trabahoan tapos sa mga oras sa trabaho nga walay katarongan tingali maoy usa ka lit-ag. (Itandi sa 2 Samuel 13:1-14.) “Ang tawo nga maalamon makakita sa daotan ug magatago sa iyang kaugalingon,” miingon ang maalamong sanglitanan.​—Proverbio 22:3.

Pagsumpo sa Panghasi

Siyempre, dili realistiko ang paghanduraw nga mausab nimo ang kaisipan sa tanang lalaki diha sa trabahoan o makausab sa dugay nang midulot nga mga sumbanan sa paggawi. (Itandi sa Jeremias 13:23.) Ug dili usab makataronganong hukman nga ang tanang mga lalaki nga daw sobra ka mahigalaon adunay “mga mata nga puno sa panapaw.” (2 Pedro 2:14) Busa ayaw usab sila katahapi.

Apan kon nalangkit na ang dayag nga sobra ka pamilyar, pakitag malig-ong baroganan. Dihang mipakita si Solomon ug wala-kinahanglanang kaibog sa usa ka dalaga, siya wala mag-ukon-ukon. Iyang gitubag ang pagbirigbirig ni Solomon pinaagi sa mga ekspresyon sa dili-matarog nga gugma sa timawang lalaki nga magbalantay sa karnero. Sanglit wala siya magpadaog sa pagbirigbirig ni Solomon, siya nakaingon, “Ako maoy usa ka paril.”—Awit ni Solomon 8:10.

Pagpakita ug sama nga kalig-on. Sa kasagaran ang mga pagpaibog mapukgo pinaagi sa pag-ingon: “Palihog, walay hikapay”; “Tawga lang ko sa akong ngalan”; o, “Dili ko gusto nianang matanga sa tiaw.” Ang usa ka Kristohanong babaye sa makadaghan nakaingon, “Husto na!” Busa, ipatin-aw nga ang imong dili nagkahulogang dili! (Itandi sa Mateo 5:37.) Ang maluya ug hanap nga tubag mopadasig lang hinoon sa tigpanghasi sa pagsulay pa.

Kon ikaw minyo, maayong imong ipahibalo ang imong mga pagbati diha sa imong bana. Tingali may praktikal siyang ideya kon unsaon sa pag-atiman sa situwasyon. Kon daw ang labing maayo mao ang pagbag-o ug trabaho, hinumdomi ang saad sa Diyos: “Dili ko gayod ikaw talikdan ug pagabiyaan.”​—Hebreohanon 13:5.

Ang Imong Trabaho ug ang Imong Integridad

Busa samtang ang sekular nga trabaho gikinahanglan, kini sa ubang mga kahimtang makahatag hulga sa imong Kristohanong integridad. Busa ang mga pulong ni Jesus diha sa Mateo 10:16 tukma: “Magmainampingon kamo sama sa mga bitin ug magmalumo kamo sama sa mga salampati.”

Ang paghupot sa Kristohanong integridad diha sa trabahoan dili masayon, apan mahimo kini. Gihimo kini sa libolibong mga babaye taliwala sa mga Saksi ni Jehova pinaagi sa pagsunod sa tambag sa Bibliya. Ilang gipalig-on ang ilang espirituwalidad pinaagi sa pagtuon sa Bibliya, sa pag-ampo, sa Kristohanong mga tigom, sa buluhatong pagsangyaw sa Gingharian, ug sa ubang diyosnong mga kalihokan. Ingong resulta, ilang gitagamtam ang usa ka butang nga dili mahatag sa suweldo. Kini mao ang kahibalo nga sila nakapahimuot kang Jehova, ang Usa kansang Pulong nagsaad: “Siya nga nagalakaw sa integridad magalakat sa kasegurohan.”​—Proverbio 10:9.

[Mga footnote]

Aron Magpabilin ang Integridad Diha sa Trabahoan:

Ipahibalo nga duna kay hataas nga mga sukdanan sa moral

Pagbantay sa pagpakigkuyog sa kaubanan sa trabaho

Magmaugdang sa imong pamesti