‘Taposon sa Diyos ang Imong Pagbansay’

ANG magdudula nga nangandam alang sa importanteng lumba kinahanglang magbansay ug maayo. Buot niya nga maandam ang iyang lawas aron sa dakong adlaw, mahatag niya ang labing maayo nga iyang maarangan. Ang mga Kristohanon, usab, kinahanglang magbansay ug maayo apan sa lahi nga tumong. Si apostol Pablo miingon: “Bansaya ang imong kaugalingon sa diyosnong debosyon ingong imong tumong.”​—1 Timoteo 4:7.

Busa, kinahanglang andamon sa Kristohanon ang iyang lawas sa espirituwal nga paagi. Sama sa magdudula nga nagabansay sa iyang lawas, lig-onon sa Kristohanon ang iyang espirituwal nga kusog ug pagkamalahutayon. Iyang himoon kini pinaagi sa pagtuon sa Pulong sa Diyos ang Bibliya, pinaagi sa pag-ampo, pinaagi sa regular nga pakig-uban sa isigka-Kristohanon, ug pinaagi sa pagpahayag sa katilingban sa iyang pagtuo.

Sa kasagaran adunay magbabansay ang magdudula, ug ang mga Kristohanon, usab, adunay magbabansay. Kinsa? Walay lain kondili sa Jehova nga Diyos! Gipunting ni apostol Pablo ang kabalaka ni Jehova alang sa programa sa Kristohanon sa pagbansay, nga nagsulat: “Ang Diyos sa tanang dili-takos nga kalulot . . . mao gayod ang mangunay sa pagtapos sa pagbansay kanimo, siya molig-on kanimo, siya mopabaskog kanimo.” (1 Pedro 5:10) Unsang pagbansay ang ihatag sa Diyos kanato? Daghang matang, ug ang tanan hinungdanon kon buot kitang magpabiling maayog lawas ingong Kristohanon.

Direktang Disiplina

Si Pedro nakadawat sa pagbansay gikan kang Jehova. Daghan kitag makat-onan gikan sa iyang eksperyensiya. May mga panahon nga masakit ang pagbansay ni Pedro. Handurawa lang kon unsay gibati ni Pedro dihang iyang gibugnaw si Jesus sa pagsunod sa katuyoan sa Diyos, ug si Jesus mitubag: “Pahawa kanako, Satanas! Usa ikaw ka babag alang kanako, kay ang imong gihunahuna dili ang mga butang sa Diyos, kondili ang mga butang sa mga tawo.” (Mateo 16:23) Handurawa, usab, kon unsay iyang gibati sa midagan ang mga katuigan dihang ang kahadlok sa tawo mipalihok kaniya nga dili-maalamon. Gipahamtang ni apostol Pablo ang disiplina ni Jehova niadtong hitaboa: “Sa paghiadto ni Cephas [Pedro] sa Antioquia, siya akong ginawong sa pagsupak, kay nahimo man siya nga badlonganon.”​—Galacia 2:11-14.

Bisan pa niana, sa duha ka hitabo gibansay ni Jehova si Pedro. Iyang nakat-onan nga “walay disiplina nga makalipay, hinunoa makasakit hinoon; apan sa kapulihay kini magahatag ug malinawong bunga, nga mao ang pagkamatarong.” (Hebreohanon 12:11) Ang pagdawat niadtong kusganong mga pahamatngon ingong disiplina nga gikan kang Jehova nakatabang kang Pedro sa pagbaton ug hustong hunahuna sa mga butang ug nakabansay kadto kaniya sa hinungdanon Kristohanong mga hiyas sa pagkamaaghop ug pagkamapaubsanon.​—Proverbio 3:34; 15:33.

Pag-atiman sa mga Situwasyon

Si Jehova makabansay kanato pinaagi sa pagtugot sa mga kahimtang nga mobangon nga malisod atimanon​—usahay kini sila anaa sa sulod sa Kristohanong kongregasyon. Kita mouswag ingong mga Kristohanon kon kita mangayog pagtultol, ipadapat ang mga prinsipyo sa Bibliya nga atong nakat-onan, ug sa pagtan-aw kon sa unsang paagi ang pagpadapat niining mga prinsipyoha mao kanunay ang labing maayong paagi.

Si Pedro nalangkit sa kabangian sa mga personalidad nga mibangon taliwala sa mga apostoles ni Jesus. Kon atong basahon ang mga asoy niini, makaikag ang pagtan-aw kon giunsa sa paggamit ni Jesus kining mga kabangiana​—nga sa tinuod maoy mga bunga sa pagkadili-hingpit ug sa pagkakulang sa eksperyensiya​—ingong mga higayon sa pagbansay sa iyang mga sumusunod sa hinungdanon Kristohanong mga hiyas sa gugma, pagkamapaubsanon, ug pagpasaylo.​—Mateo 18:15-17, 21, 22; Lucas 22:24-27.

Nakasaksi usab si Pablo ug kabangian sa mga personalidad. (Buhat 15:36-40; Filipos 4:2) Iyang gibatbat kon sa unsang paagi kining mga problemaha nakahatag sa mga Kristohanon ug higayon sa pagdawat sa pagbansay: “Mag-inantusay kamo sa usag usa ug dagayang magpinasayloay sa usag usa kon aduna may pagmahay sa usa batok sa usa. Maingon nga si Jehova dagayang nagapasaylo kaninyo, nan kinahanglan kamo usab magapasaylo. Ug labaw niining tanan, isul-ob ninyo ang gugma, kay kini mao ang hingpit nga bugkos sa panaghiusa.”​—Colosas 3:13, 14.

Sa unang siglo, mitungha ang labi pa ka makalilisang nga hulga taliwala sa mga Kristohanon. Mipasidaan si Pedro mahitungod niini: “Adunay mini nga mga magtutudlo sa inyong taliwala. Sila sa tago magapasulod ug makadaot nga mga sekta ug magapanghimakak pa gani sa tag-iya nga maoy nagpalit kanila, nga modalag kalit nga kalaglagan sa ilang kaugalingon. Dugang pa, daghan ang magasunod sa ilang mga buhat sa haluag nga batasan, ug tungod kanila ang dalan sa kamatuoran mapasipad-an.” (2 Pedro 2:1, 2) Kining hitaboa miresultag kalaglagan sa dili-mahinulsolong “mini nga mga magtutudlo.” (2 Pedro 2:3) Apan komusta kadtong nagpabiling matinumanon?

Ang hitabo mibansay kanila sa ‘pagdasig sa ilang lunsay nga salabotan.’ (2 Pedro 3:1) Ang ilang pagkaalisto sa pagbantay batok sa pagsulod sa mini nga mga pagtulon-an nagtukmod kanila sa pagrepaso sa mga katarongan sa ilang pagtuo. Sa nakita nila ang daotang mga bunga sa mga lihok sa “mini nga mga magtutudlo,” ang ilang pagsalig sa Kristohanong kamatuoran labi pa nga milig-on.​—1 Pedro 3:3-7.

Pananglitan, diha sa usa ka kongregasyon ang tigulang nga si apostol Juan supak sa tawong ginganlag Diotrepes, usa ka ambisyosong tawo nga walay pagtahod sa awtoridad ni Juan ug kinsa dili lamang nagdumili sa pagdawat sa sinugo nga gipadala ni Juan kondili misulay pa sa pagpalagpot niadtong nagpasakop. Tingali masakit kini alang sa tanang sinserong mga Kristohanon nga kauban ug kongregasyon kang Diotrepes. Apan nakahatag kini kanila ug higayon sa pagpakita nga sila dili ‘mga manunundog sa daotan’ ug busa nakadawat ug maayong pagbansay sa pagkamaunongon kang Jehova ug sa awtoridad sa pagkaapostol.​—3 Juan 9-12.

Sa Pakig-atubang sa Dili mga Kristohanon

Si Jesus miingon nga ang iyang mga sumusunod dili bahin sa kalibotan. (Juan 17:16) Ang unang pagkamaunongon sa Kristohanon iya kang Jehova ug sa iyang Gingharian. Maningkamot siya sa paghupot sa moral nga mga sukdanan sa Diyos, busa ang iyang pangunang intereses ug mga pagtagad lahi niadtong sa kalibotan. Apan, kinahanglang magkinabuhi ang Kristohanon sa kalibotan, ug kini maoy nakaingon sa mga tensiyon.

Si Pedro, sa panahon sa iyang dugay nga ministeryo, tingali nakakita sa daghang mga okasyon sa dihang mihimog malisod nga mga desisyon ang mga Kristohanon, gitimbang ang mga hangyo sa kalibotan sumala sa dikta sa konsensiya. Sa unang sulat ni Pedro, siya mihatag ug maayo, praktikal nga tambag kon unsaon sa paghimo niini aron ang Kristohanon “makabaton ug maayong konsensiya.”​—1 Pedro 2:13-20; 3:1-6, 16.

Sa pagkatinuod, nagapaabot kitang mga Kristohanon sa panahon sa dihang dili na kita kinahanglang magtagad sa mga hangyo niining sistema sa mga butang. Apan kita ginabansay sa paglahutay ug gitugotan sa pagpasundayag sa atong pagkamaunongon sa atubangan sa pagsulay ug sa dili-diyosnong mga impluwensiya. Samtang atong mabatonan ang kasinatian sa pagpadapat sa mga prinsipyo sa Bibliya sa nagkalainlaing mga sirkumstansiya ug maisogong molihok sa paagi nga nahibalo kita nga maoy tinguha ni Jehova nga maoy atong buhaton, kita nabansay usab sa praktikal nga kaalam ug kaisog. Hunahunaa ang pagbansay nga nadawat natong tanan tungod sa pagkinabuhi niining sistemaha ug malamposong nakaatiman sa daghan kaayong mga problema!

Ilalom sa Paglutos

Sa dihang naghisgot si Pedro mahitungod sa pagbansay kanato, ilabinang gipunting niya ang paglutos. Iyang gipakita nga kinahanglang magpaabot ang mga Kristohanon sa paglutos: “Magmalinawon kamo sa hunahuna, managtukaw kamo. Ang inyong kaaway, ang Yawa, nagalakawlakaw sama sa leon nga nagangulob, nga nangitag iyang matukob.”​—1 Pedro 5:8; tan-awa usab ang 2 Timoteo 3:12.

Si Pedro kuwalipikado sa pagsulti mahitungod niini tungod kay siya mismo nag-antos sa paglutos. Sa unang mga adlaw sa Kristohanong kongregasyon, siya ug ang ubang mga apostoles gibunalan ug gibaoran sa paghunong sa pagsangyaw. Unsay ilang reaksiyon? Sila “gikan sa atubangan sa Sanhedrin namahawa, nga malipayon tungod kay giisip sila nga takos nga pakaulawan tungod sa iyang ngalan.”​—Buhat 5:41.

Busa, misulti si Pedro sumala sa eksperyensiya, ug ilalom sa pagdasig, dihang siya miingon: “Magkalipay hinoon kamo sumala sa inyong pagpakaambit sa mga kasakit ni Kristo, aron kamo magakalipay usab ug magamasadyaon inigpadayag na unya sa iyang himaya. Kon kamo gipanamastamasan tungod sa ngalan ni Kristo, malipayon kamo, tungod kay ang espiritu sa himaya, bisan ang espiritu sa Diyos, anha man kaninyo.”​—1 Pedro 4:13, 14.

Oo, ang bukas nga paglutos, magsilbing usa ka porma sa pagbansay. Ilalom niana, makakat-on ang Kristohanon sa labi pang pagsalig sa espiritu sa Diyos. Ang iyang pagtuo “nasulayan.” (1 Pedro 1:7) Siya gibansay sa kaisog pinasukad sa gahom ni Jehova. (2 Timoteo 1:7) Iyang naugmad ang mapailobong pag-antos, ug sama kang Jesus, iyang ‘nakat-onan ang pagpasakop pinaagi sa mga butang nga iyang giantos.’​—Hebreohanon 5:8; 1 Pedro 2:23, 24.

Taposon ni Jehova ang Atong Pagbansay

Sa pagkatinuod, ang malisod nga mga problema, lakip sa paglutos, nga lahutayon sa Kristohanon dili gikan sa Diyos. Si Santiago mitambag: “Kon mailalom sa pagsulay, pasagding walay moingon: ‘Ako gisulayan sa Diyos.’ Kay ang Diyos dili arang nga masulayan sa daghang mga butang ug wala usab siyay sulayan.” (Santiago 1:13) Tingali motungha ang problema sa daghang mga hinungdan, lakip na kon makahimog sayop o daotan sa ilang kaugalingong pagbuot. Apan, sanglit mahitabo man kining mga butanga, gigamit sila ni Jehova sa pagbansay sa iyang mga alagad sa hinungdanong mga hiyas nga Kristohanon.

Si Job, Jeremias, Pedro, Pablo, ug ang tanang mga alagad sa Diyos sa panahon sa Bibliya gibansay niining paagiha. Kita, usab, samtang atubangon nato ang nagkalainlaing malisod nga mga kahimtang, lantawon nato sila ingong tuboran sa pagbansay nga gitugotan ni Jehova. Pinaagi sa atong pag-atubang kanila diha sa kusog ni Jehova, kita mabansay sa pagkamasinugtanon, kaalam, pagkamapaubsanon, kaisog, gugma, pag-antos, ug sa ubang mga hiyas.​—Itandi sa Santiago 1:2-4.

Kita madasig, usab, sa pagkahibalo nga kining ang-anga sa atong pagbansay matapos ra unya. Busa, gilipay ni Pedro ang iyang kaubang mga Kristohanon, nga nagaingon: “Ug tapos kamo makaantos sa makadiyut, ang Diyos sa tanang dili-takos nga kalulot, nga nagtawag kaninyo ngadto sa iyang dayong himaya diha kang Kristo, mao gayod ang mangunay sa pagtapos sa inyong pagbansay, siya molig-on kanimo, siya mopabaskog kanimo.” (1 Pedro 5:10) Kining mga pulonga aplikado nga may samang gahom ngadto sa “dakong panon” nga nagapaabot sa kinabuhing walay kataposan diha sa Paraiso sa yuta.

Kanang hunahunaa angay makatabang kanatong magpasakop nga mapailobon niining mga eksperyensiya sa pagbansay, determinadong dili mokompromiso. Busa, atong masinati ang kamatuoran sa makapadasig nga mga pulong ni Pablo: “Busa dili kita mohunong sa pagbuhat ug maayo, kay sa nahaigo nga panahon kita magaani kon kita dili magakaluya.”​—Galacia 6:9.