Pagpabiling Suod sa Organisasyon ni Jehova
Sumala sa giasoy ni John Barr
KADTO ang kataposang bahin sa biyahe aron sa pagduaw sa balay usa ka tuig nga miagi sa miaging Hunyo, nga milupad gikan sa Glasgow ngadto sa Aberdeen. Samtang ang among ayroplano mipataas kaayo ibabaw sa lunhawng kabanikanhan sa Scotland ug padayon sa ibabaw sa hinayg-agos nga subang Clyde, ang akong mga hunahuna mibalik sa tuig 1906 ug niadtong gamayng balangay sa Bishopton, nga nahimutang sa usa ka dapit sa ubos sa habagatan sa suba.
Abi mo, kadto ang tuig ug dapit dihang ang akong apohang-babaye, si Emily Jewell, misugod sa pagbasa sa libro ni Charles T. Russell, ang The Divine Plan of the Ages. Dihadiha nabuksan ang iyang mga mata sa kamatuoran nga ang Bibliya wala magtudlo sa doktrina sa impiyernong-kalayo. Sa wala madugay ang iyang duha ka dagko nang anak babaye si Bessie ug Emily (ang naulahi nahimong akong inahan) misugod usab sa pagkakita sa kahayag sa kamatuorang misidlak latas sa mga gabon sa bakak nga doktrina nga gitudlo sa United Free Church of Scotland. Sa 1908 si Lola nabawtismohan ingong simbolo sa iyang pahinungod sa pagbuhat sa kabubut-on sa Diyos, ug ang iyang mga anak babaye nabawtismohan wala madugay tapos niadto.
Ang akong amahan mao ang eskribiyente o session clerk sa samang United Free Church sa Bishopton. Siya sa kanunay nalisdan sa pagtuo sa doktrina sa Trinidad, busa ang ministro sa iglesya mitanyag sa pagwali sa espesyal nga wali sa iyang kaayohan usa ka Dominggo. Kadto ang panapos! Sa pagkadungog sa gisulayang pagpatin-aw, ang akong amahan sa maong panahon nakombinsir nga bakak ang doktrinang Trinidad. Siya mibulag sa simbahan ug nabawtismohan niadtong 1912 ingong simbolo sa iyang pahinungod kang Jehova. Wala madugay tapos niadto ang akong mga ginikanan mibalhin paamihanan ngadto sa Aberdeen uban sa duha nila ka anak, si Louis ug si James, ug ako natawo didto niadtong 1913.
Ang akong mga hunahuna niadtong unang katuigan ug sa paningkamot sa akong mga ginikanan sa pagmatuto kanamong tulo ka anak “sa disiplina ug pagdumala-sa-kaisipan ni Jehova” nagpabilin kanako samtang ang ayroplano nagsugod sa pagpaubos ibabaw sa kabungtoran, kasubaan, ug kawalogan nga akong nailhan sukad sa pagkabata. (Efeso 6:4) Niadtong maanindot sanag nga kabuntagon, gibati ko gayod ang dakong pasalamat kang Jehova tungod niadtong ginikananhong pagbansay! Ako nasayod nga kadto nakaamot sa akong pagpabilin nga suod kanunay sa organisasyon ni Jehova.
Ang Bili sa Sayong Pagbansay
Ang among pamilya sa kanunay nahiusa ug malipayon. Kon ugaling si Papa ug Mama may kasungian sa opinyon, paningkamotan nila nga dili gayod kini ipakita sa atubangan namong mga anak. Kadto nagmugna alang kanamo dili lamang sa pagtahod alang sa among mga ginikanan kondili sa kahimtang usab nga may tinuod nga pakigdait ug kasegurohan sulod sa among panimalay.
Ang pipila sa akong gimahal nga mga panumdoman nasentro sa mga panagkatigom sa among pamilya sa magabii. Gitagana namo ang among kaugalingong kalingawan, pinaagi sa pagbuhat sa mga butang sama sa pag-awit nga duyogan sa among musikal nga pagtugtog ug pagdula nga tingob sa mga dula sama sa Monopoly. Gawas pa, bisag unsa ka okupado si Papa, dili gayod siya mapakyas sa paggugol ug panahon uban kanamo sa halos kada adlaw, nga magabasag kusog sa Bibliya ug sa mga basahon sa Watch Tower, ingon man sa ubang basahon sa dili-ugdang ug sa mas ugdang nga matang. Kining tanang butang nagpasuod gayod sa among pamilya samtang kami nagtubo.
Kami lamang ang pamilyang naa sa “kamatuoran” niadtong amihanang bahin sa Scotland niadtong sayong katuigan. Ingong sangpotanan, ang among balay nahimong ilado sa daghan sa nagapanawng mga hawas (mga pilgrim, nga maoy pagtawag kanila kaniadto), sa Watch Tower Society, sama ni Albert Lloyd, Herbert Senior, ug Fred Scott. Ang pipila naggikan pa sa hedkuwarter sa Sosyedad sa Brooklyn, New York, apil si W. E. Van Amburgh ug A. H. Macmillan. Ang maong mga pagduaw maoy dagkong mga hitabo sa katuigan sa akong pagkabatan-on.
Hangtod niining adlawa ako mapasalamaton sa tiunayng espiritu sa pagkamaabiabihon nga gipakita sa akong mga ginikanan. Kadto nakapatugob sa among pamilyahanong kinabuhi, ug bisan pag batan-on gisugdan ko pagpauswag ang akong pagpabili sa tibuok kapunongan sa kaigsoonan. Oy, pagkadako gayod ang mahimo sa mga ginikanan sa pag-ugmad sa mainitong bugkos sa gugma tali sa ilang mga anak ug sa tibuok-kalibotang asosasyon sa ilang mga igsoon!
Pagsagubang sa Personal nga Suliran
Samtang ako nagkabayong na, ako mausbawon nahimong maulawon ug tiglainlain nga batang lalaki. Sa nadakodako na ako, nakaplagan kong labi pang lisod nga makighimamat sa mga tawo ug makigsulti kanila. Kadtong pagkamaulawon nahimong dakong babag sa daghang paagi ilabina kon bahin sa pagpamatuod sa akong pagtuo pinaagi sa pagwali sa maayong balita sa Gingharian.
Wala madugay tapos sa Gubat sa Kalibotan I, ang akong lola ug akong inahan nahimong ang unang mga Saksi sa Aberdeen nga miapil sa balay-sa-balay nga pagsangyaw. Kaming mga bata miapil sa pagpanghatag sa mga tract, apan karon nga ako aktuwal makigsulti sa mga tawo diha sa ilang mga balay, aw, kana lain na nga butang! Kadto usa ka dakong hagit. Apan sa kataposan kana akong giatubang. Dili ko gayod hikalimtan kadtong hapon sa Dominggo sa Nobyembre 1927 dihang akong gisultihan ang akong amahan nga ako mouban kaniya sa ganghaan-sa-ganghaang pagsangyaw. Kadto gayod ang unang panahon nga akong nakita ang mga luha sa mga aping sa akong amahan—mga luha sa kalipay sa maong hitabo!
Ang Trahedya sa Pamilya Nakatandog Kanako
Ang kalinaw sa among pamilyahanong kinabuhi nabungkag sa gabii sa Hunyo 25, 1929, dihang ako 16. Tapos sa usa ka adlaw sa pagsangyaw, ang akong inahan ug akong igsoong babaye nagdali sa pagpauli aron sa pagluto sa panihapon ni Papa. Sa kalit, ang tulin nga motorsiklo mibangga kang Mama, nga miguroy kaniya ubay sa dalan sulod sa mga 40 yarda (37 m). Ang mga samad sa iyang ulo grabe kaayo nga wala dahomang siya mabuhi. Apan salamat sa daghang bulan sa mahigugmaong pag-atiman sa akong igsoong babaye si Louie, siya nabuhi. Sa igong panahon, si Mama nakaarang sa pagkinabuhing normal hangtod sa iyang pagkamatay niadtong 1952.
Kadtong makaguol nga kasinatian nakahimog hinungdanon kaayong butang alang kanako—tungod niadto gisusi ko pag-ayo ang akong kinabuhi ug kon unsay akong gibuhat niana. Niadtong ting-init gisugdan ko ang pagtuon sa Bibliya nga labi pang lalom kay sa nangagi—akong gihimo ang kamatuoran nga akong kaugalingon. Kadto ang punto sa dakong kausaban alang kanako, ug akong gipahinungod ang akong kinabuhi sa pag-alagad kang Jehova. Bisan pa niana, maoy sa pipila pa ka tuig sa ulahi nga nakahigayon ako sa pagpasimbolo sa akong pahinungod pinaagi sa bawtismo sa tubig.
Pagsulod sa Bug-os-Panahong Pag-alagad
Sa pagbiya sa tunghaan niadtong 1932, gisugdan ko ang usa ka kurso sa pagbansay sa mekanikal ug elektrikal nga inhenyeria. Sa Britanya niadtong mga adlawa, walay pagdasig nga anaa karong adlawa sa mga batan-on sa pagsulod sa bug-os-panahong buluhaton sa pagsangyaw ingong mga payunir. Bisan pa niana, sa paglabay sa mga tuig, ako nasayod kon diin ko angay gugolon ang akong kusog—diha sa bug-os-panahong ministeryo.
Makahinumdom pa akong tin-aw sa butang among gitun-an sayo sa 1938 nga nagpasiugda kanako sa mga kaayohan sa pagpabiling suod sa organisasyon ni Jehova ug pagpadapat sa mga instruksiyon niana sa personal. Kadto ang mga isyu sa magasing Ang Bantayanang Torre mahitungod kang Jonas nga nagsaysay sa mga kasinatian nga iyang giagian sa pagkalagiw gikan sa iyang tinudlong-buluhaton. Gibutang ko gayod sa kasingkasing ang maong leksiyon, nga akong gihukom nga dili nako balibaran ang bisan unsang tinudlong-buluhatong moabot kanako pinaagi sa organisasyon ni Jehova. Wala ako makaamgo niadto kon pila ka teokratikanhong tinudlong buluhaton ang diha sa unahan sa pagsulay sa akong hukom.
Miampo ako alang sa giya, ug ang tubag miabot pinaagi sa usa ka sorpresang sulat gikan sa hedkuwarter sa Sosyedad sa London, nga naghangyo nga akong palandongon ang pagkahimong membro sa pamilya sa Bethel. Ikag kong gipahimuslan ang higayon sa pagsulod nianang dakong ganghaan ngadto sa dagko pang mga pribilehiyo sa pag-alagad. Busa, niadtong Abril 1939 ako nagbuhat tapad ni Harold King, kinsa sa ulahi nag-alagad nga misyonaryo sa Tsina ug, tungod sa iyang buluhaton sa pagsangyaw, migugol ug mga tuig sulod sa usa ka komunistang prisohan. Kami nag-asembol sa mga makinang transkripsiyon ug sa mga ponograpo usab nga gigamit sa pagpatugtog sa mga narekord nga mga wali diha sa mga ganghaan sa mga balay sa katawhan.
Si Harold ug ako maghanduraw sa tanang nagkalainlaing matang sa mga tawo nga sa kataposan mamati sa mensahe sa Gingharian pinaagi sa kasangkapang among gigama. Nianang paagiha dili gayod namo hikalimtan ang resulta sa among trabaho. Sukad niadto, sa tanang nagkalainlaing tinudlong-buluhaton nga akong nadawat sa Bethel, akong gipaningkamotan ang paghupot niining kaisipana. Kana naghimo sa akong trabaho nga dakong kalipay ug kanunayng makahuloganon maylabot sa buluhatong pagwali sa Gingharian.
Mga Pribilehiyo sa Pag-alagad
Wala madugay sa akong pag-abot sa Bethel sa London, ako natudlo nga alagad sa kompaniya (karon gitawag nagadumalang magtatan-aw) sa usa ka kongregasyon nga may kapin sa 200 ka magmamantala. Sa nangagi, ako ang magtatan-aw sa kongregasyon nga may napulo ra ka magmamantala! Unya ako gibutang nga tagdumala sa Departamento sa Sound sa usa ka talagsaong kombensiyon sa tibuok nasod sa Leicester niadtong 1941. Hangtod niadtong panahona diyutay ra ang akong kasinatian sa sound.
Sa ulahi ako natudlo ngadto sa nagapanawng buluhaton ingong usa ka alagad sa mga igsoon, nga karon gitawag magtatan-aw sa sirkito. Unom lamang ang maong mga alagad sa Britanya dihang kanang buluhatona gisugdan sa Enero 1943. Ang akong asaynment maoy alang sa usa ra ka bulan, apan kadto misangpot sa akong pagduaw sa mga kongregasyon sulod sa kapin ug tulo ka tuig. Sulod niadtong lisod mismong mga katuigan sa Gubat sa Kalibotan II, ako nagdumala sa tulo ka dagkong kombensiyon—butang nga wala pa nako mahimo sa nangagi.
Ang buluhaton sa nagapanawng magtatan-aw niadtong mga adlawa lahi gayod sa kon unsa kini karong adlawa. Kami nagsigeg lakaw, ug ang biyahe sa tibuok Britanya niadtong mga tuig sa gubat usahay lisod kaayo. Sa daghang okasyon, kinahanglang mogamit akog bisikleta sa bahin sa panaw tali sa mga kongregasyon. Inay sa pagduaw sa usa ka kongregasyon sa usa ka semana, sumala sa ginabuhat karong adlawa sa mga nagapanawng magtatan-aw, kon gagmay ang mga kongregasyon, among duawon ang abot sa unom sa usa ka semana!
Kini ang naandang eskedyul sa adlaw: Mobangon sa alas singkoimedia; tapos sa pamahaw, mobiyahe paingon sa sunod kongregasyon aron sugdan pagsusi ang mga rekord sa kongregasyon sa pagka alas otso. Ang hapon kasagarang gugolon sa pagsangyaw, nga kini sundan sa gabii sa usa ka oras nga tigom uban sa mga alagad sa kongregasyon ug dayon sa usa ka pakigpulong alang sa kongregasyon. Ako talagsang makatulog sa wala pay 11, o bisan sa gabii pa kaayo kon akong sulaton ang taho sa adlaw bahin sa kongregasyon nianang samang gabii. Ang matag Lunes gigahin alang sa pagkompleto sa mga taho alang sa semana, alang sa personal nga pagtuon, ug alang sa bisan unsang pangandam nga buluhaton alang sa sunod semana.
‘Okupado kaayong eskedyul sa semana,’ moingon ka ba? Oo, tinuod, apan, oy, pagkamagantihon ang pagbati nga kami naglig-on sa mga igsoon niadtong mga tuig sa gubat sa dihang wala sa kanunay ang samang suod nga kontak sa organisasyon! Sa literal kaayong kahulogan, nabatonan namo ang katagbawan sa pagbati nga kami nagbulig sa mga kongregasyon “nga mahimong lig-on sa pagtuo.”—Buhat 16:5.
Balik sa Pag-alagad sa Bethel
Ako gihangyo sa pagbalik sa pag-alagad sa Bethel sa Abril 1946. Ako nalipay sa pagbuhat niana, apan akong gibating ang akong kinabuhi natugob sa espirituwal nga paagi ingong sangpotanan niadtong tulo ka tuig ug tunga sa buluhaton sa nagapanawng magtatan-aw. Ang organisasyon nahimong labi pang dakog kahulogan alang kanako karon, ug akong gibati nga daw akong gibuhat ang gibatbat sa Salmo 48:12, 13: “Manlakaw kamo sa libot sa Zion, kamong katawhan, ug liboton ninyo kana, ihapa ang mga torre niini. . . . Susiha ang mga puy-anang torre niini.” Kay nakalakaw palibot taliwala sa katawhan sa Diyos ang akong gugma miuswag alang sa “tibuok kapunongan sa mga igsoon.”—1 Pedro 2:17.
Sa akong pagbalik sa Bethel, ako nakapribilehiyo sa pag-atiman sa kinadak-ang buluhaton sa pag-imprenta sa among imprentahan sa London ug sa ulahi nalangkit usab sa trabaho sa paggamag plato o plate-making. Unya, sa Septiyembre 1977 nabatonan ko ang tagsaong pribilehiyo nga gihatag kanako sa pagkahimong membro sa Nagamandong Lawas sa mga Saksi ni Jehova, nga nahimutang sa Brooklyn, New York, U.S.A.
Pagaangkonon ko nga usahay gibati ko nga gustong ‘mokalagiw’ sa pila sa labi pang lisod nga mga buluhatong gihatag kanako. Apan unya mahinumdom ako kang Jonas ug ang sayop nga iyang gibuhat, ug sublion ko sa akong kaugalingon kanang kahibulongang saad nga hikaplagan sa Salmo 55:22: “Itugyan mo ang imong palas-anon kang Jehova mismo, ug siya magalig-on kanimo. Dili niya itugot nga matarog ang matarong.” Nakaplagan ko nga matuod gayod kining mga pulonga!
Si Jehova dili gayod mohangyo kang bisan kinsa kanato sa pagbuhat sa butang nasayran niyang dili nato mahimo. Bisan pa niana, diha lamang sa iyang kusog nga kita makaarang sa pagbuhat sa iyang ihangyo. Ug laing butang—kon imong gihigugma gayod ang imong mga igsoong nagabuhat tapad kanimo, sila magasuportar ug magapaluyo kanimo, nga magabuhat uban nimo “abaga sa abaga” aron tabangan ka sa pagpas-an sa imong gitudlong buluhaton.—Sofonias 3:9.
Bililhong mga Relasyon
Hinuon, sa kanunay adunay pila ka Kristohanong igsoon nga sa linain imong gimahal. Usa kanila mao si Alfred Pryce Hughes, kinsa namatay niadtong 1978. Ang kasaysayan sa iyang kinabuhi mipatim-aw sa Abril 1, 1963, isyu sa The Watchtower. Sa daghang katuigan siya nag-alagad nga alagad sa sanga, ug sa ulahi ingong membro sa Komite sa Sanga. Siya gimahal pag-ayo sa mga igsoon sa Britanikong natad tungod sa iyang dakong pagtahod sa organisasyon ni Jehova ug sa iyang pagkamaunongon niini ug gugma sa tanang kaigsoonan. Ang laing butang mao ang iyang gugma sa pagsangyaw sa kanataran. Kini wala gayod makunhori sa tibuok niyang kinabuhi, bisan unsa pang responsabilidad ang iyang gipas-an. Ang pagbuhat kauban sa matinumanong mga igsoon sama kang Pryce dako kaayog kahulogan kanako, nga naglig-on sa akong determinasyon sa pagpabiling suod sa organisasyon ni Jehova ug pagpabiling aktibo sa ministeryo.
Niadtong Oktubre 29, 1960, ako misulod sa linain bililhong relasyon uban sa dugay-nang-panahong madasigong payunir ug misyonaryo sa ika-11ng klase sa Gilead, kinsa niadtong panahona nag-alagad sa Irlandiya. Niadtong petsaha si Mildred Willett ug ako naminyo, ug sukad niadto siya usa ka matinumanong tigpaluyo nako sa Bethel nga pag-alagad.
Una mamatay ang inahan ni Mildred niadtong 1965, iyang gitambagan ang iyang anak babaye nga dili gayod “mangabubho kang Jehova.” Si Mildred kanunay nahinumdom sa mga pulong sa iyang inahan, ug kana nakatabang sa pagpugong kaniya sa pagkahimong diskontento kon ako subsob may obertaym nga trabaho. Kini nakatabang ug dako kanako sa pag-atiman nga malipayon sa bisan unsang dugang asaynment nga moabot kanako. Kaming duha nakapahimulos sa linain sa pagkaambit sa daghang magantihong kasinatian sa ministeryo.
Usa ka batan-ong magtiayon nga among gitun-an sa Bibliya, pananglitan, nakahimog kusog nga pag-uswag ngadto sa punto sa pagpahinungod ug bawtismo ug regular nagapakig-ambit sa ministeryo. Kami nalipay kaayo! Unya, sa kalit, sa walay dayag nga hinungdan, sila mihunong sa pagpakig-uban. Si Mildred ug ako nangahiubos, ug kanunay kaming naghunahuna kon diin kami nasayop sa among pagbansay kanila. Kanunay namong giampo kang Jehova nga iya gihapong buksan ang ilang mga kasingkasing aron pamatud-an ang ilang gugma sa kamatuoran. Mahanduraw mo ba ang among kalipay dihang among nadawat ang usa ka sulat gikan sa maong magtiayon mga pulo ka tuig sa ulahi nga nagsulti kanamong sila aktibo na usab nga nakig-uban ug ang ilang balay karon maoy sentro sa usa ka Pagtuon sa Libro?
Ang banang si Will misulat: “Buot kong pasalamatan kamo tungod sa tanang tabang ug mahigugmaong konsiderasyon nga inyong gihatag kanamo . . . Ang akong pagbulag sa pagtuo akong sala, ang akong apresasyon sa kasingkasing dili husto . . . Among nakaplagan ang dakong kalipay nga mahibalik sa organisasyon ni Jehova . . . Maoy uban ang nindot nga mga handumanan nga ako nagasulat kaninyo karong gabhiona, hinaot si Jehova magapanalangin kaninyong duha sa inyong pag-alagad kaniya.”
Sa laing sulat, ang usa ka inahan misulat kanamo mahitungod sa iyang batang lalaki si Mike: “Ako nalipay kaayo nga ang mga manulonda nagpalingkod kaniya sa inyong tupad.” Unsay iyang gipasabot? Aw, si Mike mitambong sa usa ka kombensiyon uban sa iyang inahan ug manghod nga lalaki, apan siya dili gayod interesado sa kamatuoran. Namatikdan ni Mildred ang batan-ong lalaki nga naglingkod nga inusara ug siya nakigsulti kaniya. Dayon among gidapit siya ug ang iyang igsoong lalaki sa pag-adto sa Bethel sa London ug tan-awon ang trabahong among gibuhat.
Sa ulahi, si Mike miabot, ug ang iyang nakita nakahaling sa iyang interes nga igo sa pagpadayon sa pagbatog pagtuon sa Bibliya. Ang sangpotanan? Siya karon usa ka ansiano sa kongregasyon, ug ang iyang asawa ug duha ka anak lalaki aktibo tanan sa ministeryo. Dili pa dugay ang asawa ni Mike misulat: “[Si Mike] kanunay naghisgot nga nakahibalag kaninyong duha . . . Nakadayeg gayod siya sa inyong kalulot ug interes kaniya.”
Dihang ang akong asawa ug ako makadawat sa mga pahayag sa apresasyon gikan sa usa ka tawo sama kang Will o Mike nga nakapribilehiyo kami sa pagtabang, ang among mga kasingkasing yanong moawas sa pagkamapasalamaton kang Jehova! Pagkabililhon nga mga ganti ang maong buhing “mga sulat sa rekomendasyon”—ang tanan bahin sa kalipay nga nadawat gikan sa pagpabiling suod sa organisasyon ni Jehova.—2 Corinto 3:1-3.
Pag-alagad sa Hedkuwarter sa Kalibotan
“Usa ka nasod sa kaugalingon.” Kana ang pagbatbat sa editor sa usa ka mantalaan sa Brooklyn Heights sa dakong pamilya sa kapin sa 3,500 ka Saksing nagpuyo sa hedkuwarter sa kalibotan sa mga Saksi ni Jehova sa Brooklyn, New York, ug sa Watchtower Farms, nga nahimutang sa duolag usa ka gatos ka milya (160 km) ang kalayo sa ilaya sa New York. Sa pagkamatuod, ang mga dinihogan ni Jehova maoy usa ka espirituwal nga nasod sa panan-aw ni Jehova! Karong adlawa, mga kapid-an gikan sa daghang kalibotanong kanasoran nagapadayag ug nagaingon ngadto sa mga sakop niining nasora: “Mouban kami kanimo, kay among nadungog nga ang Diyos nagauban kanimo.”—Zacarias 8:23; 1 Pedro 2:9.
Nan, makaapresyar ka ba unsa ka makalipay nga ang akong asawa ug ako mahimong permanenteng bahin niining dakong pamilyang Bethel? Ako makaingon nga walay pagpanuko nga ang miaging walo ka tuig sa akong kinabuhi mao ang labing talagsaong sa tibuok kong teokratikanhong kasinatian. Dinhi imong mabati ang pulso sa makitang organisasyon ni Jehova; dinhi ang espirituwal nga pagkaon giandam ug unya ipadala ngadto sa upat ka suok sa yuta; ug dinhi imong makita ang paglihok sa espiritu ni Jehova nga nagagiya ug nagatultol sa halandumong mga desisyon nga pagahimoon; ug dinhi imong mamatikdan labaw kay sa bisan diin pa ang natigom nga ebidensiya sa pagpanalangin ni Jehova sa buluhaton sa pagwali sa Gingharian ug sa paghimog tinun-an. Kining tanang bag-o pang kasinatian ug mga impresyon nakahatag kanakog dugang pagdasig sa pagpabiling labi pang suod sa katawhan ni Jehova.
Akong nasugid ang pipila ra sa kasinatian sa akong kinabuhi. Bisan pa niana, sila basin makabulig kanimo sa pagsabot ngano, samtang ang ayroplanong akong gisakyan milandig sa kataposan sa Aberdeen Airport niadtong masanag nga kabuntagon sa Hunyo, akong gibating mapasalamaton kaayo kang Jehova nga ako bahin gihapon sa atong mahigugmaong tibuok-kalibotang kapunongan sa mga igsoon. Akong gigugol ang maong panahon sa biyahe sa pagdumdom sa katuigan nako sa kamatuoran, ug kini nagpahinumdom na usab kanako unsa ka mapuslanon nga kita matag karon ug unya mag-asoy sa daghang panalangin diha sa kamot ni Jehova.—Salmo 40:5.
Ang akong igsoong babaye si Louie didto sa pagsugat kanako—sa gihapon matinumanon, madasigon ug maunongon tapos sa 60 ka tuig sa dedikadong pag-alagad kang Jehova. Akong gipasalamatan si Jehova tungod nianang dugang panalangin, kay wala ba si apostol Pablo mag-ingon nga ang pagkamatinumanon mao ang gipangita ni Jehova diha sa tanan niyang “piniyalan”? (1 Corinto 4:2) Dako gayong pagdasig ang ikahatag sa usa ka membro sa pamilya ngadto sa lain pinaagi sa pagpabiling matinumanon!
Si Moises kas-a miampo: “Ipakita kanako unsaon pag-ihap sa among mga adlaw sa paagi nga kami makabaton sa usa ka kasingkasing nga manggialamon.” (Salmo 90:12) Samtang si Mildred ug ako nagakatigulang, among gipabilhan ang panginahanglan sa kanunay sa pagsandig sa kaalam ni Jehova aron magamit ang among kinabuhi sa paaging nagapasundayag sa among gugma alang kaniya ug sa among mga igsoon. Si Jehova mahigugmaong nagapakita kanato nianang paagiha kon kita mopabiling suod sa iyang organisasyon.
[Hulagway sa panid 28]
Si John Barr (naa sa atubangan sa wala) sa tuig 1930, uban sa iyang igsoong babaye, igsoong lalaki, ug mga ginikanan
[Hulagway sa panid 31]
Si John Barr karong adlawa, uban sa iyang asawang si Mildred