Mga Pag-ampo Nagkinahanglag mga Binuhatan

“Si Jehova halayo sa mga daotan, apan siya mamati sa pag-ampo sa mga matarong.”—PROVERBIO 15:29.

ANG tanang mga kinahanglanon ni Jehova maalamon, matarong, ug mahigugmaon. Dili gayod kini mabug-at. (1 Juan 5:3) Lakip niana ang iyang mga kinahanglanon mahitungod sa pag-ampo, ang usa niini mao nga kita angay magkinabuhi nga nahiuyon sa atong mga pag-ampo. Ang atong lihok kinahanglang makapahimuot kang Jehova nga Diyos. Kay kondili, sa unsang paagi malaoman natong dunggon niya ang atong mga hangyo ug mga pangaliyopo?

2, 3. Nganong wala tubaga ni Jehova ang mga pag-ampo sa mga Israelitas, sumala sa makita sa mga pulong ni Isaias, Jeremias, ug Miqueas?

² Usa kini ka bahin sa pag-ampo nga wala panumbalinga sa kadaghanan diha sa Kakristiyanohan, sama nga wala kini panumbalinga sa apostatang mga Israelitas sa mga adlaw ni Isaias. Maoy hinungdan nga gihimo ni Jehova ang iyang propetang si Isaias sa paghawas kaniya nga nagaingon: “Sa diha nga kamo magahimo ug daghang mga pag-ampo, ako dili mamati . . . Panghugas kamo; panghinlo kamo; kuhaa ang inyong daotang mga buhat gikan sa atubangan sa akong mga mata; hunong na sa pagbuhat sa daotan. Pagtuon sa pagbuhat sa maayo.” (Isaias 1:15-17) Oo, kon gitinguha niadtong mga Israelitas ang pabor sa Diyos, kinahanglang molihok sila sa paagi nga makapahimuot kaniya. Sumala sa gikapahayag na: “Kon gusto nimong mamati ang Diyos kanimo inig-ampo nimo, kinahanglang mamati ka Kaniya sa dihang Siya mosulti.”

³ Sa pagkatinuod, masubsob nga nakita ni Jehova nga kinahanglang pahinumdoman ang iyang katawhang Israel niining mga kamatuorana. Busa atong mabasa: “Kadtong nagapalingoglingog sa iyang igdulongog gikan sa pagpamati sa kasugoan​—bisan ang iyang pag-ampo maoy usa ka dulumtanan” sa Diyos. “Si Jehova halayo sa mga daotan, apan siya mamati sa mga pag-ampo sa mga tawong matarong.” (Proverbio 28:9; 15:29) Tungod niining kahimtang, mituaw si Jeremias: “Nagatabon ka [Jehova] sa imong kaugalingon sa usa ka panganod, aron walay pag-ampo nga makalahos kanimo.” (Lamentaciones 3:44) Sa pagkatinuod, ang pasidaan nga gidasig si Miqueas sa paghatag natuman: “Sila mangayo ug tabang kang Jehova, apan siya dili motubag kanila. Siya motago sa iyang nawong gikan kanila niadtong panahona, sumala sa ilang daotang mga binuhatan.”​—Miqueas 3:4; Proverbio 1:28-32.

4. Unsay nagpakita nga bisan taliwala sa mga katawhan ni Jehova wala pabilhi sa uban nga nagkinahanglag mga binuhatan nga kaharmoniya sa ilang mga pag-ampo?

⁴ Busa hinungdanon ang pagkinabuhi sumala sa atong mga pag-ampo. Hinungdanon bang ipasiugda kining kamatuorana karon? Oo, dili lamang tungod sa kahimtang sa Kakristiyanohan kondili sa kahimtang usab sa ubang dedikadong katawhan ni Jehova. Taliwala sa kapin sa 3,000,000 ka magmamantala sa maayong balita sa miaging tuig, kapin sa 37,000 ang gipalagpot tungod sa batasan nga dili angay sa usa ka Kristohanon. Katumbas kana sa proporsiyon nga mga usa sa 80. Malagmit, ang kadaghanan niining mga tawhana nag-ampo sa matag karon ug unya. Apan, naglihok ba sila sibo sa ilang mga pag-ampo? Wala gayod! Gani adunay pipila ka mga ansiano nga anaa sa bug-os panahong pag-alagad sa dugay nang katuigan nga gidisiplina sa usa ka paagi. Pagkamakapasubo! Sa pagkatinuod, “Siya nga nagadahom nga nga maayo na niyang pagkabarog, magbantay basig mapukan siya,” nga dili siya molihok sa usa ka paagi nga makahimo sa iyang mga pag-ampo nga dili-madawat sa iyang Magbubuhat.​—1 Corinto 10:12.

Kon Nganong ang mga Pag-ampo Nagkinahanglag mga Binuhatan

5. Aron tubagon ni Jehova ang atong mga pag-ampo, sa unsang paagi atong pamatud-an ang atong pagkatim-os?

⁵ Aron pagadunggon ang atong mga pag-ampo ni Jehova nga Diyos, dili lamang mahinlo kita sa moral ug sa espirituwal nga paagi kondili ipamatuod usab nato ang katim-os sa atong mga pag-ampo pinaagi sa pagbuhat sa mga butang nga atong ginaampo. Ang pag-ampo lamang dili kapuli sa matinud-anon, maalamong paningkamot. Dili mobuhat si Jehova ug mga butang nga atong mahimo sa atong kaugalingon pinaagi sa kinasingkasing nga pagpadapat sa tambag diha sa iyang Pulong ug sa pagsunod sa pagtultol sa iyang balaang espiritu. Kinahanglang andam kita sa pagbuhat kutob sa atong maarangan niining bahina aron may basehanan siya sa pagtubag sa atong mga pag-ampo. Busa, kita ‘dili makapangayo ug labaw pa kay sa atong mahimo,’ sumala sa pagkapahayag niana sa usa ka tawo.

6. Unsang duha ka katarongan nga kinahanglang mag-ampo kita?

⁶ Apan, ang pangutana hayan ibangon: ‘Nganong mag-ampo kon kinahanglan pang molihok alang nianang atong ginaampo?’ Kita angay mag-ampo sa duha ka maayong katarongan. Una, pinaagi sa atong mga pag-ampo atong gidawat nga ang tanang maayong mga butang nagagikan sa Diyos. Siya ang Maghahatag sa tanang maayo ug hingpit nga mga gasa​—ang adlaw, ulan, mabungahong mga panahon, ug daghan pa! (Mateo 5:45; Buhat 14:16, 17; Santiago 1:17) Ikaduha, malamposon man o dili ang atong mga paningkamot nagadepende kini sa panalangin ni Jehova. Sama sa atong mabasa diha sa Salmo 127:1: “Gawas nga si Jehova ang magatukod sa balay, kawang lamang ang kahago niadtong nagatukod niini. Gawas nga si Jehova ang magabantay sa siyudad, kawang lamang ang pagtukaw sa magbalantay.” Naghatag ug samang punto mao kining mga pulonga ni apostol Pablo sa 1 Corinto 3:6, 7: “Ako mao ang nagtanom, si Apolos mao ang nagbisbis, apan ang Diyos mao ang nagpatubo; sa ingon niana, ang may bili dili ang nagtanom o ang nagbisbis kondili ang nagpatubo, nga mao ang Diyos lamang.”

Ubang Karaang mga Pananglitan

7, 8. (a) Unsang hitabo sa kinabuhi ni Jacob nga nagpakita nga siya nakasabot nga kinahanglang ubanan ug mga binuhatan ang mga pag-ampo? (b) Unsay pananglitan ang gihatag ni Haring David niining bahina?

⁷ Gipakita sa taho sa Kasulatan nga milihok ang matinumanong mga alagad ni Jehova nianang ilang giampo. Atong tagdon ang pipila ka hawas nga mga pananglitan. Tungod kay si Jacob nga apo ni Abraham ang nakadawat sa panalangin sa katungod sa pagkamagulang, gidumtan siya ni Esau nga patyon. (Genesis 27:41) Sa milabay ang mga 20 ka tuig, sa dihang mipauli si Jacob gikan sa Paddan-aram ngadto sa iyang yutang natawhan nga may dakong panimalay ug daghang mga binuhing mga hayop, nakadungog siya nga sugaton siya ni Esau. Nakahinumdom sa pagdumot ni Esau, kinasingkasing nga nangayo si Jacob ug panalipod kang Jehova batok sa kasuko sa iyang igsoon. Apan gipasagdan ba lamang niya kini? Wala gayod. Siya nagpadalag daghang mga gasa nga nag-una kaniya, nga nangatarongan: “Pagahupayon ko ang iyang kaligotgot pinaagi sa gasa nga nagauna kanako.” Ug mao kini ang nahitabo, kay sa nagkita ang duha ka igsoon, gigakos ni Esau si Jacob ug gihalokan siya.​—Genesis, kapitulo 32, 33.

⁸ Laing pananglitan si David sa pagpaningkamot alang sa atong ginaampo. Sa dihang giilog sa iyang anak nga si Absalom ang iyang trono, ang magtatambag ni David si Ahitophel mikuyog kang Absalom. Busa kinasingkasing nga nangaliyopo si David nga mapakyas unta ang tambag ni Ahitophel. Miampo lang ba si David alang niana? Wala, iyang gisugo ang iyang maunongong magtatambag nga si Husai sa pag-anib kang Absalom aron iyang masanta ang tambag ni Absalom. Ug mao gayod kanay nahitabo. Milihok si Absalom sa dili maayong tambag nga gihatag kaniya ni Husai, gisalikway ang tambag ni Ahitophel.​—2 Samuel 15:31-37; 17:1-14; 18:6-8.

9. Sa unsang paagi gipakita ni Nehemias nga iyang gipabilhan ang prinsipyo nga nagkinahanglag mga binuhatan ang mga pag-ampo?

⁹ Laing pananglitan nga mahimong hisgotan ingong pahimatngon kanato mao kanang bahin kang Nehemias. Aduna siyay dakong proyektong gihimo​—ang pagtukod pag-usab sa mga kuta sa Jerusalem. Apan, daghang mga kaaway ang nagsabotsabot batok kaniya. Nag-ampo ug milihok si Nehemias, sumala sa atong mabasa: “Nag-ampo kami sa among Diyos ug among gibutangan ug usa ka bantay batok kanila sa adlaw ug sa gabii.” Sukad niadto, ang katunga sa mga batan-ong lalaki ni Nehemias nagbantay sa pagpanalipod sa laing katunga, kadtong nanagtukod sa kuta.​—Nehemias 4:9, 16.

Ang Pananglitan ni Jesus

10, 11. Unsang mga pananglitan ang gihatag ni Jesus nga nagpakita nga siya milihok kaharmoniya sa iyang mga pag-ampo?

¹⁰ Mihatag kanato si Jesu-Kristo ug maayong pananglitan sa pagpaningkamot sa butang nga atong giampo. Kita iyang gitudloan sa pag-ampo: “Balaanon unta ang imong ngalan.” (Mateo 6:9) Apan gihimo usab ni Jesus ang kutob sa iyang maarangan aron ang iyang mga mamiminaw magabalaan sa ngalan sa iyang Amahan. Sa susama, wala lamang mag-ampo si Jesus: “Amahan, himayaa ang imong ngalan.” (Juan 12:28) Dili, iyang gihimo kutob sa iyang maarangan sa paghimaya sa ngalan sa iyang Amahan ug sa pag-awhag sa uban sa paghimo niini.​—Lucas 5:23-26; 17:12-15; Juan 17:4.

¹¹ Nakakita sa dakong espirituwal nga panginahanglan sa mga tawo, si Jesus miingon sa iyang mga disipulo: “Daghan unta ang anihon, apan diyutay ra ang mga mamumuo. Busa, hangyoa ang Agalon sa anihon [Jehova nga Diyos] nga makapadala unta siyag mga mamumuo ngadto sa iyang anihon.” (Mateo 9:37, 38) Gipasagdan ba kana ni Jesus? Wala gayod! Human gilayon niana, iyang gipadala ang iyang mga disipulo nga tinagurha sa pagmantala, o sa pagpanaw sa ‘pagpangani.’ Sa ulahi, gipadala usab ni Jesus ang 70 ka ebanghelisador sa paghimo sa samang buluhaton.​—Mateo 10:1-10; Lucas 10:1-9.

Pagpadapat sa Prinsipyo

12. Unsay kalabotan sa binuhatan diha sa atong mga pag-ampo nga hatagan kita sa Diyos sa atong kalan-on sa matag adlaw?

¹² Sa matin-aw, gilaoman kita ni Jehova nga Diyos nga magmatubayon, molihok nga kakarmoniya sa atong mga pag-ampo, busa nagapamatuod sa atong pagkasinsero. Gitudloan kita ni Jesus sa pag-ampo: “Hatagi kami karon sa pagkaon namo sa matag-adlaw.” (Mateo 6:11) Busa, tukmang makapangayo ang tanan niyang mga sumusunod alang niana. Apan makalaom ba kita nga tubagon sa atong langitnong Amahan kanang pag-ampoa nga walay atong himoon bahin niana? Siyempre dili gayod. Maoy hinungdang atong mabasa: “Ang tapolan nagatinguha”​—tingali pinaagi sa pag-ampo—​“apan ang iyang kalag walay bisan unsa.” (Proverbio 13:4) Mihimo si apostol Pablo ug samang punto diha sa 2 Tesalonica 3:10, nga nagaingon: “Kon adunay magadumili sa pagtrabaho, ayaw ninyo siya pakan-a.” Ang pag-ampo alang sa atong kalan-on sa matag-adlaw kinahanglang ubanan sa pagkamainandamon sa pagtrabaho. Makaikag, maalamong miingon si Pablo nga kadtong magadumili sa “pagtrabaho” angay nga dili mokaon. Ang uban nga gustong motrabaho tingali walay-trabaho, masakiton, o tingali tigulang na kaayo sa pagtrabaho. Gusto silang motrabaho, apan saylo na kini sa ilang mga kahimtang sa panglawas. Busa, sila tukmang makaampo sa ilang kalan-on sa matag-adlaw ug sa pagpaabot nga makadawat niana.

13. Aron tubagon ni Jehova ang atong mga pag-ampo nga kunsaran kita sa iyang balaang espiritu, unsa ang kinahanglan natong buhaton?

¹³ Gitambagan usab kita ni Jesus sa pagpangayo sa iyang langitnong Amahan sa Iyang balaang espiritu. Sumala sa gipasalig ni Jesus kanato, ang Diyos labi pang andam sa paghatag kanato sa iyang balaang espiritu kay sa paghatag sa yutan-ong mga ginikanan ug maayong mga butang sa ilang mga anak. (Lucas 11:13) Apan makalaom ba kita nga hatagan kita ni Jehova nga Diyos sa iyang balaang espiritu sa milagrosong paagi, bisag wala kitay buhaton? Dili gayod! Kinahanglang buhaton nato ang tanan natong maarangan aron makadawat sa iyang balaang espiritu. Dugang pa sa pag-ampo alang niana, kinahanglang magkugi kita sa pagkaon sa Pulong sa Diyos. Ngano? Tungod kay dili mohatag si Jehova nga Diyos sa iyang balaang espitritu nga bulag sa iyang Pulong, ug dili usab kita makalaom nga makadawat sa balaang espiritu kon dili nato pabilhan ang yutan-ong alagianan ni Jehova nga iyang gigamit karon, “ang matinumanon ug maalamong ulipon,” nga gihawasan sa Nagamandong Lawas sa mga Saksi ni Jehova. Kon wala pa kining tabang gikan niining maong “ulipon,” dili gayod nato masabtan ang bug-os nga kahulogan sa atong ginabasa o mahibalo kon unsaon sa pagpadapat sa atong nakat-onan.​—Mateo 24:45-47.

14, 15. (a) Aron tubagon ni Jehova ang atong pagpagayog kaalam diha sa atong mga pag-ampo, sa unsang paagi kita motabang? (b) Sa unsang paagi gipakita kini sa pananglitan ni Haring Solomon?

¹⁴ Ang prinsipyo nga ang mga pag-ampo nagkinahanglag mga binuhatan aplikado usab niining mga pulonga sa disipulong Santiago, ang igsoon ni Jesus sa amahan: “Ug kon aduna man kaninyoy nakulangan ug kaalam, papangayoa siya sa Diyos, kay ang Diyos madagayaong mohatag ngadto sa tanan sa walay pagpanumboy; ug kini igahatag kaniya.” (Santiago 1:5; Mateo 13:55) Apan hatagan ba kita sa Diyos niining kalaama pinaagi sa usa ka milagro? Dili. Una sa tanan, kinahanglang may husto kitang kaisipan, kay atong mabasa: “Iyang pagatudloan ang mga maaghop sa iyang dalan.” (Salmo 25:9) Ug sa unsang paagi tudloan ni Jehova “ang mga maaghop”? Pinaagi sa iyang Pulong. Dugang pa, kinahanglang maningkamot kita sa pagsabot ug sa pagpadapat niini, sumala sa gipadayag sa Proverbio 2:1-6: “Anak ko, kon dawaton mo ang akong mga pulong ug tigomon mo ang akong mga sugo diha kanimo, aron nga ikiling mo ang imong igdulongong kanako, ug bansayon mo ang imong kasingkasing sa pagsabot; oo, kon ikaw magasangpit sa salabotan, ug magapatugbaw sa imong tingog alang sa pagpasabot, kon ikaw mangita niini ingon nga salapi, . . . ikaw makasabot sa pagkahadlok kang Jehova, ug hikaplagan mo ang kahibalo sa Diyos. Kay si Jehova mohatag ug kaalam.”

¹⁵ Sa dihang nangayo si Haring Solomon ug kaalam diha sa pag-ampo ug milagrosong gitubag sa Diyos ang iyang pag-ampo, aplikado ba usab ang prinsipyo nga nagkinahanglan ang mga pag-ampo ug binuhatan? Oo, aplikado, kay alang sa hari sa Israel, gisugo si Solomon sa pagsulat ug iyang kaugalingong kopya sa Kasugoan, basahon kini kada adlaw, ug ipadapat kini sa iyang kinabuhi. Apan sa dihang misupak si Solomon sa mga pahimangno niini, sama sa pagpadaghan sa iyang mga asawa ug mga kabayo, ang iyang mga binuhatan wala na magkauyon sa iyang mga pag-ampo. Ingong resulta, si Solomon nahimong usa ka apostata ug namatay ingong “walay salabotan.”​—Salmo 14:1; Deuteronomio 17:16-20; 1 Hari 10:26; 11:3, 4, 11.

16. Unsang ilustrasyon ang nagpakita nga ang atong mga pag-ampo nga makabuntog sa mga kahuyangon sa unod kinahanglang ubanan sa mga binuhatan?

¹⁶ Ang prinsipyo nga kinahanglang ubanan ang mga pag-ampo ug binuhatan aplikadao usab kon mangayo kitag tabang sa Diyos sa pagbuntog sa pipila ka midukot na, hakog nga batasan. Busa ang usa ka payunir nga igsoong babaye miadmiter nga nagiyan siya sa mga drama sa telebisyon, magtan-aw niini gikan sa alas 11:00 s.b. ngadto sa alas 3:30 s.h. kada adlaw. Nakakat-on gikan sa pakigpulong sa distritong kombensiyon kon ka makadaot kining imoral nga mga programa, giampo niya sa Diyos kining butanga. Apan, dugaydugay niyang nasumpo ang batasan. Ngano? Tungod kay, matud pa niya: ‘Miampo ako nga masumpo ko ang batasan ug mitan-aw ra gihapon sa mga programa. Busa mihukom ako sa pag-alagad sa kanataran sa tibuok adlaw aron dili ako matintal. Sa kataposan midangat ako sa punto nga makapalong na ako sa TV sa buntag ug sa tibuok adlaw.’ Oo, dugang pa sa pag-ampo nga mabuntog ang iyang kahuyangon, siya milihok sa pagbuntog niana.

Pag-ampo ug ang Atong Pagpamatuod

17-19. (a) Unsang mga kamatuoran ang nagpakita nga nagalihok ang mga Saksi ni Jehova sumala sa ilang ginaampo? (b) Unsang panig-ingnan sa usa ka indibiduwal ang nagpakitag samang punto?

¹⁷ Ilabinang tinuod ang prinsipyo nga nagkinahanglan ang mga pag-ampo ug binuhatan sa buluhaton sa pagsangyaw sa Gingharian. Busa, ang tanang mga Saksi ni Jehova nagaampo nga mouswag dili lamang ang mga mamumuo sa anihon kondili madasigon usab sila nianang buluhatona. Ingong resulta, nakakita silag tagsaong pag-uswag sa nagkalainlaing yuta. Sa pagkuha ug usa lamang ka pananglitan: Sa 1930 usa lamang ka saksi ni Jehova ang nagsangyaw sa Chile. Karon, kanang usa ka Saksi nahimo dili lamang usa ka libo kondili mga 30,000. (Isaias 60:22) Resulta ba lamang kini sa mga pag-ampo? Dili, giubanan kini ug buhat. Ngani, sa 1986 lamang ang mga Saksi ni Jehova sa Chile nakagugol ug kapin sa 6,492,000 ka oras sa buluhatong pagsangyaw!

¹⁸ Tinuod kini dihang idili ang buluhaton sa pagsangyaw. Ang mga Saksi mag-ampo dili lamang sa kauswagan kondili nagabuhat usab sa tinago nga paagi ug nagapadayon sa pagsangyaw. Busa, bisan pa sa opisyal nga pagbatok, nahitabo gihapon ang pag-uswag niining mga yutaa. Busa, sa 33 ka yuta nga diin giatubang sa mga Saksi ni Jehova ang opisyal nga pagbatok, sa yugto sa 1986 nga tuig sa pag-alagad sila nakagugol ug kapin sa 32,600,000 ka oras sa ilang buluhaton sa pagsangyaw ug nalipay sa 4.6 porsiento nga pag-uswag!

¹⁹ Siyempre, ang prinsipyo nga nagkinahanglan usab ang mga pag-ampo ug binuhatan aplikado sa indibiduwal nga paagi. Makaampo kita kang Jehova nga makabaton ug pagtuon sa Bibliya sa balay apan wala buhata ang kutob sa atong maarangan nga makabaton ug usa. Mao kanay eksperyensiya sa usa ka payunir. Nakabaton ug usa lamang ka pagtuon sa Bibliya, siya miampo nga makabaton ug dugang pa. Mihumong ba siya diha? Wala, apan iyang gisusi pag-ayo ang iyang ministeryo ug nakakaplag nga diha sa iyang mga pagbalik-duaw wala niya hisgoti ang ulohan sa pagtuon sa Bibliya sa balay. Iya kadtong gipaningkamotang makab-ot, ug sa ulahi siya nakabaton ug dugang duha ka mga pagtuon sa Bibliya.

20. Sa unsang paagi ikapahayag sa laktod nga paagi ang prinsipyo nga nagkinahanglag binuhatan ang mga pag-ampo?

²⁰ Daghan pang mga pananglitan ang ikahatag sa pagpamatuod nga nagkinahanglan ug mga binuhatan ang mga pag-ampo. Pananglitan, anaa kanang bahin sa personal nga mga relasyon sa pamilya o sa kongregasyon. Apan ang mga pananglitan sa ibabaw igo nang makapatin-aw sa bug-os nga nagkinahanglag mga binuhatan ang mga pag-ampo. Labing makataronganon kini, kay dili kita makalaom nga dungon ni Jehova nga Diyos ang atong mga pag-ampo kon wala makapahimuot kaniya ang atong paggawi. Matin-aw nga kinahanglang paningkamotan natong buhaton ang kutob sa atong maarangan kaharmoniya sa atong mga pag-ampo kon nagalaom kita nga buhaton ni Jehova ang butang nga dili nato mahimo. Sa pagkatinuod, ang mga prinsipyo ni Jehova maalamon ug matarong. Sila makataronganon, ug alang sa atong kaayohan nga molihok kita nga kaharmoniya niana.

Makahinumdom Ka Ba?

◻ Unsang kinahanglanon bahin sa pag-ampo ang wala panumbalinga sa kadaghanan sa karaang Israel?

◻ Nganong makataronganon ang Diyos sa pagsugo nga kinahanglang molihok ug moampo kita alang sa atong ginatinguha?

◻ Unsang karaang mga pananglitan ang nagpakita nga milihok ang mga alagad ni Jehova alang nianang ilang giampo?

◻ Aron tubagon sa Diyos ang atong mga pag-ampo nga kunsaran sa balaang espiritu ug kaalam, unsa ang angay natong buhaton?

◻ Sa unsang paagi ang prinsipyo nga nagkinahanglag binuhatan ang mga pag-ampo aplikado sa atong pag-alagad sa kanataran?

1. Unsang usa ka kondisyon ang kinahanglang kab-oton aron tubagon sa Diyos ang atong mga pag-ampo?

[Hulagway sa panid 17]

Giawhag ni Jesus ang iyang mga disipulo sa pag-ampo alang sa dugang mga mamumuo sa anihon. Apan iyang gipadala usab sila sa buluhaton sa pagsangyaw, o sa ‘pagpangani’

[Hulagway sa panid 18]

Moampo ka bang tabangan nga makontrolar ang imong pagtan-aw ug telebisyon? Nan ipadapat ang prinsipyo nga ang mga pag-ampo nagkinahanglag mga binuhatan pinaagi sa pagpalong sa imong TV