Mga Magmamantala sa Gingharian Nagtaho

Usa ka Pangulo Misulti

MAKAPADASIG ang pagkasayod nga may mga tawo pa nga tag-as ug katungdanan niining kalibotana nga nahigugma sa pagkamatinud-anon ug hustisya ug nagasulti sa pagtuboy niining mga hiyasa. Ang usa ka panig-ingnan mao ang usa ka pangulo sa tribo sa usa ka Aprikanhong nasod diin ang buluhaton sa mga Saksi ni Jehova gipiotan. Atong ipaasoy kini sa taho:

“Dili pa dugay ang nagkalainlaing relihiyon naghimo sa sagol-denominasyong kombensiyon sa among lungsod, ug kini nag-apil sa mga Katoliko, mga Presbyteriano, mga Pentekostal, ug uban pa. Ang Kinalabwang Pangulo gidapit sa paghatag ug pakigpulong sa kombensiyon sa hinapos sa kataposang mga sesyon. Sa katingala sa tibuok nga katigoman, siya misulti kanila, apil sa ubang butang, sa pagsundog sa pagkamatinud-anon ug hataas moral nga mga sukdanan sa mga Saksi ni Jehova, nga midugang nga kon ang tanan sama sa mga Saksi ni Jehova, may kalinaw unta sa nasod.

“Sa pagkaugma ang dagkong mga lider sa mga simbahan nga gihawasan panahon sa kombensiyon miadto sa palasyo sa Pangulo ug mitutol nga grabe batok sa bahin sa iyang pakigpulong nga nagdayeg sa mga Saksi ug nangutana kaniya kon siya wala ba masayod nga ang mga Saksi gidili man sa nasod. Ang Pangulo mitubag sa apirmatibo apan gisultihan sila nga siya walay nakaplagang sala sa mga Saksi ni Jehova. Siya mipadayon sa pagsulti: ‘Sa tanan kong katuigan ingong Kinalabwang Pangulo, bisan kausa walay Saksi ni Jehova ang gidala sa akong korte tungod sa grabeng buhat nga daotan. Sa laing bahin, kon ang balanghoy kawaton gikan sa usa ka uma, kadaghanan mosangpot nga ang usa ka Katoliko mao ang kawatan. Kon gabi ang kawaton, usa ka Presbyteriano maoy nangawat, Ang mga membro sa inyong simbahan naghugaw sa akong nasod pinaagi sa mga aborsiyon, ug ngani walay usa ka Saksi ni Jehova ang gidala sa akong korte tungod nianang mga salaa. Dili ba ang mga balaod sa Diyos nagadili man sa maong mga pagkadaotan, o ang mga simbahan dili na ilalom sa balaod sa Diyos?’ Ang mga klerigo wala makatubag.

“Sa ulahi, ang Kinalabwang Pangulo nagpatawag sa mga hawas sa mga Saksi ni Jehova ug nag-awhag kanila sa pagbantay nga walay kaulawan ang mahibutang sa ngalan sa ilang Diyos ug sa iyang kaugalingong ngalan ingong ang Kinalabwang Pangulo nga misulti pabor sa mga Saksi ni Jehova.”

Ang taho nag-ingon nga karon daghang bag-ohan ang mibarog dapig sa kamatuoran. Ang usa ka Saksi nagpahayag nga siya karong bag-o nakasugod ug mga pagtuon sa Bibliya uban sa tulo ka pangulo sa dapit, nga usa kanila mao ang Kinalabwang Pangulo, ug ang tulo nagatambong tanan sa mga tigom sa mga Saksi ni Jehova!

Si Jehova nga Diyos nagamatikod niadtong nahigugma sa kamatuoran ug sa pagkamatarong ug nagasulti pabor sa Iyang mga alagad.​—Mateo 10:42.