Akong Nakita nga si Jehova Maayo

Sumala sa giasoy ni Lennart Johnson

SA Dominggo, Hulyo 26, 1931, ang ikaduhang presidente sa Watch Tower Bible and Tract Society, si J. F. Rutherford, mipahayag sa pakigpulong “Ang Gingharian, ang Paglaom sa Kalibotan” sa coliseum sa Columbus, Ohio. Ang among pamilya sa Rockford, Illinois, namati niana sa radyo. Ako niadto 14 anyos, apan ang maong programa nagtangtang, ingnon ta, sa usa ka bagang tabil sa akong mga mata.

Bisan pag ang akong amahan interesado sa mensahe sa Gingharian, ug sa ulahi ang akong igsoong lalaki, usab, ang akong inahan sa kanunay walay pagtagad. Si Papa namatay sa sunod tuig, sa 1932. Ang ubang mga pagsibya sa Watch Tower padayong nagpakaon kanako sa espirituwal nga paagi, apan niadto lamang Abril 1933 nga akong nasayran ang dapit diin magtigom ang mga Saksi ni Jehova, nga milyamilya ang kalayo sa tabok sa suba.

Dako ang katingala sa gamayng grupo didto sa pagkakita nga ang usa ka niwangong tin-edyer nagbisikleta abot sa ilang tigom alang sa pagtuon sa Vindication Basahon Dos! Sa matag tigom, ako nagpadayon nga nakakat-on sa dugang ug nalipay sa duha ka bulan sa ulahi nga misugod sa pagduaw sa ganghaan ngadto sa ganghaan uban ang mensahe sa Gingharian. Ako nabawtismohan sa usa ka rehiyonal (karon sirkito) nga asembliya niadtong tuiga mismo.

Tapos sa pag-eskuyla sa matag adlaw, akong gugolon ang usa o kapin pang oras sa pagduaw sa mga silingan sa palibot sa among balay uban ang mensahe sa Gingharian. Ako may higayon usab sa pagsangyaw sa eskuylahan. Pananglitan, ang usa ka kurso nagpahayag sa teoriya nga impiyernong-kalayo ug pagsakit. Kadto nagtukmod kanako sa paghatag sa Kasulatanhong pamatuod nga ang mga patay wala mag-antos kondili walay panimuot lamang ug anaa sa ilang mga lubnganan nga may paglaom sa pagkabanhaw. Gitugtan ako sa titser sa pagbasa sa akong mabug-osong komposisyon sa atubangan sa enterong klase.

Ang Bug-os-Panahong Ministeryo

Niadtong Mayo 1935, ako mitambong sa kombensiyon sa Washington, D.C., diin gipasiugda ang payuniring (ang bug-os-panahong ministeryo). Sa pagpauli, ako misulat sa Watch Tower Society, ug sila mibalos dili lang sa listahan sa mga teritoryong mabatonan kondili hasta usab, sa akong katingala, naglakip sa daghang plano sa paggamag treyler. Niadtong mga adlawa ang payuniring kadaghanan nagpasabot sa pag-adto sa bag-ong mga dapit, ug ang usa ka treyler naghatag sa usa sa dapit kapuy-an. Busa ako mihukom sa pagtrabaho aron makabaton ug kotse ug treyler aron ako makapadayon sa bug-os-panahong ministeryo.

Kasamtangan, ako nalangkit sa paggamit sa de-trompang sakyanan o sound car nga napalit sa among kongregasyon sa pagsangyaw sa mensahe sa Gingharian. Dihang ang laing igsoong lalaki ug ako gidapit nga moadto sa Monroe, Wisconsin, aron gamiton kana, akong nahimamat ug sa wala madugay giminyoan si Virginia Ellis. Sa maong panahon kami nagkauban sa pagtrabaho aron makabaton sa kotse ug treyler nga magamit sa payunir nga buluhaton!

Sa tinghunlak sa 1938 si Mama namatay, ug sa maomaong panahon si Harold Woodworth nagsulat kanamo gikan sa New Mexico: “Ari kamo dere; dako ang panginahanglan.” Busa kami mibiyahe paingon sa New Mexico, nga maoy biyahe sa mamala nga duolag usa ka libo unom ka gatos kilometros. Sa usa ka adres ubay sa dalan, ang usa ka telegrama nakaabot kanamo. “Pauli mo,” kadto miagda. Ako gitanyagan ug dakog-suweldong trabaho uban ang ekselenteng mga higayon nga moasenso. Akong gigisi ang telegrama. Kon si Jehova nagtabang kanamo sa pagpangandam alang sa payuniring, dili ko tugotan nga may mobalda niana!

Sa Marso 1939 among gisugdan ang among payunir nga pag-alagad sa Hobbs, New Mexico. Kadto dapit sa mga baka; daghan usab ang bag-ong mga lalin sa mga dapit sa aseite nga maduaw niining lugara. Ang gamayng kongregasyon may mga tigom sa Biyernes ug Dominggo, busa among dad-on ang mga basahon, tubig, pagkaon, gamayng kusinilya, ug mapilopilong katre ug gugolon ang Lunes hangtod Biyernes sa hapon sa pagsangyaw sa kabanikanhan. Sa pag-abot sa gabii, kami mangatulog sa kapatagan uban sa langit ingong atop ug sa “sulo” sa dapit sa aseite sa duol sa pag-abog sa mga halas. Among gigugol ang mga hinapos sa semana sa lungsod nga mosangyaw uban sa kongregasyon.

Tapos sa daghang bulan sa maong eskedyul, ang Sosyedad nagpadala kanamo ngadto sa Roswell ug dayon ngadto sa Albuquerque, New Mexico. Dinhi gigamit na usab namo ang de-trompang sakyanan, nga epektibo ilabina sa pagsangyaw ngadto sa Indian nga kabalangayan sa dapit. Sa misugod ang bag-ong buluhaton sa pagsangyaw sa kadalanan uban sa among mga magasin sa sinugdan sa 1940, kami nalipay nga nakig-ambit niana uban sa mga igsoon sa Albuquerque.

Pagsupak Panahon sa Kaguliyang sa Gubat

Ang ikaduhang gubat sa kalibotan nagsugod sa Uropa sa miaging Septiyembre, ug misunod ang usa ka yugto sa mapintasong paglutos tungod sa among neyutral nga baroganan bahin sa pag-apil sa gubat. Kas-a ang akong kamisadentro literal nga gilasnit gikan sa akong bukobuko samtang ako nakig-ambit sa pagsangyaw.

Sa ting-init sa 1940, ang mga igsoon nagsangyaw uban sa mga magasin duol sa El Paso, Texas, ug ubay-ubay kanila gidakop. Sa sunod Lunes, si Harold Woodworth ug ako miadto sa pagtabang kanila panahon sa ilang husay. Pinaagi sa pagsukitsukit sa mga igsoon atubangan sa korte, ako nakapatunghag angayng mga punto sa pagdepensa kanila. Tapos ipahayag nga silang tanan walay sala, ang balita sa mantalaan nagtumong kanako nga usa ka “may kaugmaong batan-ong abogado gikan sa Albuquerque.” Apan, sa pagkamatuod, si Jehova mao ang mihatag sa iyang mga alagad sa kadaogan niadtong adlawa!

Sa susama, ang among mga igsoon nangapriso tungod sa pagsangyaw sa laing siyudad. Tapos ako moatubang sa korte sa pagdepensa kanila, si Igsoong David Gray ug ako naghatag sa usa ka sulat ngadto sa matag opisyal sa siyudad. Ang sulat nagpahayag sa legal nga katungod sa mga Saksi ni Jehova sa pagtuman sa ilang buluhaton, ug kadto nagpasidaan nga kon ang mga Saksi padayong hasion, ang opisyales maoy manubag sa bisan unsang kadaot nga basin mosangpot.

Gidawat sa alkalde ang sulat ug gibasa kana nga walay komento, apan kami gisultihan sa hepe sa polisiya: ‘Dinhi sa Kasadpan ang mga tawo mobiyahe sa gawas sa lungsod, ug . . . aw, sa ulahi ang uban mangita kanila, ug sila dili na gayod hikaplagan.’ Apan wala tumana ang iyang bahad; hinunoa, ang kahimtang milinaw, ug ang aksiyon sa korte batok sa mga igsoon gidismis.

Sa maomaong panahon ako gitudlo sa Watch Tower Society nga usa ka alagad sa sona (karon gitawag magtatan-aw sa sirkito). Naapil sa akong asaynment ang dakong bahin sa New Mexico ug bahin sa Texas.

Gilead ug Asaynment sa Laing Nasod

Niadtong 1943 si Virginia ug ako nakadawat ug imbitasyon sa pagtambong sa ikaduhang klase sa Watchtower Bible School of Gilead. Tapos sa graduwasyon sa Enero 1944, kami sa sinugdan giasayn sa pagtrabaho uban sa Flatbush nga Kongregasyon sa Brooklyn, New York. Kami nagpuyo sa likod sa pabrika sa Sosyedad sa usa ka daang tinukod nga sa ulahi giguba aron padak-an ang pasilidad sa pabrika sa Adams Street.

Hinuon, sa wala madugay among nadawat ang among asaynment ngadto sa Dominican Republic, diin si Rafael Leónidas Trujillo Molina mao ang absolutong diktador. Sa among pag-abot sa tugpahanan sa Dominggo, Abril 1, 1945, si Virginia ug ako mao ang bugtong mga Saksi sa nasod. Kami nangadto sa Victoria Hotel ug nakabatog katulganan​—$5 sa usa ka adlaw alang kanamong duha, apil ang pagkaon. Niadtong hapona mismo among nasugdan ang una namong pagtuon sa Bibliya.

Kadto nahitabo niining paagiha: Duha ka babayeng Dominican nga among gitun-an sa Bibliya sa Brooklyn naghatag kanamo sa mga ngalan sa mga paryente ug mga kaila, nga usa kanila mao ang usa ka Dr. Green. Sa among giduaw siya, amo usab nahibalag ang iyang silingan nga si Moses Rollins. Tapos sa pagsulti kanila sa unsang paagi among nabatonan ang ilang mga ngalan ug mga direksiyon, sila namatig maayo sa mensahe sa Gingharian ug misugot sa usa ka pagtuon sa Bibliya. Sa wala madugay si Moses nahimong unang lokal nga magmamantala sa Gingharian.

Niadtong gabhiona mismo si Dr. Green nagdala kanamo sa pagpangitag balay gikan sa ibabawng parte sa dos-andanang bus. Sa kataposan among giabangan ang usa ka gamayng kongkretong balay didto sa kaulohan, ang Ciudad Trujillo (karon Santo Domingo). Sa Hunyo upat pa ka misyonaryo miduyog kanamo. Gibuksan ang ikaduhang misyonaryong balay, ug dayon nangabot ang dugang misyonaryo. Sa pagka Agosto 1946 kami may kinatas-ang ihap nga 28 ka magmamantala. Sa wala madugay nangabot ang dugang misyonaryo, ug ang mga balay gibuksan na usab alang kanila. Ang pag-uswag nagsugod na!

Pag-alagad Samtang Gidili

Sa pagka 1950 kami miuswag ngadto sa kapin sa 200 ka magmamantala. Ugaling, kay ang mga Saksi ni Jehova nagahupot sa baroganan sa estriktong neyutralidad, ang gobyerno ni Trujillo misugod sa pagpriso sa among mga batan-ong igsoong lalaki. Dayon, sa pagkompeto niana, ang bug-os nga pagdili gipahamtang sa buluhaton sa mga Saksi ni Jehova sa Hunyo 21, 1950.

Kay dili na makatigom sa mga Kingdom Hall, ang mga igsoon misugod sa pagtigom sa hilom sa gagmayng mga grupo sa pribadong mga balay. Didto kami nagtuon sa mga artikulo sa Bantayanang Torre nga gigama pinaagi sa mimeograp. Ang tanang maunongon nagmahal pag-ayo sa espirituwal nga kusog nga gipadayon sa paghatag ni Jehova kanila diha sa gagmayng mga grupo sa pagtuon.

Ang Dominggo mao ang among adlaw sa pagduaw sa daghang Dominican nga igsoon sulod sa mga prisohan ni Trujillo. Kami kapkapan sa entrada, nga matikdan ang among bug-os nga ilhanan. Usahay libotan kami sa mga sundalo dihang kami kauban sa maong mga igsoon, nga bantayan kamig maayo. Sa usa ka okasyon kami gikuyogan ni Stanley Aniol gikan sa Chicago, kinsa nagduaw sa iyang misyonaryong anak babaye si Mary (karon Mary Adams, nga nagaalagad sa Brooklyn Bethel). Kay natandog sa integridad sa batan-ong Dominican nga mga igsoong lalaki, si Igsoong Aniol mabinationg mihalok kanilang tanan atubangan sa nanan-awng mga sundalo.

Sa pagkatapos sa pagduaw, samtang kami nagsubay sa dakong komersiyal nga dalan, ang usa ka sakyanan nga puno sa mga tawo ni Trujillo nagsunod kanamo nga hinay. Kadto usa sa iladong mga paagi ni Trujillo sa pagsingkamot sa paghadlok sa mga tawo. Sa giingnan namo si Igsoong Aniol kon unsay ilang tuyo, kadto wala makatandog kaniya bisag diyutay. Sa pagkamatuod, kinahanglang dili tagdon ang paningkamot ni Trujillo sa paghadlok ug ibutang ang bug-os nga pagsalig kang Jehova.

Usahay ang mga impostor, ang mga espiya ni Trujillo, moanha sa among ganghaan, nga moangkong mga igsoon. Busa kinahanglan kami mahimong “mabinantayon sama sa mga bitin apan inosente sama sa mga salampati.” (Mateo 10:16) Among sulayan ang maong mga tawo pinaagig mautingkayong mga pangutana sa pagtino kon sila tinuod bang among mga igsoon o dili.

Panahon sa pagdili ang ubay-ubayng mamumulong matag usa mohatag sa mga pakigpulong sa Memorial sa tulo ka lainlaing grupo sa pagtuon, nga mobiyaheng dili himatikdan kutob sa mahimo gikan sa usa ka lokasyon gadto sa lain. Kadaghanan mobunok ang ulan sa gabii sa Memorial, ug sanglit ang panon sa mga espiya ni Trujillo mahadlok sa kusog nga ulan sama nga ang mga tawo sa ubang dapit mahadlok sa kusog nga ulan sa niyebe, kadto panalangin alang kanamo.

Sanglit ang pagsulod pag-usab sa nasod dumilian sa gobyerno ni Trujillo, ang kadaghanan sa mga misyonaryo wala motambong sa internasyonal nga mga kombensiyon sa New York City niadtong 1950 ug 1953. Kami kinahanglang matagbaw sa pagkobre sa kombensiyon sa The New York Times, nga nagtaganag nindot nga mga hulagway sa kombensiyon ug sa detalyadong adlaw-adlaw nga kabatbatan sa programa. Gawas pa, ang lokal nga teatro naghatag ug taastaas nga salida sa dakong bawtismo sa kombensiyon sa 1953.

Niadtong 1956 si Roy Brandt ug ako gipatawag alang sa opisyal nga pagsukitsukit. Ang opisyales sa gobyerno ni Trujillo sa nangagi nagdapit kang Igsoong Manuel Hierrezuelo sa pag-adto ug pagpakigkita kanila. Apan sa ulahi si Manuel gibalik sa iyang pamilya nga usa ka minatay. Busa sa maong panahon, unsa kahay among sangpotan?

Sa pag-abot kami gisukitsukit nga separado, nga lagmit girekord ang among mga tubag. Wala nay laing nahitabo niadto, apan duha ka bulan sa ulahi ang mga mantalaan nagpahibalo nga ang gobyerno ni Trujillo nagtangtang sa pagdili diha sa mga Saksi ni Jehova ug kami makabuhat na usab sa dayag sa among mga buluhaton. Ang mga Kingdom Hall gipangita na usab, ug ang buluhaton ni Jehova nagpadayon sa pag-uswag.

Ugaling, sa Hunyo 1957 ang usa ka mapintasong bag-ong sunodsunod nga paglutos misugod, ug ang tanang misyonaryo gipalagpot sa nasod. Ang among paglakaw masulob-on gayong adlaw alang kanamo. Si Virginia ug ako nakaalagad sa 12 anyos sa Dominican Republic ug among nakita nga ang gidaghanon sa mga Saksi mitubo gikan sa kami rang duha ngadto sa kapin ug 600. Sa 1960 ang ikaduhang pagdili giwagtang, ug ang gidaghanon sa mga magmamantala nagpadayon sa pag-uswag hangtod nga karon kini mga 10,000!

Pag-alagad sa Puerto Rico

Sa among pag-abot sa Puerto Rico sa Agosto 1957, ang among Kristohanong mga igsoon ingon man mga reporter sa mantalaan diha sa pagsugat kanamo. Ang misangpot nga mga asoy sa mantalaan nakahatag ug dakong pamatuod. Niadtong panahona, menos sa 1,200 ang magmamantala sa Gingharian sa Puerto Rico; karon adunay duolag 22,000!

Niadtong 1958 ang Sosyedad nagdapit kanako nga mahimong usa ka nagapanawng magtatan-aw. Busa, latas sa katuigan kami nakaila ug nakabuhat uban sa daghang matinumanong igsoon gikan sa tanang bahin sa Puerto Rico ug sa Virgin Islands. Sa nahaigong panahon, ang akong asawa ug ako nahimong mga membro sa lokal nga pamilyang Bethel. Ug sukad sa pagkaporma sa Komite sa Sanga dinhi, si Jehova nagpabor kanako sa pagkahimong membro niini.

Ako nahupong sa kalipay kay nakadawat sa personal gikan kang Jehova sa gitagnang “usa ka gatos ka pilo karon . . . nga mga igsoong lalaki ug mga igsoong babaye ug mga inahan ug mga anak.” (Marcos 10:30) Dili gayod nako gustong gugolon ang akong kinabuhi sa laing paagi kay sa diha sa iyang pag-alagad. Ug busa, samtang ako maghinumdom sa mga 48 ka tuig sukad sa akong pagsugod sa pagpayunir, ako malipayong makaingon nga, sa pagkamatuod, akong nakita nga si Jehova maayo!​—Salmo 34:8.

Samtang gihimo ang panapos nga mga preparasyon sa estorya sa kinabuhi ni Lennart Johnson sa ibabaw, si Virginia Johnson namatay nga malinawon samtang siya natulog niadtong Enero 31, 1987

[Blurb sa panid 27]

Si Jehova mao ang mihatag sa iyang mga alagad sa kadaogan!

[Blurb sa panid 28]

Ang tanang maunongon nagmahal pag-ayo sa espirituwal nga kusog nga padayong gihatag ni Jehova kanila

[Letrato sa [panid 29]

Si Virginia ug ako nagbuhat uban sa daghang matinumanong igsoon gikan sa tanang bahin sa Puerto Rico