Mga Pangutana Gikan sa mga Magbabasa
◼ Unsay nahimong sayop ni Moises nga nakawala sa iyang pribilehiyo sa pagsulod sa Yutang Saad? Tungod ba kay iyang gibunalan ang bato imbes sa pagsulti lang niana o tungod ba kay napakyas siya sa paghimaya kang Jehova nga Diyos?
Mopatim-aw nga labaw pa ang sayop ni Moises kay sa pag-igo lamang niya sa bato imbes sa pagsulti niana, sumala sa gisugo sa Diyos.
Dihang hapit nang matapos ang 40 ka tuig nga paglaaglaag, nagkampo ang mga Israelinhon sa Kadesh-barnea sa kamingawan sa Zin (o, Paran). Tingali nakakampo na sila didto sa miaging mga dekada, tungod kay ang tulo ka tubod sa tubig sa maong dapit naghatag man ug lunhawng tanaman, sama sa makita sa nagaubang letrato. Apan, ning higayona, nihit ang tubig, nga tingali nagpasabot nga walay makitang pagkaon ang mga tawo. Busa ilang giaway si Moises, nga hawas ni Jehova, nga nagaingon: “Nganong gipatungas mo kami gikan sa Ehipto aron sa pagdala kanamo niining daotan nga dapit? Kini dili mao ang dapit alang sa uma ug sa mga higuera ug mga paras, ug mga granada, ug wala gani bisan tubig nga imnon.”—Numeros 20:5.
Dayon gisultihan sa Diyos si Moises ug Aaron: “Kuhaa ang sungkod ug tigoma ang katilingban, . . . ug magsulti ka sa bato atubangan sa ilang mga mata aron kini magahatag sa iyang tubig; ug magakuha ikaw alang kanila ug tubig gikan sa bato ug paimna ang katilingban ug ang ilang mga kahayopan.” (Numeros 20:8) Unsay sunod nga nahitabo?
“Gitigom ni Moises ug Aaron ang katilingban sa atubangan sa bato, ug siya miingon kanila: ‘Ania, karon, kamo nga mga maalsahon! Magapaagay ba kami ug tubig alang kaninyo gikan niining batoha?’ Ug gibakyaw ni Moises ang iyang kamot ug gibunalan ang bato sa iyang sungkod makaduha; ug miagay ang daghang tubig.”—Numeros 20:10, 11.
Ang uban miingon nga gisugo sa Diyos si Moises ug Aaron sa “pagsulti sa bato,” apan ilang “gibunalan ang bato.” Nasuko ba gayod kaayo si Jehova niini nga tungod niana iyang gisultihan si Moises ug Aaron nga dili Niya pasudlon sila sa pagdala sa Israel ngadto sa Yutang Saad?
Daw dili ingon niini ang nahitabo. Ang kamatuoran mao nga sa pila ka bulan tapos sa Exodo gikan sa Ehipto, unang mireklamo ang mga tawo sa pagkawalay tubig. Duol kini sa Bukid sa Sinai (Horeb), diha sa usa ka dapit nga gitawag sa ulahi nga Meriba (sa lugar nga makita sa ubos). Matikdi kon unsay gisulti sa Diyos kang Moises niadtong okasyona. “Ako mitindog sa atubangan mo didto sa ibabaw sa bato sa Horeb. Ug bunali ang bato, ug gikan niini motubod ang tubig, aron makainom ang katawhan.” (Exodo 17:2-7; 33:6) Busa, dinha sa Kadesh, gisugo si Moises sa pagsulti sa bato, tingali gusto niyang buhaton ang iyang nahimo na sa miagi sumala sa sugo sa Diyos, bisan pa nga miingon ang Diyos nga ang pagsulti sa bato igo na.
Daw may dako pang butang ang nakaagak sa paghukom kang Moises ug Aaron. Unsa kaha kana? Si Moises miingon sa makilalison nga mga tawo: “Magapaagay ba kami ug tubig alang kaninyo gikan niining batoha?” Ang Salmo 106:33 naghatag kanatog katin-awan niini, kay kini nagpakita nga milihok si Moises tungod kay nasakit ang iyang espiritu ug tungod kay siya ‘namulong sa dili angay sa iyang mga ngabil.’ Sa masuk-anong mga pulong, gibayaw niya ang iyang kaugalingon ug si Aaron inay sa Usa nga mao gayod ang naghatag sa tubig sa milagrosong paagi. Busa, sa wala pa mamatay si Moises diha sa utlanan sa Yutang Saad, gikutlo pag-usab sa Diyos ang hitabo diha sa Kadesh-barnea ug gipakita nga ang sayop ni Moises mao nga siya napakyas sa ‘pagbalaan sa Diyos atubangan sa mga mata sa katawhan.’—Numeros 27:12-14.
Makakuha kitag pagtulon-an gikan niini. Samtang hinungdanong pugngan nato ang atong kaugalingon sa paghimog mga buhat sa kasuko, ingon usab ka hinungdanon nga pugngan nato ang atong espiritu, ilabina kon magkulang ang uban. Kon atong pasagdan ang atong kaugalingon nga sobrang mabalaka, basin ug mosugod kita sa paglantaw sa mga alagad sa Diyos ingong mga tawo lamang, inay ilhon nga “karnero” usab sila sa Diyos. Tinuod, dili sila hingpit ug makahimog makalagot nga mga butang, apan sila “iyang katawhan ug karnero sa iyang sibsibanan.” (Salmo 100:3) Gitugotan sa Diyos ang iyang Anak aron mamatay alang kanila, busa dili ba kita angay maningkamot nga magmapailobon kanila, dili kaayo magtagad sa atong pagbati o kon unsay epekto niini diha kanato kondili ang tan-awon mao ang ilang baroganan atubangan sa Diyos?
[Mga Letrato sa panid 31]
Panahon sa tingpamulak diha sa tanaman nga nagalibot sa usa sa mga tubod sa tubig sa dapit sa Kadesh-barnea
[Tinubdan]
Photos, pages 10, 31: Pictorial Archive (Near Eastern History) Est.