Kon Nganong Ikaw Angay Mainteres
‘MAINTERES sa unsa?’ Sa kinadak-ang kausaban nga mahitabo sa kasaysayan sa katawhan! Usa ka bug-os bag-ong kagamhanan nga hinimo sa Diyos hapit nang mobanos sa yutan-ong talan-awon. (Daniel 2:44) Ang pagbanos mag-apektar sa matag lalaki, babaye, ug bata—sa kaayohan kaha o sa kadaotan. Kining talagsaong kausaban mahitabo sulod sa kaliwatang gihisgotan sa Mateo 24:34. Busa, ang mensahe mahitungod nianang kausabana nagakinahanglan sa sinsero ug madasigong interes sa tanang tawo. Sa pagkamatuod, sayop ang pag-ingon, ‘Dili ako interesado.’
Sa Dihang Daghan Dili Magpakitag Interes
Ang atong adlaw karon dili mao ang unang panahon nga ang usa ka hinungdanon ug dinaliang mensahe gipahibalo nga angay makapukaw sa interes niadtong gidapit sa pagpamati niini. Ang adlaw ni Noe usa nianang panahona. Tungod sa daotan, imoral, ug mabangisong kinaiya niadtong panahona, gituyo ni Jehova nga Diyos ang paglaglag sa katawhan pinaagi sa tibuok-yutang lunop. (Genesis 6:5-7, 13) Bisan pa niana, una molihok sa paglaglag sa mga dili diyosnon, iyang gihikay nga si Noe, usa ka magwawali sa pagkamatarong, magpasidaan kanila sa umaabot nga Lunop ug sa dalan nga kinahanglang ilang subayon aron maluwas nga buhi. Bisan pag hinungdanon ang maong mensahe, ang katawhan sa linangkob nga nakabati niana “wala magtagad.” (Mateo 24:39; Lucas 17:26, 27; 2 Pedro 2:5) Sila dili mabination, dili matinagdanon—yanong dili interesado! Tungod niini, nawad-an sila sa tanan.
Ang susama gayong kahimtang naglungtad sa mga adlaw sa mga molupyo sa gidungog imoral nga mga siyudad sa Sodoma ug Gomora. Bisan pag gipasidan-an sa umaabot nilang kalaglagan tungod sa ilang labihan nga pagkadaotan, sila wala mamati. Sila dili interesado ni bisan kinsang makatugaw sa ilang naandang mga buluhaton sa kinabuhi. Ang tawong si Lot mao lamang ang nalahi.—Genesis 18:20-30; 19:29; Lucas 17:28-30.
Busa, ang mensahe dili popular taliwala sa mga molupyo sa maong mga siyudad. Tingali sila mas mabalak-on sa hunahunaon sa ilang mga silingan bahin kanila kon sila mopakitag interes. O tingali sila nahadlok nga kinahanglang ilang himoon ang kausaban sa ilang kinabuhi nga dili nila buot himoon. Dayag, nagkalipay sila sa ilang mapatuyangong paagi sa kinabuhi. (Judas 7) Busa hangtod sa adlaw sa pag-abot sa ilang kalaglagan, sila walay katahap ug wala makasabot sa butang hapit nang mahitabo.
Kadtong Dili Interesado sa Adlaw ni Jesus
Sa dihang ang Anak sa Diyos, si Jesu-Kristo, dinhi sa yuta, iyang gipadala ang iyang mga sumusunod aron ipahayag ang maayong balita mahitungod sa langitnong kagamhanan sa Diyos. (Mateo 10:7) Sa pagkamatuod, iyang gitudloan ang iyang mga tinun-an sa paagi sa ilang pagpahayag niining talagsaon ug hinungdanong mensahe diha sa matag balay ug kon unsay pagabuhaton kon ang mga tagbalay dili magpakitag tiunayng interes. Pamatii siya samtang iyang gibansay ang iyang mga tinun-an: “Inigsulod ninyo sa balay, timbayaa ang panimalay; ug kon ang balay takos, ipaabot ang kalinaw nga gipanghinaot ninyo niana; apan kon kini dili takos, ipabalik ang kalinaw gikan kaninyo. Kon may dili magpadayon kaninyo o manimati sa inyong mga pulong, sa paggula ninyo nianang balaya o nianang siyudara itaktak ninyo ang abog gikan sa inyong tiil.”—Mateo 10:12-14.
Matikding si Jesus nagtugon sa iyang mga tinun-an nga “itaktak ang abog gikan sa [ilang] mga tiil” sa dihang sila mobiya sa usa ka balay o lungsod diin sa bug-os walay interes sa Gingharian ni Jehova. Unsay iyang gipasabot sa maong tambag? Ang pagtaktak sa abog gikan sa mga tiil sa usa nagpaila sa pagpahigawas sa tulubagon o pagkamanubag tungod sa sangpotanan nga maagoman sa tagbalay tungod sa kawalay interes sa mensahe sa Diyos. Kadto nagpasabot nga ang mga sumusunod ni Jesus malinawong manlakaw ug pasagdan kanang balaya o siyudara nga makaagom sa sangpotanan nga magagikan unya sa Diyos.
Ipakita ang Interes—Kini Nagkahulogan sa Imong Kinabuhi!
Makaikag ang pagmatikod nga gitandi ni Jesu-Kristo ang mga sanong sa atong adlaw ngadto sa iya sa mga adlaw ni Noe ug sa Sodoma ug Gomora. (Mateo 24:37-39; Lucas 17:26-30) Ang imoralidad ug kabangisan kaylap sa mga adlaw ni Noe ug sa mga adlaw ni Lot. Sa pagkamatuod, ang matarong nga tawong si Lot gisakit ug naguol sa dihang nakita ang pagkamalapason ug pagpatuyang sa malaw-ayng kagawian sa mga molupyo sa Sodoma ug Gomora.—2 Pedro 2:6-8.
Ugaling, sa nagtumong si Jesus sa adlaw ni Noe ug sa adlaw ni Lot, iyang gisentro ang atong pagtagad, dili sa imoralidad ug kabangisan niadtong panahona, kondili sa mga butang hinuon sa matag-adlawng atimanonon—pagkaon, pag-inom, pagminyo, pagkagipaasawa, pagpamalit, pagpamaligya, pagpanukod, ug pagpananom. Iyang gipaila nga daghan ang dili mosanong sa mensahe sa maayong balita sa Gingharian sa Diyos apan mapuliki sa adlaw-adlawng mga kalihokan sa kinabuhi ug sa ingon dili magpakitag interes sa katuyoan ni Jehova. Ang mensahe magkahulogan sa kinabuhi o kamatayon. Ang dili pagpamati mahimong gastoso. Ang dili pagtagad o pagpakitag kawalay interes maoy seryosong sala.—Itandi ang Mateo 6:31, 32.
Unsa ba gayod ka seryoso? Si Jesus mipatin-aw: “Sa Adlaw sa Paghukom ang Diyos magpakitag labawng kaluoy sa mga tawo sa Sodoma ug Gomora kay sa mga tawo nianang lungsora” nga wala mamati o magpakitag interes. (Mateo 10:15, Today’s English Version) Kon ang usa ka tawo magpakitag interes, mamati, ug motuo sa mensahe, bisan pag siya tingali imoral ug mabangison, siya makabag-o sa iyang personalidad ug mauyonan sa panan-aw ni Jehova nga mahimong takos ingong sakop sa Gingharian, sama ra sa unang mga Kristohanon sa Corinto.—1 Corinto 6:9-11.
Sa tanan niyang pakigkabildo sa iyang mga tinun-an, si Jesu-Kristo miawhag kanila sa pagpamati, sa pagtagad, sa pagpakitag interes sa hinungdanong mensahe sa Gingharian sa Diyos. Aron pukawon ang pagtagad niadtong iyang gipakigsultihan, siya mitambag: “Tagda kon giunsa ninyo sa pagpamati.” “Siya nga may mga igdulongog papamatia siya.” “Pamati kamo kanako, kamong tanan, ug sabta.” “Pamati kamo ug sabta kini.”—Lucas 8:18; Marcos 4:9; 7:14; Mateo 15:10.
Busa, sa sunod panahong usa sa mga Saksi ni Jehova moduaw sa inyong balay, makaayo kanimo ang pag-ingon: ‘Dayon, ako interesado.’