Mga Pangutana Gikan sa mga Magbabasa

◼ Nganong diyutay kaayong mga Saksi ni Jehova ang moambit sa tinapay ug bino sa tinuig nga pagsaulog sa Panihapon sa Ginoo?

Kini tungod kay ang mga Saksi ni Jehova, nga lahi sa mga iglesya sa Kakristiyanohan, nagtuo sa pagtulon-an sa Bibliya nga diyutay rang mga tawo ang makaangkon sa langitnong kinabuhi ug ang nahibilin sa matinumanong mga alagad sa Diyos pagagantihan sa kinabuhing walay kataposan sa yuta.

Ang mga iglesya dugay nang nagtudlo nga ang langit mao ang ganti sa tanang makapahimuot sa Diyos; ang uban moadto sa kalayong-impiyerno. Lahi ang ginapahayag sa Bibliya. Ang Kasulatan tin-awng nagapakita nga ang pila lamang ka tawo sama sa mga apostol, maghari uban kang Kristo sa langit. Si Jesus nag-ingon nga sila maoy “gamayng panon.” Ang Bibliya nagaingong ang ilang gidaghanon maoy 144,000. (Lucas 12:32; Pinadayag 14:3, 4) Daghan ang nag-alagad nga matinumanon kang Jehova ug nakabaton sa iyang pag-uyon una ablihi ni Jesus ang dalan paingon sa langitnong kinabuhi. (Mateo 11:11; Hebreohanon 10:19-21) Ug tapos sa pagpili sa “gamayng panon,” minilyon pa ang nahimong matuod nga mga Kristohanon. Alang niining tanang maunongon nga dili sakop sa “gamayng panon,” ang Bibliya nagapadayag sa kalaoman sa kinabuhing walay kataposan sa napasig-uling yutan-ong paraiso. (Salmo 37:20, 29; Pinadayag 21:4, 5) Apan nganong sila dili moambit usab sa tinapay ug sa bino? Si Jesus nagpailang ang pag-ambit sa mga emblema panahon sa Panihapon sa Ginoo maoy alang lamang niadtong gitawag sa kinabuhi sa langit, kadtong naa sa bag-ong tugon.

Hinuon, ang pagtuo sa halad ni Jesus hinungdanon alang sa tanang makaangkon sa pagpasaylo sa Diyos ug sa kinabuhing walay kataposan, bisan kon kinabuhi sa langit o kinabuhi sa paraisong yuta. Gipakita kini ni Kristo sa Juan 6:51-54: “Ako mao ang buhing tinapay nga nanaog gikan sa langit; kon si bisan kinsa mokaon niining tinapaya siya mabuhi sa walay kataposan; . . . ang tinapay nga akong igahatag mao ang akong unod alang sa kinabuhi sa kalibotan [sa matubos nga katawhan] . . . Siya nga mokaon sa akong unod ug moinom sa akong dugo may kinabuhing walay kataposan.”

Bisan pa niana, matikdan nga gipahayag ni Jesus ang maong mga pulong ngadto sa dili lamang iyang mga disipulo. Usa ka adlaw tapos sa milagroso niyang pagpakaon sa linibo, ang panon miduol kang Jesus sa dapit sa Capernaum. Ang maong panon nakigsulti kaniya nga nag-apil sa iyang mga pulong sa Juan 6:51-54. Busa si Jesus wala makigsulti sa panguna ngadto sa mga disipulo sa dihang siya miingon nga siya mao ang masambingayong “tinapay nga nanaog gikan sa langit” nga makataganag labawng malungtarong kalaoman sa kinabuhi kay sa manna nga gikaon sa kamingawan.—Juan 6:24-34.

Sa pagtagad nianang karaang kasinatian sa kamingawan, hinumdomi kon kinsa ang nanggawas sa Ehipto ngadto sa kamingawan. Kadto mao ‘ang mga anak sa Israel nga mikabat ug unom ka gatos ka libo ka kusgang mga lalaki nga nanagbaktas, gawas sa mga bata, ug sa dakong nagkasagol nga panon.’ (Exodo 12:37, 38; 16:13-18) Kining “nagkasagol nga panon” nag-apil sa mga Ehiptohanon nga nangaminyo sa mga Israelinhon ug sa ubang Ehiptohanon nga nakigduyog sa Israel. Ang mga Israelinhon ug ang “nagkasagol nga panon” nagkinahanglag manna aron mabuhi. Apan, ang “nagkasagol nga panon” may kalaoman bang sama sa iya sa mga Israelinhon? Wala, sila walay samang kalaoman. Bisan pag sila makasimba taliwala sa mga Israelinhon ug makalaom sa pagsulod sa Yutang Saad, sila dili gayod mahimong mga hari o mga saserdote ubos sa tugon sa Kasugoan. Busa ang pagkaon sa literal nga manna sa kamingawan wala maghatag sa tanan sa samang mga kalaoman.

Kini maoy usa ka kalainan nga hinumdoman samtang imong palandongon ang giingon ni Jesus ngadto sa iyang mga disipulo sa duolag usa ka tuig tapos sa iyang pagpahayag sa mga pulong sa Juan 6:51-54. Sa maong naulahing okasyon, si Jesus nagbatbat sa bag-ong tulomanon nga naglangkit sa aktuwal nga tinapay ug bino nga magsimbolo sa iyang unod ug dugo. Samtang iyang gisugdan ang pagsaulog sa Panihapon sa Ginoo, si Jesus miingon ngadto sa suod niyang mga sumusunod: “Kining kopaha nagkahulogan sa bag-ong tugon tungod sa akong dugo, nga igabubo alang kaninyo.” Ngadto sa samang gamayng grupo sa mga apostol, siya midugang: “Kamo mao ang nagpabilin uban kanako sa akong mga pagsulay; ug akong buhaton ang usa ka tugon uban kaninyo, maingon nga ang akong Amahan mihimog usa ka tugon uban kanako, alang sa usa ka gingharian, aron kamo makakaon ug makainom sa akong lamesa sa akong gingharian, ug maglingkod sa mga trono sa paghukom sa napulog-duha ka banay sa Israel.”—Lucas 22:20, 28-30.

Panid-i nga gikan niining naulahing mga pulong ang mokaon sa aktuwal nga tinapay ug moinom sa aktuwal nga bino ingong mga emblema nga magsimbolo sa lawas ug dugo ni Jesus mao ang mga disipulo nga anaa sa “bag-ong tugon.” Kana sila maanaa usab sa laing tugon, ang tugon nga himoon ni Jesus uban kanila aron sila makaambit sa pagmando ‘sa iyang gingharian.’ Tin-aw, si Jesus nagtumong dinhi niadtong mahimong ‘usa ka gingharian ug mga saserdote sa atong Diyos, aron magmando nga mga hari ibabaw sa yuta.’ (Pinadayag 5:10) Sa unang siglo, ang Diyos nagsugod sa pagpili sa 144,000 nga makaambit sa langitnong Gingharian. Ang mga Kristohanon sa Corinto sakop nianang grupoha, kay sila gibatbat ingon nga “gibalaan nga nahiusa kang Kristo Jesus, nga gitawag aron mahimong mga balaan.” (1 Corinto 1:2; itandi ang Roma 1:7; 8:15-17.) Ang maong “mga balaan” makaambit sa Panihapon sa Ginoo, nga moambit uban ang apresasyon sa may-simbolong tinapay ug sa bino usab nga nagkahulogan sa “bag-ong tugon tungod sa [iyang] dugo.”—1 Corinto 11:23-26.

Karong adlawa may nahibiling buhi pa sa yuta nga gamay lamang nga nahibilin niadtong gipili sa Diyos alang sa langitnong kinabuhi. Kana lamang sila nga anaa sa “bag-ong tugon” ang awtorisadong makaambit sa mga emblema, ang tinapay ug bino, panahon sa tinuig nga saulog sa Memorial.

Hinuon, ang tanang matuod nga Kristohanon karong adlawa nga nagapaabot sa pagkinabuhing walay kataposan sa yuta ilalom sa pagmando sa Gingharian nahibalo nga kini posible pinaagi sa pagtuo sa halad ni Jesus. Sumala sa gisulti ni Jesus sa panon, siya mao “ang buhing tinapay nga nanaog gikan sa langit.” (Juan 6:51) Apan, kana wala magkahulogang kadtong may yutan-ong paglaom angay moambit sa literal nga mga emblema sa Memorial, kay wala man diha sa “bag-ong tugon,” ni sila anaa sa tugon uban kang Jesus nga maatua ‘sa iyang gingharian, nga maglingkod sa mga trono.’

Busa, kining dakong grupo nga may yutan-ong paglaom dili moambit sa mga emblema, ang tinapay ug bino. Apan kini wala gayod magbanaag sa kakulang sa pagtuo o apresasyon sa lawas ug dugo ni Jesus. Ngani, tungod sa ilang lalom nga apresasyon sa iyang halad ug sa nindot nga yutan-ong kalaoman sa ilang atubangan, sila tinong presente kada tuig ingong matinahorong mga maniniid sa pagsaulog sa Panihapon sa Ginoo. Niining paagiha, ilang gipabanaag ang ilang pagtuo mismo ug nagahatag ug makalipayng ebidensiya nga ang nahibilin sa “gamayng panon” ug ang kapid-ang “ubang mga karnero” anaa sa mainitong panaghiusa.—Juan 10:16.