Pag-ampo sa Bukid Hiei—Kalamposan ba Alang sa Kalinaw sa Kalibotan?

ANG pag-ampo ba makapatunghag kalinaw sa kalibotan? “Ang kalinaw dili moabot pinaagi sa pag-ampo lamang. Dili ingon niana kana ka sayon,” miingon si Gijun Sugitani, usa ka organisador sa tigom sa pag-ampo nga gihimo sa Agosto 1987 sa Japan. “Apan wala ako magtuo nga makab-ot ang kalinaw nga wala usay pag-ampo.” Ang iyang hunahuna sama ra sa hunahuna sa mga 500 ka Hapones ug sa 24 ka delegado sa gawas sa nasod sa 1987 nga Komperensiya sa mga Relihiyon nga gihimo sa Kyoto, Japan.

Ang sektang Budhista nga Tendai mao ang nangulo niining tigom sa pag-ampo ingong sumpay sa usa nga gihimo sa 1986 sa Assisi (Italya) ug giatol kini sa ika-1,200 nga anibersaryo sa pagbukas sa Enryakuji Temple sa Bukid Hiei. Ang mga Budhista, nagaangkong Kristiyano, Confucianismo, Hinduismo, Islamiko, Hudiyohanon, Sikh, ug Shinto nagpulihay sa pagtanyag ug mga pag-ampo diha sa bukid. Ang tigom ba sa pagkatinuod maoy usa ka kalamposan alang sa kalinaw sa kalibotan?

“Inareglar nga Bulak” nga Tigom

“Ang komperensiya sa mga relihiyon maoy relihiyosong inareglar nga bulak,” miingon si Etai Yamada, hataas nga pari sa Tendai nga sekta ug mao ang pinasidunggang tsirman. “Walay usa sa mga bulak ang nawad-an sa porma ug sa alimyon niini.” Ang buot niyang ipasabot nga basta nagakahiusa lang ang mga relihiyon sa ilang tinguha alang sa kalinaw sa kalibotan, ang matag usa makapabilin sa nagkasumpaking mga pagtulon-an niini, sama sa tagsa-tagsang mga bulak diha sa usa ka inareglar nga bulak.

Lakip sa iladong “mga bulak” diha sa tigom gihawasan sa Katolikong Iglesya, si Francis Cardinal Arinze sa Vatican Secretariat for Non-Christians. Gibasa ni Arinze ang mensahe sa papa, nga nag-ingon nga ang “kalinaw dili makab-ot nga walay pag-ampo ug bisag ang mga gubat masugdan sa pipila lamang ka tawo, ang kalinaw nagkinahanglan sa kooperasyon ug panag-usa sa tanan.”—Mainichi Daily News, Agosto 5, 1987, panid 12.

Kon ang paglaom sa kalinaw sa kalibotan “nagkinahanglan sa kooperasyon ug panag-usa sa tanan,” unsa ka gamhanan nga Diyos ang ilang gitanyagan sa pag-ampo? Ang mga delegado miampo alang sa kalinaw, apan sila nagtuo nga ang tawhanong mga paningkamot ang mopatungha niini. Sama sa dayandayang bulak nga inareglar, ang ilang tigom sa pag-ampo maoy matahom nga pasundayag sa ilang kaugalingong mga paningkamot.

Ang inareglar nga bulak matahom tan-awon, apan dihang matapos na ang linain nga okasyon, ang walay gamot nga mga bulak malaya ug ang ilang kaanindot mawala. Ang tagsa-tagsang katahom sa kada bulak ug ang katahom sa pagkaareglar mahanaw sa ulahi. Ang mga bulak gihimo nga dili makabunga. Kini bang komperensiya sa mga relihiyon matapos usab ingong “inareglar nga bulak” nga walay bunga?

Ang miapil nga mga lider sa relihiyon wala matagbaw sa mga resulta. “Gusto nila nga magmaespisipiko bahin sa mga paagi nga buhaton sa mga relihiyon sa umaabot apan miingon nga kulang silag panahon sa paghisgot niini,” mitaho ang Asahi Evening News. Apan, kini ang gilaomang sangpotan. “Ang among tuyo,” miingon si Takaaki Kobayashi, usa sa organisador sa komperensiya sa mga sa relihiyon, “mao ang pagpamati sa mga sugyot sa matag relihiyon bahin sa labing maayong mga paagi sa pagkab-ot sa kalinaw. Ang sekretong lagda mao nga ang matag entrante kinahanglang mamati sa mga hunahuna sa uban nga walay pagkomento kun pagtubag o pagdebati.” Ang ilang paningkamot diha sa tigom sa pag-ampo kinutohan sa pagpamati sa uban, dili sa paglihok. Sumala sa gidangatan, ang tigom “napakyas sa paghatag ug klarong tulomanon sa pagkab-ot sa mga tumong sa komperensiya sa mga relihiyon.”

Alang ba Kadto sa Tinuod nga mga Kristohanon?

Ang mga tawo nga naningkamot sa pagsunod kang Jesu-Kristo tingali mahibulong: ‘Angay bang moapil ang Kristohanon niining tigoma sa pag-ampo?’ Ang kamatuoran nga kadto gihimo diha sa Bukid Hiei, ang sagradong bukid sa Budhistang sekta, maoy butang nga angay palandongon. Imo bang mahanduraw si Jesu-Kristo nga motungas sa sagradong bukid sa Budhista aron sa pagtanyag sa pag-ampo alang sa kalinaw?

Si apostol Pablo mipasidaan sa mga sumusunod ni Jesu-Kristo: “Ayaw kamo pagpahiangay sa inyong kaugalingon kauban sa mga dili-magtutuo. Kay unsa may pakigkomboyohan sa pagkamatarong ug sa pagkadaotan? O unsa may pakig-ambitan sa kahayag ug sa kangitngit? Dugang pa, unsa may pakig-uyonan ni Kristo kang Belial? O unsa may iya sa tawong matinumanon nga pakigsalohan sa dili-magtutuo? Ug unsay may pakig-uyonan sa templo sa Diyos ug sa mga diyosdiyos? . . . ‘Busa panggula kamo gikan kanila, ug magpalain kamo,’ nagaingon si Jehova, ‘ug ayaw na kamo paghikap ug mahugaw’; ug ‘unya dawaton ko kamo.’”—2 Corinto 6:14-17.

Dili ba ang pagtanyag ug mga pag-ampo sa mga tigom sa nagkalainlaing pagtuo diha sa sagradong bukid sa Budhista sama ra nga ‘nagpahiangay’ ang Kristohanon? Nan, nagkahulogan ba kini nga ang tinuod nga mga Kristohanon dili magtagad bahin sa pag-ampo alang sa kalinaw? Dili gayod!

Pag-ampo Alang sa Kalinaw

Diha sa iyang tagna mahitungod sa “kataposang bahin sa mga adlaw,” naghisgot si propetang Isaias bahin sa daghan nga moingon: “Umari, kamo nga katawhan, ug manungas kita sa bukid ni Jehova,” dili sa Bukid Hiei sa Budhista. “Ang bukid ni Jehova” nagasimbolo sa tinuod nga pagsimba sa Diyos sa Bibliya. Ang ‘pagtungas’ niadtong bukira mosangpot ug unsa? Buweno, si Jehova “magatudlo kanato bahin sa iyang mga dalan, ug manlakat kita sa iyang mga alagianan,” miingon si Isaias! “Siya [Jehova] magahukom sa taliwala sa mga nasod,” midugang ang propeta. Ingong resulta, aduna unyay kalinaw sa kalibotan, kay si Isaias mitagna nga ang tinuod nga mga magsisimba “magahimo sa ilang mga espada nga mga punta sa daro ug ang ilang mga bangkaw himoon nga mga galab. Usa ka nasod dili mobakyaw sa espada batok sa laing nasod, ni magpakakat-on pa sila mahitungod sa gubat.”—Isaias 2:2-4.

Kining kahimtanga naglungtad na taliwala sa mga Saksi ni Jehova, ug sa dili madugay kini molukop sa tibuok yuta. Apan sa unsang paagi? Si Jehova nga Diyos, dili mga tawo, ang mopatungha sa dumalayong kalinaw pinaagi sa iyang Gingharian. Silhigon niini ang tanang magbubungkag sa kalinaw ug human niana ipasig-uli ang paraiso sa yuta. (Pinadayag 11:15, 18) Dili sama sa mga ekspresyon nga gipamulong diha sa relihiyosong komperensiya nga sama sa matahom apan walay-bungang “inareglar nga bulak,” ang mga pulong ni Jehova dili gayod mobalik kaniya nga walay resulta.—Isaias 55:11.

Nan, ngano, nga mag-ampo kita alang sa kalinaw kon ang Diyos mopatungha niini bisan unsa pay mga paningkamot sa tawo? Pinaagi sa pag-ampo sa Gingharian sa Diyos nga moabot, atong ginapahayag ang atong kaugalingong pangandoy sa kalinaw ug nagapasundayag sa atong pagtuo sa paagi sa Diyos sa pagpatungha niini dinhi sa yuta. (Mateo 6:9, 10) Kon makakita man kita sa kalinaw nga ipatungha sa Diyos o dili nagadepende sa atong “paglaom diha kang Jehova.” Busa tungas ngadto “sa bukid ni Jehova” ug duyog sa pag-ampo alang sa tinuod nga kalinaw nga iyang gisaad!—Salmo 37:9, 11.

[Hulagway sa panid 8]

Ang inareglar nga bulak matahom nga tan-awon, apan kini wala areglaha aron makabunga

[Hulagway sa panid 9]

Ang Bukid Hiei, nga sagradong bukid sa sektang Budhista nga Tendai, nga gihimoan sa tigom sa pag-ampo