Ang Masanag nga Umaabot sa Yuta Ilalom sa Pagmando sa Gingharian sa Diyos
ANG Bibliya nag-ingon nga ang “pagtuo mao ang seguradong pagpaabot sa mga butang nga gilaoman.” (Hebreohanon 11:1) Sumala sa atong nakita sa nag-unang artikulo, kapin sa 500 ka tuig sa wala pa matawo si Kristo, gipahinabo sa Diyos nga masulat diha sa basahon ni Daniel ang matagnaong pagtan-aw daan sa pagtungha ug sa pagkapukan sa mga gahom gikan sa mga adlaw ni Daniel hangtod sa atong mga adlaw. Ang pagkatukma niining mga tagnaa nagapasalig kanato, nagahatag kanatog malig-ong rason sa pagtuo, nga ang nahibilin sa mga tagna ni Daniel matuman usab, ug sa dili madugay ang Gingharian sa Diyos ilalom ni Kristo Jesus maoy mopuli sa tawhanong mga kagamhanan. Pagkadakong kausaban niana alang sa katawhan! Nagpanan-aw sa unahan nianang panahona, ang Diyos mismo nag-ingon: “Tan-awa! Gibag-o ko ang tanang butang.” (Pinadayag 21:5) Ang paghisgot sa pipila ka dinasig nga mga tagna nga naglarawan sa hulagway alang kanato nianang malipayong panahon makatabang kanato sa pagkakita kon unsa ang “bag-ong” mga butang, kon unsa kini ka lahi sa atong nakita karong mga adlawa ilalom sa tawhanong pagmando. Sa pagkatinuod, ang gipamulong sa Bibliya bahin sa umaabot sa atong yuta ug kinabuhi diha niana katingalahan. Palandonga:
Ang krimen ug kapintasan matapos. “Kay ang mga mamumuhat ug daotan pagalaglagon, . . . ang mga daotan mangawala.” Ang mga tawo nga mabuhi “magalingkod, ang tagsatagsa ilalom sa iyang paras ug ilalom sa iyang kahoyng igos, ug walay magahadlok kanila; kay ang baba ni Jehova sa mga panon ang nagsulti niini.”—Salmo 37:9, 10; Miqueas 4:4.
Ang mga pagbahinbahin sa rasa ug nasod, ug ang mga gubat nga ilang gipasiugda mangawala. “Ang nasod dili na mobakyaw ug espada batok sa laing nasod, ni makakat-on pa sila mahitungod sa gubat.”—Isaias 2:4.
Ang kakulang sa mga puloy-anan, pagkawa-lay mga balay, ug pagkawalay trabaho maoy mga butang na unya sa miagi. Si Isaias nagtagna: “Sila magatukod ug mga balay ug magapuyo niini; ug sila magatanom ug mga kaparasan magakaon sa ilang mga bunga. . . . Ug ang akong mga pinili magapahimulos pag-ayo sa buhat sa ilang mga kamot.”—Isaias 65:21, 22.
Ang makalilisang nga mga kagutmanan, sama niadtong mihampak dili pa dugay sa mga dapit sa Aprika, pulihan sa kadagaya sa pagkaon alang sa tanan. “Adunay daghang trigo sa yuta; ug sa tumoy sa kabukiran adunay pagsugwak.” “Ang yuta magahatag sa iyang bunga; ang Diyos, bisan ang atong kaugalingong Diyos, magapanalangin kanato.”—Salmo 72:16; 67:6, 7.
Dugang pa, dunay maayong panglawas ug kinabuhi aron matagamtam kining mga panalangina. Bisan sa ministeryo ni Jesus sa yuta, tinuod ang giingon nga “ang mga buta nakakita, ang bakol nakalakaw, ang mga sanlahon nangaayo ug ang mga bungol nakadungog.” Apan, usa ka mas dakong saad ang matuman: “Iyang [Diyos] pagapahiran ang mga luha gikan sa ilang mga mata ug ang kamatayon mawala na, wala na usab unyay pagminatay, ni paghilak ni kasakit. Kay ang unang mga butang nangagi na.”—Lucas 7:22: Pinadayag 21:4.
Pagkakatingalahang kausaban! Pagkadakong kahupayan ang mahatag niini diha sa nasubong katawhan! Among gidasig ka nga magpailalom karon sa Gingharian sa Diyos, aron ikaw usab makaani sa mga kaayohan nga motungha gikan niining dakong kausaban sa pagmando sa kalibotan.
[Hulagway sa panid 7]
Ang mga tawo nga nagakinabuhi karong adlawa makapaabot sa katingalahang mga panalangin—sa kataposan sa gubat, krimen, kakabos, sakit, ug bisan kamatayon Dili ka ba malipay sa maong umaabot?