Nagapabili Ka ba sa Sagradong mga Butang?
“Tinguhaa nga makigdait sa tanang tawo, ug ang pagkabinalaan nga kon wala kini walay bisan kinsa nga makakita sa Ginoo, tan-awa pag-ayo . . . nga walay makihilawason o si bisan kinsang wala magpabili sa sagradong mga butang, sama kang Esau, si kinsa nagbaylo sa iyang mga katungod sa pagkapanganay sa usa ka pagkaon.”—HEBREOHANON 1214-16.
1. Unsang kakulang sa pagpabili ang gipakita sa kadaghanang tawo, apan sa unsang paagi ang mga Kristohanon lahi?
SI Jehova nga atong Diyos labing mahinatagong Magtatagana. Siya madagayaong nagatagana sa mga panginahanglan sa tanan niyang kalalangan. Hinuon, ang kinabag-ang katawhan wala kaayo magtagad niini. Sila wala magpasalamat kang Jehova o moila sa ilang dakong utang kaniya. Ang mga Kristohanon, sa laing bahin, dili kay magpakawaybili sa pagkamaayo ni Jehova. Sila nagapasidungog kaniya tungod sa iyang ginabuhat alang kanila. Tungod sa ilang debosyon kaniya, gisalig ni Jehova sa iyang katawhan ang daghang sagradong mga butang nga wala mapahimusli sa katawhan sa katibuk-an. Kini maoy bililhong mga butang, nga gilain ingong balaan ug may kalabotan pagsimba kang Jehova. Nahibalo ka ba kon unsa ang maong sagradong mga butang? Ug ikaw may lalom, kinasingkasing nga pagpabili kanila?—Salmo 104:10-28; Mateo 5:45; Pinadayag 4:11.
2. Kinsay nagpakitag iladong kawalay pagpabili?
2 Dili ang tanang katawhan sa Diyos ang tukmang nagapabili sa sagradong mga butang. Pananglitan, ang anak ni Isaac si Esau napakyas niining bahina. Si Pablo naghisgot kaniya sa misulat siya ngadto sa dinihogang Hebreohanong mga Kristohanon. Tapos awhaga sila nga “tinguhaa nga makigdait sa tanang tawo,” siya nagpasidaan kanila sa pagtino nga sa ilang taliwala “walay makihilawason o si bisan kinsang wala magpabili sa sagradong mga butang, sama kang Esau, si kinsa nagbaylo sa iyang mga katungod sa pagkapanganay sa usa ka pagkaon.”—Hebreohanon 12:14-16.
3, 4. Unsa ang sagradong mga katungod sa pagkapanganay ang gibaligya ni Esau ngadto kang Jacob sa usa ka panaksang sinabawan?
3 Unsa ba ang maong mga katungod sa pagkapanganay? Si Jehova misaad sa apohan ni Esau, si Abraham, nga pinaagi kaniya ug sa iyang mga kaliwat sa kadugayan may matawo nga mahimong sinaad nga Binhi, ang Mesiyas, o ang Kristo. Pinaagi sa maong Binhi ang tanang nasod makapanalangin sa ilang kaugalingon, nga mosangpot sa ilang pagkamaluwas gikan sa sala ug kamatayon.—Genesis 22:15-18; Galacia 3:16.
4 Si Esau, ang panganay ni Isaac, nagbaton sa kahigayonan nga mahimong bahin sa linyang magpatungha sa maong Binhi. Kadto bahin sa iyang katungod sa pagkapanganay. Apan sa iyang kaulawan, ang rekord sa Bibliya nagaingon: “Gitamay ni Esau ang katungod sa pagkapanganay.” Sa pagkamadalidalion gibaylo niya kana sa usa ka pagkaon sa sinabwang balatong ug diyutayng tinapay. Sa pagkamatuod, dili nato buot sundogon ang iyang kakulang sa apresasyon. Hinunoa, angay natong ugmaron ang tinamdan sa igsoon ni Esau, si Jacob. Siya ang sunod sa linya sa katungod sa pagkapanganay, nga iyang gipalit tungod sa dayag nga kakulang sa pagpabili sa iyang igsoon. Sa ingon gitino ni Jacob nga ang katungod nga mahimong katigulangan sa sinaad nga Binhi ipasa sa usa nga tukmang nagpabili niining sagradong butang.—Genesis 25:27-34.
5. Unsang sagradong mga butang ang atong pagahisgotan, ug sa unsang paagi kita makalikay sa pagpakawaybili niini nila?
5 Sulod sa Kristohanong kongregasyon, gitagana ni Jehova ang daghang sagradong mga butang aron kita magpabiling lig-on sa espirituwal ug tukmang masangkapan alang sa iyang pag-alagad. Atong hisgotan ang ubay-ubay kanila. Unya, sa tinagsatagsa, kita makapalandong kanila ug makapalig-on sa atong pagpabili kanila aron nga dili gayod nato ipakawaybili.
Ngalan ni Jehova ug ang Lukat—Labing Sagrado
6. Sa unsang paagi kita makapakita nga wala nato ipakawaybili ang pagkasagrado sa ngalan ni Jehova?
6 Nahauna sa atong listahan sa sagradong mga butang mao ang ngalan ni Jehova. Unsa ka hamili kining ngalana diha sa imong hunahuna ug kasingkasing? Sa paghatag sa sulundang pag-ampo, si Jesus miingon nga una: “Balaana ang imong ngalan.” (Mateo 6:9) Sa dihang kita mabawtismohan, kita mahimong usa sa mga Saksi ni Jehova. (Isaias 43:10, 11) Pagkadakong dungog! Ug inighisgot nato bahin sa pagkamaayo ni Jehova ug sa iyang talagsaong mga katuyoan, ang uban makaila kaniya pinaagi sa iyang personal nga ngalan, ug sila usab buot moalagad kaniya. Apan kon ang usa dili na mosulti mahitungod kaniya o, grabe pa, malangkit sa buhat nga daotan, kini magdalag pakaulaw sa maayong ngalan ug dungog ni Jehova. Ang matinumanong Kristohanong mga Saksi ni Jehova maningkamot sa kanunay sa pagbalaan sa iyang balaang ngalan sa atubangan sa uban pinaagi sa ilang ginasulti ug ginabuhat.—Levitico 22: 31, 32; Deuteronomio 5:11.
7. Nganong angay kitang magpakitag kinalabwang pagpabili sa halad lukat ni Kristo?
7 Anaa sa taas sa listahan sa sagradong mga butang mao ang halad lukat. Unsa ka bililhon ang halad ni Kristo alang kanimo? Pinasukad lamang sa bug-os nga pagtuo sa maong hingpit tawhanong halad nga mapasaylo ang atong mga sala. (1 Juan 2:1, 2) Si Pablo naghisgot nga ang dinihogang kongregasyon “gipalit sa dugo sa kaugalingong Anak [sa Diyos].” (Buhat 20:28; itandi ang 1 Pedro 1:17-19.) Si Jesus, ang bugtong-inanak nga Anak sa Diyos, mibiya sa iyang posisyon sa langit, mipuyo sa yuta taliwala sa makasasalang mga lalaki ug mga babaye, ug unya mihatag sa iyang hingpit tawhanong kinabuhi diha sa masakit nga kamatayon diha sa kahoy sa pagsakit aron kita makabaton untag kinabuhing walay kataposan. (Mateo 20:28) Dakong pagkaingrato kon ang usa dili mopakitag halalom nga pagpabili sa matag adlaw sa maong bililhong gasa sa Diyos.—Hebreohanon 10: 28, 29; Judas 4, 5.
Atong Relasyon Kang Jehova ug sa Iyang Organisasyon
8. Unsa ka bililhon ang atong relasyon kang Jehova?
8 Kini magdala kanato sa laing sagrado kaayong butang, ang atong relasyon kang Jehova. Angay gayod nga atong mahalon pag-ayo kining atong pagkasuod sa atong langitnong Amahan. Kon kita ‘mopaduol sa Diyos, siya mopaduol kanato.’ (Santiago 4:8) Siya nahigugma pag-ayo kanato, ug buot niyang kita mahigugma kaniya uban sa bug-os natong kasingkasing. (Mateo 22: 37, 38; Juan 3:16) Si David naghatag sa iyang anak si Solomon ug maayong tambag bahin sa iyang relasyon kang Jehova. Nahaapil niini mao ang usa ka pasidaan: “Ug ikaw, Solomon anak ko, ilha ang Diyos sa imong amahan ug alagara siya uban sa bug-os nga kasingkasing ug sa nahimuot nga kalag; kay ginasusi ni Jehova ang tanang kasingkasing, ug nasabtan ang tanang kiling sa mga hunahuna. Kon imo siyang pangitaon, siya imong hikaplagan; apan kon siya imong biyaan, ikaw iyang isalikway sa walay kataposan.” (1 Cronicas 28:9) Busa “hupti ang inyong kaugalingon diha sa gugma sa Diyos, samtang kamo nagapaabot sa kaluoy sa atong Ginoong Jesu-Kristo uban ang kinabuhing walay kataposan sa unahan.”—Judas 21.
9. Sa unsang mga paagi kita nagapakita nga kita wala magpakawaybili sa pribilehiyo sa pagkahimong bahin sa organisasyon ni Jehova?
9 Gipabilhan mo ba usab unsa ka sagradong pribilehiyo ang pagkahimong bahin sa organisasyon ni Jehova? Kitang tanan kinahanglang mahinumdom nga kita bahin niini tungod sa dili-takos nga kalulot ni Jehova. Kon ang usa ka tawo makitang dili mapabilhon ug mahimong dili-mahinulsolong mamumuhat ug daotan, mawad-an siya sa maong pribilehiyo. Si Pablo nagpasidaan: “Busa siya nga nagahunahunang siya nagabarog pabantaya nga dili mapukan.” (1 Corinto 10:6-12) Gihatag ni Pablo kining pasidaana tapos sa paghisgot bahin sa 23,000 ka Israelinhon nga nangamatay tungod sa pagsimbag diyosdiyos ug sa imoralidad. Makapakita usab kitag pagpabili sa pagkasagrado sa organisasyon ni Jehova pinaagi sa pagbuhat sa matag usa sa atong bahin aron kini mahigawas sa kahugawan, imoralidad, panagbingkil, komersiyalismo, ug mga pagbati sa pagkalabaw ug pagpihigpihig. (2 Corinto 7:1; 1 Pedro 1:14-16) Kita makapaningkamot sa paglig-on sa bugkos sa inigsoong gugma, samtang mainampingong nagasunod sa teokratikanhong kahikayan ug nakigtambayayong niadtong nagapanguna.—1 Tesalonica 4:3-8; 5:12, 13.
Pulong sa Diyos, mga Kasugoan, ug Paglaom sa Gingharian
10. Sa unsang paagi atong ginapakitang bug-os natong gipabilhan ang Balaang Kasulatan?
10 Ang inspiradong Pulong sa Diyos, ang Balaang Bibliya, sagrado usab. Kini nasudlan sa balaang mga pamahayag, mga instruksiyon, tambag, mga saad, mga pinadayag, oo, sa tanang atong gikinahanglan aron ‘masangkapan kita alang sa tanang maayong buluhaton.’ (2 Timoteo 3:16, 17) Sa unsang paagi kita makapakitag apresasyon alang niini? Nahauna, pinaagi sa pagtuon niini ug pagpadapat sa atong nakat-onan diha sa atong mga kinabuhi. Unya, pinaagi sa tukmang pagsunod sa binase-sa-Bibliyang “pagkaon sa hustong panahon” nga gitagana ni Jehova pinaagi sa “matinumanon ug maalamong ulipon.” (Mateo 24:45) Ug gikan sa praktikal nga punto de vista, kinahanglang huptan natong hapsay ug hinlo ang atong personal nga mga kopya sa Bibliya, ingon man ang Kristohanong mga basahon nga atong gigamit sa atong buluhatong pagsangyaw. Basin makahatag ug kaulawan kang Jehova kon kita mogawas ug mogamit sa usa ka Bibliya nga hugaw kaayo o daot.
11. Nganong angay dili nato ipakawaybili ang sagradong mga kasugoan ni Jehova?
11 Ang sagradong mga kasugoan ni Jehova anaa sa Pulong sa Diyos. Kanunay ba nimong giisip kana nga sagrado, o may panahon bang makiling ka sa dili pagpabili niana? Ang mga kasugoan ni Jehova nahisamag mga karatula, mga igmamarka, ug mga ali aron mahigawas sa peligro ubay sa dalan sa kinabuhi. Kon kana atong sundon, luwas ang atong pagbiyahe ug sa kataposan makaabot sa atong destinasyon sa bag-ong kalibotan ni Jehova; apan kon dili nato balihon ang mga sugo ug mga pahinumdom Jehova, kita nagapadulong sa katalagman.—Salmo 119:10, 11, 35, 101, 102; Proverbio 3: 1-4.
12. Sa unsang paagi ang atong paglaom sa Gingharian usa ka sagradong butang?
12 Pinaagi sa Bibliya, ato usab hisayran ang usa ka sagradong butang nga angay minahal sa atong mga kasingkasing: ang atong paglaom sa Gingharian. Sa paghisgot sa matinumanong Abraham, si Pablo nag-ingon sa Hebreohanon 11:10: “Kay siya nagapaabot sa siyudad [Gingharian sa Diyos] nga may matuod nga mga patukoranan, nga ang magtutukod ug magbubuhat sa maong siyudad mao ang Diyos.” Ikaw ba may susamang lig-on, malahutayong paglaom sa Gingharian sa Diyos? Ang imo bang pagtuo lig-on kaayo nga ang imong kasingkasing wala maghambin ug mga pagduhaduha, ug ang imo bang kadasig nagapabiling wala makubsi samtang nagapaabot ka nga matuman ang mga katuyoan sa Diyos sa iyang gitakdang panahon?—Mateo 24:20-22, 33, 34, 42.
Sagradong mga Panagkatigom ug mga Pribilehiyo
13. Nganong dili angay ipakawaybili ang mga kaayohan sa Kristohanong mga tigom?
13 “Magdasigay kamo ngadto sa gugma ug sa maayong mga buhat, nga dili magsalikway sa atong panagkatigom, sumala sa nabatasan sa uban,” mitambag si Pablo. Kini nagapailang ang atong Kristohanong mga tigom maoy laing sagradong tagana nga dili pakamenoson. Sa panahon sa mga panagkatigom, madawat nato ang bililhong instruksiyon ug mainitong pakig-uban nga gikinahanglan nato pag-ayo. Dinhi kita usab makahimo sa “publikong pagpahayag sa atong paglaom” pinaagi sa pagpakigpulong gikan sa entablado kon kita may higayon ug pinaagi sa pagkomentong regular. (Hebreohanon 10:23-25) Ug sanglit ang Kingdom Hall mao ang dapit diin ginahimo ang kadaghanan sa atong mga tigom, ikaw ba regular nga nagaamot ug salapi ug nagakugi aron kini mahuptang maayog kondisyon?—Exodo 35:21.
14. Unsay motabang nato sa pagpabili nga ang atong Kristohanong ministeryo usa ka sagradong bahandi?
14 Ang pribilehiyo nga nabatonan sa mga Kristohanon sa pagsangyaw sa maayong balita gipanig-ingon ni Pablo ngadto sa “bahandi diha sa mga sudlanan nga yutang-kolonon.” (2 Corinto 4:1, 7) Oo, ang Kristohanong ministeryo maoy laing sagradong butang usab nga dulot natong gipabilhan. Bisan pag ang kadaghanan nga atong ginasangyawan maoy dili matinagdanon, angay nga kanunay natong pahinumdoman ang atong kaugalingon sa hamiling pribilehiyo nga atong nabatonan sa pagsulti sa uban mahitungod kang Jehova ug sa iyang mga katuyoan. Busa atong pagatumanon ang atong komisyon sa pagsangyaw sa maayong balita sa Gingharian sa Diyos ug paghimog mga tinun-an. (Mateo 24:14; 28:19, 20) Ang pagkakitang nagauswag ang bag-ong mga tinun-an maoy dugang hinungdan sa kalipay. (1 Tesalonica 2:19, 20) Kon atong gimahal ang ministeryo, kita dili mahimong dili-regular o dili-aktibo sa pagmantala sa maayong balita.
15. Nganong ang pag-atiman sa mga pribilehiyo sulod sa organisasyon ni Jehova dili ipakawaybili?
15 Ang mga pribilehiyo sulod sa organisasyon ni Jehova maoy sagrado usab. Sa aktuwal, ang maong mga pribilehiyo maoy sagradong butang gisalig. (Itandi ang Buhat 20:28.) Kon kaha ang responsabilidad naglangkit sa pagkamagtatan-aw, pagkamagbalantay, pagtudlo, o ubang pag-alagad sa kaubang mga Kristohanon, ihatag niana ang talagsaong pag-atiman. Bisan pag ang usa ka buluhaton daw gamay ra, ayaw kana ipakawaybili, apan buhata kanag maayo, sa gilayon, ingon nga ngadto kang Jehova. Hinumdomi, “ang tawo nga matinumanon sa labing diyutay matinumanon usab sa daghan.”—Lucas 16:10.
Kaminyoon ug ang Pamilya
16. Sa unsang mga paagi kita makapakitang atong giisip ang kaminyoon ug pamilya nga sagradong mga butang?
16 Sa paglista sa sagradong mga butang, ayaw hikalimti ang pag-apil sa kaminyoon ug pamilya. Matuod, ang mga dili-Kristohanon magminyo usab, apan ang mga Kristohanon nagaisip sa kaminyoon nga sagrado, nga nalangkit sa ilang pagsimba kang Jehova. (Itandi ang 1 Pedro 3: 1-7.) Sa unsang paagi gipakita nato ang pagtahod sa maong sagradong butang? Ang Bibliya nagaingon sa Hebreohanon 13:4: “Himoa ang kaminyoon nga madungganon sa tanan, ug ang higdaanan sa kaminyoon nga walay kahugawan, kay pagahukman sa Diyos ang mga makihilawason ug mga mananapaw.” Si Jesus nagpasidaan nga ang pagpadayon sa pagtutok sa usa ka babaye mao nga makabatog kaibog kaniya mahitumbas sa pagpanapaw diha sa kasingkasing. (Mateo 5:27, 28) Kon gusto nimong magminyo, pagminyo sa madungganong paagi. Dayon, ayaw gayod ipakawaybili ang imong kaminyoon. Ugmara ang tinuod nga gugma ug halalom nga pagtahod sa matag adlaw. Kon kamo may mga anak, ‘matutoa sila sa disiplina ug pagtulon-an ni Jehova.’ Sa maong paagi ang imong pamilya mahimong “balaan.”—Efeso 6:4; 1 Corinto 7:14.
Balaang Espiritu ni Jehova ug Pag-ampo
17. Nganong dili nato ipakawaybili ang balaang espiritu sa Diyos?
17 Gikinahanglan nato ang tanang tagana ni Jehova, ug ang usa ka hinungdanong tabang gikan kang Jehova mao ang iyang balaang espiritu. (Juan 14:26) Wala kita masayod sa tanang panahon sa mga paagi sa paggamit ni Jehova sa iyang balaang espiritu sa atong kaayohan, apan usa ka butang ang tino: kita dili makapadayon kon wala kana. Angay nga moampo kita alang sa balaang espiritu aron sa pagtabang kanato sa pagsabot sa matuod nga mga pagtulon-an ug pag-antos sa mga pagsulay. Kinahanglan nato kana aron maugmad ang mga bunga sa espiritu. (Galacia 5:22, 23) Ug kita gipasidan-an sa Efeso 4:30 nga angay nga “dili nato pagul-on” ang balaang espiritu, pinaagi sa pagkalangkit sa mga butang nga nagapugong sa pag-agos niini nganhi kanato. Hinaot nga atong pabilhan kanunay ang balaang espiritu ni Jehova.
18. Nganong ang pag-ampo usa ka sagradong pribilehiyo?
18 Ang kataposang sagradong butang atong hisgotan, ang pag-ampo, tinong dili pinakagamay ug bili. Dako gayod nga pribilehiyo nato ang pagpakigsulti sa Soberano sa uniberso, si Jehova! Dayag, angay nga duolon nato siyang matinahoron, masimbahon, nga dili gayod ipakawaybili. Makasalig kita nga pamatian ug tubagon ang atong mga pag-ampo nga itanyag nga nahiuyon sa iyang kabubut-on. “Ayaw kamo pagkabalaka mahitungod sa bisan unsa, apan sa tanang butang pinaagi sa pag-ampo ug sa pangamuyo uban ang pagpasalamat ipahibalo ninyo ang inyong mga hangyo sa Diyos.” (Filipos 4:6) Ang pag-ampo mohimo kanatong mapabilhon sa sagradong mga butang.
19. Unsang mga panalangin ang moabot niadtong tukmang nagapabili sa sagradong mga butang?
19 Atong nahisgotan ang 13 ka sagradong butang nga angay dili nato ipakawaybili. Daghan ang pa ang mahisgotan. Kon pabilhan nato ang maong mga butang, atong mahuptan ang maayong relasyon uban sa atong Diyos, si Jehova ug makabaton sa iyang matag-adlaw nga panalangin. Pagkadakong kalinaw sa hunahuna ang ihatag niini, uban ang maayong tanlag! Ayaw gayod ipakawaybili ang maong bililhong relasyon! Higugmaa si Jehova uban sa bug-os mong kasingkasing, hunahuna, kalag, ug kusog, ug higugmaon ka niya sa kanunay. ( 1 Juan 4:16) Walay makabugto sa maong bugkos sa gugma gawas sa imong kaugalingong pagkadili-matinumanon.—Roma 8:38, 39.
20. Sa unsang mga paagi kita malamposong makasubay sa dalan padulong sa kinabuhi sa bag-ong kalibotan ni Jehova?
20 Magmapuliki kita kanunay sa pag-alagad sa Gingharian, nga mag-atiman pag-ayo sa tanang pribilehiyo ug magpabili sa tanang espirituwal nga tagana. Uban sa mga kasingkasing nga tugob kanunay sa pagpasalamat, hinaot kita magmaigmat sa pagsunod sa tanang sagradong mga kasugoan ug pahinumdom ni Jehova, nga magapabili nga kana sila gibutang aron sa pagtultol kanato nga layo sa kapeligrohan sa dalan sa kinabuhi. Ug, samtang mopadayon kita sa pagsubay nianang pig-ot nga dalan sa kinabuhi, lagmit nga si Jehova dili lamang magluwas kanato nga buhi latas sa dakong kasakitan kondili mohatag kanatog kinabuhing dayon uban ang dili-matapos nga mga panalangin sa iyang bag-ong kalibotan, nga karon duol na kaayo. Kining tanan maoy tungod kay atong gipabilhan ang sagradong mga butang.
Unsay Imong Tubag??
◻ Sa unsang paagi atong malikayan ang pagpakawaybili sa ngalan ni Jehova ug sa halad lukat?
◻ Unsay makapadayag nga kita wala magpabili sa atong relasyon kang Jehova ug sa iyang organisasyon?
◻ Unsa ang pipila ka butang nga nagapasundayag sa atong pagpabili sa Pulong ug sa mga kasugoan sa Diyos ug sa paglaom sa Gingharian?
◻ Sa unsang paagi atong ikapadayag nga kita wala magpakawaybili sa Kristohanong mga tigom ug sa teokratikanhong mga pribilehiyo?
◻ Unsa ang dugang pang sagradong butang nga alang niana angay natong ugmaron ang halalom nga pagpabili?