Ang Ipasabot sa mga Balita

Ang mga Badlis sa Zebra

“Milyonmilyong katuigan sa pag-ebolusyon” ang naghatag sa zebra sa mga badlis niini, maoy pangangkon sa Britanikong magasing World of Wildlife. Ang katarongan? Ang pila ka siyentipiko nag-ingon nga ang mga badlis mitungha ingong panglingla aron mapanalipdan ang hayop batok sa mga tumutukob. Ang daw nakadugang sa pagkakatuohan niining opinyona mao ang kamatuorang ang mga badlis lagmit magpatunghag hanap nga epekto kon hikit-an sa halayo. Bisan pa niana, dili mouyon ang tanang mahilig sa siyensiya. Si Dr. Gerrie de Graaff, siyentipikanhong magtatambag alang sa South African nga magasin sa lasangnong kinabuhi nga Custos, nag-ingon: “Dili kita makatuo nga ang mga hayop makakita sa mga butang nga sama kanato.” Ingong katin-awan, si de Graaff mipunting nga ang batasan sa mga zebra dili mahiuyon sa teoriya bahin sa paglingla maong mitungha ang badlis. Ngano man? Kay ang mga zebra dili mosulay sa pagtago sama sa mga hayop nga nagasalig sa panglingla pinaagi sa kolor. Sila sabaan ug aktibo ug nagapadayag sa ilang kaugalingon pinaagi sa pagpanibsib sa luag nga kapatagan.

Ang ubang ebolusyonista may teoriya nga ang klarong itom ug puting mga badlis momugnag lipat sa mata. Sumala kang de Graaff, ang usa ka pagpatuo mao nga “ang nagahasmag nga mga leyon dili makapili sa usa ka hayop tungod kay kana mosagol sa uban diha sa panon,” samtang “ang lain nagsugyot nga ang leyon masulawan o masayop sa pagkalkular sa gihanduraw niining kataposang lukso.” Apan sumala sa iyang giingon, “kining mga teoriyaha dili makabarog tungod kay ang mga leyon may dayag nga kamasaligon kon mopatay sa mga zebra.”

Sa paghinapos, si de Graaff miuyon nga, “sa pagkakaron, kita wala gayod masayod nganong ang zebra may mga badlis.” Bisan pa niana, ang hinungdan tin-aw alang sa mga estudyante sa Bibliya. Sa Genesis 1:20-25 kita gisultihan nga ang tanang linalang sa yuta gilalang sa Diyos “sumala sa ilang mga matang.” Ingong resulta, ang kinaiyanhong palakaw sa biyolohiya maoy hinungdan sa mga badlis sa zebra. Ang maong mga badlis maoy bahin sa kahibulongang kadaiya sa desinyo sa kalalangan sa Diyos.

Nagtrabahong mga Ministro?

Ang pila ka klerigo nagdahom nga makakitag dagkong kausaban sa ilang propesyon sa dili madugay. Kana ang kabalakang gipahayag sa usa ka pastor nga Luterano, si Jean-Pierre Jornod, diha sa Reformiertes Forum, usa ka Luteranong magasin nga gipatik sa Switzerland. Siya miingon: “Ako motagna pa gayod nga ang pastor sa tuig 2000 sa kadaghanang kaso may inoras nga trabaho gawas pa sa iyang parokya.” Ngano? Siya midugang: “Dili lang tungod sa salapi, apan una ug kinalabwan tungod kay ang katilingban mausbawong nagakinahanglag mga pastor nga nalangkit sa adlaw-adlaw nga kinabuhi.”

Sa pagpatin-aw sa dugang ning panginahanglan, si Jornod miingon: “Ang pastor sa tuig 2000 mao unyay usa ka lalaki o babaye nga hanas sa arte sa komunikasyon. Ako dili moingon nga ang mga simbahan mawalay sulod unya, apan ang mga tawo nga buot aboton sa usa ka pastor magpalayo sa simbahan, ingon nga sa bahin kini matuod karong adlawa. Busa, ang iyang mensahe kinahanglang mas tin-aw, mas hisabtan, ug mas deretso sa punto.”

Mamatikdan nga ang sinuholang mga magbalantay wala mailhi sa unang-siglong Kristiyanidad. Pananglitan, si apostol Pablo nagtagana sa kaugalingon niyang mga panginahanglang pisikal pinaagig sekular nga trabaho—ang paggamag tolda. Dugang pa, siya nakigkomunikar sa mga tawo sa epektibo kaayong paagi, pinaagi sa pagtudlo kanila “sa dayag ug sa balay-balay.” (Buhat 18:3; 20:20, 21, 33, 34) Kasukwahi sa sinuholang mga ministro karong adlawa, ang mga ansiano, o mga magbalantay, sa taliwala sa mga Saksi ni Jehova nagasunod gihapon niining Kasulatanhong sumbanan sa unang-siglong mga Kristohanon.