Mga Magmamantala sa Gingharian Nagtaho
Mga Kasinatian Gikan sa Tuvalu
ANG maayong balita sa Gingharian ginamantala sa matahom nga kaislahan sa Tuvalu, sa South Pacific, ug ang usa ka maayong pamatuod gikahatag bisan sa mga tawo nga tag-as ug katungdanan. Ang usa ka Australianong igsoong lalaki nga kauban sa iyang asawa nagaalagad nga nagapanawng magtatan-aw sa Tuvalu nagsugilon kanamo mahitungod sa iyang kasinatian:
“Ang akong asawa ug ako gidapit sa usa ka kaon sa balay sa Primer Ministro sa Tuvalu. Ang okasyon mao ang pagduaw sa Ministro sa Langyawng Kahikayan sa Australia. Sa lakaw sa pagpangaon, ang akong asawa ug ako nakabatog maayong higayon nga sangyawan ang Australianong ministro ug iyang asawa. Sa dihang gipailaila kami, ang Primer Ministro mikomento nga kahibulongan ang buluhatong ginabuhat sa mga Saksi ni Jehova sa Tuvalu, ilabina kon bahin sa paghubad sa among mga basahon ngadto sa pinulongang Tuvaluan. ‘May mga kopya ako sa tanan nilang basahon sa akong librarya, ug sila maayo kaayo!’ matud niya. Ang ministro ug ang iyang asawa naikag nga makabati sa pag-uswag sa among buluhaton sa Tuvalu.
“Sa ulahi sa gabii, mitambong kami sa pila ka lokal nga kalingawan sa tradisyonal nga sayaw. Tapos niadto ang Gobernador Heneral sa Tuvalu miduol kanamo ug mihisgot nga ang pila ka Saksi nakaduaw sa iyang pinuy-anan sa miaging semana ug nagbilin ug pila ka kopya sa mga magasing Bantayanang Torre ug Pagmata! Namatikdan niya sa likod sa usa sa mga magasin ang usa ka anunsiyo alang sa New World Translation of the Holy Scriptures ug buot masayod sa unsang paagi siya makabatog usa ka kopya sa lokal nga paagi. Giingnan namo siya nga kami malipay nga mohatag kaniyag usa ka kopya. Sa sunod Dominggo, kami miadto sa iyang pinuy-anan dala ang Bibliya, ug may maayo kaming panaghisgot sa mga usa ka oras. Miingon siya nga dako kaayo ang iyang pagpabili sa atong buluhaton ug mga basahon. Ngani, sa pag-abot namo sa iyang balay, ang iyang asawa nagbasa sa librong Mabuhi sa Walay Kataposan diha sa Tuvaluan. Busa kami nalipay nga makapamatuod ngadto sa pipila ‘nga anaa sa taas nga katungdanan.’”—1 Timoteo 2:1-4.
Sa laing okasyon ang Primer Ministro sa Tuvalu miduaw sa Solomon Islands. Ang komunidad sa mga Tuvalu nga nagapuyo didto nag-andam ug kombira sa pagpasidungog kaniya. Apil niadtong giimbitar sa kombira mao ang usa ka igsoong babaye, nga mitaho sa mosunod nga kasinatian:
“Sa pagkatapos sa kombira, ang Primer Ministro mihatag ug higayon sa pagsuknag mga pangutana mahitungod sa kinaulahiang mga hitabo sa Tuvalu. Ang usa ka pangutanang gisukna mao ‘May bag-o bang mga relihiyon sa Tuvalu?’ Ang Primer Ministro mitubag nga ‘adunay pila ka bag-ong relihiyon nga gitugotan sa Tuvalu apan usa lamang ang maayo.’ Sa gisukna kon unsa man kana, siya mitubag, ‘Mga Saksi ni Jehova.’
“Natingala ang tanan sa iyang tubag, ug ang dayag nga pangutana mitungha kon nganong ang mga Saksi ni Jehova mao ‘lamang ang maayong relihiyon.’ Siya miingon: ‘Kay ang among mga pastor nagalingkod sa balay sa tibuok adlaw ug nagabagting lamang sa kampana sa ma-Dominggo aron kami moadto ug mamati kanila. Apan ang mga Saksi ni Jehova moanha gayod kanimo, ug bisan pag dili ka moadto sa simbahan, tudloan ka nila sa Bibliya diha sa imong balay mismo.’”
Busa, bisan pag sawayon sa uban ang atong ganghaan-sa-ganghaan nga ministeryo, dayag gipabilhan sa uban ang among pagdala sa mensahe ngadto sa ilang mga balay mismo.—Buhat 5:42.