Si Satanas—Tinuod ba Siya?
Nagtuo ka ba nga si Satanas nagalungtad? Kon mao, ikaw daw bahin sa nagkadiyutang minoriya. “Sa pagka 1980 ang pagtuo sa Yawa nahanaw na gawas sa taliwala sa konserbatibong mga Katoliko, mga karismatik, konserbatibong mga Protestante, Sidlakanhong Ortodokso, mga Muslim—ug sa pila ka magtutuo sa okulto.” Kana ang ginaingon sa librong Mephistopheles-The Devil in the Modern World, ni Jeffrey Burton Russell.
Apan dili tanan mihunong sa pagtuo nga si Satanas matuod. “Ang Yawa buhi gihapon ug aktibo sa kalibotan,” matud ni Papa Juan Paulo II sa usa ka bag-ong pakigpulong sa Italya.
Husto ba ang papa? Kon man, si Satanas makaarang sa pagbuhat kon unsay iyang gusto sa kalibotan. Kon ang mga tawo dili motuo nga siya nagalungtad, sila dili mosupak kaniya. Dili katingad-ang si Cardinal Ratzinger, usa ka labawng awtoridad sa Batikano bahin sa doktrina, mipahayag: “Ang Yawa makapasilong sa paborito niyang kinaiya, ang pagkadili-magpaila.”
Tinuod bang nagalungtad si Satanas? Kon motuo kita sa Bibliya, magatubag kita nga oo! Si Satanas gitawag makadaghan pinaagi sa ngalan nianang dinasig nga talaan. Pananglitan, ang magsusulat sa Bibliya si Pablo, sa pagpasidaan bahin sa “mini nga mga apostol” ug “malimbongong mga magbubuhat” sa taliwala sa Kristohanong kongregasyon, misulat: “Ug dili katingad-an, kay si Satanas nagapadayon sa pagbalhin sa iyang kaugalingon ngadto sa usa ka manulonda sa kahayag.” Giisip ni Pablo si Satanas ingong intelihente, malimbongong persona.—2 Corinto 11:13, 14.
Nan, nganong ang paglungtad ni Satanas wala isipang ugdang sa kinabag-ang katawhan karong adlawa? Lagmit, kini banaag sa espiritu sa panahon. Kay kita nagapuyo diha sa ginatawag sa pipila nga tapos-Kristohanong panahon, ang ateyismo, hedonismo, materyalismo, ug komunismo nagpuli sa relihiyosong pagtuo diha sa daghang katilingban. Milyonmilyong tawo dili na motuo sa Diyos, nga nagaisip sa iyang paglungtad ingong dili kinahanglanon sa kaugalingon nilang mga pilosopiya. Ug gihiklin nila si Satanas uban sa Diyos. Ang pila ka relihiyosong katawhan sa Kakristiyanohan, bisan pag nagaangkon silang nagtuo sa Diyos, mibati nga ang pagtuo kang Satanas kinaraan na niining ika-20ng siglo.
Hinuon, mamatikdang ang dili pagtuo sa Diyos dili kay bag -o. Mga 3,000 ka tuig kanhi, ang Hebreohanong magbabalak si David misulat: “Ang buangbuang nagaingon sa iyang kasingkasing: ’Walay Jehova.’ Sila nagalihok nga madinaoton, sila nagalihok nga dulumtanan sa ilang pakiglabot.” (Salmo 14:1; 53:1) Sa laing dapit siya nagpahayag: “Ang daotan sumala sa iyang pagkamapahitas-on dili magasusi; ang tanan niyang hunahuna mao: ‘Walay Diyos.’” (Salmo 10:4) Bisan niadtong panahona, ang katawhan naglihok nga daw ang Diyos wala maglungtad. Ug ang makataronganong konklusyon mao nga kon walay Diyos, walay Satanas.
Nagtuo pa ang Pipila Hinuon, sa napahayag na, ang pipila nagadawat gihapon sa pagtuo sa usa ka literal nga Yawa. Anaa kadtong nagtuo sa karaang Zoroastrianhong pagtulon-an sa dualismo, nga nagaingong ang maayo ug daotan, ang Diyos ug ang Yawa, sa tanang panahon nagalungtad nga tapad. Ang uban nagaingon pa nga ang maayo ug daotan maoy mga bahin sa Diyos. Ug daghan pa sa Kakristiyanohan ug sa Islam ang nagtuo sa paglungtad ni Satanas. Sa pagkamatuod,alang sa daghan kanila, siya nagalungtad gihapon ingong usa ka espiritu nga pak-an nga may mga sungay ug ikog nga nagagahom sa dulnganan niadtong “imortal nga mga kalag” nga gihatag ngadto sa “impiyernong-kalayo,” nga gihulagway diha sa mga buhat sa bantog Pranses nga tigdibuho si Gustave Doré.
Sa pagkamatuod, alang sa pipila, ang pagtuo kang Satanas gipasobrahan pa. Sila nagasimba kaniya—pinaagi kaha sa ngalan o pinaagi satanasnon o demonyohanong mga rituwal. Sa mga milenyo, ang pamarang ug pangdiwata nailhan nga pagsimba kang Satanas. Bisan atong moderno, maduhaduhaong panahon, ang Satanismo malamboon gihapon. Busa, una nato hisgoti kon unsay ginaingon sa Bibliya bahin kang Satanas, atong hisgotan ang pila ka kamatuoran mahitungod sa modernong Satanismo.
[Hulagway sa panid 3]
Usa ka Buddhistang paghulagway sa satanasnong “impiyerno”