Mga Magmamantala sa Gingharian Nagtaho
Ang Maayong Balita Nagmauswagon sa Cyprus Bisan pa sa Pagsupak
MIWALI si apostol Pablo sa maayong balita sa Gingharian sa Cyprus. (Buhat 13:4-12) Kadto maoy niadtong 47-48 K.P. Karong adlawa, ang maayong balita ginawali niining matahom nga pulo sa 1,154 ka Saksi ni Jehova, ug sa Abril niining tuiga, 2,570 ang mitambong sa serbisyo sa Memorial, nga nagapakitang may daghang matinud-anon-ug-kasingkasing ug mahadloko-sa-Diyos nga pulo. Apan samtang daghang tawo ang nagadawat sa malinawong mensahe sa Bibliya nga gipahayag sa mga Saksi ni Jehova, ang Grego Ortodoksong klero, sama sa Hudiyong klero sa adlaw ni Jesus, nagasupak sa buluhaton. (Juan 15:20) Ang sangang buhatag sa Cyprus misulat: “Nga labi pa kay sukad masukad, ang Grego Ortodoksong Iglesya nagapakita sa determinasyon niini nga tugawon ang atong buluhaton sa pagsangyaw.” Dayon gibatbat sa taho kon giunsa paghasi sa klero ang mga igsoon diha sa ilang balay-balay nga ministeryo ug pagsingkamot sa paghagit kanila aron malangkit sila sa argumento. Dayon ilang gisumbong sila nga nakadisturbo, apan ang mga igsoon wala mahagit ug nagpahilayo.
Sa pagkamatuod, ang pagsupak sa klero kadaghanan misumbalik, sumala sa ginapadayag sa mosunod nga kasinatian: “Pila ka bulang miagi, ang usa ka babaye nagsugod sa pagtuon sa Bibliya uban sa mga Saksi ni Jehova, ug sa dili pa dugay ang iyang bana miapil. Dayon ang usa ka teologo miduaw niining magtiayona, nga naglaom sa pagkombinsir kanilang ihunong nila ang ilang pagtuon sa Bibliya. Gisulayan sa teologo ang pagsaysay sa Trinidad ngadto kanila. Sa taudtaod ang bana misalga ug miinogn: ‘Dili ako makasabot sa unsang paagi si Jesus, nga karon anaa sa langit sa pisikal nga lawas, sumala sa imong giingon, sa samang panahon mahiusa sa Diyos nga anaa sa espiritung dagway.’ Ang tubag sa teologo mao: ‘Aw, dili kinahanglang masabtan mo ang tanan.’ Ang tawong interesado miingon: ‘Apan ako nakasabot nga si Jesus mao ang Anak sa Diyos ug dili mao ang Diyos mismo. Dili na ko buot makadungog pa bahin sa Trinidad.’ Niana ang teologo mitindog ug masuk-anong miingon: ‘Abante na kaayo kamo sa inyong pagtuon sa Bibliya. Dili na kamo mausab.’”
Karon ang asawa nagatambong sa tanang tigom ug nabawtismohan sa “Pagsalig Kang Jehova” Distritong Kombensiyon. Ang bana nagapadayon sa iyang pagtuon ug nagatambong sa pila ka tigom.
“Busa, bisan pa sa ilang paningkamot, wala makab-ot sa klero ang ilang tumong,” nag-ingon ang taho gikan sa sangang-buhatan sa Cyprus. “Hinunoa, ang among napanid-an mao nga mas daghang interesadong tawo ang karon nagatambong sa mga tigom kay sukad masukad. Sa samang panahon, ang mga igsoon mas determinado sa pagdala sa maayong balita ngadto sa mga tawong matinud-anog kasingkasing.” Si Jehova nagapaluyo sa iyang mga maunongon sumala sa iyang gisaad sa Jeremias 1:19: “Sila makig-away batok kanimo, apan sila dili modaog batok kanimo, kay ‘ako magauban kanimo,’ nagaingon si Jehova, ‘sa pagluwas kanimo.’”