Usa Ka Bag-ong Kalibotan—Duol Na Kaayo!
KINING kalibotana nagpinal na! Tinuod ba gayod kana? Buweno, palandonga pag-ayo ang mga kahimtang sa kalibotan.
Adunay igong nukleyar nga mga hinagiban nga makalaglag sa tanang populasyon sa yuta sa makadaghan. Ginasangka ang sibil nga gubat diha sa daghang mga nasod, sama sa Angola ug Mozambique. Dunay etnikong mga panag-away sa South Africa, Sri Lanka, ug sa ubang nasaod. Ang terorismo ug kagutmanan nakapatayg daghang tawhanong mga kinabuhi.
Komosta ang epidemiya AIDS? Ang Sunday Times sa South Africa sa Oktubre 25, 1987, nagtawag niini nga “bag-ong itom nga kamatayon” ug miingon: “Karon ang bug-os nga kalisang sa Aids sa Aprika gibutyag: Diha sa ubang mga nasod unom ka tawo gikan sa matag napulo malagmit mamatay sa 1994.”
Kaylap ang kahadlok tungod sa maong kondisyon. Ang sa usa ka nakadawat ug Nobel prize si Harold C. Urey miingon sa pila ka tuig nga milabay: “Kita nangaon sa kahadlok, nangatulog sa kahadlok, nabuhi sa kahadlok ug mangamatay sa kahadlok.” Labing hinungdanon, si Jesu-Kristo, ang labing bantogang propeta nga nabuhi sukad sa yuta, mitagna nga sa kataposang mga adlaw ang mga tawo niining kalibotan, “panguyapan tungod sa kalisang ug sa pagpaabot sa mga butang nga moabot diha sa pinapuy-ang yuta.”—Lucas 21:26.
Apan daghan ang wala mahadlok. Hinunoa, sila nangalipay. Ngano? Tungod kay sila nasayod nga kining sistema sa kalibotan (dili ang planetang Yuta) duol nang matapos, apan ang usa ka bag-ong kalibotan duol na kaayo. Sa unsang paagi makaseguro sila? Tungod sa katumanan sa daghan kaayong mga tagna sa Bibliya.
Pananglitan, sa dihang gipangutana si Jesu-Kristo sa ilhanan sa iyang presensiya ug sa kataposan sa kalibotan, siya miingon: “Ang nasod managgubat batok sa laing nasod ug gingharian batok sa gingharian .” Sa 1914, ang Gubat sa Kalibotan I mibuto. Kini nakapahinabog labing daghang kamatayon tungod sa gubat sukad niadtong panahona. Pila ka sundalo ang nangamatay? Duolan sa 9,000,000 ang nangamatay, gawas pa sa milyonmilyong mga sibilyan! Apan ang Gubat sa Kalibotan II mas malaglagon, nga nakaangin ug mga 55,000,000 ka kinabuhi! Gitudlo ni Jesus nga ang tanan niini ubanan sa kakulangan sa pagkaon, mga linog, mga kamatay, ug pagkadaotan.—Mateo 24:7-13; Lucas 21:10, 11.
Ang Kristohanong apostol Pablo tukmang nagtagna sa presenteng mga kahimtang sa kalibotan. Siya misulat: “Sa kataposang mga adlaw ang kritikal nga panahon moabot. Kay ang mga tawo mga mahigugmaon sa kaugalingon, mga mahigugmaon sa salapi, tigpagawal, hambogiro, tampalasan, masukihon sa mga ginikanan, dili-mapasalamaton, dili-maunongon, walay kinaiyanhong pagbati, walay pagpugong sa kaugalingon, mabangis, walay gugma sa pagkamaayo, mga mabudhion, gahig-ulo, andakan, mga mahigugmaon sa kaugalingon inay mga mahigugmaon sa Diyos, nagabaton ug dagway sa diyosnong debosyon apan nagapahimakak sa gahom niini; ug likayi kining mga butanga.” (2 Timoteo 3:1-5) Si Pabloe tukma kaayong nakatagna sa presenteng-adlawng mga kahimtang tungod kay gidasig siya sa Diyos sa pagsulat niadtong mga pulonga.
Mahitungod sa iyang kaugalingong mga pulong bahin sa panahon sa kataposan, si Jesus miingon: “Inigkakita na ninyo nga mahitabo kining mga butanga, sayri nga duol na ang gingharian sa Diyos.” (Lucas 21:31) Gigamit sa milyonmilyon ang sulondang pag-ampo ni Jesus ug nangayo nga moabot ang Gingharian sa Diyos. (Mateo 6:9, 10) Apan sa dihang gipangutana, “Unsay buhaton niini nga Gingharian?” sila walay tubag. Sa kasukwahi, milyonmilyon niadtong kuging nagatuon sa Bibliya nahibalo nga taposon sa Gingharian kining daang kalibotan ug magatukod ug usa ka bag-ong kalibotan nga mohatag dili-maisip nga mga panalangin sa katawhan. Apan sa unsang paagi? Kanus-a?