Ang Ipasabot sa mga Balita

Takos Sundon

Usa ka sulat nga dil pa dugayng gipatik diha sa New Haven Register, mantalaan sa Connecticut, mihatag ug pila ka maayog tumong nga mga hunahuna bahin sa mga kombensiyon nga gihimo sa mga Saksi ni Jehovah. Gipahayag ngadto sa editor, ang sulat nag-ingon: “Ang mga Saksi ni Jehova bag-o pa lang naghimo sa ilang tinuig nga mga komperensiya diha sa Colisiyom. Taliwala sa tanang mga grupo nga nanungha, walay usa nga labi pang dinawat o pinangita kay kanila. Ang Colisiyom dili na gayod mahimong sama kahinlo, sa dili pa sila magtigom, o sama kahinlo inigbiya nila sama sa ilang kataposang pagduaw.”

Nagpunting sa usa ka kombensiyon nga gihimo sa mga Saksi sa pila ka tuig nga milabay, ang magsusulat sa sulat midugang nga “75,000 ka Saksi nagtigom diha sa Yankee Stadium, nga duna pay 20,000 sa gawas nga namati sa mga trompa diha sa usa ka piyesta sa pagsimba nga nakapakurat sa New York. Duha ka gatos ka polis ang gipadala sa unang adlaw, ang naandang gidaghanon nga itudlo sa ingon ka daghang tawo. Duha lamang ang gipadala sa pagkasunod adlaw aron sa paghatag ug mga direksiyon. Ang siyudad sa New York nagpadalag mga tawo sa sanitasyon, mga tigpakaon, mga polis sa pagtuon niining dili-katuohang episyenteng palakaw ug sa pagkakat-on gikan niana. Walay bisan usa ka gamayng mga hugaw gikan sa pagkaon o basura nga nakit-an dihang namauli sila, bisan pa sa pagpakaon sa ilang mga sakop. Kon magtutuo ka sa usa o ubang porma sa teolohikal nga mistisismo o isalikway silang tanan, . . . makadayeg ka gayod sa ilang dedikasyon, sa ilang pagkabuotan, sa ilang tagsaong pananglitan sa tawhanong pamatasan ug mahimsog nga pagkinabuhi. Maayong atong sundon ug praktison ang katingalahang mga hiyas nga gipakita niining mapaubsanon ug debotadong mga tawo.”

Bisan nga gilantaw sa kadaghanan ang pamatasan sa mga Saksi ni Jehova nga talagsaon, ang mga Saksi mismo nahibalo nga ang tinuod nga mga Kristohanon kinahanglan ‘magkinabuhi pinaagi sa espiritu’ ug kinahanglan “maglakaw nga mahapsay usab pinaagi sa espiritu.” Ang espiritu sa Diyos mao ang nakapatungha diha kanila sa bunga sa “gugma, kalipay, kalinaw, pag-antos, kalulot, pagkamaayo, pagtuo, kalumo, pagpugong sa kaugalingon.” Ang maong mga hiyag tinuod gayod nga takos sundon.​—Galacia 5:22, 23, 25.

Usa ka Korona sa Pagkapandol

Ginatos sa mga lungsoranon sa Málaga, Espanya, misuportar sa publikong koleksiyon sa pagpatunghag pundo alang sa maluhong koronang bulawan para sa popular nga lokal nga birhen, “Ang Atong Birhen sa Paglaom.” “Usa ka gramong bulawan alang sa [birhen]” mao ang panultihong namugna sa miaging duha ka tuig aron sa pagpatunghag mga kontribusyon. Sukad niadto, mga ariyos, mga medalya, mga singsing sa kasal, ug bulawang mga ngipon pa gani ang gidonar. Kining mga butanga gitunaw hangtod sa 1.5 ka kilogramos nga lunsayng bulawan, igong makahimog solidong bulawan alang sa korona sa imahen.

Diha sa usa ka solemneng seremonya, nga gidumala sa papal nuncio ug daghang iladong mga obispo sa Espanya, “Ang Atong Birhen sa Paglaom” gikoronahan sa Hunyo 1988. Bisan pa, daghang mga Katoliko nagduhaduha bahin niining koronasyon. Ang Kinatsilang mantalaang El País mitaho nga diha sa usa ka bukas nga sulat duolan sa 20 ka mga seminarista nangutana: “Dili ba kaha nakahatag kitag iskandalong bato nga makapandol sa mga magtutuo ug dili-magtutuo tungod sa atong walay-hinungdang mga rituwal?” Ubang Katolikong mga grupo nga gihisgotan sa dili pa dugayng papal ensiklikal mirekomendar nga ang matinumanon “nagbalhin sa ilang mga bahandi ngadto sa kabus.” Tungod niini, gipahayag niining mga Katoliko ang ilang “dili-mabalhing pagsupak tungod sa konsensiya maylabot sa gianunsiyong maluhong seremoniya” ug ang “mahal kaayong korona.”

Dili ikahibulong nga nakita sa sinserong mga tawo nga salawayon ang pagdayandayan sa walay kinabuhing imahen. Mao usab kanay bation sa Diyos. Sa mga siglong milabay, iyang gikastigo ang mga Israelinhon niining samang buhat. Si Jehova miingon pinaagi sa iyang propetang Ezekiel: “Ilang ginapasigarbo ang katahom sa ilang alahas, nga gikan niini sila naghimog dulumtanang mga imahen ug mga diyosdiyos.” (Ezekiel 7:20, The Jerusalem Bible) Tungod niini, ang mga mahigugmaon sa kamatuoran maalamong mamati sa tukma sa panahong tambag sa Bibliya sa “pagpahilayo gikan sa pagsimbag mga diyosdiyos.”​—1 Corinto 10:14.