Makahinumdom Ka Ba?

Nahatagan ba nimog maayong pagpalamandong ang dili pa dugayng mga gula sa Ang Bantayanang Torre? Kon mao, tingali imong mahinumdoman ang mosunod:

◻ Unsa ang tuboran sa tinuod nga kalipay?

Si jesus miingon: “Malipayon kadtong nagapatalinghog sa pulong sa Diyos ug nagabantay niini!” (Lucas 11:28) Busa gipakita ni Jesus nga ang tinuod nga kalipay makita sa pagkahimong matinumanong alagad sa Diyos ug nagabuhat sa iyang kabubut-on—8/15, panid 8.

◻ Unsa ang usa ka paagi nga atong masuklan ang malalangon ug malimbongong mga lihok ni Satanas?

Aron makasukol kang satanas, kinahanglang atong susihon ang atong kaugalingon. Kita ba may kahuyangan nga mapahimuslan o ginapahimuslan karon mismo ni Satanas? Pananglitan: Ikaw ba may suliran sa pagkahambogiro? Kinahanglan bang ikaw kanunay nga numero uno? Kon nakaila kita sa atong kaugalingon, makatul-id kita nianang maong mga sulirana, basta nga kita mapaubsanon. Niining paagiha, wala nato iladlad ang atong kaugalingon kang Satanas.—9/1, panid 15, 16.

◻ Unsa ang simbolikong patik nga ginabutang sa antitipikong ‘tawo nga sinul-oban sa lino’ diha sa mga tawong mahimong “ubang mga karnero” ni Kristo? (Ezequiel 9:2-4; Juan 10:16)

Ang “patik” mao ang pamatuod nga ang samag karnerong mga tawo dedikado, bawtismadong mga indibiduwal nga dunay samag-Kristong personalidad—9/15, panid 14.

◻ Unsay gipasabot ni apostol Pedro sa dihang miingon siya nga kita kinahanglang “maghigugmaay sa usag usa nga mainiton nga gikan sa kasingkasing”? (1 Pedro 1:22)

Ang “mainiton” sa literal nagkahulogan “mainaton.” Aron ang maong gugma ikapakita diha sa mga Kristohanon nagkinahanglag paningkamot ug naglangkit kini sa pag-inat sa atong mga kasingkasing sa pagpadako niana aron makasakop kana sa mga tawo nga kasagarang dili makadani kanato.—10/1, panid 12.

◻ Unsa ang templo nga gihisgotan sa Pinadayag 11:1, ug kanus-a kini natukod?

Kini mao ang dakong espirituwal nga templo, diin ang balaan sa mga balaan nga mao ang puloy-anan ni Jehova sa langit. Natukod kini sa 29 K.P. sa dihang gidihogan si Jesus ug misugod sa pag-alagad ingong hataas nga saserdote. (Hebreohanon 3:1; 10:5)​—10/15, panid 12.

◻ Unsa ang Codex Sinaiticus, ug unsa ka bililhon kini?

Ang Codex Sinaiticus nasudlan sa enterong Kristohanon Gregong Kasulatan ug sa Gregong hubad sa mga bahin sa Hebreohanong Kasulatan. Kini sa labing menos maoy 1,600 ka tuig, ug kini napormang usa ka hinungdanong kalangkitan sa atong pagkatalogo sa mga manuskrito sa Bibliya.​—10/15, panid 30, 31.

◻ Unsa ang makahatag labing dakong kalipay diha sa kaminyoon?

Ang kada usa nga kapikas magatino nga ang Diyos anaa sa ilang kaminyoon. Niining paagiha, ang espirituwal nga mga panginahanglan mapatagbaw, ug ang bugkos sa kaminyoon mapalig-on. (Ecclesiastes 4:12; Mateo 5:3)​—11/1, panid 16.

◻ Unsa “ang kalinaw sa Diyos” nga gihisgotan ni Pablo diha sa Filipos 4:7?

Kining maong kalinaw maoy hinatag sa Diyos nga pagkalinong ug pagkakalmado, bisan taliwala sa labing masulayong mga kahimtang. Kini nagagikan sa suod nga relasyon kang Jehova ug sa kahibalo nga kita nakabuhat sa kahimut-anan sa iyang mga mata.​—11/1, panid 30.

◻ Pinaagi sa unsa nga ang tawo mahimong inuyonan ni Jehova?

Pinaagi sa imong pagpahinungod ug bawtismo, posible alang sa usa ka dili-hingpit nga tawo nga mahimong usa ka “tawo nga maayo ug kabubut-on,” o tawo nga inuyonan sa Diyos. (Lucas 2:14)​—11/15, panid 11.

◻ Unsay mahimo sa mga ginikanan sa pagtabang sa ilang nakasalang minor de edad nga bata bisan kon siya gisalikway ingong dili-bawtismadong magmamantala o kon siya gipalagpot?

Sama nga ang mga ginikanan magpadayon sa pagtaganag pagkaon, sapot, ug puloy-anan, sa ingon kinahanglan ilang tudloan ug disiplinahon siya sumala sa Pulong sa Diyos. Sila makatuod uban kaniya nga siya lamang usa o siya makaapil diha sa kahikayan sa pagtuon sa pamilya.​—11/15, panid 20.

◻ Sa unsang paagi gikawang sa Hudiyohanong tradisyon ang sugo sa Diyos diha sa Exodo 20:12 nga kinahanglan pasidunggan sa mga anak ang ilang mga ginikanan?

Ang tawo makahimo sa paghatag sa iyang kabtangan nga sa ulahi idonar sa templo pinaagi sa pagdeklarar niana ingon nga “corban,” nga nagkahulogan, “usa ka gasa nga gipahinungod ngadto sa Diyos.” (Marcos 7:11) Kining maong corban magamit gihapon nianang tawhana alang sa iyang kaugalingong kaayohan, apan mahimo nga dili niya kini mahatag sa iyang mga ginikanan.​—12/1, panid 4, 5.