Kon Unsaon Pag-ila sa Matuod nga mga Ministro sa Diyos
KADTO nahitabo sa 1948. Duha ka ministro, mga Saksi ni Jehova, nagsakay sa daang bus sa libaongon nga dalan, nga nagpadulong sa Bukid Pyrenees gikan sa usa ka lungsod sa amihanang Espanya. Sila moduaw sa usa ka ministro sa nahilit nga dapit. Sa paghunong sa bus sa dapit nga kinadul-an sa balangay nga gipuy-an sa ministro, ilang nakita siya nga naghulat kanila uban sa iyang asno. Apan nakamatikod usab sila sa usa ka talagsaong pundok sa duol—upat ka armado kaayong mga Guwardiya Sibil ug usa ka pari! Samtang nagtungas ang mga ministro sa titip nga dalan padulong sa balangay, usa sa mga Guwardiya mihulbot sa iyang rebolber ug misinggit, “Manos arriba!” (Iisa ang mga kamot!) Gidakop ang mga bisita. Ngano? Giingnan sa pari ang mga Guwardiya nga ang mga bisita mga terorista—usa ka dakong bakak! Ingong resulta, ang tulo ka ministro gipriso.
Unsay gipamatud-an niini? Nga dili ang tanan nga nagaangkong mga pari o mga ministro maoy tinuod nga mga ministro sa Diyos. Ngani, kadaghanan may dako kaayong kalainan tali sa matuod ug bakak nga mga ministro. Unsa ang pangunang mga kinahanglanon sa matuod nga mga ministro?
Ang mga Kinahanglanon sa Matuod nga mga Ministro
Ang paninugdang kahulogan sa “pagministro” mao “ang paghatag tabang o pag-alagad.” Ang matuod Kristohanong mga ministro kinahanglang may lig-ong pagtuo nga ang Bibliya mao ang dinasig nga Pulong sa Diyos. (Juan 17:17) Bisan pa niana, ang maong paninugdang kinahanglanon dili igo. Kinahanglan usab nga sila may dakong kahibalo ug pagsabot sa Bibliya. Apan kinahanglang dili nila gamiton ang maong kahibalo sa hinakog nga paagi—sa ilang kaugalingong kaayohan lamang. Angay nga sila madasigon usab nga mga magwawali sa Ebanghelyo—ang maayong balita mahitungod sa Gingharian sa Diyos ug ang paglaom sa kinabuhing walay kataposan sa usa ka paraisong yuta.—Juan 17:3; Salmo 37:11, 29.
Lain pay ato, ang kamatuorang ang mga Saksi ni Jehova nagawali sa maayong balita sa Gingharian dili lamang sa Espanya kondili sa tibuok kalibotan maoy katumanan sa gitagna ni Jesus alang sa panahon sa kataposan niining daotang daang sistema sa mga butang. Siya miingon: “Ug kining maayong balita sa gingharian igawali sa tibuok gipuy-ang yuta ingon nga pamatuod sa tanang nasod; ug unya ang kataposan moabot.”—Mateo 24:14, 33, 34.
Ang laing paninugdang kinahanglanon sa matuod nga mga ministro mao nga, sumala sa giingon ni Jesus, sila angay “dili bahin sa kalibotan”; busa, sila angay magpahilayo sa politika. (Juan 15:19) Angay usab nga sila mapaubsanon kaayo, mahigugmaon, ug maluluton, nga kanunay andam motabang sa mga takos nga anaa sa kawalad-on.—1 Corinto 13:1, 4; 1 Pedro 5:6.
Kini seryoso kaayong butang. Ang pag-ila tali sa matuod ug bakak nga mga ministro maoy butang maylabot sa kinabuhi ug kamatayon. Ingon niana ka seryoso! Sa iyang bantog nga Wali sa Bukid, si Jesus nagpasidaan: “Magbantay kamo sa mini nga mga propeta nga moanha kaninyo nga managsapot sa pagkakarnero, apan sa sulod mga lobo nga manunukob.”—Mateo 7:15.
Bisan pa niana, ang matuod nga mga ministro sa Diyos dili lamang may mga katungdanan ug mga kinahanglanon kondili daghan usab ug mga pribilehiyo. Ngani, ingong usa ka pundok, sila mao ang labing bulahan, labing malamposon, ug sa pagkakaron mao ang labing malipayong grupo sa yuta karong adlawa, sumala sa imong makita sa sunod nga artikulo.