Ang Kahadlok Daotan ba sa Tanang Panahon?
KINI makagun-ob sa kalipay ug makalumpag sa paglaom. Gitawag kining hilo sa kaisipan, tigdaot sa gahom sa pangatarongan, ug giingong labawng malaglagon kay sa pinakagrabeng sakit sa lawas. Oo, ang kahadlok maoy usa ka gamhanan nga emosyon. Bisan pa niana, kini daotan ba sa tanang panahon?
Handurawa nga ikaw nagamaneho subay sa karsadang dili sinati. Ang karsada nagpatungas sa kabukiran ug nagsugod pag-ikis-ikis ug paglikoliko. Mitikyop na ang kagabhion, ug mikuyog niini ang taligsik sa niyebe. Midigyas ug diyutay ang imong sakyanan, ug ikaw nakaamgo nga nahiabot ka na sa usa ka habog nga dapit diin ang karsada nagkayelo.
Karon kinahanglan nga ikaw maigmat. Samtang mainampingon nimong gisubay ang matag kurbada nga danlog, makahunahuna ka nga sayon nga dili nimo makontrolar ang sakyanan diha sa danlog nga dalan ug mahulog ngadto sa walog sa ubos. Dugang pa, ikaw walay ideya kon unsang laing kapeligrohan ang nagpahipi sa kangitngitan. Samtang ang mga hunahunang sama niini misantop sa hunahuna, ikaw namad-an ug laway ug mas mikusog ang pinitik sa imong kasingkasing. Ikaw igmat kaayo. Bisan unsa pay imong gihunahuna sa nangagi, karon ikaw bug-os naghunahuna sa buluhatong giatubang: ang pagpadagan sa sakyanan subay sa karsada ug paglikay sa aksidente.
Sa kataposan, ang karsada nagdulhog na. May mga suga na sa kalye, ug wala nay yelo. Sa inanay, nahanaw ang imong kakulba. Ikaw nakarelaks ug nakapanghayhay nga nahuwasan. Kadtong tanang kahadlok sa wala lamay hinungdan!
Apan kadto ba wala lamay hinungdan? Dili gayod. Ang makataronganong kakulba sa maong mga sirkumstansiya maoy normal nga reaksiyon. Kini makahimo natong igmat, mabinantayon. Ang maayong kahadlok makatabang nato nga dili magdalidali, nga magdaot sa atong kaugalingon. Oo, ang kahadlok dili tigdaot sa gahom sa pangatarongan sa tanang panahon o hilo sa kaisipan. Sa pila ka sirkumstansiya, kini mapuslanon gani.
Ang Bibliya nagahisgot sa kahadlok ug nagapaila kanato sa duha ka linaing matang. Ang usa ka matang sa kahadlok maoy tinuod nga hilo sa kaisipan. Apan ang lain maoy dili lang normal ug maayo kondili kinahanglanon sa atong kaluwasan. Unsa ang duha ka matang sa kahadlok? Ug sa unsang paagi kita makatuon sa pag-ugmad sa usa samtang makalikay sa lain? Kini pagahisgotan sa sunod artikulo.