Pagmando Pinaagi sa Diyos—Ang Labing Maayong Paagi
ANG kasaysayan sa mga gobyerno nagapadayag nga ang mga tawong dili hingpit dili makagahom sa tukma sa ubang mga tawo. Sumala sa giingon ni Lord Acton sa Inglaterra: “Ang gahom lagmit makapadaot ug ang absolutong gahom bug-os makapadaot.” Busa, sumala sa ginaingon sa Bibliya: “Ang tawo nagamando sa tawo sa iyang kadaotan.”—Ecclesiastes 8:9.
Sa sinugdan, gihatagan ni Jehova nga Diyos ang tawo ug pagbulot-an ibabaw sa kahayopan apan dili ibabaw sa mga tawo. Gisultihan sa Diyos ang iyang unang gilalang nga Anak sa mga langit: “Buhaton nato ang tawo sumala sa atong dagway, ingon sa kasama nato, ug magabuot sila sa mga isda sa dagat ug sa nagalupad nga mga linalang sa kalangitan ug sa aghop nga kahayopan ug sa tibuok nga yuta ug sa tanang nagalihok nga kahayopan nga nagalihok ibabaw sa yuta.” (Genesis 1:26) Ang Maglalalang sa tawo mao ang iyang Magmamando. Nan, sa unsang paagi kana nausab?
Sukad sa pag-alsa sa tawo sa tanaman sa Eden, siya nagapadayon sa pagsalikway sa Diyos ingong iyang Magmamando. (Genesis, kapitulo 3) Dayag kini sa karaang Israel, usa ka nasod nga gipili sa Diyos ingong iyang kaugalingon. Sa dihang nangayog usa ka tawhanong hari ang mga Israelinhon, giingnan ni Jehova ang iyang propetang si Samuel: “Sila wala magsalikway kanimo, apan nagsalikway kanako ingon nga ilang hari.”—1 Samuel 8:7.
Ang pagmando sa Diyos ibabaw sa mga Israelinhon maoy maluluy-on. Pinaagi sa iyang hawas si Moises, gihatagan sila ni Jehova sa usa ka hugpong sa kalagdaan nga nagpakitag mahigugmaong konsiderasyon sa ilang kaayohan. Kana nanalipod kanila batok sa daghang sakit ug nagpasiugdag konsiderasyon alang sa mga tigulang, sa mga babayeng balo, ug sa mga ilo. Gibaod sa Kasugoan ang pagtahod sa kabtangan sa uban ug pagkamatinud-anon sa mga pakiglabot sa negosyo. Kana nagsaway sa pagkamay-pinalabi, pagsaksig bakak, ug panghiphip. Ang pagmando sa Diyos tinuod nga makataronganon ug matarong.
Si Jehova misaad sa pagmando dili lang sa Israel kondili sa tanang tawo. Iyang pagakuhaon gikan sa mga tawong makasasala ang gahom sa pagmando ibabaw sa ubang mga tawo ug ihatag ang maong gahom ngadto sa iyang bugtong-inanak nga Anak. Nga nagtagna niini, ang Diyos miingon diha sa tagna ni Ezekiel: “Kini dili ihatag kang bisan kinsa hangtod nga moabot siya nga may legal nga katungod, ug akong ihatag kini kaniya.”—Ezekiel 21:27.
Maoy ngadto kang Jesu-Kristo nga gihatag sa Diyos ang legal nga katungod sa pagmando sa katawhan ingong usa ka hawas sa pagkasoberano ni Jehova. Tungod kay ang Gingharian sa Diyos pinaagi kang Kristo mao ang labing maayong paagi sa pagmando sa tanang tawo, gitudloan ni Jesus ang iyang mga tigpatalinghog sa pag-ampo alang niini. “Nan, pag-ampo kamo sa ingon niini nga paagi,” miingon si Kristo: “Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Pagabuhaton unta ang imong kabubut-on, dinhi sa yuta maingon sa langit.”—Mateo 6:9, 10.
Pinaagi sa pagtagad ni Jesus sa mga tawo, gipakita niya kon unsa unya siyang matanga sa magmamando. Si Kristo tinuod nga nakabatog kaluoy, kay “sa pagkakita sa mga panon giabot siyag kaluoy alang kanila, tungod kay sila gipanitan ug nahitibulaag sama sa mga karnero nga walay magbalantay.” (Mateo 9:36) Gipakita ni Jesus ang giladmon sa iyang gugma alang sa iyang mga sumusunod sa dihang siya miingon: “Akong ginahatag kaninyo ang usa ka bag-ong sugo, nga kamo mahigugma sa usag usa; maingon nga ako nahigugma kaninyo, nga kamo usab mahigugma sa usag usa.” (Juan 13:34) Igo ang iyang paghigugma sa mga tawo nga iyang gihatag ang iyang kinabuhi ingon nga lukat. Ang maong halad nagapaposible nga kadtong nagdawat niana mapahigawas gikan sa sala, sakit, ug bisan kamatayon.—1 Juan 2:1, 2; Pinadayag 21:1-4.
Sa pagtagna sa unsang paagi ang pagmando sa Diyos pinaagi ni Jesu-Kristo mahimong makataronganon, matarong, ug malinawon, gidasig ang propetang si Isaias sa pagsulat: “Alang kanato ang usa ka bata natawo, alang kanato ang usa ka anak nga lalaki gihatag; ug ang prinsipinhong pagmando igatungtong sa iyang abaga. Ug ang iyang ngalan pagatawgon nga Kahibulongang Magtatambag, Diyos nga Gamhanan, Amahan nga Walay Kataposan, Prinsipe sa Pakigdait. Sa kadagaya sa prinsipinhong pagmando ug sa pakigdait walay kataposan, ibabaw sa trono ni David ug ibabaw sa iyang gingharian sa pagtukod niini nga malig-on ug sa pagpadayon niini pinaagi sa hustisya ug sa pagkamatarong, sukad karon ug hangtod sa panahong walay kataposan. Ang kakugi mismo ni Jehova sa mga panon maoy magahimo niini.”—Isaias 9:6, 7.
Ang yutan-ong mga hawas sa pagmando sa Diyos mahisama sa mga tawo nga karon nagapabanaag sa mahigugmaong mga hiyas ni Jesus ingong mga magtatan-aw sa matuod Kristohanong kongregasyon. Lahi sa diktador nga klero, kining mga tawhana nagapakitag mahigugmaong kabalaka alang sa panon, sama sa gibuhat ni Jesu-Kristo. Mahitungod sa maong diyosnong mga tawo, ang propetang si Isaias misulat: “Tan-awa! Ang usa ka hari magamando alang sa pagkamatarong mismo; ug mahitungod sa mga prinsipe, sila magamando ingong mga prinsipe alang sa hustisya mismo.” (Isaias 32:1) Ang maong mga hawas sa pagmando sa Diyos magaalagad usab sa balaang intereses sa bag-ong kalibotan.—Salmo 45:16.
Haduol na ang Dakong Kausaban!
Sa dili pa mobanos ang Gingharian sa Diyos sa wala-lalisa nga pagmando sa katawhan, kinahanglang mahitabo ang dakong kausaban. Ang maong kausaban magtapos sa nasodnong mga pagbahinbahin. Inay sa daghang nagkabanging tawhanong mga gobyerno, aduna unyay usa ka matarong langitnong kagamhanan nga magahiusa sa katawhan ingong usa ka katawhan nga nagapuyong malinawon. Sa pagtagna niini, ang propetang si Daniel misulat: “Sa mga adlaw nianang mga haria ang Diyos sa langit magatukod sa usa ka gingharian nga dili gayod malaglag. Ug ang gingharian mismo dili igapasa sa uban nga katawhan. Kini magadugmok ug magalaglag niining tanan nga gingharian [tawhanong mga kagamhanan], ug kini mismo mobarog sa panahong walay katinoan.”—Daniel 2:44.
Ang pagmando sa Diyos mao ang bugtong sulbad sa mga suliran sa panggamhanan nga giatubang sa katawhan karong adlawa. Ang kahimtang nga nahimutangan karon sa mga tawo nagapameligro sa ila mismong kinabuhi! Ug walay tinuod tawhanong solusyon. Busa, maalamon ang paghatag pagtagad sa solusyon sa Bibliya ug paglantaw nga masaligon sa panahong duol na sa dihang ang mga tawong matarong ug kasingkasing magkalipay ilalom sa walay-mohagit ug bulahang pagmando pinaagi sa Diyos.
[Hulagway sa panid 6]
“Ang usa ka hari magamando alang sa pagkamatarong mismo”