“Unsay Akong Pagabuhaton Aron Maluwas?”
“UNSAY akong pagabuhaton aron maluwas?” Kining pangutanaha gibangon balik pa sa tuig 50 K.P. sa usa ka magbabantay sa bilanggoan sa Filipos, sa Macedonia. Dihay dakong linog nga nahitabo, ug ang mga ganghaan sa bilanggoan nga iyang gibantayan natangtang. Nagtuo nga nakaeskapo ang mga binilanggo, patyon na unta sa magbabantay sa bilanggoan ang iyang kaugalingon. Apan ang usa sa mga binilanggo, si apostol Pablo, misinggit: “Ayaw buhatig daotan ang imong kaugalingon, kay ania ra kaming tanan!”—Buhat 16:25-30.
Si Pablo ug ang iyang kaubang binilanggo, si Silas, miabot sa Filipos sa pagwali bahin sa kaluwasan, ug sila gibilanggo tungod sa bakak nga sumbong nga gipasaka batok kanila. Mapasalamaton nga wala moeskapo ang mga binilanggo, ang magbabantay sa bilanggoan buot mamati sa balita ni Pablo ug Silas. Unsa may iyang buhaton aron makatagamtam sa kaluwasan nga giwali niining duha ka Kristohanong mga misyonaryo?
Ang mga tawo karong adlawa nagkinahanglan gihapon sa kaluwasan nga giwali ni Pablo ug Silas. Apan, makasubo, gilantaw sa kadaghanan ang butang nga luwas na nga may lalom nga pagduhaduha. Sila nayugot sa pagkamapahitas-on ug pagkamakisapi sa daghan niadtong mga relihiyon kinsa nangangkon nga nagatudlo kanila kon unsaon nga maluwas. Ang uban misibog gikan sa dili-makataronganong emosyonalismo nga maoy kinaiyahan sa daghang ebanghelikal nga mga relihiyon nga nagapasiugda sa ideya sa kaluwasan. Ang Ingles nga magsusulat si Philip Howard miingon nga kining ginatawag nga mga ebanghelisador “nagaatake sa mga emosyon ug sa mga kamot sa nagapirmag-tseke inay sa mga hunahuna sa ilang mamiminaw.”—Itandi ang 2 Pedro 2:2.
Ang uban pa nakurat sa mga kausaban nga nagakahitabo usahay sa mga tawo kinsa nagtuo nga sila nakaeksperyensiya nga “giluwas.” Diha sa ilang librong Snapping, si Flo Conway ug Jim Siegelman naghisgot sa daghang relihiyosong mga eksperyensiya—apil ang pagkahimong “naluwas”—nga nauso sa kataposan sa pipila ka dekada. Sila misulat mahitungod “sa dulom nga bahin” sa maong mga eksperyensiya ug miingon nga ang mga tawo “ginalitik” sa kalit nga kausaban sa personalidad nga napakyas sa paghatag sa gisaad nga katumanan ug kadan-agan apan nagpatungha hinoon ug sayop nga pagtuo, siradong mga hunahuna, ug pagkawalay katakos sa pag-atubang sa kamatuoran. Ang mga awtor midugang: “Atong mabatbat ang palakaw ingong usa ka pagsira sa hunahuna, sa dili-paghunahuna.”
Dili kini mao ang kaso sa dihang nakaeksperyensiya ug kaluwasan ang unang-siglong mga Kristohanon. Ang magbabantay sa bilanggoan nga taga Filipos ‘wala mosira sa iyang hunahuna’ sa dihang gitubag ni apostol Pablo ang iyang pangutana, “Unsay akong pagabuhaton aron maluwas?” Ug si Pablo ug Silas wala mohimog ‘pag-atake sa iyang mga emosyon’ ug wala mangayog dakong pinansiyal nga amot. Hinunoa, “ilang gipahayag ang pulong ni Jehova ngadto kaniya.” Nangatarongan sa tawo, ilang gitabangan siya nga makadangat ug matin-aw nga pagsabot sa mga tagana sa Diyos alang sa kaluwasan.—Buhat 16:32.
“Tumuo Ka Kang Ginoong Jesus”
Gibuksan niadtong Kristohanong mga misyonaryo ang hunahuna sa magbabantay sa bilanggoan ang pundamental nga kamatuoran mahitungod sa kaluwasan. Kadto mao gihapon ang kamatuoran nga gipatin-aw ni apostol Pedro sa dihang unang gitukod ang Kristohanong kongregasyon. Gipunting ni Pedro ang dugokang papel ni Jesu-Kristo maylabot sa kaluwasan, nagtawag kaniya nga “ang Pangulong Ahente sa kinabuhi.” Kadto nga apostol miingon usab: “Walay kaluwasan pinaagi kang bisan kinsa pa nga lain, kay walay bisan unsa pang lain nga ngalan sa silong sa langit nga gikahatag ngadto sa mga tawo nga pinaagi niini maluwas kita.” (Buhat 3:15; 4:12) Si Pablo ug Silas nag-agak sa taga Filipos nga magbabantay sa bilanggoan ngadto niining mao gihapong Ahente alang sa kaluwasan sa dihang sila miingon: “Tumuo ka kang Ginoong Jesus ug maluwas ka.”—Buhat 16:31.
Apan, unsay kahulogan sa pagtuo kang Ginoong Jesus? Nganong wala nay lain pang ngalan apan kang Jesus lamang nga kita maluwas? Ang tanan ba sa ulahi makabaton ug kaluwasan? Ang mga apostoles ba nagtuo sa ideya nga “sa dihang maluwas na, padayon nang luwas”? Kini maoy hinungdanong mga pangutana tungod kay, bisan pa sa kamatuoran nga ang mga pulong ug mga buhat sa daghang modernong mga relihiyonista mikiling sa pagpaubos sa termino, kita nagkinahanglan gihapon ug kaluwasan. Kitang tanan nagkinahanglan ug makatagbaw, makataronganong tubag sa pangutana: “Unsay akong pagabuhaton aron maluwas?”