Ang Pagkabanhaw—Alang Kang Kinsa ug Kanus-a?

KADTO nahitabo sa tuig 32 K.P., sa Betania, diin nagpuyo si Lazaro uban sa iyang duha ka igsoong babaye, si Marta ug Maria. Nagpasugo ang mga igsoong babaye ngadto kang Jesus nga nagmasakiton si Lazaro. Gimahal ni Jesus si Lazaro ug ang iyang mga igsoon, busa Siya mipaingon sa Betania. Diha sa dalan, gipahibalo ni Jesus ang iyang mga disipulo: “Si Lazaro nga atong higala mipahulay, apan moadto ako aron sa pagpukaw kaniya gikan sa paghikatulog.” Ang mga disipulo nagtuo nga ang gipasabot ni Jesus mao ang literal nga katulog. Busa si Jesus yanong miingon: “Si Lazaro namatay.”​—Juan 11:1-15.

Ang mga bisita miabot nga upat na ka adlaw human nga namatay si Lazaro. Sa dihang nakit-an ni Jesus si Maria ug ang uban nga nanghilak, siya “mihilak,” nga nagpakita sa iyang lalom nga gugma ug kaluoy. (Juan 11:17, 35) Ang patayng lawas ni Lazaro gilubong diha sa usa ka langob. Si Jesus misugo nga ang bato nga nagsira sa pultahan sa lubnganan kuhaon. Siya miampo sa iyang Amahan ug dayon misinggit sa makusog: “Lazaro, gumala ka!” Si Lazaro migula. Pagkadakong kalipay matuod ang nahatag niini sa iyang mga igsoong babaye!​—Juan 11:38-45.

Kining hitaboa naghatag matuod nga paglaom sa pagkabanhaw. Apan, sa katibuk-an, ang kamatayon maoy usa ka makalilisang nga kaaway nga nagakuha sa atong mga minahal nga walay palaabuton sa dihadiha nga pagbanhaw kanila ni Jesus. Sama sa atong mahibaloan unya, daghan niining minahal nga mga tawo buotan ug maluluton kaayo. Busa, ang usa ka dayag nga pangutana mobangon . . .

Nganong Mamatay man ang mga Tawo?

Kon gusto kitag usa ka tukma, kasaligang tubag, kinahanglan motan-aw kita ug balik sa sinugdanan sa katawhan diha sa tanaman sa Eden. Gisulayan ang pagkamasinugtanon ni Adan, gisugo siya sa Diyos didto sa dili pagkaon sa bunga sa usa ka kahoy. Kon siya ug si Eva mokaon sa bunga, ang Diyos miingon, sila “mamatay gayod.” (Genesis 2:17) Sa dihang gitintal ni Satanas, sila misupak sa Diyos ug napakyas nianang hinungdanon nga pagsulay. Ang kamatayon misangpot.

Nganong may ingon ka dako nga silot alang sa usa ka daw gamay nga sala? Ang ilang buhat gamay apan ang sala makamatay​—usa ka pag-alsa sa hingpit nga tawo, si Adan ug Eva, batok sa ilang Maglalalang. Sila dili na hingpit, ug gipasa sa Diyos ang silot sa kamatayon. Bisan pa, ang Diyos mihikay alang nianang matarong nga silot nga mabali alang sa mga kaliwat ni Adan. Sa unsang paagi? Si Pablo misulat nga “si Kristo Jesus . . . mihatag sa iyang kaugalingon ingong lukat alang sa tanan.”​—1 Timoteo 2:5, 6; Roma 5:17.

Unsay Kahimtang sa mga Patay?

Upat na ka adlaw nga namatay si Lazaro. Kon ikaw namatay na apan tinuod nga buhi sa kalibotan sa espiritu sa upat ka adlaw ug unya nabanhaw, dili ba nimo gustong mosugilon sa uban bahin niini? Apan si Lazaro walay gisulti nga nabuhi sa ubang dapit. Ang Bibliya nag-ingon: “Mahitungod sa mga minatay, sila dili mahibalo sa bisan unsa.”​—Ecclesiastes 9:5; Salmo 146:3, 4.

Palandonga ang gipasabot niana. Milyonmilyong mga tawo nagtuo sa purgatoryo, bisan pag ang pulong dili makita diha sa Bibliya. Dunay daghan pa ang nagtuo nga dunay nagkalayong impiyerno. Apan, dili ka gani mosunog ug kaaway diha sa kalayo nga walay kataposan. Kon ikaw dili mohimo sa pagbuhat sa maong mabangis nga butang, buhaton ba kini sa atong mahigugmaong Maglalalang pinaagi sa pagpaantos sa mga indibiduwal diha sa impiyernong kalayo? Apan palandonga, palihog, ang makahupay nga pasalig sa Bibliya nga gihisgotan sa ibabaw​—ang patay “dili mahibalo sa bisan unsa.”

Sumala sa Kasulatan, ang gidaghanon niadtong magmando uban kang Kristo sa langit diyutay ra. Gibatbat sila ni Jesus ingong “gamay nga panon.” (Lucas 12:32) Nakita ni apostol Juan “ang Kordero [Jesu-Kristo] nga nagtindog diha sa [langitnong] Bukid sa Sion, ug uban kaniya ang usa ka gatos ug kap-atan ug upat ka libo . . . nga gipalit gikan sa yuta.” (Pinadayag 14:1-3) Nan, kini nagkahulogan nga ang maong mga persona maoy mga tawo kanhi, namatay, ug sa ulahi gibanhaw sa pagpuyo sa langit uban kang Kristo.

Sama sa imong mahanduraw, natabangan ang mga tawo sa pagsabot niining mga kamatuoran sa Bibliya​—nga walay purgatoryo ni nagkalayong impiyerno ug nga dunay paglaom nga ang mga tawong patay pagabanhawon sa langit. Apan, kon kadtong pagabanhawon sa langit diyutay ra, unsay paglaom alang sa uban?

Ang Yutan-ong Pagkabanhaw

Gibuksan o giinagurahan, ni Jesu-Kristo, ang dalan sa pagkahimong mabanhaw sa kinabuhi sa langit. (Hebreohanon 9:24; 10:19, 20) Busa, si Juan Bawtista dili maapil sa langitnong pagkabanhaw tungod kay siya gipatay sa wala pa mamatay si Jesus ug nagbukas sa dalan sa langitnong kinabuhi. Si Jesus miingon: “Wala pay mitungha nga molabaw pa ka dako kay kang Juan Bawtista; apan ang labing gamay diha sa gingharian sa langit dako pa kay kaniya.” (Mateo 11:11) Unsay ganti ang gitagana sa Diyos alang niining matinumanong tawo ug sa uban nga sama kaniya kinsa nangamatay?

Paklia ang inyong Bibliya sa Lucas 23 ug basaha ang mga bersikulo 39 ngadto sa 43. Ang usa sa mga mamumuhat ug daotan kinsa gilansang tapad ni Jesus miingon: “Jesus, hinumdomi ako inig-abot mo sa imong gingharian.” Gipasaligan siya ni Jesus nga siya magauban kaniya sa Paraiso. Kana dili sa langit, apan kini maoy usa ka yutan-ong paraiso, sama niadtong unang Paraiso.

Ang Pagkabanhaw—Usa ka Tuboran sa Paglipay

Kanang tinuod nga Biblikanhong palaabuton makahupay kaayo, sanglit kay kita may katarongan sa paglaom. Ngano? Tungod kay si Jehova gugma. (1 Juan 4:8) Sa dihang iyang gitugotan ang iyang Anak nga mamatay diha sa makauulaw nga kamatayon, ang Diyos sa pagkamatuod nagpakita sa iyang katingalahang hiyas sa gugma. Una pa niana, si Jesus miingon: “Gihigugma pag-ayo sa Diyos ang kalibotan [sa katawhan] nga tungod niana gihatag niya ang iyang bugtong Anak, aron ang tanan nga motuo kaniya dili malaglag kondili makabaton ug kinabuhing walay kataposan.”​—Juan 3:16.

Si Jesus nagpakita usab ug talagsaong gugma sa paghatag sa iyang kinabuhi ingong lukat alang sa nagatuo nga katawhan. Siya mismo miingon: “Ang Anak sa tawo mianhi, dili aron siya pagaalagaron, kondili sa pag-alagad ug sa paghatag sa iyang kalag ingon nga lukat alang sa daghan.”​—Mateo 20:28.

Si Carolann, nga gihisgotan sa unang artikulo nga namatyan ug daghan sa iyang mga minahal diha sa makalilisang nga aksidente, naminhod human niadto. Apan napahalipayan siya sa kasayoran nga kadtong namatayng mga minahal wala mag-antos. Unsay dugang nakatabang kaniya sa pagsagubang? Ang gugma ug tiunay nga mga pahasubo nga gipakita sa iyang espirituwal nga mga igsoon, mga Saksi ni Jehova, nakitang nakatabang ug dako.​—Salmo 34:18.

Ang pag-ampo kang Jehova usab nakatabang ug dako. Daghang gabii nga makamata siya ug nagpalandong nga kadtong tanan maoy usa ka mangil-ad nga damgo, apan ang kamatuoran moigo kaniya. Ang pagpangamuyo kang Jehova makapakalma kaniya, ug dugang pa nga miapresyar siya sa gisulat ni Pablo: “Ayaw kamo pagkabalaka sa bisan unsang butang, hinunoa sa tanang butang ipahibalo ninyo sa Diyos ang inyong mga hangyo pinaagi sa pag-ampo ug sa pagpangamuyo uban sa pagpasalamat; ug ang kalinaw sa Diyos nga lapaw sa tanang pagpanabot magabantay sa inyong mga kasingkasing ug sa inyong mga hunahuna diha kang Kristo Jesus.”​—Filipos 4:6, 7.

Si Shirley maoy laing pananglitan kon unsa ka makapahupay ang paglaom sa pagkabanhaw. Ang iyang batan-ong anak nga lalaki si Riccardo namatay dihadiha sa dihang ang usa ka mabug-at nga semento nahulog diha sa iyang dughan, nga nakasiak sa iyang gamay nga kasingkasing. Human niini nga trahedya, sa Enero 1986, gisultihan ni Shirley ang iyang mga higala: “Kadto sama sa usa ka mangil-ad nga damgo.” Diha sa Katolikong Simbahan siya nakadungog niining mga pulonga: “Pagahukman sa Diyos ang buhi ug ang patay.” Si Shirley misugod sa paghunahuna, ‘Kon hukman sa Diyos ang buhi ug ang mga patay, nan sa unsang paagi mahibaloan sa usa kon asa moadto ang tawo inigkamatay? Ug kon sila atua sa langit, nganong banhawon pa man sila sa ulahi aron pagahukman? Dugang pa, unsaon sa pagbanhaw kanila kon sila buhi sa langit?’ Ang Bibliya wala gayod maghisgot sa pagbanhaw sa mga buhi kondili sa mga patay lamang.

Gipangutana ni Shirley ang iyang bana niining problemaha, sanglit sinati siya sa Bibliya. Sa nasabtan niya ang pipila sa gipamulong sa Kasulatan mahitungod sa ulohan, si Shirley wala na gayod mobalik sa simbahan. Ang usa ka paryenti nga usa sa mga Saksi ni Jehova misugod sa pagtuon sa Bibliya kang Shirley ug sa iyang bana sa Marso 1986, ug wala magdugay sila gibawtismohan. Siya karon mihinapos: “Maanindot gayod kaayo ang pagkahibalo sa kamatuoran, sa pagkahibalo bahin sa pagkabanhaw, ug ang pagkahibalo kon unsa ka kahibulongang persona si Jehova.”

Ang Pagkabanhaw—Kanus-a?

Diha sa panan-awon, si apostol Juan nakakita ug “usa ka dakong panon sa katawhan, nga walay bisan kinsa nga makaihap, gikan sa tanang kanasoran ug kabanayan ug katawhan ug mga pinulongan, nga nanagtindog sa atubangan sa trono ug sa Kordero.” (Pinadayag 7:9) Nga ang dakong panon ‘nagtindog sa atubangan sa trono sa Diyos’ sila gitakda nga magpuyo sa yuta. (Isaias 66:1) Kon ang uban kanila mamatay karon, kanus-a sila pagabanhawon? Ang Bibliya wala mohatag ug petsa, apan mahitabo kini tapos sa nagsingabot nga gubat diin paphaon sa Diyos gikan sa yuta kadtong tanan nga dili-andam sa pagkinabuhi sumala sa iyang matarong nga mga sukdanan. (2 Tesalonica 1:6-9) Kana mao ang mobukas sa dalan sa Adlaw sa Paghukom ug sa pagkabanhaw sa tanan nga giisip sa Diyos nga mahilinya alang sa usa ka yutan-ong pagkabanhaw. (Juan 5:28, 29; Buhat 24:15) Ang katumanan sa tagna sa Bibliya nagpamatuod nga kining kulba-hinam ug katingalahang mga kaugmaran mahitabo sa dili madugay!​—Pinadayag 16:14-16.

Ang mga disipulo ni Jesus kas-a nangutana kaniya: “Unsa may ilhanan sa imong presensiya ug sa konklusyon sa sistema sa mga butang?” Sa pagtubag gihisgotan ni Jesus ang mga gubat, kagutom, mga linog, mga kamatay, ug tibuok-kalibotang pagsangyaw sa maayong balita sa Gingharian.​—Mateo 24:3-14; Lucas 21:7-11.

Kining tagsaong tagna natuman sukad sa 1914, sa dihang misugod ang Gubat sa Kalibotan I. Kini nakapatay ug milyonmilyon ug nakapatunghag kagutom ug kakulangan sa pagkaon diha sa daghang nasod. Ang kahimtang sa kalibotan sa panahon ug human sa Gubat sa Kalibotan II mas grabe pa.

Mahitungod sa mga kamatay, daghan mibati nga ang labing grabeng pananglitan mao ang AIDS. “Ang epidemiya kaylap kaayo ug makamatay sa hilabihan nga ang mga eksperto nagtandi niini sa Itom nga Kamatayon nga mipatay ug un-kuwarto sa populasyon sa Uropa sa ikanapulog-upat ka siglo.”​—Reader’s Digest, Hunyo 1987.

Tungod niining presente nga mga kalisang, pagkakatingalahang hitabo unya ang pagkabanhaw! Kini maoy panahon unya sa dili-matukib nga kalipay sa dihang ang mga pamilyang nabungkag tungod sa kamatayon, sama niadtong kang Carolann ug Shirley, magkauli pag-usab! Sa matin-aw, ang makataronganong dalan alang sa matag usa kanato mao ang paghapsay sa atong kinabuhi karon nga mahasubay sa kabubut-on sa Diyos ug busa takos nga maanaa unya didto sa dihang himoon ang pagkabanhaw.

[Hulagway sa panid 7]

Ang Bibliya nagaingon nga sama sa usa ka kahoy nga tingali pagpaputlon apan manalingsing pag-usab, ang Diyos makabanhaw gikan sa mga patay niadtong anaa sa iyang panumdoman.—Job 14:7-9, 14, 15