Unsay Imong Paglantaw sa Napulo ka Sugo?

GILANTAW sa mga tawo ang Napulo ka Sugo sa Bibliya sa nagkalainlaing paagi. Ang mga Sabadista nag-ingon nga ang Napulo ka Sugo nabugkos sa tanang katawhan. Giisip sa mga Lutherano kini nga mao ang “labing maayong hugpong sa mga balaod nga nahatag nga diha niini ang usa ka indibiduwal makatukod sa iyang kinabuhi.” “Kon sabton sa tukma,” matud pa sa tigpamabang Katoliko, “ang Napulo ka Sugo nagatagana gihapon ug basehanan alang sa Kristohanong pagkinabuhi.”

Busa, samtang ang ubang relihiyosong mga grupo nagtuo nga kinahanglan bug-os natong sundon ang Napulo ka Sugo, gilantaw sila sa uban ingong yanong giya alang sa maayong moral nga paggawi. Sa pagkamatuod, sumala sa Encyclopædia of Religion and Ethics, “hayan walay laing tawhanong dokumento ang nakahatag dakong impluwensiya sa relihiyoso ug sa moral nga kinabuhi kay sa Decalogue [Napulo ka Sugo].” Ngano man kini? Palandonga una ang gipamulong niini. Sila mubo, matugkaron, ug gamhanan. Apan unsa ang angay nimong paglantaw sa Napulo ka Sugo? Unsay kahulogan niini alang kanimo?

[Kahon sa panid 3]

ANG NAPULO KA SUGO

1. Dili ka magbaton ug lain nga mga diyos sa atubangan ko.

2. Dili ka magbuhat ug usa ka larawan nga linilok bisan sa dagway sa bisan unsang butanga nga atua sa itaas sa langit kon dinhi sa ilalom sa yuta kon sa anaa sa tubig sa ilalom sa yuta. Dili ka moyukbo kanila ni magsimba kanila . . .

3. Dili mo paggamiton ang ngalan ni Jehova nga imong Diyos sa pasipala . . .

4. Hinumdoman mo ang adlaw nga igpapahulay ug balaana kini, sa unom ka adlaw makatrabaho ka. . . . Dili ka magbuhat sa bisan unsa, ikaw ni ang imong anak nga lalaki ni ang imong anak nga babaye, ni ang imong sulogoon nga lalaki ni ang imong sulogoon nga babaye ni ang imong kahayopan bisan ang imong dumuloong nga anaa sa sulod sa imong pultahan . . .

5. Tahora ang imong amahan ug ang imong inahan . . .

6. Dili ka magpatay.

7. Dili ka manapaw.

8. Dili ka magpangawat.

9. Dili ka magsaksi ug bakak batok sa imong isigkatawo.

10.Dili ka maibog sa balay sa imong isigkatawo. Dili ka maibog sa asawa sa imong isigkatawo, ni sa iyang sulogoon nga lalaki ni sa iyang sulogoon nga babaye ni sa iyang baka ni sa iyang asno ni sa bisan unsang butang nga iya sa imong isigkatawo.​—Exodo 20:3-17.