‘Malipayon ang mga Nagaantos’

1. Sukad 1914, unsang kahimtang sa yuta ang nagtuman sa Mateo 24:3-8, ug unsang mga pangangkon alang sa Liga sa Kanasoran ug sa Hiniusang Kanasoran ang napakyas?

SA IYANG libro, The Present Age, si Robert Nisbet, naghisgot sa “Kapitoag-Lima ka Tuig nga Gubat nga nagpadayon, nga panagsang nahunong, sukad sa 1914.” Oo, “ang mga gubat ug dinungogdungog sa mga gubat,” apil ang mga gubat sa kalibotan—kana ang gitagna ni Jesu-Kristo alang niining panahon sa kataposan. (Mateo 24:3-8) Ang Liga sa Kanasoran gipatungha niadtong 1920 “aron mapugngan ang gubat sa walay kataposan.” Pagkapakyas intawon niini! Ang Hiniusang Kanasoran giorganisar niadtong 1945 “aron maluwas ang sunod nga mga kaliwatan gikan sa hampak sa gubat.” Apan ang librong Fires All Around the Horizon ni Max Harrelson nagaasoy: “Walay adlaw sukad sa pagkatapos sa Gubat sa Kalibotan II nga walay panag-away sa usa ka dapit.”

2. Unsay gisukna sa pila ka tawo mahitungod sa mga kahimtang sa kalibotan, apan unsang mga pangutana ang angay natong isukna?

² Terorismo ug kabangisan, korapsiyon ug kakabos, mga droga ug mga kamatay—kining tanan nakadugang sa timawang hulagway. Ang pila ka tawo tingali mangutana: ‘Sa unsang paagi maantos sa katawhan kanang samok nga kahimtangan?’ Hinuon, labawng hinungdanon nga kita mangutana: ‘Sa unsang paagi ang Diyos nakaantos sa pagdaot sa iyang yutan-ong kalalangan? Hangtod kanus-a tugotan niya ang mga tawong daotan sa paglaglag sa yuta ug pagpakaulaw sa iyang bililhong ngalan?’

3. (a) Unsang pangutana ang gisukna ni propetang Isaias, ug ngano? (b) Unsang tubag ang gihatag ni Jehova, ug unsay ginapaila niini alang sa atong adlaw?

³ Gipatungha ni propetang Isaias ang susamang pangutana. Siya gitudlo sa pagpahayag ngadto sa iyang isigkalungsoranon sa usa ka mensahe gikan kang Jehova. Apan siya gipasidan-an nga dili sila mamati kaniya o sa Diyos nga nagpadala kaniya. Busa nangutana si Isaias: “Hangtod kanus-a, Oh Jehova?” Oo, hangtod kanus-a nga si Isaias magawali ngadto niadtong gahiang katawhan, ug hangtod kanus-a nga si Jehova magaantos sa ilang makapainsultong paglingoglingog sa iyang mensahe? Mitubag si Jehova: “Hangtod ang mga siyudad mangalumpag, nga walay usa ka pumuluyo, ug ang mga balay walay yutan-ong tawo, ug ang yuta mismo mahimong awaaw.” (Isaias 6:8-11) Susama karong adlawa, ang Diyos nagaantos sa maong mga pakaulaw hangtod sa iyang tinudlong panahon sa pagpahamtang ug paghukom sa kalibotan nga niana ang pangunang tagsala mao ang dili-matinumanong Kakristiyanohan.

4. Unsay sangpotanan sa pagkamainantoson ni Job, ug unsang pasalig ang ginahatag niini kanato karong adlawa?

⁴ Si Jehova dugay nang nagaantos sa mga pagbiaybiay ni Satanas. Mga 3,600 ka tuig nga miagi, ang matinumanong si Job miantos usab, nga nagpanghimakak sa hagit ni Satanas nga siya dili magpabiling matinumanon ilalom sa pagsulay. Nakapalipay gayod kadto sa kasingkasing ni Jehova! (Job 2:6-10; 27:5; Proverbio 27:11) Sumala sa giingon sa igsoon ni Jesus sa inahan nga si Santiago: “Tan-awa! Ginapahayag namo nga malipayon kadtong nagaantos. Nakadungog kamo sa pag-antos ni Job ug nakakita sa sangpotanan nga gihatag ni Jehova, nga si Jehova malumo kaayo sa pagbati ug maluluy-on.” Sa susama, kadtong nagaantos duyog kang Jehova karong adlawa makasalig sa malipayong sangpotanan.—Santiago 5:11.

5. Giunsa pagpakita ni Jesus nga ang pagkamainantoson kinahanglan sa katawhan sa Diyos karong adlawa, ug samtang nagabuhat sa unsang buluhaton nga kinahanglan sila moantos?

⁵ Tin-awng gipakita ni Jesus nga ang pagkamainantoson gikinahanglan sa katawhan sa Diyos sa atong adlaw. Sa pagtagna sa ilhanan sa “konklusyon sa sistema sa mga butang,” siya miingon: “Ang nagaantos hangtod sa kataposan mao ang mamaluwas.” Nagaantos samtang nagabuhat sa unsa? Ang sunod nga mga pulong mismo ni Jesus nagatubag: “Ug kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang kanasoran.” (Mateo 24:3, 13, 14) Sa maong panahon lamang nga ‘moabot ang kataposan.’—Tan-awa usab ang Marcos 13:10, 13; Lucas 21:17-19.

Kon Nganong si Jehova Nagaantos

6. Nganong si Jehova usa ka talagsaong panig-ingnan sa pagkamainantoson, ug unsay usa ka katarongan nga siya nag-antos sa ingon?

⁶ Ang apostol Pablo misaysay nga “ang Diyos, bisan pag may tinguha sa pagpadayag sa iyang kapungot ug pagpaila sa iyang gahom, nagmatinugoton uban ang dakong pailob sa mga sudlanan sa kapungot nga angay sa kalaglagan.” (Roma 9:22) Nganong giantos ni Jehova ang nagapadayong paglungtad sa daotan, kining mga sudlanan sa kapungot? Ang usa ka katarongan mao kini: sa pagpadayag nga ang tawhanong pagmando, nga bulag sa Maglalalang sa tawo, tinong mapakyas. (Jeremias 10:23) Sa dili na madugay, ang pagkasoberano sa Diyos mabayaw samtang pamatud-an niya nga siya lamang ang makapatunghag kalinaw, harmoniya, ug kalipay sa tawhanong pamilya, pinaagi sa Gingharianong pagmando ni Jesus.—Salmo 37:9-11; 45:1, 6, 7.

7. Tungod sa unsang laing katarongan si Jehova nag-antos, ug unsang kaayohan ang gihatag niini sa minilyon sukad sa katuigang 1930?

⁷ Dugang pa, si Jehova nagaantos “aron iyang ikapaila ang kadagaya sa iyang himaya diha sa mga sudlanan sa kaluoy.” (Roma 9:23) Kining mga sudlanan sa kaluoy mao ang nagahupot-sa-integridad nga mga dinihogan nga “gipalit gikan sa katawhan” aron magmando uban kang Kristo Jesus diha sa iyang langitnong Gingharian. Ang pagtimri sa 144,000 nagapadayon sukad sa apostolikanhong panahon. Karon kini hapit nang matapos. (Pinadayag 7:3; 14:1, 4) Ug tan-awa! Sukad sa katuigang 1930 ang nagapadayong pag-antos ni Jehova nagatugot sa pagkatigom sa minilyon pa, “usa ka dakong panon . . . gikan sa tanang kanasoran,” nga nagakalipay sa palaaboton nga makalabang-buhi sa kataposang kasakit aron makapanunod ug kinabuhing walay kataposan sa usa ka paraisong yuta. (Pinadayag 7:4, 9, 10, 13-17) Ikaw ba usa nianang dakong panon? Kon mao, dili ka ba malipay nga si Jehova nagaantos sa presensiya sa mga sudlanan sa kapungot hangtod karon? Bisan pa niana, kinahanglang mopadayon ka sa pag-antos, maingon nga si Jehova nagaantos.

Pagkamainantoson Gantihan

8. Nganong kitang tanan nagkinahanglag pagkamainantoson, ug unsang panig-ingnan sa pagkamainantoson ang angay natong palandongon gayod?

⁸ Kitang tanan nagakinahanglag pagkamainantoson aron madawat nato ang mga gisaad. Tapos sa pagpahayag niining paninugdang kamatuoran sa Hebreohanon 10:36, ang apostol Pablo nagbatbat nga detalyado sa tim-os nga pagtuo ug pagkamainantoson sa usa ka dakong “panganod sa mga saksi” sa karaang panahon. Dayon siya mitambag kanato nga “dalaganon nga mainantoson ang lumba nga gibutang sa atong atubangan, samtang kita nagatutok sa Pangulong Tinugyanan ug Maghihingpit sa atong pagtuo, si Jesus. Tungod sa kalipay nga gibutang sa iyang atubangan,” miantos si Jesus sa bug-os-kasingkasing nga pag-alagad, nga wala gayod mahikalimot sa ganti. Pagkamakapalig-on ang iyang panig-ingnan aron kita moantos usab!—Hebreohanon 12:1, 2.

9. Unsay misangpot gikan sa modernong-adlawng mga panig-ingnan sa pagkamainantoson?

⁹ Ang modernong-adlawng mga panig-ingnan sa pagkamainantoson dagaya usab. Tingali ikaw may nasayran o nailhang mga igsoong lalaki ug mga babaye nga talagsaon ang ilang pagkamainantoson. Nakapadasig gayod kanato ang ilang pagkamatinumanon! Ug kada tuig, samtang ang mga Saksi ni Jehova nagataho sa ilang tibuok-kalibotang kalihokan ngadto sa Watch Tower Society, madawat ang dugang makalipayng mga asoy sa pagkamainantoson ug paghupot sa integridad. Ang tsart sa upat ka panid nga nagauna nagasuma sa talagsaong buluhaton nga nahimo sulod sa 1989 samtang ang maong mga Saksi ‘nagdugang sa ilang pagtuo sa pagkamainantoson.’—2 Pedro 1:5, 6.

Atong Kinalabwang Tuig

10. (a) Pila ka nasod ug kapupud-an ang nakig-ambit sa pagwali sa maayong balita sa Gingharian sa 1989, ug pila ang nakig-ambit sa maong buluhaton? (b) Pila ka payunir ang mitaho sa bulan nga may kinatas-ang ihap, ug pila ang total nga gidaghanon sa oras nga gigugol sa pagsangyaw sa kanataran?

¹⁰ Sumala sa gipadayag sa nag-unang tsart, 212 ka nasod ug kapupud-an ang nakig-ambit sa pagwali sa umaabot nga Gingharian ni Jehova. Minahal nga magbabasa sa Bantayanang Torre, nakapribilehiyo ka ba sa pagkausa sa 3,787,188 nga nakig-ambit sa maong dakong buluhaton? Ikaw ba usa sa 808,184 nga mitaho ingong mga payunir sa bulan nga may kinatas-ang ihap sa maong pag-alagad? Bisan unsa ang imong naamot ngadto sa 1989 tibuok-yutang total nga gidaghanon nga 835,426,538 oras nga nagugol sa pagsangyaw sa kanataran, ikaw may hinungdan sa pagmaya.—Salmo 104:33, 34; Filipos 4:4.

11. (a) Pilay gidaghanon sa tumatambong sa Memorial sa miaging Marso 22 nga maoy usa ka hinungdan sa pagmaya, ug ngano? (b) Pila ang nabawtismohan, ug unsang mga nasod diha sa tsart ang talagsaon niining bahina?

¹¹ Pagmaya, usab, nianang talagsaong total nga 9,479,064 nga tumatambong, sa miaging Marso 22, sa tibuok-kalibotang saulog sa Memoryal sa kamatayon ni Jesus! Kini nagapaila sa potensiyal nga 5,691,876 dugang magmamantala sa Gingharian, kon unta kining interesadong mga karnerohon sa mahigugmaon maagak ngadto sa toril, aron makabatog regular nga bahin sa pag-alagad kang Jehova. Makatabang ba kita kanila niini? (Juan 10:16; Pinadayag 7:9, 15) Daghan ang nagasanong na, sumala sa gipaila sa katibuk-ang total nga 263,855 bag-ong Saksi nga nabawtismohan sulod sa 1989 tuig sa pag-alagad.

12. Unsa ang pila ka bahin nga wala ipadayag sa tsart (a) mahitungod sa mga pabrika sa Watch Tower Society? (b) mahitungod sa napahimutang nga mga magasin ug mga suskrisyon?

¹² Adunay pila ka bahin nga wala ipadayag sa tsart. Ang kauhaw alang sa mga basahon—mga Bibliya, mga libro, mga brosyur, mga magasin—dili matagbaw. Ingong sangpotanan, ang mga pabrika sa Watchtower sa New York migamit ug 25,999 toneladang papel sa pag-imprentag 35,811,000 Bibliya, libro, ug brosyur, usa ka 101-porsientong pag-uswag kay sa 1988. Ang ubang dagkong pabrika sa Watch Tower Society, ilabina sa Alemanya, Italya, ug Hapon, mitrabahog ekstrang mga turno, sa pagsuportar sa “matinumanon ug maalamong ulipon” sa pagpanghatag sa espirituwal nga “pagkaon sa hustong panahon.” (Mateo 24:45) Sulod sa Abril ug Mayo, ang maayo kaayong mga pagpahimutang sa mga magasin ug mga suskrisyon gitaho sa ubay-ubayng mga nasod, uban ang espesyal nga pasiugda sa pagpanagtag sa mga isyu sa Bantayanang Torre bahin sa “Dakong Babilonya.” (Pinadayag 17:5) Walay pagduhaduha, karong umaabot nga Abril, ang aux­iliary nga mga payunir ug ubang mga Saksi magpanon ngadto sa kanataran sa kalibotan diha sa butang mapamatud-an nga kinadak-an natong pagpamatuod sa 1990 tuig sa pag-alagad.—Itandi ang Isaias 40:31; Roma 12:11, 12.

13. Unsang mga nasod ang gilista sa tsart nga wala ilista sa miaging tuig? Isaysay.

¹³ Tan-awa na usab ang tsart. Makita ba nimo ang pila ka nasod nga wala nganli sa miaging tuig? Aw, oo! Sa Hungaria ug Polandia, nga ang atong buluhaton karong bag-o nalegal na. Mapasalamaton kita sa mga awtoridad niining mga nasora nga karon sila nagapakitag konsiderasyon alang sa mga Saksi ni Jehova. Niining bahina, ang mga pag-ampo sa tibuok-kalibotang kapunongan sa mga igsoon gitubag, “aron kita makapadayon sa pagkinabuhi sa malinawon ug mahilomong kinabuhi uban ang bug-os diyosnong debosyon ug kaugdang.”—1 Timoteo 2:1, 2.

14. Ihatag ang pila ka dagkong punto sa “Diyosnong Debosyon” Distritong mga Kombensiyon sa Polandia.

¹⁴ “Diyosnong debosyon”! Aw, ang “Diyosnong Debosyon” Distritong mga Kombensiyon nahimo gani sa Polandia, sa tulo ka dapit, sulod sa Agosto! Pagkamatinagdanon ang atong 91,024 Polakong mga igsoon! (Hebreohanon 13:1, 2, 16) Nga samag milagro, tinagpulo ka libong mga igsoon—mga Czech, Aleman, Ruso, ug uban pa—nakakuhag mga bisa aron motambong nga sakay sa bus, tren, ug bisan magbaktas. Ang linibo pa misakayg ayroplano gikan sa mga Amerika, Kasadpang Uropa, ug sa layo pang kapupud-an sa Pasipiko ug Hapon. Ang dagko kaayong mga estadyum, nga gihinloan pag-ayo sa atong mga igsoon, halos dili pa igo aron makapasulod sa 65,710 sa Chorzów, 40,442 sa Poznan, ug 60,366 sa Warsaw—katibuk-ang gidaghanon sa tumatambong nga 166,518! Sa matag sentro, ang talan-awon sa bawtismo nakapatunghag mga luha sa kalipay. Sa Poznan ang usa ka 9-anyos ug usa ka 90-anyos gibawtismohan, ug ang total nga 6,093 nabawtismohan sa tulo ka kombensiyon nag-apil sa daghang tin-edyer, nga daghan kanila gikan sa mga nasod diin giingong ang relihiyon mapuo na duyog sa mga tigulang. Dili kana tinuod sa matuod nga relihiyon nga gipasukad sa Pulong sa Diyos! (Itandi ang Salmo 148:12, 13; Buhat 2:41; 4:4.) Pagkakahibulongan nga gigantihan ang pagkamainantoson sa atong mga igsoon sa Sidlakang Uropa!

Padayong Pagkamatinumanon Gisulayan

15. Sa unsang paagi gipakita sa mga Saksi sa Lebanon ang pagkamainantoson ug kalig-on, ug uban ang unsang maayong mga resulta?

¹⁵ Sama kang apostol Pablo, ang mga Saksi ni Jehova giawhag nga magpakitag pagkamainantoson ilalom sa daghan ug nagkadaiyang mga kahimtang. (2 Corinto 11:24-27) Sa Lebanon ang gubat sibil nagasilaob. Unsay sanong sa atong mga igsoon? Uban ang kalig-on ug determinasyon. Sa 1989 kusog kaayo ang luthangay ug bombahay, apan bisan sa dapit diin kini labing kusog, ang mga igsoon determinado nga dili maghinayhinay. Ang usa ka kongregasyon sa Beirut mitaho: “Ang regular nga mga grupo alang sa pagsangyaw sa kanataran gihikay sa tanang gabii sa semana. Bisan sa lisod nga mga kondisyon sa seguridad, ang mga igsoon wala maluya. Nasangyawan namo ang mas daghang teritoryo kay sukad masukad. Niadtong Abril nabatonan namo ang kinatas-ang ihap sa gidaghanon sa mga payunir. Nasugdan ang bag-ong mga pagtuon sa Bibliya, ug napahimutang ang mas daghang magasin ug libro.”

16. Sa unsang paagi gipakita sa atong mga igsoon sa Colombia ang pagkamainantoson pinaagi sa pagdala sa maayong balita ngadto sa mga lungsod diin walay mga Saksi?

¹⁶ Ang Colombia nahabalita tungod sa pagbaligyag droga ug sa kabangisan. Apan ang matinumanong pagkamainantoson sa mga Kristohanon didto nahabalita usab. Dili pa dugay, ang temporaryong espesyal nga mga payunir gipadala ngadto sa 31 ka lungsod nga may napulo ka libo o labaw pang pumuluyo diin walay mga Saksi. Sa usa ka lungsod, sa dihang nasayran sa mga tawong bag-o pang interesado nga ang mga payunir moestar lamang didto sa pila ka bulan, nangaliyupo sila nga magpabilin ang mga payunir. Sa lain, 18 ka tawong interesado mipirma sa usa ka sulat sa pasalamat tungod sa espirituwal nga tabang nga gihatag panahon sa tulo ka bulan nga pag-estar sa mga payunir ug nangayog dugang nga tabang. “Seryoso kining buluhatona,” matud nila. Dili na mistil isulti, sa duruha ka kaso gihimo ang kahikayan sa pagpadayon sa pag-ugmad sa interes. Kinahanglag pagkamainantoson ang pag-ugmad sa maong layong teritoryo, apan ang pagkugi sa mga payunir nga naghimo niana dagayang gipanalanginan.

17, 18. (a) Ilalom sa unsang mga kahimtang nag-antos ang mga Saksi ni Jehova sa Italya? (b) Unsa ang kahimtang sa mga Saksi bisan pa sa pagpakaylap sa mga bakak mahitungod kanila?

¹⁷ Sa Italya, ang mga Saksi ni Jehova nagaatubang ug dakong pagsupak sa klero, apan sa kusog ni Jehova sila nagaantos. Sa lainlaing mga parokya, ang klero nanagtag sa mga paskin nga ibutang sa mga pultahan sa mga balay sa ilang mga parokyano nga nagasulti sa mga Saksi ni Jehova nga dili motuplok sa timbrehan sa pultahan. Daghang pari ang nanguhag mga batang lalaki aron ibutang ang maong mga paskin sa tanang pultahan sa usa ka dapit—bisan sa mga balay sa mga pamilyang Saksi! Bisan pa niana, ang mga Saksi dili daling mahulga, ug kasagarang gamiton nila ang mga paskin aron masugdan ang estoryahay. Dugang pa, gihisgotan kana pag-ayo sa mantalaan ug sa nasyonal telebisyon, nga nagsaway sa relihiyosong pagkapanatiko nga gipakita ug nagpasiugdang ang maong mga taktikang sama niini ilhanan gayod sa kahuyang sa simbahan. Nasuko kaayo ang usa ka propesor sa unibersidad sa gilantugiang kontra-Saksing mga paskin nga siya misuskribir ngadto sa Ang Bantayanang Torre ug Pagmata!

¹⁸ Ang Iglesya Katolika sa Italya migamit pag mga apostata sa pagpakaylap ug mga bakak mahitungod sa katawhan ni Jehova, apan kini wala usab mosaler kay ang 172,382 ka magmamantala ilado ug tinahod. Usa ka lalaki nagsulti sa miduawng mga Saksi nga siya nakabasa nag daotang mga butang mahitungod kanamo diha sa mga basahong gisulat sa mga kanhi-Saksi. Busa, siya supak kaayo sa dihang ang iyang igsoong lalaki nahimong Saksi ni Jehova. Ugaling, sa wala madugay namatikdan niya ang maayong epekto sa pagbalhig relihiyon sa iyang igsoon diha kaniya. Siya naghunahuna: ‘Unsaon pagkaposible nga ang butang daotan kaayo magpatunghag maayong mga resulta?’ Busa, siya nangayog pagtuon sa Bibliya sa miduawng mga Saksi.—Itandi ang Colosas 3:8-10.

Pagsagubang sa Pagkadili-Matinagdanon

19, 20. (a) Unsang kahimtang ang nagkinahanglag pagkamainantoson sa bahin sa mga Saksi sa Pinlandia, ug unsa gayod ang kahulogan sa usa ka surbi sa simbahan? (b) Unsang kasinatian ang nagailustrar sa kahinungdanon sa pagkamainantoson sa pagwali sa maayong balita?

¹⁹ Sa mga nasod diin ang mga Saksi subsob nagaduaw, kasagarang may kaylap nga pagkadili-matinagdanon sa maayong balita. Kini mao gayod ang kahimtang sa Pinlandia. Ang simbahan nianang nasora mihimog usa ka surbi ug nakadiskobreng 70 porsiento sa populasyon dili moangay nga ang mga Saksi magaduaw sa ilang mga balay. Bisan pa niana, 30 porsiento wala kaayo mosupak, ug kanila, 4 porsiento ang miingon nga nakaangay gayod sila sa mga Saksi ni Jehova. Kini makahuloganong numero. Upat ka porsiento sa populasyon sa Pinlandia maoy 200,000 ka tawo. Itandi kana sa gidaghanon sa magmamantala karon nga 17,303!

²⁰ Giawhag sa pagtagad sa usa ka magmamantala nga nagsangyaw ang maong surbi ug gisukna: “Wala ka ba mahibalo nga 70 porsiento kanamo nagaisip kaninyo nga dili-tilinguhaon? Nganong magbalikbalik man kamo sa pag-anhi sa among mga pultahan?” Mitubag ang magmamantala: “Oo, apan ang maong pagtuon mismo mipakita nga 4 porsiento kaninyo ang moangay kanamo. Kami naningkamot sa pagkaplag nianang mga tawhana. Bisan pag may 1 porsiento lamang, kami mamabalay-balay gihapon sa pagsingkamot sa pagkaplag kanila.” Ang tagbalay naghunahuna sa makadiyut ug miingon: “Ang inyo bang mensahe ingon ka bililhon alang kanila?” Ang magmamantala mitubag pinaagi sa pagsukna: “Gusto ba nimong makadungog niana?” Sa wala madugay kining tagbalaya nagpakitag interes sa maayong balita.

Kon Unsay Umaabot

21. (a) Unsang matang sa bugno ang kinahanglan natong bugnoon niining sistemaha, ug ngano? (b) Unsa ba ang tingali kinahanglan natong antoson, ug unsay gipasalig kanato sa tagna ni Habakuk?

²¹ Komosta ba kitang tanan karong adlawa? Kita ba determinadong moantos uban kang Jehova ug kang Kristo Jesus hangtod sa kataposan? Tingali kana dili na kaayo dugay, apan kinahanglang moantos kita! Sa sistema ni Satanas, kinahanglang kita makigbugno sa dakong bugno alang sa pagtuo, kay ang imoralidad, korapsiyon, ug mga dinumtanay nagalibot kanato sa tanang kiliran. (Judas 3, 20, 21) Tingali kinahanglang antoson nato ang paglutos sa usa o laing matang. Bisan karon, linibo sa atong mga igsoon ang nagaantos sulod sa mga prisohan, ug ang pipila kanila mabangisong gidagmalan. Kini sila mapasalamaton tungod sa atong mga pag-ampo. (2 Tesalonica 3:1, 2) Sa duol na kaayo, ang sistema karon mawala na! Sumala sa ginaingon ni Habakuk: “Ang panan-awon maoy alang sa tinudlong anahon, ug kini nagadali sa kataposan, ug kini dili magbakak. Bisan pag malangan kini, paabota kini; kay kini mamatuman gayod. Kini dili maulahi.”—Habakuk 2:3.

22. Unsang sangpotanan ang atong masaligong madahom kon atong ipakita ang pailob sa mga propeta ug pagkamainantoson ni Job?

²² Ang tinun-ang si Santiago mahigugmaong nagasulti kanato: “Mga igsoon, kuhaig sumbanan ang pag-antos sa daotan ug pagpailob ang mga propeta, nga namulong diha sa ngalan ni Jehova.” Kita karong adlawa nga nagasulti diha sa ngalan ni Jehova mamahimong mga maghuhupot-sa-integridad panahon sa mapait nga mga pagsulay, sama kang Isaias, Jeremias, Daniel, ug uban pa. Sama kang Job, kita makaantos. Pagkakahibulongan nga siya gigantihan tungod sa iyang pagkamainantoson! Ang kaluoy ug mahigugmaong-kalulot ni Jehova maghatag kanatog susamang mga ganti—kon kita moantos hangtod sa kataposan. Ug hinaot ang mga pulong ni Santiago matuman alang sa matag usa kanato: “Tan-awa! Ginapahayag namo nga malipayon ang mga nagaantos.”—Santiago 5:10, 11; Job 42:10-13.

Unsay Imong Tubag?

◻ Unsang panginahanglan sa pagkamainantoson ang gipasiugda ni Jesus?

◻ Tungod sa unsang mga katarongan si Jehova nag-antos?

◻ Unsa ang pila ka dagkong punto sa dakong buluhatong nahimo sulod sa 1989?

◻ Sa unsang paagi gigantihan ang pagkamainantoson sa atong mga igsoon sa Polandia?

◻ Sa unsang paagi ang mga Saksi sa Lebanon, Colombia, ug Italya nagpakitag pagkamatinumanon ilalom sa pagsulay?

[Chart sa panid 20-23]

1990 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN

(Tan-awa ang tomo)