Kinsay Motultol sa Katawhan Ngadto sa Pakigdait?

ANG kamatuorang ang mga tawo dili makapatunghag pakigdait nagkahulogan bang dili gayod kita makakitag pakigdait? Dili. Maingon nga si Satanas, kinsa labawng gamhanan kay kanato, mao ang kinalabwang babag sa pakigdait sa yuta, mao nga adunay Usa nga labi pang gamhanan kay kang Satanas nga sa kataposan motultol sa katawhan ngadto sa pakigdait. Ang Bibliya, nga nagahisgot bahin kang Satanas, nagahisgot usab bahin niining Usa. Kini nagaingon: “Ang prinsipinhong pagmando mahipatong sa iyang abaga. Ug ang iyang ngalan pagatawgon nga Kahibulongang Magtatambag, Diyos nga Gamhanan, Amahan nga Walay Kataposan, Prinsipe sa Pakigdait.” (Isaias 9:6, 7) Kinsa ba kining Prinsipe sa Pakigdait? Walay lain kondili mao si Jesu-Kristo, ug siya makapatunghag pakigdait tungod kay siya labaw pang kuwalipikado kay kanato. Sa unsang mga paagi?

Labaw kay sa Tawhanong mga Kuwalipikasyon

Sa usa ka butang, si Jesus dili mortal, nga nailalom sa kamatayon. Tinuod, siya nagkinabuhi ingong tawo ug namatay sa haladnong kamatayon. Apan unya siya gibanhaw ngadto sa dili-mamatay langitnong kinabuhi, ug maoy sa maong kahimtang nga siya nahimong ang Prinsipe sa Pakigdait. Kana ang hinungdang ang usa ka tagna nagaingon: “Walay kataposan ang iyang gingharian.” (Lucas 1:32, 33) Lahi sa Oriental nga emperador nga si Aśoka, si Jesus mabuhing walay kataposan sa pagtino nga ang iyang maayong buhat dili daoton sa ubos nga mga manununod.

Dugang pa, si Jesus wala mabulingi sa sala. Ang iyang pagmando gibase sa diyosnong kaalam ug sa matarong nga mga prinsipyo. Ang propetang Isaias mitagna: “Diha kaniya ang espiritu ni Jehova kinahanglang mahiluna, ang espiritu sa kaalam ug pagsabot, ang espiritu sa tambag ug kagahom, ang espiritu sa kahibalo ug ang pagkahadlok kang Jehova . . . Siya dili magahukom sumala lamang sa makita sa iyang mga mata, ni magabadlong sumala lamang sa butang nadungog sa iyang mga igdulongog. Ug uban sa pagkamatarong siya magahukom sa mga timawa.” (Isaias 11:2-4) Lahi sa mga Uropanhon sa miaging panahon, dili preserbahon ni Jesus ang pakigdait sa kaugalingong nasod nga unya makiggubat diha sa langyawng mga nasod. Ilalom niya, ang pakigdait maoy tibuok nga kalibotan.

Dugang pa, si Jesus may gahom sa pagpatunghag pakigdait. Ang tagna nagaingon: “Ang espiritu ni Jehova . . . , ang espiritu sa tambag ug sa kagahom,” anaa kaniya. Kining espirituha maoy nagpaluyo sa paglalang sa uniberso ingon man sa tanang gamhanang buhat sa pagkamatarong nga gitaho diha sa Bibliya. Bisan ang dakong magsusupak, si Satanas, walay mga hinagiban nga malamposong makabuntog sa gahom sa espiritu sa Diyos.

Ang mga Lakang Ngadto sa Pakigdait

Sa unsang paagi si Jesus motultol sa katawhan ngadto sa pakigdait? Basin matingala ka sa pagkasayod nga siya nakasugod na. Sa matagnaong basahon sa Pinadayag, si Jesus makitang nagdawat sa pagkahari gikan sa Diyos sa usa ka langitnong Gingharian. (Pinadayag 11:15) Kon susihon nato pag-ayo ang mga tagna sa Bibliya ug itandi kana sa mga panghitabo sa atong siglo, atong makita nga ang paglingkod ni Jesus ingong Hari nahitabo sa langit niadtong 1914. (Mateo 24:3-42) Kadto usa ka dakong lakang sa pagpatunghag pakigdait sa yuta.

Apan, kon kana matuod nganong misilaob ang Gubat sa Kalibotan I niadtong 1914? Ug nganong ang atong siglo nakakitag daotan pang mga gubat kay sa uban sa kasaysayan? Kay ang unang lihok sa langitnong Hari mao ang pagpalagpot kang Satanas sa tanang panahon gikan sa mga langit ug pagtambog kaniya nganhi sa silinganan sa yuta. Ang sangpotanan? Ang tagna nagaingon: “Alaot ang yuta ug ang dagat, tungod kay ang Yawa nanaog nganha kaninyo, nga may dakong kapungot, kay nahibalo nga siya adunay hamubong panahon na lamang.” (Pinadayag 12:7-12) Ang dagkong mga gubat sa atong siglo nahilangkit sa kasuko ni Satanas. Apan matikdi: Ang kasuko ni Satanas maoy alang sa “hamubong panahon.” Ang krisis sa dili madugay matapos na!

Hinuon, una pa niini ang Prinsipe sa Pakigdait nagahimog dugang hinungdanong mga pagpangandam alang sa pakigdait. Sa sinugdan, ang katawhan kinahanglang masayod sa katuyoan sa Diyos sa pagpatunghag pakigdait pinaagi kang Kristo. Nahiangay niini, si Jesus mitagna nga sa atong panahon “kining maayong balita sa gingharian igawali sa tibuok gipuy-an nga yuta alang sa usa ka pamatuod sa tanang nasod.” (Mateo 24:14) Ingong katumanan niini, ang maayong balita ginawali karong adlawa sa mga Saksi ni Jehova sa tanang suok sa kalibotan.

Dayon, ang mga tawong matarong ug kasingkasing kinahanglang maedukar diha sa mga dalan sa pakigdait. Ang Bibliya nagasaad: “Ang tanan mong mga anak mao unyay mga tawo nga pagatudloan ni Jehova, ug ang pakigdait sa imong mga anak modagaya.” (Isaias 54:13) Ang minilyong mga tawo nga matarong ug kasingkasing nagadawat niining edukasyona bisan karon.

Ang Sunod nga Lakang

Hapit na ang panahon karon alang sa laing mahukmanong lakang sa palakaw sa pagdinaitay. Unsa ba kana? Usa ka lakang nga nailhan sa daghan apan pipila ra ang nasayod sa tinuod nga katuyoan. Ang Bibliya nagatawag niini “ang gubat sa dakong adlaw sa Diyos nga Gamhanan sa Tanan,” o Armageddon. (Pinadayag 16:14, 16) Daghan ang nagahunahuna nga ang Armageddon maoy usa ka nukleyar nga gubat nga molaglag sa sibilisasyon. Sa kasukwahi, kini maoy usa ka direktang lihok ni Jesus, ang Prinsipe sa Pakigdait, sa pagpahinabo sa mga butang nga hinungdanon sa pakigdait.

Nahauna, ang Armageddon magawagtang sa tanang tawhanong babag sa pakigdait. Ang tagna sa Salmo 37:10 nagaingon: “Makadiyut na lamang, ug ang daotan mawala na; ug pagasusihon mo gayod ang iyang dapit, ug siya mawala na.” Oo, pagawagtangon ni Jesus “ang usang daotan”—ang mga tiggubat, ang mga kriminal, ang mga terorista, ingon man ang tanan nga dili modawat sa dakong Prinsipe sa Pakigdait—gikan sa yutan-ong talan-awon. Wala na silay dugang katungod sa pagpadayon sa pagpuyo niining planetaha.—Pinadayag 19:19-21.

Ikaduha, sa Armageddon kining tagnaa ni Daniel mamatuman: “Sa mga adlaw niadtong mga haria ang Diyos sa langit magatukod sa usa ka gingharian nga dili gayod malaglag. Ug ang gingharian mismo dili igahatag ngadto sa laing katawhan. Kini magadugmok ug magalaglag niining tanang gingharian, ug kini mismo mobarog sa mga panahong walay katinoan.” (Daniel 2:44) Ang nasodnong mga dibisyon nga subsob kaayong misangpot sa gubat pagahanawon. Sa kataposan, aduna unyay usa ka kagamhanan sa kalibotan ilalom sa usa ka magmamando nga atong kasaligan!

Kanus-a moabot ang Armageddon? Ang Bibliya walay ginaingon. Apan ang mga hitabo sa kalibotan ingong katumanan sa tagna nagapaila nga kini haduol na kaayo. Ang Bibliya tin-awng nagatagna sa usa ka hitabo nga maoy usa ka pasiuna niana. Si apostol Pablo nagaingon: “Sa dihang sila magaingon: ‘Pakigdait ug kasegurohan!’ una ang kalit nga kalaglagan modangat kanila.” (1 Tesalonica 5:3) Unya, pagkatapos gayod sa kalit nga kalaglagan nga mosangko sa Armageddon, ang labing dakong babag sa pakigdait pagahanawon na. Ang “hamubong panahon” ni Satanas matapos na unya, ug siya mahibutang sa usa ka kahimtang diin siya dili na makapahinabog kasamok dinhi sa yuta. (Pinadayag 20:1-3) Pagkadakong kahupayan!

Usa ka Kalibotan nga May Pakigdait

Handurawa ang kahimtang sa maong panahon. Ang salmista mitagna: “Ang mga maaghop magapanunod sa yuta, ug sila makakaplag sa ilang tumang kalipay sa kadagaya sa pakigdait.” (Salmo 37:11) Ang maong mga maaghop mopadayon sa pagtuman sa matahom nga tagna ni Isaias: “Ilang pagasalsalon ang ilang mga espada ngadto sa mga punta sa daro ug ang ilang mga bangkaw ngadto sa mga galab. Ang nasod dili na mobakyaw ug espada batok sa nasod, ni sila makakat-on pa sa gubat.”—Isaias 2:4.

Sa kataposan, sa unang panahon sukad sa Eden, ang tanang buhing tawo makatagamtam sa panalangin ni Jehova nga Diyos, ug iyang pagatumanon ang iyang saad: “Tan-awa! Ang balongbalong sa Diyos magauban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo magauban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.”—Pinadayag 21:3, 4.

Usa ka Lig-ong Paglaom

Nan, kinsay motultol sa katawhan ngadto sa pakigdait? Si Jesu-Kristo, ang tinudlong Prinsipe sa Pakigdait. Kini ba praktikal nga paglaom alang kanato karong adlawa? Aw, kon ang mga saad sa Bibliya dili kasaligan, walay tinuod nga paglaom alang sa pakigdait. Ang mga tawo mopadayon sa pag-away ug pagpatyanay sa usag usa nga walay pagkatapos. Apan ang Bibliya maoy kasaligan, ug ang Gingharian sa Diyos ilalom ni Kristo mopatungha sa pakigdait. Kami nagadasig kanimo sa pagpamati sa maayong balita sa Gingharian nga ginadala sa mga Saksi ni Jehova nganha sa inyong balay ug tan-awa kini sa imong kaugalingon. Dayon, sa pag-abot sa panahon, hinaot ikaw mahiapil sa mga maaghop nga magapanunod sa yuta ug magkalipay sa ilang kaugalingon sa kadagaya sa pakigdait.

Ang paglaom sa pakigdait nga gihisgotan niining artikuloha maoy gikan sa Bibliya. Karong adlawa, sa dihang daghan ang dili na motuo sa Bibliya, basin magduda ka kon kaha kining paglaoma maoy praktikal. Ang mga Saksi ni Jehova lig-ong nagtuo nga kini praktikal. Sila nagadawat sa Bibliya ingong dinasig nga Pulong sa Diyos, busa sa bug-os kasaligan. Sa 1989 gipatik nila ang usa ka basahong nag-ulohang Ang Bibliya—Pulong sa Diyos o sa Tawo? nga nagpadayag sa daghang pamatuod niining kamatuorana. Ang pipila sa impormasyon nianang basahona gihisgotan sa mosunod duha ka artikulo, nga ginadapit ka namo sa pagbasa.

Ang dugang impormasyon bahin sa saad sa Bibliya nga pakigdait mopatim-aw diha sa artikulong “Pakigdait sa Kalibotan—Unsay Tinuod nga Kahulogan Niini?” nga igapatik sa Abril 15, 1990, isyu sa Bantayanang Torre.

[Blurb sa panid 8]

Si Jesus lamang ang may mga kuwalipikasyon sa pagtultol sa katawhan ngadto sa pakigdait

[Blurb sa panid 9]

Karong adlawa, ang maayong balita sa Gingharian ginawali sa tanang suok sa kalibotan