Kaluwasan Haduol na Alang sa mga Tawong May Diyosnong Debosyon!
“Si Jehova mahibalong moluwas sa mga tawong may diyosnong debosyon gikan sa pagsulay, apan nagatagana sa mga tawong dili-matarong alang sa adlaw sa paghukom aron pagalaglagon.”—2 PEDRO 2:9.
1. (a) Unsang makapasubong kahimtang ang giatubang sa katawhan sa atong adlaw? (b) Tungod niini, unsang mga pangutana ang angay natong tagdon?
ANG mga suliran sa kinabuhi nagadugang alang sa tanang katawhan. Matuod kini bisan kon ang tawo nagpuyo sa lugar diin daghan ang materyal nga mga butang o kon nagpuyo sa lugar nga kini nagkulang. Ang pagkawalay kasegurohan naglungtad bisan asa. Daw kulang pa ang ekonomikanhong kalisod nga pagakabalak-an, ang seryosong mga suliran sa palibot nagaatake sa planetang Yuta, nagahulga sa tanang kinabuhi diha niana. Ang balatian kaylap. Ang mananakod nga mga sakit, ang mga sakit sa kasingkasing, ug ang hampak sa kanser nakapatay ug daghan. Ang imoralidad nagahatag dakong kagun-oban sa tawhanong mga emosyon ug sa pamilyahanong kinabuhi. Dili lamang kana, ang kalibotan gisanapan sa kabangisan. Tungod sa ginaatubang sa tawhanong katilingban, kita sa realistikanhon makapangutana: May igo bang pasukaranan sa paglaom ug sayo nga kaluwasan? Kon mao, sa unsang paagi kini moabot, ug alang kang kinsa?—Itandi ang Habacuc 1:2; 2:1-3.
2, 3. (a) Nganong makapalig-on kanato karong adlawa ang gipamulong sa 2 Pedro 2:9? (b) Unsang espisipikong mga buhat sa pagluwas ang gihisgotan sa Bibliya ingong usa ka pasikaranan sa pagdasig?
2 Ang nagakahitabo sa atong adlaw nagpahinumdom kanato sa pipila ka hinungdanong panahon sa tawhanong kasaysayan. Ang apostol Pablo mikuha sa pagtagad sa mga buhat sa kaluwasan nga gihimo sa Diyos niadtong mga higayona ug dayon midangat niining makapalig-ong konklusyon: “Si Jehova mahibalong moluwas sa mga tawong may diyosnong debosyon gikan sa pagsulay.” (2 Pedro 2:9) Matikdi ang konteksto nianang pulonga, diha sa 2 Pedro 2:4-10:
3 “Sa pagkamatuod kon ang mga manulonda wala pasayloa sa Diyos sa diha nga sila nakasala, apan, nagtambog kanila ngadto sa Tartaro, nagbalhog kanila sa halalom nga mga bung-aw sa kangitngitan nga gitagana alang sa paghukom; ug kon siya wala magpasaylo sa karaang kalibotan, apan naghupot kang Noe, nga usa ka magwawali sa pagkamatarong, nga luwas kauban sa pito ka tawo sa diha nga gipalunopan niya ang kalibotan sa mga tawong dili diyosnon; ug sa gihimo nga abo ang mga siyudad sa Sodoma ug Gomorra iyang gihukman sila sa pagkalaglag, gihimo sila nga panig-ingnan sa mahitabo unya sa mga tawong dili-diyosnon; ug iyang giluwas ang matarong nga si Lot, nga naguol uyamot tungod sa pagpatuyang sa mga tawong malinapason sa kasugoan sa haluag nga paggawi—kay ang mga nakita ug nadungog sa matarong nga tawo sa nagpuyo siya uban kanila sa adlaw-adlaw nakapasakit sa iyang matarong nga kalag tungod sa ilang daotang mga buhat—si Jehova mahibalong moluwas sa mga tawong may diyosnong debosyon gikan sa pagsulay, ug sa pagtagana sa mga tawong daotan alang sa adlaw sa paghukom aron pagaputlon, labi na gayod sila nga nagapahiuyon sa makapahugawng pangibog sa unod ug nagatamay sa langitnong pagmando.” Sumala sa gipakita niana nga mga kasulatan, ang nahitabo sa adlaw ni Noe ug sa panahon ni Lot punog kahulogan alang kanato.
Ang Espiritu nga Kaylap sa mga Adlaw ni Noe
4. Sa mga adlaw ni Noe, nganong gilantaw sa Diyos ang yuta nga nadaot? (Salmo 11:5)
4 Ang makasaysayanhong asoy sa Genesis kapitulo 6 nagpahibalo kanato nga sa mga adlaw ni Noe ang yuta nadaot sa panan-aw sa matuod nga Diyos. Ngano? Tungod sa kabangisan. Kini dili maoy talagsang mga kaso lamang sa mabangis nga krimen. Ang Genesis 6:11 nagtaho nga ang “yuta napuno sa kabangisan.”
5. (a) Unsang tinamdan sa mga tawo ang nakaamot sa kabangisan sa mga adlaw ni Noe? (b) Unsay gipasidaan ni Enoc mahitungod sa pagkadili-diyosnon?
5 Unsay nagpaluyo niana? Ang kasulatan nga gikutlo sa itaas nga gikan sa 2 Pedro naghisgot sa mga tawong dili-diyosnon. Oo, kaylap ang espiritu sa pagkadili-diyosnon sa tawhanong mga kalihokan. Kini naglakip dili lamang sa kawalay pagtagad sa katibuk-an sa kasugoan sa Diyos kondili sa masukolong tinamdan ngadto sa Diyos mismo.a Ug sa dihang ang mga tawo masukihon sa Diyos, malaoman ba nga sila makiglabot nga maluluton sa ilang isigkatawo? Bisan sa wala pa matawo si Noe, kining pagkadili-diyosnon kaylap na kaayo nga tungod niana gipahinabo ni Jehova si Enoc sa pagpanagna mahitungod sa mahitabo. (Judas 14, 15) Ang ilang pagkamasukihon sa Diyos piho nga mosangpot sa pagpakanaog sa balaang paghukom.
6, 7. Unsa ang situwasyon diin nalangkit ang mga manulonda nga nahimong dakong hinungdan sa daotang mga kahimtang nga miugmad sa wala pa ang Lunop?
6 Dihay laing impluwensiya usab nga nakaamot sa kabangisan niadtong mga adlawa. Ang Genesis 6:1, 2 nagpunting sa pagtagad niana sa dihang kini miingon: “Ug nahitabo sa misugod pagdaghan ang mga tawo sa ibabaw sa yuta ug may nangatawo kanila nga mga anak nga babaye, unya ang mga anak sa matuod nga Diyos misugod sa pagkamatikod sa mga anak nga babaye sa mga tawo, nga sila mga maanyag; ug sila nangasawa sa tanan nilang napili.” Kinsa kadtong mga anak sa matuod nga Diyos? Dili yanong mga tawo. Ang kalalakin-an sa kasiglohan nakamatikod na sa maanyag nga mga babaye ug nagapangasawa kanila. Kining mga anak sa Diyos maoy mga manulonda kinsa nagmateryalisar. Diha sa Judas 6, sila gihubit ingong “mga manulonda nga wala magpabilin sa ilang orihinal nga nahimutangan apan mingbiya sa ilang tukmang pinuy-anan.”—Itandi ang 1 Pedro 3:19, 20.
7 Sa dihang kining labaw-tawhanong mga linalang nga nagmateryalisar ingong mga lalaki nakigrelasyon uban sa anak nga mga babaye sa mga tawo, unsa may resulta? “Dihay mga Nephilim sa yuta niadtong mga adlawa, ug sa human usab niini, sa dihang ang mga anak sa matuod nga Diyos nagpadayon sa pakigrelasyon uban sa anak nga mga babaye sa mga tawo ug nanganak ug mga anak kanila, sila maoy mga tawong kusgan sa karaang panahon, mga tawong bantogan.” Oo, ang mga anak sa dili-natural nga kaminyoon mao ang Nephilim, mga gamhanan nga migamit sa ilang labaw nga gahom sa pagdaogdaog sa uban.—Genesis 6:4.
8. Unsay reaksiyon ni Jehova sa daotang mga kahimtang sa yuta?
8 Unsa ba gayod ka daotan ang kahimtang? Kadto miabot sa punto nga “nakita ni Jehova nga ang pagkadaotan sa tawo sa yuta dako ug ang tanang pagpalandong sa iyang kasingkasing lunlon mga kadaotan lamang.” Unsay reaksiyon sa Diyos niini? “Si Jehova nagbasol nga gibuhat niya ang tawo sa yuta, ug nakapasubo kini kaniya sa iyang kasingkasing.” Kini wala magpasabot nga gibati sa Diyos nga siya nasayop sa dihang iyang gilalang ang katawhan. Hinunoa, siya nagbasol nga human nga iyang gihimo ang katawhan, ang ilang paggawi nahimong daotan kaayo nga siya napugos sa paglaglag kanila.—Genesis 6:5-7.
Ang Dalan nga Motultol sa Kaluwasan
9. (a) Nganong ang Diyos nakiglabot nga may pag-uyon kang Noe? (b) Unsang pasiunang pahibalo ang gihatag sa Diyos kang Noe?
9 Alang kang Noe, siya “nakakaplag ug kahimuot sa mga mata ni Jehova. . . . Si Noe maoy usa ka tawong matarong. Iyang gipamatud-an ang iyang kaugalingon nga walay-ikasaway taliwala sa iyang mga katalirongan. Si Noe nagalakaw uban sa matuod nga Diyos.” (Genesis 6:8, 9) Busa gihatagan ni Jehova si Noe ug pasiuna nga pahibalo nga Iyang ipahinabo ang globonhong lunop ug gisugo siya sa pagtukod ug arka. Ang tanang katawhan, gawas kang Noe ug sa iyang pamilya, laglagon gikan sa nawong sa yuta. Bisan ang mga mananap malaglag, gawas lamang niadtong pipila nga magahawas sa matag usa ka matang nga kinahanglan dalhon ni Noe sa arka.—Genesis 6:13, 14, 17.
10. (a) Unsang pagpangandam ang kinahanglang himoon aron maluwas, ug unsa ka dako kadtong buluhatona? (b) Unsay takos ilhon bahin sa paagi sa pagdumala ni Noe sa iyang buluhaton?
10 Kining abanteng kahibalo naghatag ug mabug-at nga responsabilidad kang Noe. Ang arka kinahanglang tukoron. Pormahon kini sama sa usa ka dakong kaban, nga duolan sa 40,000 kubikong metro ang bug-os nga gidak-on. Si Noe gisugo nga pundohan kini ug pagkaon ug unya tigomon ang mga mananap ug mga langgam, “sa tanang matang sa unod,” aron maluwas. Kadto maoy usa ka buluhaton nga nagkinahanglag katuigan sa pag-andam. Unsay pagsanong ni Noe? Siya “misugod sa pagbuhat sumala sa tanang gisugo sa Diyos kaniya. Iyang gibuhat kana.”—Genesis 6:14-16, 19-22; Hebreohanon 11:7.
11. Mahitungod sa iyang panimalay, unsang dakong responsabilidad ang gipangabaga ni Noe?
11 Samtang gibuhat kadto, migugol usab si Noe ug panahon sa paglig-on sa espirituwalidad sa iyang panimalay. Sila kinanglang panalipdan batok sa pagsunod sa mapintas nga mga dalan ug sa masukihong kinaiya sa mga tawo nga naglibot kanila. Hinungdanon kaayo nga sila dili sobrang magpalinga sa inadlaw-adlaw nga mga kalihokan sa kinabuhi. Ang Diyos may buluhaton alang kanila, ug hinungdanon nga ilang tukoron ang ilang mga kinabuhi diha niana. Nahibalo kita nga ang pamilya ni Noe misanong sa iyang instruksiyon ug gipakig-ambit ang iyang pagtuo tungod kay si Noe, ang iyang asawa, ang ilang tulo ka anak, ug mga asawa sa ilang mga anak—ang tanan walo ka tawo—gihisgotan nga may pag-uyon diha sa Kasulatan.—Genesis 6:18; 1 Pedro 3:20.
12. Sumala sa gipakita sa 2 Pedro 2:5, unsang responsabilidad ang matinumanong gihimo ni Noe?
12 Si Noe adunay lain pa nga responsabilidad—sa pagpasidaan sa umaabot nga Lunop ug sa pagpahibalo kon nganong moabot kana. Tataw nga matinumanon niyang giabaga kana nga responsabilidad, kay siya gihisgotan diha sa Pulong sa Diyos ingon nga “usa sa ka magwawali sa pagkamatarong.”—2 Pedro 2:5.
13. Unsang situwasyon ang giatubang ni Noe samtang iyang giatiman ang iyang hinatag sa Diyos nga buluhaton?
13 Karon palandonga ang mga sirkumstansiya sa pagtuman ni Noe sa buluhaton. Ibutang ang imong kaugalingon sa iyang kahimtang. Kon ikaw si Noe o usa sa iyang pamilya, nalibotan unta ikaw sa kapintasan nga gibuhat sa mga Nephilim ug sa mga tawong dili-diyosnon. Direkta ka unta nga magaatubang sa impluwensiya sa rebelyoso nga mga manulonda. Samtang nagatukod ka sa arka, ikaw mahimong sentro sa pagbiaybiay. Ug sa tuig nga tanan samtang nagapasidaan ka sa umaabot nga Lunop, imong makita nga ang mga tawo okupado kaayo sa ilang inadlaw nga mga kalihokan sa kinabuhi nga “sila wala magpakabana”—sa ato pa, “hangtod nga miabot ang lunop ug gianod silang tanan.”—Mateo 24:39; Lucas 17:26, 27.
Unsay Kahulogan sa Kasinatian ni Noe Alang Kanimo?
14. Nganong kita karong adlawa dili malisdan sa pagsabot sa situwasyon nga giatubang ni Noe ug sa iyang pamilya?
14 Kana nga situwasyon dili kaayo malisod alang sa kadaghanan sa atong mga magbabasa nga handurawon. Nganong dili? Tungod kay ang mga kahimtang sa atong adlaw maoy sama gayod niadtong naglungtad sa mga adlaw ni Noe. Si Jesu-Kristo miingon nga kini malaoman. Diha sa iyang dakong tagna mahitungod sa panahon sa iyang presensiya sa konklusyon sa sistema sa mga butang, si Jesus nagtagna: “Sama sa mga adlaw ni Noe, mao man ang sa presensiya sa Anak sa tawo.”—Mateo 24:37.
15, 16. (a) Unsa ka tinuod nga, sama sa mga adlaw ni Noe, ang yuta karong adlawa napuno sa kabangisan? (b) Unsang partikular nga kabangisan ang ginaantos sa mga alagad ni Jehova?
15 Mao ba gayod kana ang nahitabo? Ang kalibotan ba karong adlawa napuno sa kabangisan? Oo! Kapin sa usa ka gatos ka milyon ka tawo ang nangamatay sa mga gubat niining maong siglo. Ang pipila sa atong mga magbabasa direkta nga nakaeksperyensiya sa epekto niini. Daghan pa ang nahulga sa mga kriminal nga gustong mokuha sa ilang mga salapi o ubang mahalong mga butang. Ug ang mga batan-on naladlad sa kapintasan diha sa tunghaan.
16 Apan, ang mga alagad sa Diyos nakasinatig labaw pa kay sa mga kadaot sa gubat ug kriminal nga kabangisan sa katibuk-an. Sila usab nailalom sa kabangisan tungod kay sila dili bahin sa kalibotan apan nagapaningkamot nga mahimong mga tawong may diyosnong debosyon. (2 Timoteo 3:10-12) Usahay ang maong kapintasan maoy sa porma sa pagtukmod ug sagpa lamang; may mga panahon kini maoy pagdaot sa propidad, pagpamugbog, ug bisan mga pagpatay.—Mateo 24:9.
17. Ang pagkadili-diyosnon ba kaylap karong adlawa? Ipatin-aw.
17 Samtang gibuhat ang maong kapintasan, ang mga tawong dili-diyosnon, usahay, maisog nga mopahayag sa ilang pagyubit sa Diyos. Diha sa usa ka lugar sa Aprika, ang polis miingon: “Amo ang gobyerno. Adtoa ang Diyos, kon aduna, ug hangyoa siya nga moanhi ug motabang kanimo.” Diha sa mga bilanggoan ug mga kampong konsentrasyon, ang mga Saksi ni Jehova nakaatubang sa mga tawong sama kang Baranowsky, sa Sachsenhausen, Alemanya, kinsa mihagit: “Ako nakig-away kang Jehova. Tan-awon nato kon kinsa ang gamhanan, ako o si Jehova.” Wala magdugay, si Baronowsky nagkasakit ug namatay; apan ang uban nagpadayon sa pagpakita sa samang tinamdan. Ang mga opisyales nga mihimo ug mga krusada sa paglutos dili lamang sila ang nagpakita ug pagsukol sa Diyos. Sa tibuok nga kalibotan, ang mga alagad sa Diyos makadungog ug makakitag mga buhat nga nagpadayag nga kadto nga nagahimo niana walay kahadlok sa Diyos diha sa ilang mga kasingkasing.
18. Sa unsang mga paagi nga ang daotang mga espiritu nakadugang sa magubot nga kahimtang sa katawhan?
18 Niining mga adlawa nga sama gayod sa panahon ni Noe, ato usab nga makita ang pagsamok sa daotang mga espiritu. (Pinadayag 12:7-9) Kini nga mga demonyo mao gihapon kadtong mga manulonda nga nagmateryalisar ingong mga tawo ug nakigminyo sa mga anak nga babaye sa mga adlaw ni Noe. Sa dihang miabot ang Lunop, ang ilang mga asawa ug mga anak gilaglag, apan kadtong masupilong mga manulonda napugos sa pagbalik ngadto sa kalibotan sa espiritu. Sila wala nay dapit sa balaang organisasyon ni Jehova apan sila gitugyan ngadto sa Tartaro, usa ka kahimtang sa mabagang kangitngitan, nga wala hatagi ug balaang kahayag. (2 Pedro 2:4, 5) Nagalihok ubos sa pagtultol ni Satanas, nagpadayon sila nga may suod nga kontak sa mga tawhanon ug, bisan pag dili na makamateryalisar, naningkamot sa pagkontrolar sa mga lalaki, babaye, ug bisan mga bata. Ang pipila niini gihimo pinaagi sa mga buhat sa okulto. Gidaldal usab nila ang katawhan nga magpinatyanay ang usa ug usa kanila sa mga paagi nga supak tawhanong pangatarongan. Apan dili lamang kana.
19. (a) Batok kang kinsa sa partikular nga gipunting sa mga demonyo ang ilang pagdumot? (b) Unsay gipaningkamotan sa mga demonyo nga maoy atong buhaton?
19 Ang Bibliya nagpakita nga ang mga demonyo nagapakig-away batok niadtong “nagabantay sa mga kasugoan sa Diyos ug nagpamatuod bahin kang Jesus.” (Pinadayag 12:12, 17) Kanang daotang mga espiritu mao ang pangunang mga tigsulsol sa paglutos sa mga alagad ni Jehova. (Efeso 6:10-13) Ilang gigamit ang tanang nahunahunaang mga paagi aron sa pagdaldal o sa pagdani sa mga tawong matinumanon sa pagbungkag sa ilang pagkamaunongon kang Jehova ug sa paghunong sa pagmantala sa Gingharian ni Jehova uban kang Jesus ingong Mesiyanikong Hari.
20. Sa unsang paagi naningkamot ang mga demonyo sa pagbabag sa mga tawo sa pagbulag gikan sa ilang pagkontrolar? (Santiago 4:7)
20 Ang mga demonyo nanlimbasog sa pagbabag sa mga tawo nga nangandoy ug kagawasan gikan sa ilang malupigong impluwensiya. Ang kanhi espiritista sa Brazil mitaho nga sa dinha nga ang mga Saksi miduaw kaniya sa iyang balay, ang mga tingog sa demonyo nagsugo kaniya nga dili ablihan ang pultahan; apan iyang giablihan kini, ug iyang nakat-onan ang kamatuoran. Diha sa daghang mga dapit ang mga demonyo direktang nagagamit ug espiritista aron pahunongon ang buluhaton sa mga Saksi ni Jehova. Pananglitan, diha sa usa ka balangay sa Suriname, ang mga magsusupak sa mga Saksi ni Jehova mikontak ug espiritista nga inila nga makapatay ug tawo pinaagi lamang sa pagpunting sa iyang mahikong tungkod diha kanila. Uban sa iyang mga magsasayaw ug mga magtatambol, ang espiritista nga may gahom sa demonyo, miatubang sa mga Saksi ni Jehova. Iyang gilitok ang iyang mahikong mga pulong ug gipunting ang iyang tungkod diha kanila. Ang mga tagabalangay nagtuo nga ang mga Saksi mangatumba nga patay, apan ang espiritista hinoon mao ang gikuyapan ug giyangongan sa iyang naulaw nga mga sakop.
21. Sama sa adlaw ni Noe, unsay reaksiyon sa kadaghanang mga tawo sa atong pagsangyaw, ug ngano?
21 Bisan diha sa mga dapit diin ang pangungo ug pamarang dili dayag nga ginahimo, ang matag Saksi ni Jehova nakasinati kon sama sa unsa ang pagsulay sa pagsangyaw sa mga tawong okupado kaayo sa adlaw-adlawng mga kalihokan sa kinabuhi nga dili sila gusto nga masamok. Sama sa mga adlaw ni Noe, ang kadaghanan ‘wala magpakabana.’ (Mateo 24:37-39) Ang uban tingali modayeg sa atong panaghiusa ug mga nahimo. Apan ang atong espirituwal nga buluhaton sa pagpalig-on—nga naglakip ug daghang mga oras sa personal nga pagtuon, regular nga pagtambong sa mga tigom, ug pag-alagad sa kanataran—binuang kining tanan alang kanila. Sila moyubit sa atong pagsalig sa mga saad sa Pulong sa Diyos tungod kay ang ilang mga kinabuhi nahasentro sa materyal nga mga butang ug sa pagtagbaw sa kailibgon nga ilang nabatonan karon.
22, 23. Sa unsang paagi ang mga hitabo sa mga adlaw ni Noe naghatag ug makataronganong pasalig nga luwason ni Jehova ang mga tawong may diyosnong debosyon gikan sa pagsulay?
22 Ang maunongong mga alagad sa Diyos ba padayon nga mailalom sa pag-abuso niadtong walay gugma sa Diyos? Dili gayod! Unsay nahitabo sa mga adlaw ni Noe? Sumala sa pagdumala sa Diyos, si Noe ug ang iyang pamilya misulod ngadto sa natapos nang arka. Dayon, sa tinakdang panahon sa Diyos, “ang tanang mga tuboran sa dagkong kahiladman sa tubig gibuksan ug giablihan ang mga pultahan sa tubig sa langit.” Ang Lunop nagpadayon hangtod nga gisanapan ang mga bukid. (Genesis 7:11, 17-20) Ang mga manulonda nga mibiya sa ilang tukmang pinuy-anan napugos sa paghukas sa ilang tawhanong mga lawas ug mibalik ngadto sa kalibotan sa espiritu. Ang mga Nephilim ug ang tanang nahibilin niadtong kalibotan sa mga tawong dili-diyosnon, lakip niadtong walay pagtagad sa paglihok sa gipasidaan ni Noe, nalaglag. Sa laing bahin, si Noe ug ang iyang asawa ug ang ilang tulo ka anak ug ang mga asawa sa ilang mga anak naluwas. Busa giluwas ni Jehova si Noe ug ang iyang panimalay gikan sa pagsulay nga maunongon nilang giantos sa daghang katuigan.
23 Si Jehova mobuhat ba ug sama niana alang sa mga tawong may diyosnong debosyon karong adlawa? Walay pagduhaduha bahin niana. Iyang gisaad kana, ug siya dili magbakak.—Tito 1:2; 2 Pedro 3:5-7.
[Footnote]
a “Ang anomia maoy kawalay-pagtagad sa, o paglapas sa, mga balaod sa Diyos; ang asebeia [nombreng porma sa pulong nga gihubad ‘mga tawong dili-diyosnon’] maoy samang tinamdan diha sa Persona sa Diyos.”—Vine’s Expository Dictionary of Old and New Testament Words, Tomo 4, panid 170.
Nahinumdom Ka Ba?
◻ Sa unsang paagi gipakita ni Pedro nga si Jehova mahibalong moluwas sa mga tawong may diyosnong debosyon gikan sa pagsulay?
◻ Unsang mga butanga ang nakadugang sa kabangisan sa mga adlaw ni Noe?
◻ Tungod sa umaabot nga tibuok yutang Lunop, unsang responsabilidad ang nabatonan ni Noe?
◻ Unsang katugbang sa mga adlaw ni Noe ang makita nato sa atong panahon?
[Hulagway sa panid 12]
Ang pagtukod sa arka nagkinahanglag daghang katuigan sa kuging pagtrabaho
[Hulagway sa panid 13]
Si Noe migugol ug panahon sa pag-ugmad sa espirituwalidad sa iyang pamilya