“Barog nga Malig-on”—Ayaw Pagpapandol
ANG dakong isyu nga giatubang sa katawhan karon mao ang unibersal nga pagkasoberano. Gidapit kita ni Jehova sa pagbarog niining bahina pinaagi sa pagpasakop sa iyang tinudlong Hari, si Jesu-Kristo. Adunay dinaliang panginahanglan sa pagsanong niini nga pagdapit, ug sa miaging lima lamang ka tuig, kapin sa usa ka milyong mga indibiduwal ang misanong. Apan kining mga tawhana nakakaplag nga labaw pa ang nalangkit diha sa pagbarog kay sa yanong desisyon sa miagi nga moalagad kang Jehova. Kinahanglan adunay tibuok-kinabuhi nga dedikasyon. Makapabilin ba kita sa atong pagbarog kon malisod ang kahimtang? O anam-anam ba kitang mangaluya, human sa unang ‘pagbarog nga malig-on’?—1 Corinto 16:13; Hebreohanon 2:1.
Kon imong nakita nga nalisdan ka sa Kristohanong dalan, kalipayi ang kasayoran nga matuod kana diha kang Jesu-Kristo. Oo, bisan ang bugtong Anak sa Diyos miampo alang sa kusog aron makapabilin sa iyang pagbarog, labi na sa dihang nagsingabot ang iyang labing dako nga pagsulay. Handurawa siya diha sa tanaman sa Gethsemane, nga kinasingkasing nga nag-ampo: “Abba, Amahan, ang tanang mga butang mahimo mo; kuhaa kanako kining kopa. Apan dili sumala sa akong pagbuot, kondili sa imong pagbuot.” (Marcos 14:36) Siya nahibalo nga ang dalan sa unahan malisod. Siya labi pang nahibalo nga maapektohan ang ngalan sa iyang Amahan. Busa, ang bugtong hingpit nga tawo sa yuta wala maulaw sa pagpangayog tabang.
Kon malisod ang mga kahimtang alang kanato, kita nakabaton sa samang tuboran sa kusog nga nabatonan ni Jesus. Kita makaampo kang Jehova alang sa tabang aron dili kita mapandol o mahulog. Apan unsang matanga sa mga kapeligrohan nga tingalig makapandol kanato? Ang pagkahibalo niini ug pagpangandam nga abante hayan makatabang kanato nga makalikay gikan sa pagkapandol.
Ang Paglutos Makapandol Kanato
Ang Bibliya nagpasidaan: “Ang tanan nga nagatinguha sa diyosnong debosyon pagalutoson usab diha kang Kristo Jesus.” (2 Timoteo 3:12) Ang paglutos makapandol kanato, ug kini modangat sa daghang porma. (Marcos 4:17) Tingali kini maoy legal nga mga pagbando—nga nagahatag sa kapeligrohan sa pagkabilanggo ug bisan kamatayon—kapintasan sa mga tawo, makapaluya sa pagtuo nga adlaw-adlaw nga pagsupak sa usa ka determinado, nagasupak nga kapikas, o kanunay nga pagbiaybiay sa mga kauban sa tunghaan. Ang paglutos malisod antuson, apan kita gipasidan-an nga kini mahitabo sa usa ka porma o sa lain. Busa, kita makatukod sa atong pagtuo karon ug sa pagtuon sa pagsalig diha sa kusog ni Jehova aron nga sa dihang moabot ang panahon, kita makalahutay pinaagi niana nga kusog. (1 Pedro 4:13, 14; 5:6-11) Apan, ang mga babag nga makapandol mas malalangon pa kay sa mapintas nga pag-atake sa paglutos.
Mga Kahiubos Makapaluya sa Pagtuo
Kinsay dili makahinumdom sa nagun-ob nga pagbati nga midangat sa bata pa kita ug nahiubos? Mahinumdoman ba nimo ang panahon sa dihang misaad si Papa ug espesyal nga salosalo alang sa pamilya ug unya sa usa ka katarongan nausab ang iyang hunahuna? O sa panahon nga dad-on ka niya sa zoo ug sa kataposang gutlo gikanselar kini? Pagkadako sa imong kahiubos!
Ang edarang mga Kristohanon nahiubos usab, ug kini sa ubang mga kaso mitultol sa espirituwal nga kadaot. Ang pipila nagbutang sa ilang paglaom diha sa usa ka petsa nga segurado nila nga moabot ang Armageddon. Sa dihang walay nahitabo niadtong adlawa, sila nahiubos. Ang uban nahiubos sa dihang ang gilaomang pribilehiyo wala matuman. Dugang pa, ang mga tawo makapahiubos usab. Gisultihan sa usa ka 18-anyos nga dalaga ang iyang mga ginikanan nga siya nahiubos kaayo sa paggawi sa ubang mga batan-on sa kongregasyon—ug sa kapakyasan sa ilang mga ginikanan sa pagdisiplina kanila—nga tungod niana siya dili na gusto nga makiglabot pa bahin sa kamatuoran.
Samtang ang mga kahiubos masabot ilalom niining tanang mga kahimtang, angay bang magpapandol ang mga nahiubos sa ilang relasyon kang Jehova? Handurawa ang kahiubos ni Jesus sa dihang ang iyang mga apostol nagsige ug lalis kon kinsa ang labing dako kanila, busa nagpakita sa ilang ambisyosong kaisipan. (Lucas 9:46; 22:24) Handurawa, usab, ang kahiubos ni Job sa dihang ang tulo ka kauban nga gisabot nga atua didto aron tabangan siya mitalikod kaniya ug misugod sa pagduhaduha sa iyang pagkamatinumanon! (Job 22:5-10) Bisan pa, si Jesus ug Job wala mapandol.
Ang tanang mga tawo mahuyang, busa dili-makataronganon ang pagtugot sa mga kapakyasan sa uban nga makaapekto sa atong relasyon kang Jehova. (Salmo 51:5) Ang pagkadili-hingpit sa uban dili angay makapabuta kanato sa katingalahang buhat nga gihimo ni Jehova samtang iyang gitigom ang “tanang butang pag-usab diha kang Kristo.” (Efeso 1:9, 10) Ibutang sa hunahuna nga ang dili-hingpit, nahulog nga mga tawo sama kanato ang gitigom ni Jehova, mga tawo nga nagkinahanglan ug disiplina ug pagpalunsay aron motubo nga malig-on. (Salmo 130:3) Ang atong kaaway dili mao ang atong dili-hingpit nga Kristohanong igsoon kondili si Satanas, kinsa gustong molamoy kanato kon mahimo. Siya dili molampos kon kita ‘mobarog batok kaniya, malig-on diha sa pagtuo.’ (1 Pedro 5:8, 9) Kon aduna kita nianang pagtuoha, kita dili gayod “mahigawad.”—Roma 9:33.
Pagtunglo sa Kaugalingon Makapukan
Ang uban nawad-an sa ilang relasyon kang Jehova nga Diyos tungod sa pagbati nga dili-takos. Naghunahuna sa ilang kaugalingong mga kahuyangan ug mga kapakyasan, sila mohukom nga dili gayod dawaton ni Jehova ang ilang pag-alagad. Sila mibati nga ang sama kanila nga moangkon ingong usa sa mga Saksi ni Jehova maoy pagminaut. Ingon ka ba niini ka pintas sa imong kaugalingon? Kon mao, angay nimong pakigbisogan ang maong mga pagbati.
Mibati ka bang dili-takos sa pag-alagad kang Jehova? Nan pangutan-a ang imong kaugalingon, ‘Kinsa bay takos niining dako nga pribilehiyo?’ Ang tanang mga Kristohanon nagapakig-away kanunay batok sa ilang kaugalingong mga dili-kahingpitan. Bisan si apostol Pablo nagreklamo: “Sa dihang gusto kong buhaton ang maayo, ang daotan duol kanako.” (Roma 7:21) Maut ba si Pablo tungod kay nakabuhat usahay siya ug mga butang nga dili-maayo? Dili. Ang maut maoy usa ka tawo nga nagapakaaron-ingnon nga dili iyang tinuod nga pagkatawo. Kon kita maningkamot sa pagbuhat kon unsa ang matarong apan masayop usahay, kana ba maoy pagminaut bahin sa usa ka butang? Siyempre dili gayod.
Ang Bibliya nagtambag kanato sa “pagsul-ob sa bag-ong pagkatawo.” (Efeso 4:24) Apan, nagkahulogan ba kana nga nawala nato ang tanang mga paggawi sa daang pagkatawo? Dili. Diha sa iyang sulat ngadto sa mga taga Colosas, si Pablo miingon nga ang bag-ong pagkatawo “ginabag-o” pinaagi sa tukmang kahibalo. (Colosas 3:9, 10) Ang ekspresyon “ginabag-o” nagpasabot ug padayong aksiyon. Busa ang pagbag-o sa atong pagkatawo maoy padayon nga paagi. Nan, dili ikahibulong nga usahay makakita kita ug mga kahuyangan sa atong kaugalingon.
Dili kini, sa pagkamatuod, maoy pagpawalay-bili sa kaseryoso sa sala, ni nagkahulogan kini nga magpadaog kita sa tintasyon nga walay pakig-away, magtuo nga awtomatikong pasayloon kita ni Jehova. Apan makatabang kanato nga dili kita magmakritikal sa walay-katarongan sa atong kaugalingon. Ug kini labi pang makapahigugma kanato kang Jehova tungod kay iyang gitagana ang halad-lukat ni Kristo aron kita makaalagad Kaniya bisan pa sa atong napanunod kinaiyanhong pagkamakasasala.
Mihatag si apostol Juan ug timbang nga hunahuna bahin niining butanga sa dihang siya miingon: “Nagasulat ako kaninyo niining mga butanga aron kamo dili managpakasala.” Apan siya realistikanhong midugang: “Kon may makasala man gayod kaninyo [tungod sa tawhanong pagkadili-hingpit], kita adunay magtatabang uban sa Amahan, si Jesu-Kristo.” (1 Juan 2:1) Inay sobrang hukman ang kaugalingon, kini maoy kahibalo sa atong kahimtang ug ang tabang nga iyang gitagana kanato maoy motultol kanato sa pagpalanog sa mga pulong ni Pablo: “Salamat sa Diyos pinaagi kang Jesu-Kristo nga atong Ginoo!”—Roma 7:25.
Ayaw Pabilin sa Pandol nga Kahimtang
Si Jesus mihatag ug kusganon nga pasidaan sa tanan nga mahimong hinungdan sa pagkapandol: “Ang bisan kinsa nga makapandol sa usa niini nga gagmay nga nagatuo kanako, maayo pa hinoon alang kaniya kon higtan ang iyang liog ug dakong galingan nga bato nga pinatuyok sa asno ug lumsan sa halawod nga dagat.” (Mateo 18:6) Apan unsay ikasulti bahin sa usa nga napandol? Kon kita napandol sa usa ka tawo o sa usa ka sirkumstansiya, mangatarongan ba kita ug moingon, “Buweno, dili kadto akong sayop, busa dili na ako moalagad kang Jehova”?
Palandonga ang usa ka ilustrasyon. Nadalin-as ka na ba diha sa yelo o nahagbong sa hagdanan? Tingali nakuratan ka sa hitabo. Masabot nga imong makita ang imong kaugalingon nga natikay-ang diha sa yuta. Apan unsay imong sunod nga gibuhat? Moingon ka ba: “Dili akong sayop nga natikay-ang ako dinhi. Ang yelo [o ang hagdanan] mao ang nakaingon. Busa dili na ako mobangon pa”? Tingali, ikaw mibangon ug milakaw gikan sa makauulaw nga hitabo sa madali.
Dili ba tinuod kana bahin sa espirituwal nga mga butang? Kon kita nasilo sa usa ka sirkumstansiya o sa kaubang Kristohanon, kana maoy seryosong butang nga kinahanglang atimanon. Apan, kon kita magpabilin sa napandol nga kahimtang, moinsister sa pagpasangil sa laing tawo sa atong problema, dili ba tinuod nga ang atong kahimtang nahimong dugang ug dugang ato rang sayop?
Makalilipay, kon kita mapandol, ang mga ansiano ug ang ubang mga hamtong sa kongregasyon andam kaayong motabang. (Galacia 6:1) Ug si Jehova mismo mohatag ug kusog niadtong nagatinguhang moalagad kaniya bisan sa malisod nga mga kahimtang. (Filipos 4:13) Busa kinahanglang andam kita kanunay nga mangayog tabang kon daw may butang nga mobabag sa atong malig-on nga pagbarog alang kang Jehova ug sa iyang Gingharian. Sa ingon dili nato kahatagan si Satanas ug kadaogan nga magpapandol ug dili mobangon pag-usab.
Hain Ka Nagabarog?
Sa matag adlaw, ginaatubang sa dedikadong mga alagad sa Diyos ang mga isyu nga nagasulay sa ilang debosyon kang Jehova. Bisan unsa pay ilang atubangon, sila kinahanglang magbarog ug magpaisip uban sa kiliran sa Mesiyanikong Hari ni Jehova. Ang gamhanang mga magmamando niining yutaa nagabarog “batok kang Jehova ug batok sa iyang usa nga dinihogan.” Pagkadako sa pribilehiyo ang atong nabatonan sa pagbarog alang kaniya!—Salmo 2:2.
Apan, dili kita makabarog batok sa impluwensiya niining tibuok nga sistema sa kalibotan sa atong kaugalingon, busa kita mapahalipayan sa saad ni Jesus nga magauban diha sa iyang kongregasyon “hangtod sa konklusyon sa sistema sa mga butang.” (Mateo 28:20) Siya magapaluyo kanato. Dugang pa, moabot ang dakong tabang kon kita magpabiling suod kang Jehova ug mangayo kaniya ug tabang. Ang pagdangop sa iyang Pulong mohatag kanato ug kusog. Kon bation nato nga dili na makaantos, ang Salmo 55:22 nagdapit kanato sa ‘pagtugyan sa atong palas-anon kang Jehova, ug siya magasapnay kanato. Dili gayod niya pasagdan ang matarong nga matarog.’ Oo, ang Bibliya nag-awhag sa tanang katawhan sa Diyos nga “magpabiling malig-on sa pagtuo”—dili magpapandol.—1 Corinto 16:13.