Mga Magmamantala sa Gingharian Nagtaho
◻ ANG “dakong paglutos” batok sa sayong Kristohanong kongregasyon nakapatibulaag sa daghang tinun-an ni Kristo. (Buhat 8:1) Bisan pa niana, ang maong paglutos misumbalik kay kadtong natibulaag “misuroy sa yuta nga nagpahayag sa maayong balita sa pulong.” (Buhat 8:4) Si Filipe mipadayon sa pagwali, ug “nga nagkahiusa ang mga panon namati.” (Buhat 8:6) Maingon nga ang paglutos misumbalik sa unang siglo, kana misumbalik usab sa usa ka balangay sa amihanang Thailand.
Ang usa ka espesyal payunir sa mga Saksi ni Jehova misugod sa pagwali sa maong balangay, apan sa sinugdan ang mga tagabalangay wala mamati. Hinunoa, sa nakigsulti siya sa lokal nga magwawali ang mga tawo mitapok aron sa pagpamati. Ang pipila nakaamgo nga ang Saksi mas nahibalo sa Bibliya kay sa ilang ministro, mao nga misugod sila sa pagtuon sa Bibliya uban sa payunir bisan pag ang uban naghasi kanila. Gipatay ang pipila nila ka itik, gibaharang patyon ang payunir, ug ang balay sa usa ka interesadong tawo gisunog. Ang tawo miingon: “Makasunog sila sa akong balay, apan sila dili makasunog sa akong kasingkasing.” Gibisikleta ang layong distansiya sa mga nagtuon sa Bibliya aron makatambong sa mga tigom sa Kingdom Hall. Upat kanila ang nabawtismohan, ug unom pa nagatambong sa mga tigom kauban nila.
Ganti Alang sa Pagkamatinud-anon
◻ Ang mga igsoon sa Zambia nakabatog maayong dungog tungod sa pagkamatinud-anon, ug misangpot kini sa mga panalangin alang kanila, ingon man nakatabang sa uban sa pag-ila sa kamatuoran. Ang usa ka ansiano, kinsa usa ka regular nga payunir, nagsakay sa usa ka bus ug nakadungog sa usa ka Saksing nagsakay sa bus nga nakigsulti sa uban mahitungod sa pagkabanhaw. Nangutana kaniya ang usa ka pasahero: “Nganong kamong mga Saksi nagaangkon nga ang inyong relihiyon mao ang bugtong matuod nga relihiyon?” Ang igsoong lalaki miapil sa kabildohay ug miingon ngadto sa pasahero nga gantihan ni Jehova ang iyang mga Saksi tungod kay sila nagatudlo sa kamatuoran gikan sa Bibliya.
Sa lapas sa tungang gabii sa maong hataas nga biyahe, ang bus nakaabot sa usa ka babag sa dalan. Nag-ulan niadto ug kusog. Usa ka sundalo misulod sa bus ug nangutana kon aduna bay mga Saksi ni Jehova nga nagsakay. Dihay tulo. Unya miingon siya: “Okey, ang mga Saksi magpabiling naglingkod, ang uban manggawas uban sa inyong mga bag.” Ang tanan nga uban nanggawas nga naulanan, ug human sa inspeksiyon, sila mibalik uban sa ilang karga ug nahumod ang ilang sinina.
Balik sa bus, ang sundalo miingon: “Ang hinungdang gipapabilin ko ang mga Saksi mao nga sila mga tawong matinud-anon. Daghan na kamig kasinatian ug nakadiskobre nga sila lamang ang matinud-anon; sa dihang mangutana kami kon unsay anaa sa ilang mga bag, mosulti sila sa tinuod.” Sa paglarga sa bus, ang igsoong lalaki nangutana: “Hain niana ang tinuod nga relihiyon?” Ang usa ka tawo mitubag: “Ang relihiyon nga wala mahumod sa ulan.”
Oo, ang kamatinud-anon nagatabang sa pag-ila sa tinuod nga relihiyon, ug kini tinong may mga ganti!