Mga Talan-awon Gikan sa Yutang Saad

Makakat-on Ka ba Gikan sa mga Panahon?

SI Jehova kausa miingon: ‘Sa tanan nga adlaw nga ania pa ang yuta, ang pagpugas sa binhi ug ang pag-ani, ang ting-adlaw ug ang tingtugnaw, dili moundang.’ (Genesis 8:22) Niana gipasiugda niya ang kapanahonan sa pag-uma.

Unsay nasayran nimo bahin sa kapanahonan ug relasyon niana sa pag-uma? Bisan pag nagapuyo ka sa siyudad o wala mag-uma, ikaw makakat-on gikan sa kapanahonan ug sa mga buluhaton sa pag-uma sa Israel. Ngano? Kay kon mas daghan ang nasayran nimo bahin niini, ikaw mas makasabot sa Pulong sa Diyos.

Ang mga mag-uuma nagadaro sa yuta, nagapugas sa binhi, ug unya nagaani ug nagagiok sa ilang abot. Apan sa pagsabot nga mas tin-aw sa ginapamulong sa Bibliya, angay nga mas daghan pa ang atong masayran, apil ang kon kanus-a nahitabo ang maong mga buluhaton. Tagda pananglitan ang pagdaro, sama sa makita natong ginabuhat ibabaw sa hinagdang yuta sa karaang Judea.a Sa imong hunahuna sa unsang bulan gikuha kining hulagwaya? Ang pagkasayod kon kanus-a ginabuhat ang pagdaro diha sa inyong nasod basin makalimbong kanimo. Ang panahon sa pagdaro sa Amihanang Hemispera dili sama diha sa Habagatang Hemispera; kini lahi usab diha sa lainlaing mga kahabogon ug sumala sa panahon sa ting-ulan.

Kini basin makaapektar kon unsay imong pag-isip sa mga hitabo sa Bibliya. Ikaw basin nakabasa sa pagtudlo ni Elias sa iyang sumusunod: “Iyang . . . nakaplagan si Eliseo ang anak ni Shaphat samtang siya nagdaro pinaagi sa napulog-duha ka yugo sa mga baka nga nagauna kaniya.” (1 Hari 19:19) Sa imong hunahuna sa unsang bulan kana nahitabo, ug unsa kahay hitsura sa yuta? Ug sa Juan 4:35, si Jesus miingon: “Dili ba kamo nagaingon nga upat pa ka bulan una ang ting-ani? . . . Iyahat ninyo ang inyong mga mata ug tan-awa ang mga uma, nga sila puti na aron pagaanihon.” Bisan pag mihatag siyag tinong panahon, nakasabot ka ba kon kanus-a?

Ang tsart nagataganag ekselenteng sumaryo sa kapanahonan ug mga buluhaton sa uma sa Yutang Saad. Ang gawas nga lingin nagahatag sa mga bulan sa Hudiyonhong sagradong kalendaryo.b Sa pagtandi niini sa atong mga bulan, imong mamatikdan ang pagsapaway, sama nga ang Nisan (o, Abib) nagasapaw sa hinapos sa Marso ug sa sinugdan sa Abril. Ang sunod nga bahin paingon sa sentro nagapakita kon kanus-a mahinog ang mga tanom, nga nagabulig nimo sa pag-amgo kon kanus-a nahitabo ang pila ka buluhaton sa uma, sama sa pag-ani ug paggiok. Ang sentro sa tsart nagatugot nimo sa pagtandi sa mga kausaban sa panahon sulod sa tuig.

Gamita ang tsart sa pagpalalom sa imong pagsabot ug pagpabili sa mga asoy sa Bibliya, sama sa duha ka pananglitan nga gihisgotan na.

Si Eliseo nahiapil sa usa ka dakong buluhaton sa pagdaro sa gitawag siya ingong manalagna. Kana lagmit nagbutang sa panahon sa Tishri (Septiyembre-Oktubre), sa dihang ang hinobrang kainit sa ting-init milabay na. Ang unang mga ulan nagsugod sa pagpahumok sa yuta, nga nagpaposible sa pagdaro, nga gisundan sa pagpugas.

Ug kanus-a si Jesus namulong sa mga pulong sa Juan 4:35? Ang ting-ani maoy sa upat pa ka bulan. Matikdi nga ang ting-ani sa sebada nagsugod sa Nisan (Marso-Abril), hapit na sa panahon sa Paskuwa. Balik sa pag-ihap ug upat ka bulan. Kana magdala nimo sa Chislev (Nobyembre-Disyembre). Nagsige ang ulan, uban ang kusog pang ulan ug mas bugnawng panahon sa unahan. Busa tin-awng gipasabot ni Jesus ang masambingayong pag-ani sa miingon siya: “Iyahat ninyo ang inyong mga mata ug tan-awa ninyo ang mga uma, nga sila puti na aron pagaanihon.”

Ang mosunod mao ang ubang mga pangutana alang sa imong personal nga pagtuon o aron gamiton sa makapahimuot nga yugto sa pagtuon uban sa imong pamilya:

▪ Ang ting-ani sa lino sa Jerico maoy sa bulan sa Adar; busa, sa unsang paagi ang mga detalye sa Josue 2:6 ug 3:15 nagapamatuod sa katukma sa Bibliya?—Josue 4:19; 5:11.

▪ Ang paggiok misunod sa ting-ani sa trigo, busa sa unsang paagi ang saad sa Levitico 26:5 nagahulagway sa pagkamadagayaon?

▪ Sa unsang paagi ang 2 Samuel 21:10 nagapasabot nga si Rizpah tingali nagsunod sa dugay nga pagtukaw sa kamatayon sa duha niya ka anak lalaki, nga gitugotang mapatay aron mawagtang ang pagkasad-an sa dugo gikan sa katawhan sa Diyos?

▪ Nganong ang mga dalugdog ug mga ulan nga gihisgotan sa 1 Samuel 12:17 giisip nga tubag sa Diyos?—Proverbio 26:1.

▪ Unsay katarongan nga si Ruth nakahinapos nga ang pagtagad ni Boaz kaniya dili lamang umalaging reaksiyon?—Ruth 1:22; 2:23.

Nganong dili gamiton kining maong tsart sa dihang magbasa sa Bibliya?

CHISLEV NISAN

IYYAR ADAR

SIVAN TISHRI

[Mga footnote]

[Diagram/Mga hulagway sa panid 17]

(Alang sa aktuwal nga pagkahan-ay, tan-awa ang publikasyon)

NISAN (ABIB)

Marso-Abril

Sebada

IYYAR (ZIV)

Abril-MAYO

Trigo

SIVAN

Mayo-Hunyo

Sayong Igos

TAMMUZ

Hunyo-Hulyo

Unang Ubas

AB

Hulyo-Agosto

Prutas sa Ting-init

ELUL

Agosto-Septiyembre

Dates, Ubas, Igos

TISHRI(ETHANIM)

SEPTIYEMBRE-OKTUBRE

Pagdaro

HESHVAN (BUL)

Oktubre-Nobyembre

Olibo

CHISLEV

Nobyembre-Disyembre 

Kahayopan Nagpalabay sa Tingtugnaw

TEBETH

Disyembre-Enero

Talamnon Nanubo

SHEBAT

Enero-Pebrero

Kabulakan sa Almendras

ADAR

Pebrero-Marso

Citrus

VEADAR

Marso

[Picture Credit Line sa panid 16]

Pictorial Archive (Near Eastern History) Est.

[Picture Credit Lines sa panid 17]

Garo Nalbandian

Pictorial Archive (Near Eastern History) Est.