Ikaw Ba Nagapaninguha?

“Kon adunay nagapaninguha sa katungdanan sa pagkamagtatan-aw, siya matinguhaon sa usa ka maayong buluhaton.”—1 TIMOTEO 3:1.

1. Ang pagtuman sa unsang tumong ang labing hinungdanon sa mga Saksi ni Jehova?

ANG mga Saksi ni Jehova dunay angayang mga tumong nga gitumong ug gituman sa diyosnong paagi. Dili kini katingad-an, sanglit ang ilang Diyos dunay hamiling mga tumong ug kanunay nagatuman sa iyang mga katuyoan. (Isaias 55:8-11) Ang mga alagad ni Jehova angay dili manig-ingon niadtong mga tawong walay maayong tumong ug nagakinabuhing padayon nga dimatinagdanon nga diyutay rag ginabuhat aron makabenepisyo kang bisan kinsa gawas sa ilang kaugalingon. Labing hinungdanon sa mga Saksi sa Diyos mao ang pagtuman sa hamiling tumong sa pagmantala sa mensahe sa Gingharian ug pagpakig-ambit sa uban sa nagahatag-kinabuhing kahibalo sa Pulong sa Diyos.—Salmo 119:105; Marcos 13:10; Juan 17:3.

2. Unsang tumong alang sa Kristohanong mga lalaki ang gihisgotan ni Pablo sa 1 Timoteo 3:1?

² Sa organisasyon ni Jehova, dunay lain pang hamiling mga tumong. Gihisgotan ni apostol Pablo ang usa niini sa misulat siya: “Kanang mga pulonga kasaligan. Kon adunay nagapaninguha sa katungdanan sa pagkamagtatan-aw, siya matinguhaon sa usa ka maayong buluhaton.” Gusto nianang tawhana nga may mabuhat alang sa kaayohan sa uban. Siya nagapaninguha sa “usa ka maayong buluhaton,” dili sa kinabuhing sayonsayon ug madungganon. Ang laing hubad nagaingon: “Matuod gayod ang pagpamulong nga ang usa ka tawo nga nagabutang sa iyang kasingkasing sa pagpangulo may dalayegong tingusbawan.”—1 Timoteo 3:1, Phillips.

Mga Kapeligrohan Alang sa mga Ansiano

3, 4. Nganong ang usa ka lalaking nagapaninguha nga mahimong magtatan-aw magbantay sa iyang kasingkasing?

³ Sa unsang paagi ang usa ka tawo nga ginabutang sa iyang kasingkasing ang pagkahimong Kristohanong magtatan-aw may “dalayegong tingusbawan”? Aw, ang tingusbawan o ambisyon maoy usa ka mainitong tinguha sa pagkab-ot sa usa ka tumong. Tinuod, adunay hamili ug dili-hamiling mga tingusbawan. Apan kon ang usa ka lalaki mapaubsanong nagapaninguha sa katungdanan sa pagkamagtatan-aw kay buot siyang moalagad sa uban, ang iyang pag-alagad ginahimo uban sa matarong nga mga motibo ug mahimong mosangpot sa espirituwal nga mga panalangin. Apan kinahanglang bantayan niya ang iyang kasingkasing.—Proverbio 4:23.

⁴ Ang pila ka ambisyosong mga tawo nagapangitag himaya. Ang uban buot mogahom sa isigkatawo. Ang kahakog sa pagkainila o gahom nahisamag dunot nga gamot nga makapukan bisan sa kahoy nga himsog ug dagway. Ang usa ka Kristohanon usab mahimong madaog nianang sayop-motibong ambisyon. (Proverbio 16:18) “Ako may gisulat ngadto sa kongregasyon,” matud ni apostol Juan, “apan si Diotrepes, kinsa buot nga makabaton sa unang dapit sa ilang taliwala [“nga buot mahimong ulo sa tanang butang,” Phillips], wala magdawat sa bisan unsa gikan kanamo uban ang pagtahod. Kana ang hinungdan, kon ako moanha, akong ipahinumdom ang iyang mga buhat nga ginapadayon niya sa pagbuhat, nga nagawitwit bahin kanamo pinaagi sa daotang mga pulong. Usab, kay dili matagbawon niining mga butanga, siya wala usab magdawat sa mga igsoon uban ang pagtahod, ug kadtong buot modawat kanila iyang gipaningkamotan sa pagbabag ug pagpalagpot gikan sa kongregasyon.” (3 Juan 9, 10) Ang ambisyon ni Diotrepes maoy dili-kristohanon. Ang kahambogiro ug ambisyosong pag-agpas sa gahom ibabaw sa uban walay dapit taliwala sa matuod nga mga sumusunod ni Jesus.—Proverbio 21:4.

5. Uban sa unsang tinamdan ang mga magtatan-aw angay mag-atiman sa ilang mga katungdanan?

⁵ Ang Kristohanong magtatan-aw nga nagaatiman sa iyang mga katungdanan uban ang matarong nga motibasyon dili mangagpas sa mahakogong mga ambisyon. Pagaisipon niya kining maayong buluhaton sa Kristohanong pagkamagtatan-aw nga usa ka hinatag-sa-Diyos nga pribilehiyo ug magabantay sa panon sa Diyos “dili nga pinugos, kondili kinabubut-on; ni tungod sa gugma sa malimbongong ganansiya, kondili maikagon; dili ingong magaharihari niadtong maoy panulondon sa Diyos, kondili mahimong [panig-ingnan] sa panon.” (1 Pedro 5:2, 3) Oo, ang mga magtatan-aw angay magbantay batok sa pag-ugmad sa garbo ug pagtinguha sa paggamit sa gahom sa mapasipad-anong paagi.

6. Nganong ang usa ka ansiano dili magharihari ibabaw sa katawhan sa Diyos?

⁶ Ang usa ka ansiano dili angay magharihari ibabaw sa ubang mga Kristohanon, kay siya maoy ilang isigkamagbubuhat, dili ‘usa ka agalon sa ilang pagtuo.’ (2 Corinto 1:24) Sa dihang ang pila ka apostol nagtinguha nga mainila, si Jesus miingon: “Kamo nahibalo nga ang mga punoan sa kanasoran nagaharihari ibabaw kanila ug ang dagkong mga tawo nagabuot kanila. Dili kini ingon sa inyong taliwala; apan si bisan kinsa nga buot mahimong dako sa inyong taliwala kinahanglang mahimong inyong alagad, ug si bisan kinsa nga buot mahimong una sa inyong taliwala kinahanglang mahimong inyong ulipon. Maingon nga ang Anak sa tawo mianhi, dili aron alagaron, kondili aron sa pag-alagad ug sa paghatag sa iyang kalag nga usa ka lukat ilis sa daghan.” (Mateo 20:20-28) Ang usa ka ansiano dili mao ang Pangulong Magbalantay kondili usa lamang ka ubos-magbalantay. Kon siya magharihari ibabaw sa panon, siya nagapasundayag sa espiritu sa garbo. Mosangpot ilabina ang kadaot kon iyang hayloon ang uban sa pagtabang niya sa pagpauswag sa iyang garbosong mga ambisyon. Matud sa usa ka proverbio: “Ang tanan nga garboso sa kasingkasing maoy dulumtanan kang Jehova. Ang kamot mahimong masumpay sa kamot, apan siya dili mahigawas sa silot.”—Proverbio 16:5.

7, 8. (a) Nganong kinahanglang magmapaubsanon ang Kristohanong mga ansiano? (b) Paghatag ug pananglitan sa usa ka mapaubsanong ansiano.

⁷ Busa ang Kristohanong mga ansiano angay ‘magpaubos sa ilang kaugalingon sa gamhanang kamot sa Diyos.’ Ang garbo nagababag sa espirituwal nga pagkamapuslanon, kay ang mga mapaubsanon lamang ang anaa sa angayang kahimtang sa kasingkasing ug hunahuna sa pagbuhat sa balaang kabubut-on. “Ang Diyos nagasupak sa mga mapahitas-on, apan siya nagahatag sa dili-takos nga kalulot ngadto sa mga mapaubsanon.” (1 Pedro 5:5, 6) Oo, si Jehova nagapanalangin sa mapaubsanon-ug-hunahuna. Maoy gikan sa ilang taliwala nga ang mga tawong may katakos ginatudlo sa pag-alagad nga Kristohanong mga ansiano.

⁸ Ang modernong-adlaw nga kasaysayan sa mga Saksi ni Jehova punog mga asoy sa mapaubsanong pag-alagad nga gihimo sa diyosnong mga tawo. Pananglitan, tagda ang malumog-kinaiya nga si W. J. Thorn, nga kaniadto usa ka pilgrim, o nagapanawng magtatan-aw, ug dugay nang trabahante sa Bethel. Mahitungod kaniya, usa ka Kristohanon miingon: “Dili ug dili ko gayod hikalimtan ang mga pulong ni Brader Thorn nga nakatabang kanako hangtod niining adlawa. Siya miingon, ug ako mokutlo, ‘Sa dihang ako maghunahuna pag-ayo sa akong kaugalingon, ipasuok ko ang akong kaugalingon, ingnon ta, ug moingon: “Ikaw nga diyutayng abog. Unsay imong ikapasigarbo?”’” Pagkadalayegon nga kinaiya nga ipasundayag sa mga ansiano ug sa uban! Hinumdomi, “ang sangpotanan sa pagkamapaubsanon ug ang kahadlok kang Jehova maoy bahandi ug himaya ug kinabuhi.”—Proverbio 22:4.

Ang Hinatag-sa-Diyos nga Tinguha sa Pag-alagad

9. Nganong ikaingon nga ang tinguha sa pag-alagad nga magtatan-aw maoy hinatag-sa-Diyos?

⁹ Ang tinguha ba sa pag-alagad nga magtatan-aw maoy hinatag-sa-Diyos? Oo, kay ang espiritu ni Jehova nagatagana sa motibasyon, kaisog, ug kusog sa paghimo sa balaang pag-alagad kaniya. Pananglitan, unsay nahitabo sa dihang ang gilutos nga mga sumusunod ni Jesus miampo alang sa kaisog sa pagwali? “Ang dapit nga didto sila nagtigom nauyog; ug silang tanan napuno sa balaang espiritu ug nagsulti sa pulong sa Diyos uban sa kaisog.” (Buhat 4:27-31) Sanglit ang balaang espiritu nagpatungha sa maong mga sangpotanan, kini makadasig usab sa usa ka tawo sa pagpaninguha.

10. (a) Unsa ang usa ka hinungdan nganong ang usa ka Kristohanong lalaki tingali wala magapaninguha? (b) Kon ihatag kanato sa Diyos ang usa ka pribilehiyo sa pag-alagad, kita makapaneguro sa unsa?

¹⁰ Ngano mang ang usa ka hamtong nga Kristohanon tingali dili maninguha? Siya basin usa ka tawong espirituwal apan mobating kulangan pa. (1 Corinto 2:14, 15) Hinuon, angay nga magbaton kitag kasarangang pagtan-aw sa atong kaugalingon, nga makaamgo sa atong mga limitasyon. (Miqueas 6:8) Inay mapangahasong maghunahuna nga kita mao ang labing takos alang sa usa ka responsabilidad, maayo ang paghinumdom nga “ang kaalam maoy uban sa mga makasaranganon.” (Proverbio 11:2) Apan angay natong amgohon nga kon ihatag kanato sa Diyos ang usa ka pribilehiyo sa pag-alagad, itagana usab niya ang kusog nga gikinahanglan sa pagtuman niana. Sumala sa giingon ni Pablo: “Ako adunay kusog alang sa tanang butang tungod kaniya nga nagahatag kanako sa kusog.”—Filipos 4:13.

11. Unsay mahimo sa usa ka Kristohanon nga wala magapaninguha tungod kay gibati niyang siya kulangan sa kaalam aron mohatag ug tambag?

¹¹ Ang usa ka Kristohanon tingali dili maninguha tungod kay gibati niyang siya kulang ug kaalam sa paghatag ug tambag. Aw, tingali makabaton siyag kaalam pinaagi sa pagkahimong mas kugihang estudyante sa Pulong sa Diyos, ug angay gayod nga siya moampo alang sa kaalam. Misulat si Santiago: “Kon aduna kaninyoy nakulangan sa kaalam, papangayoa siya sa Diyos, kay siya nagahatag nga madagayaon sa tanan ug dili mamuyboy; ug kini igahatag kaniya. Apan papangayoa siya diha sa pagtuo, nga dili magduhaduha, kay siya nga nagaduhaduha nahisama sa balod sa dagat nga gipadpad sa hangin ug gianod-anod. Sa pagkamatuod, ayaw pahunahunaa kanang tawhana nga siya may madawat gikan kang Jehova; siya usa ka tawong dili makahukom, nga mabalhinon sa tanan niyang paagi.” (Santiago 1:5-8) Ingong tubag sa pag-ampo, ang Diyos mihatag kang Solomon “sa usa ka maalamon ug masinabtanon nga kasingkasing” nga nakapaarang niya sa pag-ila sa maayo ug daotan sa dihang magahukom. (1 Hari 3:9-14) Ang kaso ni Solomon maoy espesyal, apan pinaagi sa makugihong pagtuon ug sa panabang sa Diyos, ang mga lalaking gisaligan sa responsabilidad sa kongregasyon makatambag sa uban sa matarong nga paagi. “Si Jehova nagahatag ug kaalam; gikan sa iyang baba anaa ang kahibalo ug pag-ila.”—Proverbio 2:6.

12. Kon tungod sa kabalaka ang usa ka lalaki wala magapaninguha, unsay makatabang niya?

¹² Ang usa ka sukod sa pagkamabalak-on tingali mopugong sa usa ka tawo sa pagpaninguha. Basin siya maghunahuna nga siya dili arang makapas-an sa bug-at nga responsabilidad sa pagkaansiano. Bisan si Pablo miangkon: “Adunay nagapiit kanako sa adlaw-adlaw, ang kabalaka alang sa tanang kongregasyon.” (2 Corinto 11:28) Apan ang apostol nahibalo kon unsay buhaton sa dihang makaagom sa kabalaka, kay siya misulat: “Ayaw kamo kabalaka sa bisan unsa, apan sa tanang butang pinaagi sa pag-ampo ug pangaliyupo uban ang pagpasalamat ipahibalo ninyo ang inyong mga hangyo sa Diyos; ug ang kalinaw sa Diyos nga molabaw sa inyong hunahuna magabantay sa inyong mga kasingkasing ug sa inyong mga gahom sa hunahuna pinaagi kang Kristo Jesus.” (Filipos 4:6, 7) Oo, ang pag-ampo ug pagsalig sa Diyos makatabang sa paghupay sa kabalaka.

13. Sa unsang paagi ang usa ka lalaki makaampo kon siya makuli bahin sa pagpaninguha?

¹³ Kon magpadayon ang kabalaka, ang usa ka tawong makuli bahin sa pagpaninguha basin makaampo sama kang David: “Susiha ako, Oh Diyos, ug sayra ang akong kasingkasing. Usisaa ako, ug hibaloi ang akong makuli nga mga hunahuna, ug tan-awa kon aduna bay dalan sa kasakitan diha kanako, ug tultoli ako sa dalan sa panahong walay katinoan.” (Salmo 139:23, 24) Bisan kon unsa tingali ang kinaiyahan sa atong “makuli” o “mabalak-ong” mga hunahuna, ang Diyos makatabang nato sa pagsagubang niana aron kita makahimog espirituwal nga pag-uswag. (Tan-awa ang The New International Version.) Kini maayong pagkapahayag sa laing salmo: “Sa dihang ako miingon: ‘Ang akong tiil mahadakin-as,’ ang imong kaugalingong mahigugmaong-kalulot, Oh Jehova, naglig-on kanako. Sa dihang ang akong makuli nga mga hunahuna midaghan sa akong kahiladman, ang imong kaugalingong mga paghupay naghadla sa akong kalag.”—Salmo 94:18, 19.

Pag-alagad nga Malipayon Sumala sa Kabubut-on ni Jehova

14. Nganong ang usa ka lalaki nga wala magapaninguha angay moampo alang sa balaang espiritu sa Diyos?

¹⁴ Kon tungod sa kabalaka, mga pagbati sa kakulangan, o kawalay motibasyon, ang usa ka Kristohanong lalaki mapakyas sa pagpaninguha, tinong haom ang pag-ampo alang sa espiritu sa Diyos. Matud ni Jesus: “Kon kamo, bisan pag daotan, nahibalo nga mohatag ug maayong mga gasa ngadto sa inyong mga anak, unsa pa gayod ka labaw pa sa Amahan sa langit nga mohatag sa balaang espiritu niadtong mangayo kaniya!” (Lucas 11:13) Sanglit ang kalinaw ug pagpugong-sa-kaugalingon nahiapil sa mga bunga sa espiritu, kining espirituha makatabang nato sa pagsagubang sa kabalaka o sa mga pagbati sa kakulangan.—Galacia 5:22, 23.

15. Unsang matang sa mga pag-ampo ang makatabang niadtong walay motibasyon sa paghimo nilang andam sa mga pribilehiyo sa pag-alagad?

¹⁵ Komosta man ang kakulang sa motibasyon? Ingong bawtismadong mga Kristohanon, kinahanglang kita moampo nga ipabuhat sa Diyos kanato kon unsay makapahimuot kaniya. Si David nangaliyupo: “Himoa nga ako mahibalo sa imong mga dalan, Oh Jehova . . . Himoa nga ako molakaw sa imong kamatuoran ug tudloi ako.” (Salmo 25:4, 5) Ang mga pag-ampo nga sama niini motabang kanato sa paglikay sa sayop nga dalan, ug kita makaampo sa samang paagi kon kita kulang sa motibasyon sa pagpaninguha. Makahangyo kita ni Jehova nga himoon niyang kita buot modawat sa mga pribilehiyo sa pag-alagad. Sa pagkamatuod, kon moampo kita alang sa espiritu sa Diyos ug mopahiuyon sa pagtultol niini, sa walay duhaduha kita magmaandam kon itanyag kanato ang mga pribilehiyo sa pag-alagad. Kon buot sabton, sa bisan unsang paagi ang mga alagad sa Diyos dili buot mosukol sa iyang espiritu.—Efeso 4:30.

16. Unsang tinamdan ang nagahatag ug kusganong motibasyon sa pagtinguha sa responsabilidad sa kongregasyon?

¹⁶ Kay nagbaton sa “hunahuna ni Kristo,” kita magkalipay sa pagbuhat sa balaang kabubut-on. (1 Corinto 2:16) Si Jesus nagbaton sa samang tinamdan sa salmista, nga miingon: “Sa pagbuhat sa imong kabubut-on, Oh Diyos ko, ako nagkalipay, ug ang imong kasugoan ania sa akong sulod nga mga bahin.” (Salmo 40:8) Si Kristo miingon: “Tan-awa! Ako mianhi sa pagbuhat sa imong kabubut-on,” ug kana hangtod pa sa kamatayon sa kahoy sa pagsakit. (Hebreohanon 10:9, 10) Ang tinguha sa pagbuhat sa tanang butang posible sa pag-alagad kang Jehova nagatagana sa kusganong motibasyon sa pagpaninguha sa responsabilidad sa kongregasyon.

Tan-aw sa Umaabot

17. (a) Nganong ang mga lalaki nga karon wala magaalagad nga bug-os sama sa nangagi dili mawad-ag kadasig? (b) Unsa ang labing dakong pribilehiyo sa tanan?

¹⁷ Tungod sa mga suliran sa panglawas o sa ubang mga hinungdan, ang pipila nga sa nangagi nag-atiman sa hinungdanong mga buluhaton sa kongregasyon karon wala na magbaton nianang mga pribilehiyoa. Sila dili angay nga mawad-ag kadasig. Kita nahibalo nga daghang matinumanong mga lalaki nga dili na makaarang sa pag-alagad nga bug-os sama sa ilang gibuhat sa nangagi lig-on gihapong nagabarog ingong mga maghuhupot sa integridad. (Salmo 25:21) Sa pagkamatuod, ang mapaubsanon karaan nang mga ansiano makapadayon sa paggamit sa ilang kasinatian pinaagi sa pagpabiling bahin sa lawas sa mga ansiano. Bisan pag baldado na tungod sa edad o mga depekto, dili kinahanglan nga sila magpatangtang sa katungdanan. Kasamtangan, pasagding ang matag Saksi ni Jehova magmahal sa labing maayong pribilehiyo sa tanan, nga mao ‘ang pagpamulong bahin sa himaya sa pagkahari sa Diyos’ ingong mga manlalaban sa balaan niyang ngalan.—Salmo 145:10-13.

18. (a) Kon ang usa ka ansiano o ministeryal nga alagad natangtang, unsa tingaliy gikinahanglan? (b) Unsang maayong tinamdan ang gipadayag sa usa ka natangtang nga ansiano?

¹⁸ Kon ikaw sa usa ka panahon usa ka ansiano o ministeryal nga alagad apan wala mag-alagad karon sa maong kapasidad, paneguroa nga ang Diyos nagamahal gihapon kanimo, ug tingalig ikaw hatagan niyag pila ka wala-damhang mga pribilehiyo sa umaabot. (1 Pedro 5:6, 7) Kon kinahanglang ikaw mohimog pila ka pagpasibo, maandam nga moangkon sa usa ka sayop ug buntoga kana uban sa tabang sa Diyos. Ang pipila nga gitangtang ingong mga ansiano nagbaton sa dili-kristohanong tinamdan, ug ang pipila nahimong dili aktibo o nahulog gikan sa kamatuoran. Apan pagkamaalamon nga manig-ingon niadtong nagpadayag sa maayong espiritu! Pananglitan, sa dihang natangtang ang usa ka ansiano nga nag-alagad sa daghang katuigan sa Sentral Amerika, siya miingon: “Naguol ako pag-ayo nga mawad-an sa pribilehiyo nga dugay ko nang gimahal. Apan magkugi ako sa bisan unsang paagi nga buot akong gamiton sa mga igsoon ug maningkamot nga mapasig-uli ang akong mga pribilehiyo sa pag-alagad.” Sa nahaigong panahon, ang maong igsoon nakapribilehiyo na usab sa pag-alagad nga ansiano.

19. Unsang nahiangay nga tambag ang gihatag ngadto sa usa ka igsoon nga natangtang sa pagkaansiano o ministeryal nga alagad?

¹⁹ Kon ikaw gitangtang ingong ansiano o ministeryal nga alagad, nan, magbatog mapaubsanong espiritu. Likayi ang pagkayugot nga magdiskuwalipikar nimo alang sa umaabot nga mga pribilehiyo. Ang diyosnong espiritu makaangkon sa pagtahod. Inay mawad-ag kadasig, palandonga giunsa sa pagpanalangin ni Jehova ang imong ministeryo o imong panimalay. Lig-ona sa espirituwal ang imong pamilya, duawa ang masakiton, ug dasiga ang maluya. Labaw sa tanan, mahala ang imong pribilehiyo sa pagdayeg sa Diyos ug pagmantala sa maayong balita ingong usa sa mga Saksi ni Jehova.—Salmo 145:1, 2; Isaias 43:10-12.

20. Sa unsang paagi ang lawas sa mga ansiano makaarang sa pagtabang sa kanhing magtatan-aw o ministeryal nga alagad?

²⁰ Ang lawas sa mga ansiano angay makaamgo nga ang pagkatangtang tingali makapaguol sa kanhing magtatan-aw o ministeryal nga alagad, bisan pag kinabubut-on siyang nagpatangtang sa pribilehiyo. Kon siya wala mapalagpot, ug nakita sa mga ansiano nga naguol ang igsoong lalaki, angay nga ihatag nila ang mahigugmaong espirituwal nga tabang. (1 Tesalonica 5:14) Angay silang motabang niya sa pag-amgo nga siya gikinahanglan sa kongregasyon. Bisan pag gikinahanglan ang tambag, mahimong dili kaayo magdugay nga madawat na usab sa mapaubsanon ug mapasalamatong lalaki ang dugang mga pribielhiyo sa pag-alagad sa kongregasyon.

21. Kinsay naghulat sa mga pribilehiyo sa pag-alagad, ug unsay gisugyot niadtong nagahulat niana karong adlawa?

²¹ Kon ikaw nagapaninguha, tingali ikaw kinahanglang maghulat ug taastaas nga panahon sa dili pa makadawat ug dugang pribilehiyo sa pag-alagad. Ayaw wad-a ang pailob. Si Moises naghulat ug 40 anyos usa pa siya gamita sa Diyos sa gipagawas ang mga Israelinhon gikan sa pagkaulipon sa Ehipto. (Buhat 7:23-36) Usa pa itudlong manununod ni Moises, si Josue dugay nga nag-alagad kaniya. (Exodo 33:11; Numeros 27:15-23) Si David naghulat ug dugaydugayng panahon usa ibutang sa trono sa Israel. (2 Samuel 2:7; 5:3) Si Pedro ug Juan Marcos lagmit miagig mga yugto sa pagdalisay. (Mateo 26:69-75; Juan 21:15-19; Buhat 13:13; 15:36-41; Colosas 4:10) Busa kon ikaw walay mga katungdanan sa kongregasyon karon, basin si Jehova nagatugot nga ikaw umolon pinaagi sa pagbatog mas dakong kasinatian. Sa bisan unsang paagi, pangitaa ang tabang sa Diyos samtang ikaw nagapaninguha, ug ikaw panalanginan niyag dugang mga pribilehiyo sa pag-alagad. Kasamtangan, magkugi aron mahimong takos sa responsabilidad sa kongregasyon ug ipadayag ang espiritu ni David, nga mipahayag: “Ang pagdayeg kang Jehova igapamulong sa akong baba; ug ang tanang unod magadayeg sa iyang balaang ngalan sa panahong walay tino, bisan sa walay kataposan.”—Salmo 145:21.

Unsay Imong Tubag?

◻ Batok sa unsang mga kapeligrohan magbantay ang Kristohanong mga ansiano?

◻ Unsay makatabang niadtong tungod sa kabalaka o mga pagbati sa kakulangan wala magapaninguha?

◻ Unsay makatukmod sa usa ka tawo aron siya magmaandam alang sa responsabilidad sa kongregasyon?

◻ Uban sa unsang tinamdan ang kanhing mga ansiano ug ministeryal nga mga alagad motan-aw sa umaabot?

[Hulagway sa panid 19]

Si W. J. Thorn naghatag ug maayong panig-ingnan ingong usa ka mapaubsanong ansiano

[Hulagway sa panid 21]

Sama kang Jesus, ikaw ba andam mobuhat sa tanan nga posible diha sa pag-alagad kang Jehova?