“Padayon sa Pagsuta Kon Kamo Anaa pa Diha sa Pagtuo”
Mga Pangunang Punto Gikan sa Ikaduhang Corinto
ANG apostol nga si Pablo nabalaka bahin sa mga Kristohanon sa Corinto. Unsa kahay ilang paglantaw sa tambag nga gihatag diha sa iyang unang sulat ngadto kanila? Siya didto sa Macedonia sa dihang si Tito miabot nga may paborableng taho nga ang sulat nakapaguol sa mga taga-Corinto ngadto sa paghinulsol. Pagkadako sa kalipay ang nahatag niana kang Pablo!—2 Corinto 7:8-13.
Gisulat ni Pablo ang Ikaduhang Corinto gikan sa Macedonia, malagmit human sa tunga-tunga sa tuig 55 K.P. Diha sa maong sulat, iyang gihisgotan ang mga lakang nga himoon aron huptang hinlo ang kongregasyon, gitukod ang tinguha sa pag-amot sa nanginahanglang mga magtutuo sa Judea, ug gipanalipdan ang iyang pagkaapostol. Daghan sa gipamulong ni Pablo makatabang kanato sa ‘pagpadayon sa pagsuta kon kita anaa pa diha sa pagtuo.’ (13:5) Busa, unsay atong makuha gikan niining sulata?
Ministro Alang sa Diyos sa Paglipay
Gipakita sa apostol nga sama nga nagalipay kanato ang Diyos diha sa tanan natong mga kasakitan, kita angay nga maglipay sa uban ug mag-ampo alang kanila. (1:1–2:11) Bisag si Pablo ug iyang mga kauban ubos sa labihang pagpiit, ang Diyos nagluwas kanila. Bisan pa, ang mga taga Corinto makatabang sa mga pag-ampo alang kanila, sama nga atong iampo ang uban nga midawat sa matuod nga pagtuo. Apan unsay ikasulti bahin imoral nga tawong gihisgotan sa 1 Corinto kapitulo 5? Dayag nga siya gipalagpot apan naghinulsol. Pagkadako tingali sa iyang kalipay dihang nagpaabot ang mga taga Corinto sa ilang pasaylo ug mahigugmaon nagpasig-uli kaniya diha sa ilang taliwala.
Ang mga pulong ni Pablo mopauswag sa atong pagpabili sa Kristohanong ministeryo, magapalig-on sa atong baroganan alang sa matuod nga pagtuo. (2:12–6:10) Gani, ang mga ministro sa bag-ong pakigtugon nakapribilehiyo nga mahiapil diha sa “madaogong parada” uban sa Diyos nga mao ang nagapanguna! Si Pablo ug ang iyang isigkamagbubuhat may hamili nga ministeryo tungod sa kaluoy nga gipakita kanila. Sama kanila, ang presenteng-adlaw nga mga dinihogan may usa ka ministeryo sa kapasig-ulian. Oo, ang tanang mga Saksi ni Jehova naghimo sa uban nga adunahan pinaagi sa ilang ministeryo.
Hingpita ang Pagkabalaan ug Magmahinatagon
Gipakita ni Pablo kanato nga kinahanglang hingpiton sa Kristohanong mga ministro ang pagkabalaan diha sa kahadlok ni Jehova. (6:11–7:16) Aron kita makabarog nga malig-on diha sa pagtuo, kinahanglang maglikay kita sa pagpakig-uban sa mga dili-magtutuo, ug kita kinahanglang mahinloan sa unodnon ug sa espirituwal nga kahugawan. Ang mga taga Corinto mihimog lakang sa paghinlo pinaagi sa pagpalagpot sa imoral nga mamumuhat ug daotan, ug si Pablo nalipay nga ang iyang unang sulat nagpaguol kanila ngadto sa paghinulsol alang sa kaluwasan.
Atong nakat-onan usab nga ang mahadlokon sa Diyos nga mga ministro gigantihan tungod sa ilang pagkamahinatagon. (8:1–9:15) Mahitungod sa mga amot alang sa nanginahanglang “mga balaan,” gihisgotan ni Pablo ang maayong sumbanan sa mga taga Macedonia. Sila mahinatagon nga saylo sa ilang katakos, ug siya naglaom nga makita ang samang matang sa pagkamahinatagon diha sa bahin sa mga taga Corinto. Ang ilang pagpanghatag—ug ang atoa—kinahanglang magagikan sa kasingkasing, kay ang “Diyos nahigugma sa usa ka malipayong tighatag” ug nagapadagaya sa iyang katawhan alang sa tanang matang sa pagkamahinatagon.
Si Pablo—Usa ka Matinagdanong Apostol
Sa dihang kita makabuhat ug bisan unsa diha sa pag-alagad kang Jehova ingong mga ministro, kita magpasigarbo kaniya, dili sa atong kaugalingon. (10:1–12:13) Gawas pa, pinaagi lamang sa espirituwal nga mga hinagiban nga gihimong “gamhanan sa Diyos” nga atong mapukan ang bakak nga mga pangatarongan. Ang mapasigarbohon “labing hawod nga mga apostol” taliwala sa mga taga Corinto dili makatupong sa rekord ni Pablo sa pagkamalahutayon ingong usa ka ministro ni Kristo. Ugaling, aron siya dili masobrahan sa pagkabayaw, wala kuhaa sa Diyos ang iyang “tunok sa unod”—tingali ang hanap nga panan-aw o ang bakak nga mga apostol. Gipasigarbo hinoon ni Pablo ang iyang mga kahuyangan aron “ang gahom ni Kristo” magpabilin ibabaw kaniya sama sa usa ka tolda. Ingong usa ka tawo nga mibarog nga malig-on diha sa pagtuo, siya wala magpamatuod nga ubos sa labing hawod nga mga apostol. Ang mga taga Corinto nakakita sa mga pamatuod sa pagkaapostol nga gipatungha ni Pablo taliwala kanila “pinaagi sa tanang pagkamainantoson, ug pinaagi sa mga ilhanan ug mga tilimad-on ug gamhanang mga buhat.”
Ingong ministro ug apostol, si Pablo maikagon sa espirituwal nga mga intereses sa kaubang mga magtutuo, sa ingon kita usab magmaikagon. (12:14–13:14) Siya ‘malipay kaayo sa bug-os nga paggugol alang sa ilang mga kalag.’ Apan si Pablo nahadlok nga sa dihang makaabot na sa Corinto, siya makakaplag ug pipila nga wala maghinulsol sa mga buhat sa unod. Busa, iyang gitambagan ang tanan nga magpadayon sa pagsuta kon sila anaa pa diha sa pagtuo ug nag-ampo nga unta sila “walay nabuhat nga daotan.” Sa pagtapos, iyang giagda sila nga magmasadya, magpasibo pag-usab ug magpalipay, maghunahunang may panag-uyon, ug magpuyong malinawon. Pagkamaayong tambag usab alang kanato!
Padayon sa Pagsuta!
Ang ikaduhang sulat ni apostol Pablo ngadto sa mga Kristohanon sa Corinto sa ingon nagsugyot ug nagkalainlaing mga paagi sa pagpadayon sa pagsuta kon kita anaa pa diha sa pagtuo. Ang iyang mga pulong sa dayag angay magtukmod kanato sa paglipay sa uban, sama sa paglipay kanato sa Diyos diha sa atong tanang kasakitan. Ang giingon sa apostol bahin sa Kristohanong ministeryo angay modasig kanato sa pagbuhat niini nga matinumanon samtang atong hingpiton ang pagkabalaan diha sa pagkahadlok kang Jehova.
Hinaot ang pagpadapat sa tambag ni Pablo mohimo kanatong mas mahinatagon ug matinabangon. Oo, ang iyang mga pulong angay moagda kanato sa pagpasigarbo kang Jehova, dili sa atong kaugalingon. Kini angay mopadako sa atong mahigugmaong kabalaka alang sa kaubang mga magtutuo. Ug tino kini ug ang ubang mga punto diha sa Ikaduhang Corinto makatabang kanato sa ‘pagpadayon sa pagsuta kon kita anaa pa diha sa pagtuo.’
[Kahon/Hulagway sa panid 26]
PAGPABANAAG SA HIMAYA NI JEHOVA: Sa dihang si Moises mikanaog sa Bukid Sinai uban sa mga papan sa Pagpamatuod, ang iyang dagway mihayag tungod kay ang Diyos nakigsulti kaniya. (Exodo 34:29, 30) Gihisgotan kini ni Pablo ug miingon: “Kitang tanan, uban sa nawong nga dili tinaptapan nagapabanaag samag mga salamin sa himaya ni Jehova, nga gibag-o ngadto sa pagkasama sa iyang dagway gikan sa himaya ngadto sa himaya, nga sama gayod sa gibuhat ni Jehova ang Espiritu.” (2 Corinto 3:7-18) Ang karaang mga salamin sa kamot hinimo sa maong mga metal sama sa bronse o tumbaga ug gipasinaw pag-ayo aron mohatag ug maayong pagbanaag ang ibabaw. Samag mga salamin, ang mga dinihogan nagapabanaag sa himaya sa Diyos nga nagasidlak ngadto kanila gikan kang Jesu-Kristo, nga anam-anam nga ‘nagausab kanila ngadto sa dagway’ nga gipadayag sa nagapabanaag-sa-himaya nga Anak ni Jehova. (2 Corinto 4:6; Efeso 5:1) Pinaagi sa balaang espiritu ug sa Kasulatan, gibuhatan sila sa Diyos ug “bag-ong personalidad,” usa ka pagpabanaag sa iyang kaugalingong mga hiyas. (Efeso 4:24; Colosas 3:10) Langitnon man o yutan-on ang atong paglaom, atong ipasundayag kana nga personalidad ug pakahamilion ang pribilehiyo sa pagpabanaag sa himaya sa Diyos diha sa atong ministeryo.
[Kahon/Hulagway sa panid 27]
“MGA HINAGIBAN SA PAGKAMATARONG”: Ang usa ka paagi nga girekomendar ni Pablo ug sa iyang mga kauban ang ilang kaugalingon ingong mga ministro sa Diyos maoy “pinaagi sa mga hinagiban sa pagkamatarong diha sa tuong kamot ug sa wala.” (2 Corinto 6:3-7) Ang tuong kamot gigamit sa pagbakyaw sa espada, ug ang wala sa paggunit sa kalasag. Bisag atakehon gikan sa tanang kiliran, si Pablo ug ang iyang mga isigkamagbubuhat nasangkapan sa pakiggubat sa espirituwal nga panaggubat. Kadto gipakiggubat batok sa bakak nga mga magtutudlo ug “labing hawod nga mga apostol” aron ang kongregasyon sa Corinto dili mahilayo gikan sa debosyon kang Kristo. Si Pablo wala mogamit ug mga hinagiban sa makasasalang unod—panglipot, panglimbong, o panglingla. (2 Corinto 10:8-10; 11:3, 12-14; 12:11, 16) Hinunoa, “ang mga hinagiban” nga gigamit maoy matarong, o matul-id, mga kasangkapan sa pagpauswag sa kawsa sa matuod nga pagsimba batok sa tanang mga pag-atake. Ang mga Saksi ni Jehova karong adlawa nagagamit sa maong “mga hinagiban sa pagkamatarong” alang sa samang katuyoan.