Mga Magmamantala sa Gingharian Nagtaho
Kamatuoran sa Bibliya Nagmadaogon Ibabaw sa Tradisyon
ANG relihiyosong tradisyon mahimong nakagamot nag maayo. Ang minilyon mobati nga ang pagbalhin ug relihiyon maoy sayop. Si Saul, nga nahimong apostol Pablo, lagmit mibati niana, sanglit siya miingon: “Ako labi pang masiboton alang sa gikabilinbiling mga sugilanon sa akong mga katigulangan [kay sa daghan sa akong katalirongan].” Apan sa gipakitaan sa kamatuoran gikan sa Bibliya, siya nagbag-o nga nahimong Kristohanon gikan sa Judaismo. (Galacia 1:13-16) Daghan karong adlawa nakaamgo nga ang kamatuoran sa Bibliya nagagikan sa usa ka tinubdan nga labaw sa tradisyon. Matikdi sa unsang paagi ang kamatuoran sa Bibliya nagmadaogon sa Italya.
Usa ka babaye misaysay: “Ang akong igsoong babaye ug ako nagtubo sa usa ka dakong pamilya uban sa dugay-nang-nanglungtad nga mga tradisyon, ug kami debotado kaayong mga Katoliko. Sa paglabay sa panahon, ako naminyo. Dayon namatyan ko sa akong bana, ug ako nagkinabuhing biyuda sa daghang mga tuig kauban sa akong mga anak. Ang akong pag-umangkong babaye nagtudlog katekismo, ug siya kanunay mangutana sa pari sa mga pangutana sa Bibliya, apan wala siya makadawat ug makapatagbawng mga tubag.
“Samtang nagduaw sa akong lungsod-natawhan, una kong nahibalag ang mga Saksi ni Jehova ug gidawat ang usa ka pagtuon sa Bibliya. Ang tanan kong kanhing Katolikong kauban nagbiaybiay kanako tungod sa pagtuon sa Bibliya. Bisan pa niana, wala ako maluya. Sa unang panahon, nakapanag-iya akog Bibliya, ug walay makakuha niana gikan kanako. Ang akong igsoong babaye mibarog usab dapig kang Jehova, ug sa walay duha ka tuig, kaming duha nabawtismohan.
“Mihilak ako sa dihang ako unang mibulag sa simbahan kay ako nahadlok nga mobiya sa mga tradisyon nga nakadulot diha kanako sulod sa 76 ka tuig. Apan karon ako malipayon nga nagalakaw sa mga dalan ni Jehova ug nagabuhat sa akong labing maarangan sa pagtabang sa uban nga makagula sa espirituwal nga kangitngitan!”—Itandi ang 1 Pedro 2:9.
Barbero Nagtul-id sa Sayop nga Panghunahuna
Ang usa ka barbero sa Hapon mahiligon nga maghisgot bahin sa mga demonyo ug sa mga UFO samtang nagtupi sa buhok sa mga suki. Bisan pa niana, sa pagsugod niya sa pagtuon sa Bibliya, nakaamgo siya unsa ka peligroso ang maong batasan. Mao nga gidapit hinuon niya ang iyang mga suki nga moduyog niya sa iyang pagtuon sa Bibliya. Gisangyawan niya ang batan-ong mga suki bahin sa paglalang. Kada semana siya mopedidog mga Bibliya ug mga kopya sa librong Ikaw Mabuhing Walay Kataposan sa Paraiso sa Yuta gikan sa Saksi nga nagtuon kaniya aron ikapahimutang niya kana sa iyang mga suki.
Bisan pag dili pa Saksi, napahimutang niya ang kapin sa 30 ka set sa mga Bibliya ug mga librong Mabuhing Walay Kataposan sa una niyang tuig sa pagtuon. Kapin sa 25 ka tawo ang misugod sa pagtuon sa Bibliya ingong resulta sa iyang dili-pormal nga pagsangyaw. Usahay abot sa pulo ang moapil sa iyang grupong nagtuon sa Bibliya. Karon pito niadtong iyang gisangyawan sa dihang gitupihan sa ilang buhok ang nakatul-id sa ilang sayop nga panghunahuna ug maoy bawtismadong mga Saksi ni Jehova!