Ang Putling Pinulongan Nagpahiusa sa Usa ka Dakong Panon sa mga Magsisimba

ANG hinatag-Diyos nga putling pinulongan maoy usa ka puwersa alang sa Kristohanong panaghiusa. Ang kamatuoran niana maoy dayag ngadto sa tanan nga mitambong sa kombensiyon sa mga Saksi ni Jehova nga gihimo sa Kasadpang Berlin gikan sa Martes ngadto sa Biyernes, Hulyo 24 ngadto sa 27, 1990, sanglit ang mga Saksi gikan sa 64 ka nagkalainlaing mga nasod ang mitambong.

Sa dihang gihimo ang “Diyosnong Debosyon” Distritong mga Kombensiyon sa Polandiya sa miaging ting-init sa 1989, linibo ka mga delegado ang mitambong gikan sa Rusya ug Czechoslovakia, apan mga gatosan lamang ang mitambong gikan sa Sidlakang Alemanya. Pagkadako nga kausaban sa kahimtang sa kalibotan sa politikanhong paagi sukad niadto! Niining panahona, ang gibanabanang 30,000 ka mga delegado gikan sa Sidlakang Alemanya nakighimamat uban sa mga Saksi diha sa Olympia nga Estadyom sa Kasadpang Alemanya. Ang kombensiyon maoy usa lamang sa gatosan pa nga pagahimoon sa ubang mga bahin sa kalibotan, nga kasagaran sa Huwebes hangtod sa Domingo.

Diha sa iyang pangbukas nga pulong sa pag-abiabi sa Martes, ang tsirman nagsubli sa papel nga gidula sa mga kombensiyon sukad pa sa 1919 sa pagtabang sa mga Saksi ni Jehova nga mouswag diha sa pagpakigsulti sa putling pinulongan. Kini nga kombensiyon sa ingon motabang sa tanang mitambong nga pauswagon ang ilang katakos sa pagsulti sa putling pinulongan ug pagpahiuyon niana. Iyang gipahinumdoman ang mga delegado nga tungod sa ilang maayong pamisti ug paggawi, ang katawhan ni Jehova nagpadayag sa pag-uswag nga ilang nahimo sa pagsulti sa putling pinulongan.

“Usa ka Putling Pinulongan alang sa Tanang Kanasoran”

Sa tukma, ang yawing pakigpulong sa kombensiyon nagbatbat sa gihisgotang tema. Kini gipasukad sa Sofonias 3:9, diin ang Diyos misaad: “Kay unya ulian ko ang katawhan sa putling pinulongan, aron silang tanan magatawag sa ngalan ni Jehova, sa pag-alagad kaniya uban ang nahiusang pag-uyon.” Ang putling pinulongan naglakip sa usa ka hustong pagsabot ug pagpabili sa kamatuoran mahitungod sa Diyos ug sa iyang mga katuyoan. Si Jehova lamang ang makatagana niini pinaagi sa iyang balaang espiritu. Ang gugma sa kamatuoran kinahanglang maoy magatukmod aron makakat-on sa putling pinulongan, nga nahigawas gikan sa tanang moral nga kahugawan.

Dugang pa, ang pagsulti sa putling pinulongan dili usa ka butang lamang sa paggamit ug usa ka tinong bokabularyo. Hinunoa, ang atong paagi sa kinabuhi kinahanglang nahiuyon nianang migula gikan sa atong mga ngabil. Sa pagkamatuod, ang atong tono sa boses, ekspresyon sa panagway, ug mga panglihok-lihok maoy hinungdanon usab, kay sila nagbanaag kon unsa kita sa sulod. Aron makasunod sa nagakadakong putling pinulongan, kita kinahanglang adunay programa sa pagtuon kanunay ug sa regular nagtambongan sa tanang mga tigom sa kongregasyon.

Pagkat-on sa Putling Pinulongan

Ingon sa gipasiugda sa usa ka pakigpulong sa Martes sa hapon, ang pagkat-on sa putling pinulongan nagpasabot sa “Pag-uswag Gikan sa mga Pasukaranan ngadto sa Pakahamtong.” Ang pagtubo gikinahanglan kon buot natong magpadayon sa pag-uswag sa espirituwal. Kana nagpasabot sa pagpahimulos sa tanang mga tagana alang sa pag-uswag sa espirituwal ug sa pagpadapat sa mga prinsipyo sa Bibliya sa adlaw-adlaw.

Aron mahimong hanas diha sa putling pagsimba, kita kinahanglang “Magpatudlo kang Jehova,” ang ulohan sa simposyom sa buntag sa Huwebes. Ang unang mamumulong nagpakita kon sa unsang paagi kini ‘Gipasundayag ni Jesu-Kristo.’ Nga si Jesus gitudloan ni Jehova maoy dayag gikan sa iyang mga pulong ug mga lihok. Busa buot natong mosundog kaniya sa kon unsay iyang gitudlo. Ug maingon nga si Jesus nagpasakop kanunay sa kabubut-on sa iyang Amahan, sa ingon kita kinahanglang magpasakop usab.

Ang misunod tulo ka mamumulong nagpakita kon sa unsang paagi si Jehova nagatudlo pinaagi sa mga miting ug mga asembliya. Kita nakabenepisyo gikan sa tanang lima ka mga miting sa kongregasyon ug angayng dili sayloan ang bisan hain kanila. Ang matag miting maoy hinungdanon alang sa atong espirituwal nga pag-uswag. Si Jehova nagatudlo usab kanato pinaagi sa atong sirkitong asembliya, distritong kombensiyon, ug mga programa sa usa ka adlaw espesyal nga asembliya. Aron makabatog kaayohan gikan niining tanan, kita kinahanglang maminaw nga maikagon ug dayon ipadapat ang atong nakat-onan.

Kini nga simposyom gisundan sa pakigpulong nga “Pagsakripisyo alang sa Personal nga Pagtuon.” Aron makabatog panahon alang niini, angay natong patalinghogan ang tambag sa Efeso 5:15, 16 nga pahimuslan ang panahon sa dili kaayo hinungdanong mga butang.

Ang usa ka makataronganong tumong sa atong pagkat-on sa putling pinulongan mao ang dedikasyon ug bawtismo. Kini nga kamatuoran gipasiugda diha sa pakigpulong nga “Bawtismo Niadtong Nakakat-on sa Putling Pinulongan.” Kini nga pinulongan nag-agak sa daghan ngadto sa dedikasyon ug bawtismo. Apan, ang usa human niana magpadayon sa pagsunod sa sumbanan ni Jesus pinaagi sa madasigong pagsangyaw sa maayong balita, pagsul-ob sa bag-ong personalidad, ug pagpabiling bulag gikan sa kalibotan.

Magahing Espirituwal nga Pagkaon

Ang mga kombensiyonista nahimuot usab sa pagdawat sa magahing espirituwal nga pagkaon nga gipasukad diha sa katumanan sa matagnaong mga drama. Sa hapon sa Huwebes, duha ka pakigpulong ang gipasukad diha sa mga tema nga gikuha gikan sa tagna ni Ezekiel. Ang una, “Ang Langitnong Mangangabayo ni Jehova Nagalihok,” naghubit sa usa ka dako, halangdon, makalilisang nga salakyanan sa langit nga nagalihok sa gikusgong samag kidlat. Kini naghulagway sa langitnong organisasyon ni Jehova, nga gisakyan sa Diyos nga sa mahigugmaon siya nagatultol sa matag lihok niini ug nagagamit niini sa pagtuman sa iyang mga katuyoan. Si Ezekiel naghulagway sa dinihogan sa espiritu nga nahibilin, ilabina sukad sa 1919. Ilabina sukad sa 1935 nga sila giduyogan sa “dakong panon.”​—Pinadayag 7:9.

Ang misunod nga pakigpulong nag-ulohang “Padayon sa Pagnunot Uban sa Makitang Organisasyon.” Walay pagduhaduha nga ang makitang organisasyon sa Diyos nagpadayon sa pagnunot uban sa iyang samag-karong organisasyon sa langit. Ingon sa gibuhat ni Ezekiel, ang mga alagad sa Diyos karong adlawa kinahanglang sa pagkamasinugtanon magabuhat sa ilang matagnaong komisyon bisan pa sa dili-pagpakabana, pagbiaybiay, o pagsupak. Ang padayong pagnunot motultol ngadto sa daghang mga panalangin karon ug sa kinabuhing walay kataposan diha sa kusog-nagasingabot nga bag-ong kalibotan sa Diyos.

Sa buntag sa Biyernes, ang magahing espirituwal nga pagkaon gitagana usab pinaagi sa tulo ka pakigpulong nga gipasukad sa Isaias kapitulo 28. Ang una niini nagpakita diha sa puwersadong mga termino nga ang espirituwal nga mga palahubog sa karaang Israel ug Juda naghulagway sa mga palahubog sa espirituwal sa Kakristiyanohan. Ug maingon nga sila kanhi nakasinatig kalaglagan gikan kang Jehova, busa silang anaa sa Kakristiyanohan malaglag.

Ang misunod nga pakigpulong, nga nag-ulohang “Ilang Dalangpanan​—Usa ka Kabakakan!,” naundan sa pintok nga pasidaan: Sama nga ang pagsalig sa karaang Juda sa Ehipto namatud-ang usa ka kawang nga dalangpanan, maingon man unya ang pakig-alyansa sa Kakristiyanohan uban sa politikanhong mga gahom sa atong adlaw. Ang ikatulong pakigpulong sa Isaias kapitulo 28, “Padayon sa Pagpasidaan sa Talagsaong Buhat ni Jehova,” gitumong ngadto sa katawhan sa Diyos. Ang pagabuhaton unya ni Jehova ngadto sa Kakristiyanohan sa husto pagatawgong talagsaon, kay kini unya moabot kaniya nga wala damha. Karong adlawa, si Jehova maoy usa ka purongpurong sa himaya alang sa gamayng panon sa dinihogang mga Kristohanon ug ngadto sa kapin sa upat ka milyong “ubang mga karnero.” (Juan 10:16) Ang mamumulong mihinapos uban sa makapatukmod nga mga pulong: “Hinaot ang atong kadasig, determinasyon, ug pagkamaunongon moamot ngadto sa walay kataposang pagdayeg sa atong Diyos, si Jehova!”

Pagsulti sa Putling Pinulongan Nagpasabot ug Pagpakita sa Inigsoong Gugma

Sa hapon sa Miyerkoles napasilsil sa mga kombensiyonista nga ang pagsulti sa putling pinulongan nagpasabot usab sa “Pagtagad sa mga Ilo ug mga Balo sa Ilang Kalisdanan.” Ang ilo nga batang mga lalaki matabangan pinaagi sa pagpakadawat ug personal nga pagbansay. Kita makapakitag konsiderasyon alang sa mga balo pinaagig malulutong mga pulong sa pagdasig, pinaagi sa paglakip kanila diha sa atong Kristohanong mga kalihokan ug sosyal nga mga panagkatigom, ug pinaagi sa paghatag kanila ug materyal nga tabang kon sila takos ug tinuod nga nanginahanglan. Ang mga interbiyu nagpakita kon sa unsang paagi kining mga butanga ginahimo.

Sa hapon sa Huwebes, ang laing makapadasig sa kasingkasing nga pakigpulong nagpakita “Sa Unsang Paagi ang mga Kristohanon Nagatagad sa Usag Usa.” Ang mga Saksi ni Jehova adunay maayong rekord sa pagtinagdanay sa usag usa, ilabina kon adunay mga kalisdana sama sa bagyo ug paglinog, kon may panginahanglan sa pagsulat ngadto sa mga opisyal, o kon adunay lokal nga mga panginahanglan. Apan sa dihang ang mga kalisdanan motungha tungod sa pagkadili-hingpit, atong angayng ipadapat ang mga prinsipyong nalangkit diha sa tambag ni Jesus sa Mateo 5:23, 24 ug 18:15-17. Ilabina kon bahin sa mga kahikayan sa negosyo tali sa mga igsoon nga adunay panginahanglan alang sa mutuwal nga pagtahod ug pagtagad aron walay amo o empleyado ang magbatog mahakogong bentaha sa espirituwal nga relasyon.

Pagsulti sa Putling Pinulongan Nagpasabot sa Pagbantay sa Atong Paggawi

Ang panginahanglan sa pagbantay sa atong paggawi sa balik-balik ginapasiugda. Busa, ang unang mamumulong sa hapon sa Martes naghisgot sa temang “Pagpatalinghog ug Pagbantay sa Pulong sa Diyos.” Iyang gipakita nga adunay duha ka pangunang katarongan sa atong pagtambong sa mga kombensiyon: aron sa pagkuha ug tukmang kahibalo ug aron madasig sa pagpadapat niana nga kahibalo.

Ang unang pakigpulong sa buntag sa Miyerkoles nagbangon ug mausisahong pangutana “Si Kristo ‘Nagdumot sa Pagkadaotan’​—Ikaw Ba?” Dili paigo ang paghigugma sa pagkamatarong. Atong gikinahanglan usab nga dumtan ang pagkadaotan aron mabatonan ang maayong tanlag, aron mahuptan ang maayong relasyon uban kang Jehova, aron malikayan nga mapasipalahan ang iyang ngalan, ug aron malikayan ang pag-ani sa mga bunga sa pagkadaotan​—pagkadunot ug kamatayon.

Ang suod nga kaamgid niana nga tema mao ang nagsunod nga pakigpulong, nga nag-ulohang “Isalikway ang Kalibotanong mga Handurawan, Pangitaa ang Katumanan sa Gingharian.” Si Satanas, si Eva, ug ang nahulog nga mga manulonda ang tanan nangita sa mga handurawan hangtod sa ilang pagkapukan. Ang kalibotanong mga handurawan, naglakip sa mga damgo sa materyal o niadtong nakiglabot uban sa gidiling mga kalihokan, misangpot sa pagkalugda kon dili usab grabeng kasaypanan. Aron masanta kining mga handurawa, angay natong pangitaon ang katumanan sa Gingharian pinaagi sa pagtuon, pag-ampo, pagtambong sa tigom, ug sa publikong ministeryo.

Sa pagkinabuhing matarong Kristohanong mga kinabuhi, angay natong patalinghogan usab ang tambag nga gihatag sa hapon sa Miyerkoles diha sa pakigpulong “Mga Kristohanon​—Pagkinabuhi Sulod sa Inyong Pinansiyal nga Kahinguhaan.” Ang pagkapakyas sa pagbuhat niini mosangpot sa makadaot nga mga epekto sa pisikal ug sa espirituwal. Ang dalan sa kaalam mao ang pagkuto sa imong mahakogong mga pangandoy pinaagi sa dili pagpangutang nga wala kinahanglana ug pinaagi sa pagplano ug usa ka reyalistikanhong badyet ug dayon magpabilin diha niana. Sa tanang panahon atong gikinahanglang ugmaron ang diyosnong debosyon. Duyog sa pagbati sa pagkatagbaw, kini maoy paagi sa dakong ganansiya.​—1 Timoteo 6:6-8.

Ang kahinungdanon sa pagbantay sa atong mga panagkauban ginapasiugda diha sa Martes nga pakigpulong “Ang Imong mga Higala ba mga Higala ni Jehova?” Ang atong mga higala angayng mga Kristohanon nga nagsul-ob sa samag Kristo nga personalidad ug mga masiboton sa buluhatong pagsangyaw. Ang kalibotanong mga kauban maoy dili mga higala sa Diyos, ug kita dili makigsandurot kanila nga walay kadaot sa atong kaugalingon. Bisan sa sulod sa kongregasyon, kita angayng magmapilion kon ang atong mga panagkauban mahimong tinuod makapalig-on.

Ang nahisgotang tambag mahitungod sa paggawi sa dayag gipasiugda pinaagi sa modernong-adlaw nga drama. Kadto may ulohang “Pagbuntog sa Malansisong mga Buhat sa Yawa.”

Tambag sa Putling Pinulongan alang sa mga Pamilya

Ang gikinahanglan ug dako mao ang pakigpulong sa Miyerkoles “Mga Ginikanan​—Tumana ang Inyong mga Obligasyon!” Ang mga ginikanan mismo angayng mahibalo sa kabubut-on sa Diyos ug nagabuhat niana kutob sa ilang maarangan. Angay nilang isilsil usab ang Pulong sa Diyos ngadto sa ilang mga anak. Dugang pa, dili pa igo ang pagdala sa mga anak ngadto sa Kristohanong mga tigom ug sa pagsangyaw sa kanataran. Sila kinahanglang matudloan sa paghigugma kang Jehova ug sa pagkakita sa praktikal nga kaalam sa pagbuhat sa diyosnong mga butang.

Sunod miabot ang simposyom sa “Ang Pamilya sa Atong Adlaw.” Ang unang mamumulong nagpakita nga ang pamilya naggikan sa Diyos. Ang amahan kinahanglang makigkomunikar ug maayo sa espirituwal nga mga butang. Ang mga inahan kinahanglang maayong mga tig-atiman sa balay, ug ang mga anak kinahanglang magpakitag pagtahod kang Jehova pinaagi sa pagkooperar uban sa ilang mga ginikanan.

Ang nagsunod nga mamumulong nagpakita nga ang pamilya “Nailalom sa Atake sa mga Kaaway.” Ang kalisod sa ekonomiya mikuhag ilang bahin. Ang mga trabahoan kaylap sa mga tentasyon sa pagbuhat ug daotan, ug mga presentasyon sa medya puno sa kabangisan, gidiling sekso, ug pangagni sa materyalismo. Ang instruksiyon kinahanglang sayong magsugod, ug ang dakong kasibot maoy gikinahanglan aron mabuntog ang kalibotanong mga impluwensiya. Ang maayong paggamit kinahanglang himoon sa teokratikanhong mga galamiton nga gitagana sa Watch Tower Society.

Ang sunod nga pakigpulong, nga naghisgot uban sa pamilya sa ‘Pagkaluwas Ngadto sa Bag-ong Kalibotan,’ dugang nagpasiugda sa seryosong kaakohan sa mga ginikanan. Ang pagbansay sa kabataan kinahanglang himoon uban ang labing dakong kamaikagon. Ang maayong tambag gihatag bahin sa mga pagtuon sa Bibliya sa pamilya ug kon unsay pagatun-an, ang tanan uban sa katuyoan sa pag-abot sa mga kasingkasing sa kabataan. Niana lamang nga ang mga ginikanan ug kabataan makalaom nga maluwas ngadto sa bag-ong kalibotan ingong usa ka pamilya.

Ang paghatag ug maayong tambag alang sa usa ka situwasyon sa pamilya diin naamgohan sa daghang mga Saksi mao ang pakigpulong nga “Pag-antos Sulod sa usa ka Nabahing Panimalay.” Kadtong anaa sa maong mga sirkumstansiya gitambagan nga dili mawad-ag paglaom nga ang dili-magtutuo malagmit sa kapulihay mahimong usa ka magtutuo. Paggugol ug panahon uban sa dili-magtutuong kapikas ug paningkamoti nga makab-ot mo ang tanang kinahanglanon alang sa Kristohanong kapikas. Ikaw makapangayog tabang gikan sa mga ansiano o tingali sa uban nga gikan sa nabahing mga panimalay.

Pagsulti sa Putling Pinulongan ngadto sa Uban

Labing tukma, ang dakong pagtagad gihatag ngadto sa atong pagpahimulos sa mga kahigayonan nga itudlo ang putling pinulongan ngadto sa uban. Busa, sa buntag sa Miyerkoles ang mga kombensiyonista nakapatalinghog sa pakigpulong “Paggamit sa Inyong Bililhong Panahon nga Maalamon.” Sa pagbuhat niana atong tukoron ang mga prayoridad, sa pagtuman sa Mateo 6:33, nga nag-ingon: “Nan, padayong pangitaa pag-una ang gingharian ug ang iyang pagkamatarong.” Kana naglakip sa paggahin ug panahon alang sa personal nga pagtuon sa Bibliya, pagtambong sa tanang mga tigom, ug regular diha sa ministeryo sa kanataran. Kini nagkinahanglang atong pahimuslan ang panahon gikan sa dili kaayo hinungdanon bisan pag makalingaw nga mga kalihokan. Ang ubay-ubay nga mga interbiyu nagpakita kon sa unsang paagi ang uban nagabuhat niini.

Kinahanglang dili nato hikalimtan nga kita mga Saksi ni Jehova. Sa hapon sa Huwebes, ang ubay-ubayng mga pasundayag nagpatanom nianang lintunganayng punto ubos sa temang “Padayon sa Pagsulti sa Putling Pinulongan sa Tanang Okasyon.” Kini nga mga pasundayag nagpakita kon sa unsang paagi kini himoon diha sa pagsangyaw sa kadalanan, sa dili pormal nga pagsangyaw, ug sa paggamit ug telepono. Ang dili-mahakogong gugma alang kang Jehova nga Diyos ug sa atong silingan motukmod kanato sa pagsulti sa putling pinulongan sa tanang kahigayonan.

Suod nga nalangkit niini nga tema mao ang misunod nga presentasyon, “Mga Panalangin Niadtong Wala Mobalibad.” Sa tataw nga pagtandi uban sa Kakristiyanohan nagbarog ang nagatudlong organisasyon sa mga Saksi ni Jehova sa tibuok yuta. Sa tinagsatagsa, kinahanglang atong suklan ang tanang kapit-osan, sama sa opisyal nga pagsupak, kaylap nga kawalay pagtagad, ug mga suliran sa ekonomiya. Ang mga pasundayag nga gipasukad sa librong Nangatarongan Pinasukad sa Kasulatan nagpakita kon sa unsang paagi kini nga kapit-osan mabuntog.

Ang makapadasig usab nga kasibot sa pagsangyaw mao ang drama sa Bibliya Pagbuhat sa Kabubut-on sa Diyos Uban ang Kasibot. Kini nagpakita sa kasibot ni Jehu alang sa ngalan ni Jehova ug pagkahinungdanon alang kanato ang pagpasundayag sa samang kadasig ug kasibot alang sa buluhaton sa Diyos.

Mga Giluwat sa Kombensiyon

Dihay duha ka talagsaong mga giluwat sa Iningles ug sa Aleman sa panahon sa kombensiyon. Ang una niining mga publikasyona nga gipailaila maoy maylabot sa pakigpulong nga nag-ulohang “Pagluwas sa Imong Kinabuhi Uban ang Dugo​—Sa Unsang Paagi?” Ang mamumulong naghisgot pag-una sa mga riyesgo nga duyog sa mga pag-abuno sa dugo. Iyang gipunting nga adunay daghang mga kapilian sa dugo sa paghulip sa dugo nga nawala. Apan ang mga Saksi ni Jehova midumili sa dugo dili tungod kay kini makadaot sa lawas kondili tungod kay ang pagdawat niini maoy dili balaan. Sila nagalikay, dili tungod kay ang dugo mahugaw, kondili tungod kay kini maoy bililhon sa Diyos. Ang dugo nga maoy tinuod nagaluwas-kinabuhi mao ang nagalukat nga dugo ni Jesu-Kristo. Sa pagtapos ang mamumulong nagpahimuot sa iyang mga mamiminaw pinaagi sa pagpakita sa 32-panid nga brosyur Sa Unsang Paagi ang Dugo Magaluwas sa Imong Kinabuhi?

Ang ikaduhang bililhong giluwat maoy maylabot sa pakigpulong “Pangitaa si Jehova, Kamong Katawhan.” Sa kadaghanan, wala pangitaa sa mga tawo ang Diyos. Ang paglungtad sa daghang nagkalainlaing mga relihiyon nagpakita kon sa unsang paagi sayop nga nagtudloan ang tawo sa pagpangita sa Diyos tungod kay siya midumili sa Pulong sa Diyos. Ingon sa gipakita sa atong mga taho sa Memoryal matag tuig, minilyon ang nagkinahanglang matabangan sa pagkuha sa ilang baroganan kang Jehova. Isaias 55:6, 7 nagpakita nga si Jehova sa pagkamatuod maoy mahigugmaon ug maluloy-ong Diyos, andam sa “pagpasaylo sa madagayaon gayod.” Ingong iyang mga Saksi, kita gihatagan sa putling pinulongan aron nga atong matabangan ang uban nga moduyog kanato diha sa pag-alagad kang Jehova nga inabagay.

Karong adlawa, ang katawhan ni Jehova nagaatubang sa usa ka hagit tungod sa mga kalihokan sa masa sa mga populasyon. Ingong sangpotanan, ang tanang matang sa mga relihiyon hayan ginaangkon sa mga tawo diha sa atong teritoryo. Aron atong matabangan ang mga Hindu, Buddhista, Shintoista, ug niadtong anaa sa daghang ubang mga relihiyon, ang Sosyedad nagtagana sa nindot 384-panid nga librong Pagpangita sa Katawhan sa Diyos. Kini may awtoridad nga nagpresentar sa pangunang mga pagtulon-an sa pangunang mga relihiyon gawas sa Kakristiyanohan. Apan kini usab nagsuhid sa rekord sa bakak nga relihiyon sulod sa Kakristiyanohan. Kini nga libro magbukas sa dalan sa pagsugod ug mga panagtuon sa Bibliya uban sa mga tawong nag-angkon sa daghang nagkalainlaing mga relihiyon.

Pakigpulong Publiko ug Panapos nga mga Komento

“Nahiusa sa Putling Pinulongan” mao ang ulohan sa Biyernes nga pakigpulong publiko. Ang mamumulong nagpakita nga bisag tulo ka libo ka nagkalainlaing mga pinulongan karon ang nagsilbing mga babag sa panaghiusa, ang putling pinulongan maoy usa ka gamhanan makapahiusang puwersa. Kini nanalipod sa mga Saksi ni Jehova batok sa Babilonyanhong mga kasaypanan, nagtudlo kanila sa pagtahod sa pagkabalaan sa kinabuhi ug sa dugo, ug nakatabang kanila sa pagkinabuhi nga uyon sa mga prinsipyo sa Bibliya nga makabenepisyo kanila sa espirituwal ug sa pisikal. Ang tanan nagkinahanglang mabalaka mahitungod sa pagkakat-on ug sa pagsulti sa putling pinulongan, kay ang nagabuhat lamang sa ingon ang mamaluwas sa Armageddon. Wala nay panahon nga usikan pa sa pagpatalinghog sa tambag sa Sofonias 2:1-3.

Human sa pila ka maayong tambag sa Kasulatan sa panginahanglang “Managtukaw Maylabot sa mga Pag-ampo,” miabot ang panapos nga pahayag nga gipasukad diha sa temang “Paglakaw nga Nahiuyon sa Putling Pinulongan.” Ang daghang nagalakaw karon nga nahiuyon sa putling pinulongan sa pagkamatuod nagauswag. Ug bahin sa putling pinulongan nga gipakita niadtong mitambong niini nga mga kombensiyon pinaagi sa ilang kahinlo, kahapsay, ug organisasyonal nga kaharmoniya. Ang bag-ong giluwat nga mga basahon motabang sa tanang mga Saksi ni Jehova sa pagpakaylap sa putling pinulongan nga mas epektibo.

Ang kataposang mamumulong sa kombensiyon nagpahinumdom sa tanan sa panginahanglang magmalahutayon. Iyang gipakita nga ingong resulta niini nga kombensiyon, ang tanan angayng mamalig-on sa ilang determinasyon nga magpadayon. Siya mitapos dayon uban sa mga pulong: “Hinaot nga kita magpadayon sa paglakaw nga nahiuyon sa hinatag-Diyos nga putling pinulongan aron atong mahimaya ang atong mahigugmaon langitnong Amahan, si Jehova nga Diyos, karon ug sa walay kataposan!”

[Kahon sa panid 26]

Ang gidaghanon sa nanambong sa kombensiyon sa Kasadpang Berlin maoy 44,532, ug 1,018 ang nabawtismohan. Migugol ug 19 minutos alang sa mga kandidato sa bawtismo sa paglumbay diha sa Olympia nga Estadyom, ug niining panahona dihay padayon nga palakpak. Dihay usa ka espesyal nga seksiyon alang sa nagasultig-Iningles nga mga delegado. Mga 6,000 niini ang nakadungog sa entirong programa diha sa ilang pinulongan. Niini nga kombensiyon, dihay 4,500 usab nga gikan sa Polandiya; panahon sa duha ka tingpaniudto, ang mga membro sa Nagamandong Lawas mihatag ug mugbong mga pakigpulong alang sa ilang kaayohan.

[Hulagway sa panid 24, 25]

1. Olympia nga Estadyom, Kasadpang Berlin

2. Pinatik nga programa sa kombensiyon

3. Duha ka gatos nga mga bus nagdala sa mga delegado gikan sa Sidlakang Alemanya

4. Polakong mga kombensiyonista nalipay sa pagkadawat sa pinatik nga mga giluwat

5. Ang mga dekorasyon sa bulak nagpadan-ag sa talan-awon

6. Si A. D. Schroeder, usa sa mga membro sa Nagamandong Lawas, sa programa diha sa Kasadpang Berlin