Tagda ang Matagnaong Pulong sa Diyos!
Mga Pangunang Punto Gikan sa Ikaduhang Pedro
ANG matagnaong pulong ni Jehova, o mensahe, maoy sama sa usa ka lamparahan nga nagadan-ag diha sa usa ka mangitngit nga dapit, ug ang matuod nga mga Kristohanon kinahanglang mohatag ug seryosong pagtagad niana. Dili kana sayon kon maningkamot ang bakak nga mga magtutudlo sa pagpalambo sa apostasiya. Apan kana mahimo pinaagi sa balaang tabang. Ug kita sa hugot magpabilin sa pulong sa Diyos kon kita buot nga makalabang buhi sa tulin nga nagasingabot nga adlaw ni Jehova. Ang ikaduhang dinasig nga sulat ni apostol Pedro makatabang kanato sa paghatag ug pagtagad sa matagnaong pulong ni Jehova. Tingali gisulat ni Pedro kining sulata gikan sa Babilonya sa mga 64 K.P. Diha sa iyang sulat iyang gilabanan ang kamatuoran sa Diyos, gipasidan-an ang kaubang mga magtutuo sa samag-kawatan nga pag-abot sa adlaw ni Jehova, ug gitabangan ang iyang mga mamiminaw nga dili magpadala sa kasaypanan sa masukihon sa balaod nga katawhan. Sanglit ang adlaw ni Jehova halos ania na kanato, kita makabenepisyo ug dako gikan sa dinasig nga mga pulong ni Pedro.
Salig Diha sa Matagnaong Pulong
Ingong mga Kristohanon, angay kitang manlimbasog sa atong kaugalingon sa pagpasundayag sa diyosnong mga hiyas ug hatagan ug pagtagad ang matagnaong pulong. (1:1-21) Aron malikayan nga mahimong dili-aktibo o dili-mabungahon, atong ‘ipuno diha sa atong pagtuo ang kaligdong, kahibalo, pagpugong sa kaugalingon, paglahutay, diyosnong debosyon, pagbating inigsoon, ug ang gugma.’ Sa dihang nakita ni Pedro ang pagkausab sa dagway ni Jesus ug nakadungog sa Diyos nga naghisgot bahin kang Kristo sa maong okasyon, ang matagnaong pulong gihimong mas segurado. (Marcos 9:1-8) Ngadto nianang dinasig nga pulong kita kinahanglang mohatag ug pagtagad.
Pagbantay Batok sa mga Apostata
Pinaagi sa paghatag ug bug-os nga pagtagad sa matagnaong pulong sa Diyos, kita makabantay batok sa mga apostata ug sa ubang daotang mga indibiduwal. (2:1-22) Nagpasidaan si Pedro nga ang bakak nga mga magtutudlo makasulod sa kongregasyon. Apan, mopakanaog ug grabeng silot si Jehova batok niini nga mga apostata, sama sa iyang pagsilot sa masupilong mga manulonda, sa dili-diyosnong kalibotan sa mga adlaw ni Noe, ug sa mga siyudad sa Sodoma ug Gomorra. Ang bakak nga mga magtutudlo nagatamay sa hinatag-sa-Diyos nga awtoridad ug nagdani sa mga mahuyang sa pagduyog kanila sa kalapasan. Mas maayo pa unta nga wala makadangat ang mga apostata sa pagkahibalo “sa dalan sa pagkamatarong kay human nga tukmang nakahibalo niana motalikod sa balaang kasugoan nga gitugyan diha kanila.”
Ang Adlaw ni Jehova Nagasingabot!
Mahitungod sa mga tawong nagahatag ug pagtagad sa matagnaong pulong niining kataposang mga adlaw, dili nato tugotan nga kita maimpluwensiyahan sa mga mayubiton nga nagabiaybiay sa mensahe mahitungod sa presensiya ni Kristo. (3:1-18) Sila nakalimot nga ang Diyos nga may katuyoan sa paglaglag niini nga sistema sa mga butang ang naglaglag sa una pa sa Lunop nga kalibotan. Ang pailob ni Jehova dili angay pagaisipon nga paglangaylangay, kay buot niya nga ang mga tawo maghinulsol. Kini nga sistema pagalaglagon “sa adlaw ni Jehova” ug pagapulihan sa ‘bag-ong mga langit ug usa ka bag-ong yuta diin magapuyo ang pagkamatarong.’ Busa, maningkamot gayod kita nga mapalgang “walay buling ug hugaw ug maanaa sa kalinaw.” Inay magpalimbong sa bakak nga mga magtutudlo, pasagdi nga managtubo kita diha sa kahibalo ni Jesu-Kristo.
Atong itisok sa kasingkasing ang mga pulong ni Pedro. Ayaw gayod pagkapakyas sa pagbantay batok sa bakak nga mga magtutudlo. Pagkinabuhi uban ang kahibalo nga ang adlaw ni Jehova haduol na kaayo. Ug kanunay gayod hatagi ug pagtagad ang matagnaong pulong sa Diyos.
[Kahon/Hulagway sa panid 31]
Gitambog Ngadto sa Tartaro: Si Jehova “wala magpanuko sa pagsilot sa mga manulonda nga nakasala, apan, nagtambog kanila ngadto sa Tartaro, gibalhog sila ngadto sa yungib sa mabagang kangitngit nga gitagana alang sa paghukom.” (2 Pedro 2:4) Dili kini ang sugilambong nga Tartaro nga gihulagway diha sa Iliad ni Homer ingong usa ka dapit sa ilalom sa yuta diin ang ubos-ubos nga bakak nga mga diyos, si Cronus ug ubang Titano nga mga espiritu, gibilanggo. Ang Tartaro sa Bibliya mao ang kinaubsan, samag-bilanggo nga kahimtang diin ngadto gitambog sa Diyos ang masupilong mga manulonda sa mga adlaw ni Noe. (Genesis 6:1-8; 1 Pedro 3:19, 20; Judas 6) “Ang mabagang kangitngit” maoy misangpot gikan sa ilang pagkaputol gikan sa espirituwal nga kahayag pinaagi sa Diyos ingong mga pinalagpot gikan sa iyang pamilya. Mahitungod kanilang gitagana alang sa iyang grabe nga silot, sila adunay mangiob lamang nga palaabuton. Ang Tartaro maoy usa ka pasiunang lakang sa pagtambog nga maagoman ni Satanas ug sa iyang mga demonyo sa dili pa magsugod ang Usa ka Libo ka Tuig nga Pagmando ni Kristo. Ang ilang kalaglagan mahitabo human sa Milenyal nga Pagmando ni Kristo.—Mateo 25:41; Pinadayag 20:1-3, 7-10, 14.
[Hulagway]
Itambog ni Zeus ang ubos-ubos nga mga diyos ngadto sa usa ka sugilambong nga Tartaro
[Credit Line]
National Archaeological Musuem, Athens, Greece