Mga Pangutana Gikan sa mga Magbabasa
◼ Ang Juan 18:15 naghisgot sa usa ka tinun-an nga nailhan sa hataas nga saserdote. Kini ba mao mismo ang tinun-an nga sayosayo mikalagiw nga “hubo,” sumala sa gitaho sa Marcos 14:51, 52?
Dili, mopatim-aw nga ang tawong nailhan sa hataas nga saserdote mao si apostol Juan, samtang ang tinun-an nga si Marcos mao ang mikalagiw nga “hubo”?
Sa pagtagad sa maong mga asoy sumala sa panahon, mosugod kita sa tanaman sa Gethsemane. Ang mga apostoles nangahadlok sa gidakop si Jesu-Kristo. “Silang tanan mibiya kaniya ug nangalagiw.” Ang sunod mismo nga bersikulo sa asoy ni Marcos mipahayag sa lahi niana: “Apan ang usa ka batan-ong lalaki nga nagkalupo sa pino lino nga panapton ibabaw sa iyang hubo nga lawas misunod kaniya sa duol; ug gisulayan nila ang pagdakop kaniya, apan iyang gibiyaan ang iyang lino nga panapton ug nakabuhi nga hubo.”—Marcos 14:50-52.
Busa, ang unang sanong sa 11 ka apostoles gipalahi sa iya sa maong wala-nganli nga tinun-an, mao nga makataronganon ang paghinapos nga siya dili usa sa mga apostoles. Kining hitaboa gitala lamang diha sa Ebangbelyo nga gisulat sa sayong tinun-an nga si Juan Marcos, ang ig-agaw ni Bernabe. Busa, may katarongan sa pagtuo nga si Marcos mao ang “usa ka batan-ong lalaki” nga misunod sa gidakop nga Jesus apan nga mikalagiw nga wala ang iyang panapton nga kupo sa gisulayan siya sa pagdakop usab.—Buhat 4:36; 12:12, 25; Colosas 4:10.
Sa usa ka panahon niadtong gabhiona, si apostol Pedro misunod usab kang Jesus, sa layolayo. Sa maong diwa may kaamgid; ang batan-ong tinun-an (Marcos) misunod kang Jesus apan mihunong, samtang ang ulahing duha sa mga apostoles nga nangalagiw maoy mibanos sa pagsunod sa gidakop nga Agalon nila. Sa Ebanghelyo ni apostol Juan, atong mabasa: “Karon si Simon Pedro ingon man ang laing tinun-an nagsunod kang Jesus. Ang maong tinun-an nailhan sa hataas nga saserdote, ug siya misulod uban kang Jesus ngadto sa sawang sa hataas nga saserdote.”—Juan 18:15.
Si apostol Juan migamit sa ngalang “Juan” sa pagtumong kang Juan Bautista apan wala gayod magtumong sa iyang kaugalingon pinaagi sa ngalan. Pananglitan, siya misulat mahitungod sa “tinun-an nga nagapamatuod mahitungod niining mga butanga ug misulat niining mga butanga.” Sa susama: “Ang nakakita niini nagpamatuod, ug ang iyang pamatuod maoy matuod, ug kana siya nahibalo nga siya nagasulti sa tinuod nga mga butang.” (Juan 19:35; 21:24) Matikdi usab ang Juan 13:23: “May mihirag sa atubangan sa sabakan ni Jesus nga usa sa iyang mga tinun-an, ug siya gihigugma ni Jesus.” Kadto maoy sa dayon na sa pagdakop ni Jesus. Sa ulahi sa maong adlaw ang gilansang nga Jesus nagpili sa usa ka tinun-an, si kinsa gihisgotan ni Jesus sa susamang mga pulong: “Sa pagkakita sa iyang inahan ug sa tinun-an nga iyang gihigugma nga nagtindog sa duol, [si Jesus] miingon ngadto sa iyang inahan: ‘Babaye, tan-awa! Imong anak!’”—Juan 19:26, 27; itandi ang Juan 21:7, 20.
Kining samang kinaiya sa dili pagngalan sa iyang kaugalingon dayag sa Juan 18:15. Dugang pa, si Juan ug Pedro gilangkit diha sa tapos-pagkabanhaw nga asoy sa Juan 20:2-8. Kining mga ilhanan nagpaila nga si apostol Juan mao “ang tinun-an [nga] nailhan sa hataas nga saserdote.” Ang Bibliya wala maghatag ug pasiunang impormasyon bahin sa kon sa unsang paagi ang Galileanhong apostol (Juan) nakaila kaha, ug nailhan, sa hataas nga saserdote. Apan ang iyang pagkailado sa panimalay sa hataas nga saserdote nakapaarang kang Juan sa pagkanakaagi sa magbalantay sa ganghaan pasulod sa sawang ug nakapasulod usab kang Pedro.