Sundogon ba Nimo ang Kaluoy sa Diyos?
“Sundoga ninyo ang Diyos, ingon nga mga anak nga pinalangga.”
1. Nganong ang pagsundog sa uban hinungdanon natong tanan?
ALANG sa kaayohan o sa kadaot, ang kadaghanang tawo nagasundog sa uban. Ang mga tawo nga atong gipakig-ubanan, ug nga tingali atong sundogon, sa usa ka sukod makaapekto kanato. Ang dinasig nga magsusulat sa Proverbio 13:20 mipasidaan: “Siya nga nagalakat uban sa mga tawong maalamon mahimong maalamon, apan siya nga nagapakig-uban sa mga buang magaantos tungod niana.” Nan, uban sa maayong katarongan, ang Pulong sa Diyos nagaingon: “Sundoga, dili ang daotan, kondili ang maayo. Siya nga nagabuhat ug maayo iya sa Diyos.”—3 Juan 11.
2. Kinsa ang angay natong sundogon, ug sa unsang mga paagi?
2 Aduna kitay maayong panig-ingnan sa Bibliya sa mga lalaki ug babaye nga atong masundog. (1 Corinto 4:16; 11:1; Filipos 3:17) Apan, ang panguna natong sundogon mao ang Diyos. Diha sa Efeso 4:31–5:2, human hisgoti ang mga gawi ug batasan nga atong likayan, si apostol Pedro nag-awhag kanato nga “magmapuangoron, nga dagayang magpinasayloay sa usag usa.” Motultol kini sa pangunang tambag: “Busa, sundoga ninyo ang Diyos, ingon nga mga anak nga pinalangga, paglakaw kamo diha sa gugma.”
3, 4. Unsang kahubitan sa kaugalingon ang gihatag sa Diyos, ug nganong atong hatagag pagtagad ang iyang pagkahimong Diyos sa hustisya?
3 Unsa ang mga paagi ug mga hiyas sa Diyos nga kinahanglan natong sundogon? Daghag bahin ang iyang personalidad ug mga buhat, sumala sa makita sa paagi sa iyang paghubit sa iyang kaugalingon ngadto kang Moises: “Si Jehova, usa ka Diyos nga maluloy-on ug mapuangoron, mahinay sa pagkasuko ug dako sa mahigugmaong-kalulot ug kamatuoran, nga nagatipig sa mahigugmaong kalulot alang sa linibo, ug nagapasaylo sa pagkadaotan ug kalapasan ug sa sala, ug walay makalingkawas gikan sa iyang silot, nga nagasilot sa mga anak ug sa mga apo tungod sa kalapasan sa mga amahan.”—Exodo 34:6, 7.
4 Sanglit si Jehova “nahagugma sa pagkamatarong ug sa hustisya,” tino gayod nga atong sayron ug sundogon kining bahina sa iyang personalidad. (Salmo 33:5; 37:28) Siya ang Maglalalang, ug ang kinatas-ang Maghuhukom ug Maghahatag-sa-Balaod, busa siya nagapadayag ug hustisya ngadto sa tanan. (Isaias 33:22) Kini tin-awng gipaila diha sa iyang pagpangayog hustisya ug sa pagpatuman niini diha sa iyang katawhang Israel ug sa ulahi sa Kristohanong kongregasyon.
Gituman ang Balaang Hustisya
5, 6. Sa unsang paagi napadayag ang hustisya diha sa pagpakiglabot sa Diyos sa Israel?
5 Sa dihang gipili ang Israel ingong iyang katawhan, nangutana ang Diyos kon sila ‘magapatalinghog ba gayod sa iyang tingog ug magabantay sa iyang tugon.’ Nagtigom diha sa tiilan sa Bukid sa Sinai, sila mitubag: “Ang tanan nga giingon ni Jehova andam namong buhaton.” (Exodo 19:3-8) Pagkaseryosong buluhaton! Pinaagi sa mga manulonda, ang Diyos mihatag sa mga Israelinhon ug mga 600 ka balaod, nga katungdanan nilang tumanon kay sila usa man ka katawhan nga nagpahinungod kaniya. Komosta kon adunay modumili sa pagtuman? Ang usa ka batid sa Balaod sa Diyos mipatin-aw: “Ang pulong nga gipahayag sa mga manulonda namatud-an nga malig-on, ug ang matag paglapas ug pagsupak makadawat ug silot sumala sa hustisya.”—Hebreohanon 2:2.
6 Oo, ang usa ka Israelinhon nga dili motuman moatubang sa “silot sumala sa hustisya,” dili sa tawhanong hustisya nga kulang, kondili sa hustisya nga gikan sa atong Maglalalang. Nagpaigo ang Diyos ug pipila ka silot alang sa mga paglapas sa balaod. Ang labing seryosong silot mao ang ‘pagputol,’ o pagpatay. Kana aplikado sa seryosong kalapasan, sama sa idolatriya, panapaw, pakigluon sa suod nga kadugo, pakigluon sa mananap, homoseksuwalidad, paghalad ug bata, pagbuno, ug pag-abuso sa dugo. (Levitico 17:14; 18:6-17, 21-29) Dugang pa, si bisan kinsang Israelinhon nga motuyo ug dili mahinulsolong molapas sa bisan unsang balaang balaod mahimong “putlon.” (Numeros 4:15, 18; 15:30, 31) Sa dihang kining balaang hustisya ipahamtang, ang mga epekto hayan mabati sa mga kaanakan sa nakasala.
7. Unsa ang pipila ka sangpotanan sa pagpahamtang sa hustisya taliwala sa karaang katawhan sa Diyos?
7 Ang maong mga silot nagapasiugda sa pagkaseryoso sa paglapas sa balaang balaod. Pananglitan, kon ang usa ka anak lalaki mahimong palahubog ug busawan, dad-on siya atubangan sa hamtong nga mga maghuhukom. Kon makaplagan nga siya matinuyoon, dili mahinulsolong mamumuhat ug daotan, ang iyang mga ginikanan makig-ambit sa pagpahamtang sa hustisya. (Deuteronomio 21:18-21) Kita nga mga ginikanan makahanduraw nga dili kadto sayon nga buhaton. Bisan pa nasayod ang Diyos nga kinahanglan kadto aron dili mokaylap ang pagkadaotan taliwala sa matuod nga mga magsisimba. (Ezekiel 33:17-19) Gihikay kini sa Usa nga mahitungod kaniya kini ang ikaingon: “Ang tanan niyang mga dalan hustisya. Usa ka Diyos nga matinumanon, nga walay inhustisya diha kaniya; matarong ug matul-id siya.”—Deuteronomio 32:4.
8. Sa unsang paagi nagatimaan ang hustisya sa pakiglabot sa Diyos sa Kristohanong kongregasyon?
8 Human sa daghang siglo gisalikway sa Diyos ang nasod sa Israel ug gipili ang Kristohanong kongregasyon. Apan si Jehova wala mausab. Komitido gihapon siya alang sa hustisya ug mahubit ingong “usa ka kalayo nga nagaut-ot.” (Hebreohanon 12:29; Lucas 18:7, 8) Busa siya padayon nga adunay tagana sa pagtisok sa diyosnong kahadlok diha sa tibuok kongregasyon pinaagi sa pagpalagpot sa mga mamumuhat ug daotan. Ang dedikadong mga Kristohanon kinsa nahimong dili-mahinulsolong mamumuhat ug daotan palagpoton.
9. Unsa ang pagpalagpot, ug unsa ang malampos niini?
9 Unsay nalangkit sa pagpalagpot? Makakaplag kitag tinuod nga pagtulon-an diha sa paagi sa pag-atiman sa usa ka suliran sa unang siglo. Dihay usa ka Kristohanon sa Corinto nga nakighilawas sa asawa sa iyang amahan ug wala maghinulsol, busa nagsugo si Pablo nga ipalagpot siya gikan niadtong kongregasyona. Kinahanglan kining buhaton aron mapanalipdan ang kahinlo sa katawhan sa Diyos, tungod kay “ang diyutay nga pudyot sa igpapatubo mopatubo sa tibuok nga masa.” Ang pagpalagpot kaniya makapugong nga dili mapasipalahan ang Diyos ug ang Iyang katawhan. Ang masakit nga disiplina sa pagpalagpot basin usab makabalik sa iyang panimuot ug masilsil diha kaniya ang angay nga kahadlok alang sa Diyos ug sa kongregasyon.—1 Corinto 5:1-13; itandi ang Deuteronomio 17:2, 12, 13.
10. Unsay pagsanong sa mga alagad sa Diyos kon dunay mapalagpot?
10 Ang balaang sugo mao nga kon ang usa ka daotan mapalagpot, ang mga Kristohanon kinahanglan “dili makig-uban [kaniya] . . . , bisan na lang sa pagpakigsalo kaniya sa pagpangaon.”a Busa ginaputol siya gikan sa panag-ubanay, apil sa pakigkuyogkuyog, uban sa mga maunongon nga nagatahod ug buot nga molakaw subay sa balaod sa Diyos. Ang pipila kanila tingali maoy mga paryente nga gawas sa suod nga pamilya, nga dili bahin sa samang panimalay. Lagmit lisod alang sa mga hingtungdang paryente ang pagtuman nianang balaang sugo, sama nga dili sayon alang sa mga Hebreohanong ginikanan nga ilalom sa Moisesnong Kasugoan ang pag-apil sa pagpatay sa usa ka daotang anak. Sa gihapon, tin-aw ang sugo sa Diyos; busa kita makatino nga matarong ang pagpalagpot.—1 Corinto 5:1, 6-8, 11; Titus 3:10, 11; 2 Juan 9-11; tan-awa Ang Bantayanang Torre, Marso 15, 1982, panid 14-26; Abril 15, 1988, panid 28-31.
11. Sa unsang paagi madayag ang lainlaing bahin sa personalidad sa Diyos may kalabotan sa pagpalagpot?
11 Hinumdomi, hinunoa, nga ang atong Diyos dili lamang hustisya; apan siya usab “madagayaon sa mahigugmaong-kalulot, nga nagapasaylo sa pagkadaotan ug sa paglapas.” (Numeros 14:18) Ang iyang Pulong nagapatin-aw nga ang gipalagpot mahimong maghinulsol, mangayog kapasayloan sa Diyos. Unya unsa pa? Ang eksperyensiyadong mga ansiano mahimong makigkita kaniya sa pagtino nga mainampoon ug maampingon kon aduna bay ebidensiya nga iyang gihinulsolan ang sala nga mitultol sa pagpalagpot kaniya. (Itandi ang Buhat 26:20.) Kon mao, mahimo siyang ipasig-uli sa kongregasyon, sama sa gipakita sa 2 Corinto 2:6-11 nga maoy nahitabo sa usa ka tawo sa Corinto. Apan, ang pipila sa mga napalagpot napalayo gikan sa kongregasyon sa Diyos sa daghang katuigan, busa aduna bay mahimo aron tabangan sila nga makita ang dalan sa pagbalik?
Hustisya nga Gitimbangan ug Kaluoy
12, 13. Nganong ang atong pagsundog sa Diyos maglakip ug labaw kay sa pagpabanaag lamang sa iyang hustisya?
12 Ang mga nag-una naghisgot ilabina sa usa lamang ka bahin sa mga hiyas sa Diyos, sumala sa gihisgotan sa Exodo 34:6, 7. Ang maong mga bersikulo, hinunoa, naglatid ug labaw pa kay sa hustisya lamang, ug sila nga buot mosundog kaniya magtan-aw dili lamang sa pagpatuman sa hustisya. Kon mogama ka ug modelo sa templo nga gitukod ni Solomon, usa lang ba ka haligi niini ang imong tun-an? (1 Hari 7:15-22) Dili, kay kana dili mohatag kanimog timbang nga hulagway sa kinaiyahan ug papel sa templo. Sa susama, kon buot kita nga mosundog sa Diyos, kinahanglan sundogon usab nato ang uban niyang mga paagi ug hiyas, sama sa iyang “pagkamaluloy-on ug pagkamapuangoron, mahinay sa kasuko ug dako sa mahigugmaong-kalulot ug kamatuoran, nga nagatipig sa mahigugmaong-kalulot alang sa linibo, ug nagapasaylo sa sala.”
13 Ang kaluoy ug pagkamapinasayloon maoy sukaranang mga hiyas sa Diyos, sama sa atong makita sa paagi sa iyang pagpakiglabot sa Israel. Ang Diyos sa hustisya wala magpalingkawas kanila gikan sa silot tungod sa balikbalik nga pagpakasala, apan mipakita siyag igong kaluoy ug pagpasaylo. “Iyang gipahibalo ang iyang mga dalan ngadto kang Moises, ang iyang mga pakiglabot ngadto sa mga anak ni Israel. Si Jehova maluloy-on ug mapuanguron, mahinay sa pagkasuko ug madagayaon sa mahigugmaong-kalulot. Dili siya sa tanang panahon mangitag sayop, ni magatipig siya sa iyang kasuko sa walay kataposan.” (Salmo 103:7-9; 106:43-46) Oo, ang paghanduraw sa iyang mga pakiglabot sa daghang kasiglohan nagapamatuod nga tinuod kadtong mga pulonga.—Salmo 86:15; 145:8, 9; Miqueas 7:18, 19.
14. Sa unsang paagi gipakita ni Jesus nga gisundog niya ang pagkamaluloy-on sa Diyos?
14 Sanglit si Jesu-Kristo mao man ang “larawan sa himaya sa [Diyos] ug ang tukma nga hulad sa iyang kinaiya,” kita makadahom kaniya nga mopasundayag sa samang kaluoy ug pagkaandam mopasaylo. (Hebreohanon 1:3) Mipasundayag siya sa ingon, sama sa makita diha sa iyang mga gihimo ngadto sa uban. (Mateo 20:30-34) Iya usab gipasiugda ang kaluoy diha sa iyang pulong nga atong mabasa diha sa Lucas kapitulo 15. Ang tulo ka ilustrasyon dinha nagpamatuod nga gisundog ni Jesus si Jehova, ug kini nagataganag hinungdanong pagtulon-an alang kanato.
Kabalaka Alang Niadtong Nawala
15, 16. Unsay nakaaghat kang Jesus sa paghatag ug mga ilustrasyon diha sa Lucas 15?
15 Ang maong mga ilustrasyon nagpamatuod sa maluloy-ong kaikag sa Diyos alang sa mga makasasala, nga nagahulagway ug usa ka maangayon nga larawan aron atong sundon. Palandonga ang esena sa mga ilustrasyon: “Ug karon ang tanang mga maniningil sa buhis ug ang mga makasasala miduol kang [Jesus] sa pagpatalinghog kaniya. Ug ang mga Pariseo ug mga eskriba nagbagutbot, nga nag-ingon: “Kining tawhana nagaabiabi sa mga makasasala ug nakigsalo kanila sa pagpangaon.’”—Lucas 15:1, 2.
16 Ang tanang nalangkit dinhi maoy mga Hudiyo. Gipasigarbo sa mga Pariseo ug sa mga eskriba ang ilang makutikutihon nga pagsunod sa Moisesnong Kasugoan, nga usa ka matang sa istriktong pagsunod sa balaod sa pagkamatarong. Apan, ang Diyos, hinunoa, wala mouyon sa maong kinaugalingon nga pagkamatarong. (Lucas 16:15) Tin-aw, ang gihisgotang mga maniningil sa buhis maoy mga Hudiyo nga naningil ug buhis alang sa Roma. Sanglit daghan man ang nagapaningil ug hingaping buhis sa ilang isigka-Hudiyo, ang mga maniningil sa buhis tinamay ingon nga grupo. (Lucas 19:2, 8) Sila giklasipikar uban sa “mga makasasala,” nga nag-apil sa mga tawong daotan ug buhat, bisan sa mga babayeng bigaon. (Lucas 5:27-32; Mateo 21:32) Apan gipangutana ni Jesus ang nagbagutbot nga relihiyosong mga pangulo:
17. Unsa ang unang ilustrasyon ni Jesus diha sa Lucas 15?
17 “Kinsa bang tawhana kaninyo nga may usa ka gatos ka karnero, nga kon kawad-an siyag usa ka buok niini, dili mobiya sa kasiyaman ug siyam diha sa kaawaawan ug moadto sa pagpangita niadtong usa nga nawala hangtod nga hikaplagan niya kini? Ug sa iya na kining makaplagan pas-anon niya kini diha sa iyang mga abaga ug magakalipay. Ug sa mahiuli na siya, iyang tigomon ang iyang mga higala ug mga silingan ug ingnon sila, ‘Pangalipay kamo uban kanako, kay hingkaplagan ko ang akong karnero nga nawala.’ Sultihan ko kamo, nga sa ingon usab niana may labi pang kalipay unya didto sa langit tungod sa usa ka makasasala nga magahinulsol kay sa tungod sa kasiyaman ug siyam ka tawong matarong nga wala magkinahanglan sa paghinulsol.” Masabtan sa relihiyosong mga pangulo ang paglarawan, kay ang mga karnero ug mga magbalantay komun man nga talan-awon. Tungod sa kabalaka, gibiyaan sa magbalantay ang 99 ka buok karnero sa pagsibsib diha sa naandang sibsibanan samtang iyang gipangita ang nahisalaag. Nagpadayon hangtod iyang nakaplagan kini, iyang malulutong gidala ang nahadlok nga karnero balik sa panon.—Lucas 15:4-7.
18. Sumala sa gipasiugda diha sa ikaduhang ilustrasyon ni Jesus sa Lucas 15, unsay hinungdan sa pagkalipay?
18 Gidugang ni Jesus ang ikaduhang ilustrasyon: “O kinsa bang babayhana nga may napulo ka buok drakma, nga kon kawad-an siyag usa ka buok niini, dili modagkot ug suga ug dili silhigan niya ang balay ug dili niya kini pangitaon pag-ayo hangtod iyang makaplagan? Ug sa makaplagan na niya kini, iyang tigomon ang iyang mga higala ug mga silingan ug magaingon, ‘Pangalipay kamo uban kanako, kay hingkaplagan ko ang salapi nga nawala.’ Busa, sultihan ko kamo, nga sa ingon usab niana may kalipay unya sa atubangan sa mga manulonda sa Diyos tungod sa usa ka makasasala nga magahinulsol.” (Lucas 15:8-10) Ang kantidad sa drakma maoy duolan sa usa ka adlaw nga suhol sa mamumuo. Basin ug kabilin kadtong usa ka salapi sa babaye o kaha bahin sa usa ka parisan nga gihimong alahas. Sa dihang nawala, masingkamoton niyang gipangita ang salapi, ug sa ulahi siya ug ang iyang mga higalang babaye nagmalipayon. Unsay gipadayag niini kanato mahitungod sa Diyos?
Nagakalipay ang Langit—Tungod sa Unsa?
19, 20. Kinsa ang pangunang gihisgotan sa unang duha ka ilustrasyon ni Jesus diha sa Lucas 15, ug unsa ang pangunang punto ang ilang gihimo?
19 Kining duha ka ilustrasyon maoy tubag sa pagsaway kang Jesus, si kinsa sa sayosayo nga mga bulan nagpaila sa iyang kaugalingon ingong “ang maayong magbalantay” nga magahatag sa iyang kalag alang sa iyang mga karnero. (Juan 10:11-15) Bisan pa niana, ang mga ilustrasyon sa panguna wala maghisgot mahitungod kang Jesus. Ang pagtulon-an nga angay makat-onan sa mga eskriba ug mga Pariseo nasentro sa tinamdan ug mga paagi sa Diyos. Busa, miingon si Jesus nga adunay kalipay sa langit tungod sa makasasala nga maghinulsol. Ang maong mga relihiyonista nag-angkong nag-alagad kang Jehova, apan wala sila magsundog kaniya. Ang maluloy-ong mga paagi ni Jesus, sa laing bahin, nagahawas sa kabubot-on sa iyang Amahan.—Lucas 18:10-14; Juan 8:28, 29; 12:47-50; 14:7-11.
20 Kon ang usa sa usa ka gatos nahimong hinungdan sa kalipay, labaw na ang usa ka salapi nga gikan sa napulo. Bisan karon, atong mahanduraw ang gibati sa mga babaye sa dihang nakaplagan ang salapi! Dinhi, usab, ang pagtulon-an nahasentro sa langit, sa pagkaagi nga ang “mga manulonda sa Diyos” nagakalipay uban kang Jehova “tungod sa usa ka makasasala nga magahinulsol.” Matikdi kanang kataposang pulong, “magahinulsol.” Kining mga ilustrasyona maoy mahitungod gayod sa mga makasasala nga magahinulsol. Ug imong makita nga ang duha ka ilustrasyon nagpasiugda nga haom nga maglipay tungod sa ilang paghinulsol.
21. Unsang pagtulon-an ang angay natong makat-onan gikan sa mga ilustrasyon ni Jesus diha sa Lucas 15?
21 Ang wala-matudloi sa husto nga relihiyosong mga pangulo nga mapagawalon sa ilang taphaw nga pagsunod sa Kasugoan wala makakita sa Diyos ingong “maluloy-on, mapuangoron. . . . nga nagapasaylo sa pagkadaotan ug sa kalapasan ug sa sala.” (Exodo 34:6, 7) Kon ilang pa untang gisundog kining bahina sa paagi ug personalidad sa Diyos, ila untang pabilhan ang kaluoy ni Jesus sa naghinulsol nga mga makasasala. Komosta man kita? Gisilsil ba nato kining pagtulon-ana diha sa atong kasingkasing ug nagapadapat niini? Buweno, matikdi ang ikatulong ilustrasyon ni Jesus.
Paghinulsol ug Nagalihok nga Kaluoy
22. Sa mubo, unsa ang gihatag ni Jesus ingong ikatulong ilustrasyon sa Lucas 15?
22 Kini kasagarang gitawag nga ang ilustrasyon sa usikang anak. Apan, kon basahon hayan imong makita nganong gihunahuna kini sa uban ingong ilustrasyon sa gugma sa amahan. Nag-asoy kini bahin sa manghod nga anak lalaki sa usa ka pamilya, nga nakabahin sa iyang panulondon gikan sa iyang amahan. (Itandi ang Deuteronomio 21:17.) Milakaw kining maong anak sa usa ka halayong dapit, diin didto iyang giusik-usikan ang tanan sa mapatuyangong kinabuhi, unya sa pagkahurot sa iyang katigayonan napugos siya pagtrabaho ingong tiglawog sa baboy, ug tungod sa kawalad-on iyang gipangandoy bisan ang pagkaon sa baboy. Sa kataposan naulian siya sa iyang maayong panimuot ug mihukom nga mopauli, bisan na lang mahimong sinuholang mamumuo sa iyang amahan. Sa nahiduol na siya sa balay, mihimog positibong tikang ang iyang amahan sa pagdawat kaniya, ug nagpakombira pa gani. Ang magulang nga lalaki, nga nagpabilin sa iyang balay nga nagatrabaho, nasuko sa gipakita nga kaluoy. Apan miingon ang amahan nga angay silang maglipay sanglit ang iyang anak nga namatay karon nabuhi.—Lucas 15:11-32.
23. Unsa ang atong makat-onan gikan sa ilustrasyon sa usikang anak?
23 Ang pipila sa mga eskriba ug mga Pariseo tingali mibati nga sila gitandi sa magulang nga anak, nga lahi gikan sa mga makasasala nga sama sa manghod. Apan sila ba nakasabot sa yawing punto sa ilustrasyon, ug nakasabot ba usab kita? Kadto nagpasiugda sa talagsaong hiyas sa atong maluloy-ong Amahan sa langit nga mao ang pagkaandam mopasaylo pinasukad sa kinasingkasing nga paghinulsol ug pagbag-o sa usa ka makasasala. Angay mapalihok unta niini ang mga mamiminaw uban sa kalipay sa pagtubos sa mahinulsolong mga makasasala. Mao kanay paglantaw sa Diyos sa mga butang ug sa paagi sa iyang paglihok, ug mao usab kanay buhaton niadtong nagasundog kaniya.—Isaias 1:16, 17; 55:6-7.
24, 25. Unsang mga paagi sa Diyos ang angay natong sundogon?
24 Tin-aw nga ang hustisya nag-timaan sa tanang paagi sa Diyos, busa pakahamilion ug tinguhaon niadtong buot mosundog kang Jehova ang hustisya. Labot pa, ang atong Diyos dili matukmod sa usa ka hustisya nga lisod sabton o kaha mapioton. Dako gayod ang iyang kaluoy ug gugma. Iyang gipakita kini pinaagi sa iyang pagkaandam mopasaylo pinasukad sa tinuod nga paghinulsol. Nan, pagkahaom nga gilangkit ni Pablo ang atong pagkamapinasayloon sa atong pagsundog sa Diyos: “Dagayang magpinasayloay kamo ang usa sa usa maingon nga kamo dagayang gipasaylo sa Diyos pinaagi kang Kristo. Busa, sundoga ninyo ang Diyos, ingong mga anak nga pinalangga, ug padayon sa paglakaw diha sa gugma.”—Efeso 4:32–5:2.
25 Ang matuod nga Kristohanon dugay nang misulay ug sundog sa hustisya, kaluoy, ug pagkaandam mopasaylo ni Jehova. Kon labi pa natong siyang mailhan, labi pang masayon usab kanato ang pagsundog kaniya niining bahina. Apan, unsaon nato kini pagpadapat diha sa usa ka tawo nga subay sa hustisya nakadawat ug bug-at nga disiplina tungod sa pagsunod sa dalan sa sala? Atong tan-awon.
[Footnote]
a “Ang ekskomunikasyon diha sa iyang labing masangkarong diwa mao ang tinuyong lihok diin ihikaw sa usa ka pundok ang mga pribilehiyo sa pagkahimong membro alang sa maayog baroganan kaniadto. . . . Ang ekskomunikasyon miabot sa Kristohanong panahon nga nagtumong sa usa ka lihok sa pagsalikway diin hikawan sa relihiyosong komunidad ang mga maglalapas sa mga sakramento, pagsimba sa kongregasyon, ug mahimong apil ang bisan unsang matang sa sosyal nga pakig-ubanay.”—The International Standard Bible Encyclopedia.
Unsay Imong Nakat-onan?
◻ Sa unsang paagi napadayag ang hustisya sa Diyos diha sa kongregasyon sa Israel ug sa Kristohanong kongregasyon?
◻ Nganong kinahanglang sundogon nato ang kaluoy sa Diyos, ug ang iyang hustisya?
◻ Unsay nakaagda sa tulo ka ilustrasyon sa Lucas kapitulo 15, ug unsang mga pagtulon-an ang gitudlo niini kanato?
[Hulagway sa panid 16, 17]
Ang patag sa er-Raha atubangan sa Bukid sa Sinai (likoran sa wala)
[Credit Line]
Pictorial Archive (Near Eastern History) Est.
[Picture Credit Line sa panid 15]
Garo Nalbandian
[Picture Credit Line sa panid 18]
Garo Nalbandian