Mga Panan-awong Kulbahinam nga Magapalig-on sa Pagtuo
Mga Dagkong Punto sa Pinadayag
ANG alagad ni Jehova nga si Juan didto sa gamay nga isla sa Patmos, atbang sa kasadpang baybayon sa Asia Minor. Didto kining edaran nga apostol nakakitag kahibulongang mga butang—simbolikanhon, subsob makapahingangha, ug makahuloganon gayod! Siya nahiabot sa adlaw sa Ginoo, nga nagsugod sa pagkaentrono ni Jesus niadtong 1914 hangtod sa pagkatapos sa Iyang Milenyong Pagmando. Bisan pag si Juan nakakita sa mga butang nga mahitabo panahon sa labing mangitngit nga yugto sa katawhan, pagkamasilakon sa iyang pasiunang paglantaw sa Usa ka Libo ka Tuig nga Pagmando ni Kristo! Pagkadagkong mga panalangin ang matagamtam unya sa matinumanong katawhan!
Si Juan mirekord niining mga panan-awon diha sa basahon sa Bibliya nga Pinadayag. Kini, nga gisulat sa mga 96 K.P., makapalig-on sa atong pagtuo sa Diyos sa propesiya, si Jehova, ug sa iyang Anak, si Jesu-Kristo.—Alang sa mga detalye, tan-awa ang basahong Pinadayag—Hingpit nga Sangkoanan Niini Haduol Na!, nga gipatik sa Watchtower Bible and Tract Society of New York, Inc.
Si Kristo Naghatag ug Mahigugmaong Tambag
Sayo sa pinadayag sa Diyos pinaagi kang Kristo mitungha ang mga sulat alang sa pito ka kongregasyon sa mga isigkamanununod ni Jesus sa Gingharian. (1:1–3:22) Sa kinatibuk-an, ang mga sulat naghatag ug mga pagdayeg, nagpaila sa mga suliran, nagtaganag mga pagtul-id ug/o mga pagdasig, ug naghisgot sa mga panalangin nga mosangpot sa matinumanong pagkamasinugtanon. Bisan pag milahutay ang mga taga-Efeso, ilang gibiyaan ang gugma nga ilang gihuptan sa sinugdan. Ang bahandianon-sa-espirituwal nga kongregasyon sa Smirna gidasig nga magpabiling matinumanon taliwala sa kasakitan. Ang paglutos wala makadaog sa kongregasyon sa Pergamo, apan kini nagtugot ug pagkabahinbahin. Bisan sa nagauswag nga kalihokan sa mga Kristohanon sa Tiatira, ang Jesebelnon nga impluwensiya naglungtad didto. Ang kongregasyon sa Sardis kinahanglang mahigmata sa espirituwal, ang didto sa Piladelpia giawhag sa pagkupot sa iya nang nabatonan, ug ang dagaang nga mga taga-Laodicea nagkinahanglag espirituwal nga pagtambal.
Pagkamaayong mga pulong alang sa pagbansay sa umaabot nga mga langitnong hari—ngani, sa tanang Kristohanon! Pananglitan, aduna bay dagaang kanato? Nan lihok! Mahimong sama sa makapahayahay nga baso sa bugnaw nga tubig sa igang nga adlaw apan sugdi usab pagpasundayag ang init nga kadasig alang kang Jehova ug sa iyang pag-alagad.—Itandi ang Mateo 11:28, 29; Juan 2:17.
Ang Kordero Nagbukhad sa Usa ka Linukot nga Basahon
Dayon si Jehova nakita diha sa iyang mahimayaong trono. (4:1–5:14) Siya gilibotan sa 24 ka ansiano ug upat ka buhing linalang. Ang usa ka linukot nga basahon nga gitimrihan ug pito ka timri diha sa iyang kamot. Kinsa ang makabukhad sa maong linukot nga basahon? Tinuod, ang Kordero, si Jesu-Kristo, mao ang takos mohimo niana!
Ang makapaukyab nga mga hitabo napadayag samtang gibukhad sa Kordero ang unom ka timri. (6:1–7:17) Sa pagbukhad sa unang timri, si Kristo makita nga nagsakay ug puting kabayo, nga nagdawat ug korona (1914), ug miasdang aron sa pagpangdaog. Sa dihang ang dugang tulo ka timri gibukhad, ang mga mangangabayo nagdalag gubat, gutom, ug kamatay sa katawhan. Sa pagbukhad sa ikalima nga timri, kadtong gipamatay tungod kang Kristo mitiyabaw alang sa panimalos sa ilang dugo, ug ang matag usa gihatagan ug “usa ka puti nga biste,” nga nagkahulogan sa usa ka matarong nga baroganang may kalabotan sa ilang pagkabanhaw ingong imortal espiritung mga linalang uban ang harianong mga pribilehiyo. (Itandi ang Pinadayag 3:5; 4:4.) Sa dihang gibukhad ang ikaunom nga timri, ang adlaw sa kasuko sa Diyos ug sa Kordero gibandilyo pinaagig usa ka linog. Apan ang “upat ka hangin sa yuta,” nga nagsimbolo sa malaglagong paghukom, gipugngan hangtod ang 144,000 nga mga ulipon sa Diyos matimrihan. Sa dihang sila gidihogan sa espiritu sa Diyos ug gisagop ingong iyang espirituwal nga mga anak, sila nagdawat ug paunang timaan—usa ka timri o panumpa—sa ilang langitnong panulondon. Human lamang sa pagsulay nga ang ilang timri mahimong permanente. (Roma 8:15-17; 2 Corinto 1:21, 22) Ug unsa gayod ka dako ang katingala ni Juan sa pagkakita sa “usa ka dakong panon” gikan sa tanang kanasoran—usa ka dakong pundok uban ang paglaom sa walay-kataposang kinabuhi sa usa ka yutan-ong paraiso! Sila migula gikan sa “dakong kasakitan,” usa ka yugto sa walay samang kasakit alang sa katawhan.
Pagkamakakurat ang mga butang nga nagakahitabo sa dihang gibukhad ang ikapitong timri! (8:1–11:14) Ang tunga sa takna nga kahilom, nga nagtugot sa mga pag-ampo sa mga balaan nga madungog, gisundan sa paglabay ug kalayo sa yuta gikan sa halaran. Unya pito ka anghel ang nangandam paghuyop sa mga trompeta sa pagbandilyo sa mga hampak sa Diyos sa Kakristiyanohan. Ang mga trompeta gipalanog latas sa panahon sa kataposan hangtod sa dakong kasakitan. Upat ka trompeta ang nagmantala sa mga hampak sa yuta, dagat, mga tinubdan sa tab-ang nga tubig, ug sa adlaw, bulan, ug mga bituon. Ang paghuyop sa ikalima nagpagula sa mga dulon nga naghulagway sa paghugpa sa dinihogang mga Kristohanon aron sa pagpakiggubat gikan sa 1919 padayon. Sa pagbudyong sa ikaunom nga trompeta, ang pag-atake sa mga mangangabayo nahitabo. Ingong katumanan, ang mga dinihogan, gidugangan ug kusog sukad sa 1935 sa “dakong panon,” nga nagamantala sa nagasakit nga mga mensahe sa paghukom batok sa mga relihiyosong lider sa Kakristiyanohan.
Unya gikaon ni Juan ang usa ka gamay nga linukot, nga nagkahulogan nga ang dinihogan midawat sa ilang buluhaton ug nagkuhag sustansiya gikan sa bahin sa Pulong sa Diyos nga nasudlan sa mga pahayag sa iya-sa-Diyos nga mga paghukom batok sa Kakristiyanohan. Ang apostol gisugo nga sukdon ang sangtuwaryo sa templo, nga nagpasabot sa tinong katumanan sa mga katuyoan ni Jehova labot sa mga kahikayan sa templo ug nga ang Diyosnong mga sukdanan kab-oton niadtong mga dunay labot niini. Unya ang “duha ka saksi” nga dinihogan sa Diyos nanagpanagna nga nagsul-ob ug bisteng sako, gipamatay, apan gipangbanhaw. Kini nagapunting sa 1918-19, sa dihang ang ilang buluhatong pagsangyaw hapit nga gipatay sa mga kaaway, apan ang mga alagad ni Jehova milagrosong naaktibo pag-usab alang sa ilang ministeryo.
Ang Gingharian Natawo!
Ang pagpalanog sa ikapitong trompeta nagamantala sa pagkahimugso sa Gingharian. (11:15–12:17) Sa langit ang simbolikong babaye (ang langitnong organisasyon ni Jehova nga Diyos) nanganak ug usa ka lalaki (ang Gingharian sa Diyos nga si Kristo mao ang Hari), apan ang dragon (Satanas) napakyas sa iyang paningkamot nga tukbon kini. Ingong sangkoanan sa gubat sa langit human mahimugso ang Gingharian sa 1914, ang madaogong Miguel (Jesu-Kristo) nagtambog sa dragon ug sa iyang mga anghel nganhi sa yuta. Dinhi ang dragon nagapadayon sa pagpakiggubat batok sa dinihogang nahibilin sa binhi sa langitnong babaye.
Unya nakita ni Juan ang usa ka mapintas nga mananap nga gihimoan ug usa ka dulumtanan nga larawan. (13:1-18) Kining pitog-ulo, napulog-sungay politikanhong mapintas nga mananap migimaw gikan sa “dagat,” ang gubot nga mga masa sa katawhan nga gikan niana mitungha ang tawhanong pagmando. (Itandi ang Daniel 7:2-8; 8:3-8, 20-25.) Unsa ang tinubdan sa awtoridad niining simbolikong linalang? Ay, walay lain kondili si Satanas, ang dragon! Ug handurawa lang! Alang niining politikanhong higante ang usa ka duhay-sungay nga mananap (ang Anglo-Amerikanhong Gahom sa Kalibotan) nakit-an nga nagagama ug usa ka “larawan,” nga karon nailhan nga Hiniusang Kanasoran. Daghan ang gipugos nga mosimba sa mapintas nga mananap ug modawat sa iyang “marka” pinaagi sa pagbuhat sa mga butang sumala sa iyang paagi ug sa pagtugot niini nga magagahom sa ilang kinabuhi. Apan ang mga Saksi ni Jehova kusganong nagadumili sa demonyohanong marka sa mapintas nga mananap!
Ang mga Alagad ni Jehova Minglihok!
Ang nagkalainlaing mga alagad sa Diyos nakita nga aktibo sa dihang gibubo ang pito ka panaksan sa iyang kasuko. (14:1–16:21) Paminaw! Ibabaw sa langitnong Bukid Sion, nadungog ni Juan ang 144,000 nga nagaawit ug samag usa ka bag-ong awit. Usa ka anghel nga nagalupad sa tungang kalangitan adunay walay-kataposang maayong balita nga ipahayag sa mga molupyo sa yuta. Unsay gipakita niini? Nga ang mga Saksi ni Jehova adunay tabang sa mga anghel sa pagmantala sa mensahe sa Gingharian.
Lagmit gayod nga nahingangha si Juan sa pagkakita sa parras sa yuta nga giani ug tibuok nga mga nasod nangadugmok sa paggiok sa pug-anan sa bino sa kapungot sa Diyos. (Itandi ang Isaias 63:3-6; Joel 3:12-14.) Sa sugo ni Jehova, dayon gibubo sa pito ka anghel ang pito ka panaksan sa diyosnong kasuko. Ang yuta, ang dagat, ang mga tinubdan sa tab-ang nga tubig, ug usab ang adlaw, ang trono sa mapintas nga mananap, ug ang Suba Euprates, naapektohan sa pagbubo sa unang unom ka panaksan. Handurawa ang kaukyab ni Juan sa dihang iyang namatikdan nga ang demonyohanong propaganda nagatipon sa tawhanong mga hari ngadto sa gubat sa Diyos sa Har–Magedon. Ug ang mga sangpotanan maoy malaglagon sa dihang gibubo ang ikapitong panaksan sa hangin.
Duha ka Simbolikong Babaye
Tino, si Juan naukyaban sa pagkasaksi sa kataposan sa Bantogang Babilonya, ang tibuok-kalibotang imperyo sa bakak nga relihiyon, ug sa pagtan-aw sa sadya nga mga panghitabo human sa iyang kalaglagan. (17:1–19:10) Nga nahubog sa dugo sa mga balaan, nakita siya nga nagsakay sa mapulang mapintas nga mananap nga may pito ka ulo ug napulo ka sungay (ang Liga sa Kanasoran ug ang iyang manununod, ang Hiniusang Kanasoran). Ay, apan pagkadakong kagun-oban ang iyang nahiagoman sa dihang ang mga sungay mibalitok kaniya!
Ang langitnong mga tingog nadungog nga nagdayeg kang Jah tungod sa kalaglagan sa Bantogang Babilonya. Ug pagkagahob sa pagdayeg nga nagsibya sa kasal sa Kordero ug sa iyang pangasaw-onon, ang binanhawng mga dinihogan!
Si Kristo Nagmadaogon ug Nagamando
Dayon nakita ni Juan ang Hari sa mga hari nga nagapanguna sa langitnong kasundalohan sa paglaglag sa sistema sa mga butang ni Satanas. (19:11-21) Oo, si Jesus, “Ang Pulong sa Diyos,” nakiggubat batok sa mga nasod. Nakita sa apostol ang mapintas nga mananap (ang politikanhong organisasyon ni Satanas) ug ang bakak nga propeta (ang Anglo-Amerikanhong Gahom sa Kalibotan) nga gitambog sa “linaw nga kalayo,” nga nagsimbolo sa hingpit, walay-kataposang pagkalaglag.
Unsay sunod? Aw, nakita ni Juan ang pagtambog kang Satanas ngadto sa bung-aw. Dunay misunod nga pasiunang hulagway sa Usa ka Libo ka Tuig nga pagmando ni Kristo, nga sulod niana si Jesus ug ang binanhaw niyang mga isigkamagmamando magahukom sa katawhan, nga magabayaw sa mga masinundanon ngadto sa tawhanong kahingpitan! (20:1-10) Panahon na karon alang sa pangataposang pagsulay. Kay gibuhian gikan sa bung-aw, si Satanas magapahisalaag sa nahingpit nga katawhan, apan ang kalaglagan maoy motapos sa karera sa tanang demonyo ug tawhanong mga rebelde batok sa Diyos.
Sa pagbalik sa nangagi, sa walay duhaduha dakong kahingangha ang gibati ni Juan sa pagkakita sa tanan nga nangamatay, tua sa Hades (ang komung lubnganan sa katawhan), ug tua sa dagat nga nabanhaw ug gihukman atubangan sa Diyos, nga naglingkod sa halangdon puti nga trono! (20:11-15) Ug kadakong kahupayan ang matagamtam sa mga matul-id sa dihang ang kamatayon ug Hades isalibay sa linaw nga kalayo, nga dili na gayod manakmit ug mga biktima!
Sa kataposan sa panan-awon ni Juan, iyang nakita ang Bag-ong Jerusalem. (21:1–22:21) Kanang kagamhananong siyudad nanaog gikan sa langit ug naglamdag sa mga nasod. Nagdagayday latas sa Bag-ong Jerusalem mao ang “usa ka suba sa tubig sa kinabuhi,” nga naghulagway sa Kasulatanhong kamatuoran ug uban pang hinatag-Diyos nga mga tagana nga gipasukad sa halad ni Jesus aron mapasig-uli ang masinundanong katawhan gikan sa sala ug kamatayon ug mahatagag kinabuhing dayon. (Juan 1:29; 17:3; 1 Juan 2:1, 2) Sa matag tampi sa maong suba, nakita ni Juan ang mga kahoy nga may mga dahon nga makapaayo, nga naghulagway sa bahin sa tagana ni Jehova sa paghatag ug kinabuhing dayon sa masinundanong katawhan. Ang paniklop nga mga mensahe gikan sa Diyos ug ni Kristo gisundan ug usa ka imbitasyon. Pagkatalagsaon nga makadungog sa espiritu ug sa pangasaw-onon nga nagadapit sa matag usa nga giuhaw nga ‘umari, inom sa tubig sa kinabuhi nga walay bayad’! Ug samtang atong basahon ang mga paniklop nga pulong sa Pinadayag, sa walay duhaduha kita moduyog sa kasibot sa pahayag ni Juan: “Amen! Umanhi ka na, Ginoong Jesus.”
[Kahon/Hulagway sa panid 21]
Pabiling Nagmata: Taliwala sa mga pulong sa propesiya mahitungod sa gubat sa Diyos sa Har–Magedon (Armageddon), gikaingon: “Tan-awa! moanhi ako [Jesu-Kristo] ingon sa kawatan! Malipayon ang magatukaw ug magahupot sa iyang panggawas nga biste, aron dili siya magalakaw nga hubo ug motan-aw ang mga tawo sa iyang pagkamakauulaw.” (Pinadayag 16:15) Kini mahimong pasabot sa mga katungdanan sa magtatan-aw, o opisyal, sa bungtod sa templo sa Jerusalem. Panahon sa pagbantay, siya mosuroy sa templo aron sutaon kon nagamata o natulog ang mga Levihanong magbalantay diha sa ilang puwesto. Ang magbalantay nga makaplagang natulog bunalan pinaagi sa usa ka bunal nga lipak, ug mahimong sunogon ang iyang panggawas nga biste ingong makauulaw nga silot. Kay duol na kaayo karon ang Armageddon, ang dinihogang nanghibilin sa “harianong mga saserdote,” o “espirituwal nga balay,” desidido nga magpabiling nagmata sa espirituwal. Mao man usab ang ilang mga kaubanan, ang “dakong panon,” nga may yutan-ong paglaom, kay nagahatag usab silag balaang pag-alagad sa Diyos diha sa templo. (1 Pedro 2:5, 9; Pinadayag 7:9-17) Ilabinang angayng magpabiling nagtukaw ang mga magtatan-aw batok sa pagkaugmad sa daotang mga kahimtang sa kongregasyon. Tungod kay sila nagtukaw, ang tanang matinumanong magsisimba diha sa espirituwal nga templo sa Diyos pabiling naghupot sa ilang “panggawas nga biste,” nga nagpaila sa ilang dungganong pag-alagad ingong mga Saksi ni Jehova.